Фәсил 3

Аллаһын Кәламындан мөһкәм јапышын

1. а) Гәдимдә исраиллиләр Аллаһын сөзләринин доғрулуғуна неҹә әмин олдулар? б) Бунун бизә һансы аидијјәти вар?

«БҮТҮН гәлбинизлә вә варлығынызла билирсиниз ки, Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди» (Јешуа 23:14-16). Јешуа бу сөзләри, исраиллиләр вәд едилмиш дијарда мәскунлашдыгдан сонра халгын ағсаггалларына демишди. Бәли, Јеһованын бүтүн вәдләри дәгигликлә јеринә јетмишди. Мүгәддәс Китабдакы бу вә диҝәр һадисәләр «үмидимиз олсун» дејә, бизим үчүн горунуб сахланылмышдыр (Ромалылара 15:4).

2. а) Мүгәддәс Китаб һансы мәнада ‘Аллаһдан илһам алмышдыр’? б) Мүгәддәс Китабын Аллаһдан илһам алдығыны билмәк үзәримизә һансы мәсулијјәти гојур?

² Мүгәддәс Китабын јазылмасында тәхминән 40 адам иштирак етмишдир. Буна бахмајараг, онун Мүәллифи Јеһова Аллаһдыр. Белә чыхыр ки, Аллаһ Мүгәддәс Китабда јазыланларын һамысына бирбаша рәһбәрлик етмишдир? Бәли. О буну Өз фәал гүввәси олан ҝүҹлү мүгәддәс руһу васитәсилә етмишдир. Һәвари Павел демишдир: ‘Һәр Мүгәддәс Јазы Аллаһдан илһам алмышдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин’. Дүнјанын һәр јериндә буна инанан инсанлар Мүгәддәс Китабда јазыланлара диггәт јетирир вә орадакы тәлимләрә мүвафиг јашајырлар (2 Тимотејә 3:16, 17; 1 Салониклиләрә 2:13).

Инсанлара Мүгәддәс Китабы анламаға вә дәјәрләндирмәјә көмәк един

3. Мүгәддәс Китабын Аллаһын Кәламы олдуғуна инанмајанларын бир чохуна неҹә көмәк едә биләрик?

³ Сөһбәт етдијимиз инсанларын әксәријјәти Мүгәддәс Китабын Аллаһын Кәламы олдуғуна инанмыр. Биз онлара неҹә көмәк едә биләрик? Чох вахт ән јахшысы Мүгәддәс Китабы ачыб, орада јазыланлары һәмсөһбәтимизә ҝөстәрмәкдир. «Аллаһын кәламы ҹанлы вә тәсирли, һәр ҹүр икиағызлы гылынҹдан итидир... үрәјин дүшүнҹә вә нијјәтләрини ајырд едир» (Ибраниләрә 4:12). «Аллаһын кәламы» өлү тарих дејил, о ҹанлыдыр! Мүгәддәс Китабда јазылмыш вәдләрин иҹрасы јахынлашыр вә буна һеч нә мане ола билмәз. Мүгәддәс Китабдакы хош хәбәр инсанын үрәјинә бизим сөзләримиздән гат-гат ҝүҹлү тәсир ҝөстәрә биләр.

4. Мүгәддәс Китабдан һансы һәгигәтләрин изаһы инсанларын бу китаба мүнасибәтини дәјишиб вә нә үчүн?

⁴ Бир чохлары Мүгәддәс Китабда Аллаһын адыны ҝөрәндән сонра бу китабы дәриндән арашдырмаг истәмишләр. Диҝәрләринә һәјатын вә баш верәнләрин мәнасыны, Аллаһын пислијә нә үчүн јол вердијини вә һәмчинин, јерүзү Ҹәннәтдә әбәди һәјата даир Мүгәддәс Китабда јазыланлары ҝөстәрдикдә, онлар Аллаһын Кәламыны өјрәнмәк гәрарына ҝәлмишләр. Бәзи әразиләрдә пис руһларын инсанлары нараһат етмәсинә сәбәб олан дини адәтләр ҝениш јајылыб. Белә јерләрдә јашајанлар Мүгәддәс Китабын бу һагда нә дедијини вә пис руһлардан азад олмағын јолуну ҝөстәрдијини биләндә Аллаһын Кәламына ҝүҹлү мараг ҝөстәрирләр. Бу ҹүр мөвзулар сәмими инсанлары нә үчүн ҹәлб едир? Чүнки белә ваҹиб мәсәләләрлә бағлы етибарлы мәлуматы јалныз Мүгәддәс Китаб верир (Мәзмур 119:130).

5. а) Инсанын Мүгәддәс Китаба инанмамасынын сәбәби нә ола биләр? б) Белә адамлара неҹә көмәк едә биләрик?

⁵ Бәс кимсә Мүгәддәс Китаба инанмадығыны дејирсә нә етмәлијик? Сөһбәтә сон гојмалыјыг? Әҝәр адам мәнтиглә дүшүнмәјә һазырдырса, сөһбәти давам етдирмәк олар. Ола биләр, инсан дүшүнүр ки, Мүгәддәс Китаб Христиан дүнјасынын китабыдыр. Тарих боју Христиан дүнјасынын ријакарлығы, сијасәтә гарышмасы вә даим пул јығмагла мәшғул олмасы ола билсин, инсанларда Мүгәддәс Китаба гаршы мәнфи рәј јарадыб. Бәлкә сөһбәт етдијин адам да мәһз бу сәбәбдән Мүгәддәс Китаб һаггында мәнфи фикирдәдир. Христиан дүнјасында ҝөрүлән ишләрин Мүгәддәс Китабда мүһакимә едилдијини вә һәгиги мәсиһчиликлә Христиан дүнјасы арасындакы фәрги она изаһ етсән, еһтимал ки, һәмин адамда мараг ојана биләр (Микеја 3:11, 12; Матта 15:7-9; Јагуб 4:4).

6. а) Мүгәддәс Китабын Аллаһын Кәламы олдуғуна сәни нә әмин едир? б) Инсанларын Мүгәддәс Китабын һәгигәтән Аллаһдан олдуғуну анлајыб дәјәрләндирмәләри үчүн даһа һансы дәлилләри ҝәтирмәк олар?

⁶ Бәзи адамлара Мүгәддәс Китабын Аллаһдан илһам алдығыны тәсдигләјән дәлилләр мүсбәт тәсир ҝөстәрә биләр. Бәс Мүгәддәс Китабын Јеһова Аллаһын Кәламы олдуғуна сәни нә әмин едир? Бәлкә бу китабын өз мәншәји һаггында вердији мәлумат? Јахуд Мүгәддәс Китабын мүәллифинин инсан олмадығына сәни әмин едән ҝәләҹәк һаггында тәфсилаты илә хәбәр верән чохсајлы пејғәмбәрликләрдир? (2 Петер 1:20, 21). Јохса 40 адам тәрәфиндән 1 600 ил әрзиндә јазылмасына бахмајараг, һејрәт доғуран дахили ујғунлуғу? Бәлкә о дөврүн китабларындан фәргли олараг, елмлә узлашмасы? Јахуд ону јазанларын дүрүстлүјү? Ја да ки, ону мәһв етмәк истәјәнләрин ҹәһдләринә бахмајараг, горунуб сахланылмасы? Сәни инандыран дәлилләр башгалары үчүн дә инандырыҹы ола биләрa.

Мүгәддәс Китабы охумаг ваҹибдир

7, 8. а) Мүгәддәс Китаб бизә нә үчүн верилиб? б) Мүгәддәс Китабы охумагдан савајы даһа нәјә еһтијаҹымыз вар? в) Сән Јеһованын нијјәтләрини неҹә дәрк етмисән?

⁷ Башгаларында Мүгәддәс Китаба гаршы етибар јаратмаг һәлә ишин јарысыдыр. Биз өзүмүз дә бу китабы мүнтәзәм охумалыјыг. Бунун үчүн хүсуси вахт ајырмаг лазымдыр. Сәнин белә вәрдишин вармы? Бәшәр тарихиндә дәрҹ едилмиш бүтүн китаблардан ән диггәтәлајиги Мүгәддәс Китабдыр. Әлбәттә ону јалныз евдә охумагла иш битмир. Мүгәддәс Јазылар башгаларындан тәҹрид олунмамағы мәсләһәт ҝөрүр. Биз дүшүнмәмәлијик ки, бүтүн суаллара өзүмүз ҹаваб тапа биләҹәјик. Таразлы мәсиһчи олмаг үчүн һәм шәхси өјрәнмә, һәм дә Аллаһын халгынын јығынҹаг ҝөрүшләриндә мүнтәзәм иштирак етмәк ваҹибдир (Сүлејманын мәсәлләри 18:1; Ибраниләрә 10:24, 25).

⁸ Мүгәддәс Јазылардан Јешаја пејғәмбәрин сөзләрини охујан һәбәшистанлы мәмурун нүмунәсинә нәзәр салаг. Мәләјин ҝөстәриши илә мүждәчи Филип бу адамдан сорушду: «Охудуғуну һеч анлајырсанмы?» Һәбәшистанлы тәвазөкарлыгла ҹаваб верди: «Мәнә јол ҝөстәрән олмаса неҹә анлаја биләрәм?» О, Филипдән хаһиш етди ки, Мүгәддәс Јазылардан охудуғу парчаны она изаһ етсин. Филип бу пејғәмбәрлији өз билдији кими шәрһ етмәди. О, Мүгәддәс Јазылары өзбашына охумурду. Филип Аллаһын ҝөрүнән тәшкилаты илә сых бағлы иди. Буна ҝөрә дә, о, Јеһованын Өз тәшкилаты васитәсилә вердији тәлим сајәсиндә өјрәндикләрини һәбәшистанлы мәмурла бөлүшәрәк она көмәк едә билди (Һәвариләрин ишләри 6:5, 6; 8:5, 26-35). Бу ҝүн дә һеч ким Јеһованын нијјәтләрини өзбашына дүзҝүн анлаја билмәз. Һәр биримиз Јеһованын Өз ҝөрүнән тәшкилатынын васитәсилә вердији севҝи долу көмәјә еһтијаҹ дујуруг.

9. Мүгәддәс Китабы охумаг үзрә һансы програм һамымыза фајда ҝәтирә биләр?

⁹ Јеһованын тәшкилаты Мүгәддәс Китабы баша дүшмәјимизә көмәк етмәк үчүн, онун әсасында мүхтәлиф нәшрләр дәрҹ едир. Үстәлик, бүтүн дүнјада Јеһованын Шаһидләринин јығынҹагларында кечирилән Теократик Хидмәт Мәктәбинин програмы үзрә Мүгәддәс Китабы мүнтәзәм охумаг графики дә мөвҹуддур. Мүгәддәс Јазыларын шәхси арашдырылмасындан бөјүк фајда әлдә етмәк олар (Мәзмур 1:1-3; 19:7, 8). Аллаһын Кәламыны мүнтәзәм охумаг үчүн вар ҝүҹүнлә чалыш. Охудуғуну там анламасан да, Мүгәддәс Китаб һаггындакы үмуми тәсәввүр сәнә фајда ҝәтирәҹәк. Мәсәлән, ҝүндә дөрд-беш сәһифә охумагла Мүгәддәс Китабы бир ил әрзиндә баша вура биләрсән.

10. а) Сиз Мүгәддәс Китабы нә вахт охујурсунуз? б) Мүгәддәс Китабы кимләрлә охуја биләрсиниз вә бу ишдә мүнтәзәмлик нә үчүн ваҹибдир?

¹⁰ Мүгәддәс Китабы нә вахт охумаг олар? Бунун үчүн ҝүн әрзиндә ҹәми 10-15 дәгигә ајырсан бөјүк фајда әлдә едәрсән. Белә имканын јохдурса, мүнтәзәм һәфтәлик оху графики тутуб она риајәт етмәјә чалыш. Евлиләр Мүгәддәс Китабы бир-биринә охуја биләрләр. Әҝәр аиләдә охумағы баҹаран ушаглар варса, гој онлар Мүгәддәс Китабы уҹадан нөвбә илә охусунлар. Мүгәддәс Китабы охумаг һәјатымызда гида гәбулу кими вәрдишә чеврилмәлидир. Һамыја мәлумдур ки, јахшы гидаланма вәрдиши олмајанда инсанын сәһһәти позулур. Буна бәнзәр тәрздә, бизим руһани сағламлығымыз вә нәтиҹәдә әбәди јашамаг имканымыз ‘Аллаһын ағзындан чыхан һәр бир сөзлә’ мүнтәзәм гидаланмагдан асылыдыр (Матта 4:4).

Мүгәддәс Китабы охумагда мәгсәдимиз

11. Мүгәддәс Китабы һансы мәгсәдлә охумалыјыг?

¹¹ Мүгәддәс Китабы һансы мәгсәдлә охумалыјыг? Садәҹә бир-нечә сәһифә охумагла кифајәтләнмәк олмаз. Мәгсәдимиз Аллаһы даһа јахындан танымагдыр. Белә олдугда, Јеһоваја мәһәббәтимиз артаҹаг вә Она мәгбул тәрздә ибадәт едәҹәјик (Јәһја 5:39-42). Биз «ја Рәбб, јолларыны мәнә ҝөстәр, ардынҹа ҝетмәји мәнә өјрәт» дејән мәзмурчунун әһвал-руһијјәсини тәглид етмәлијик (Мәзмур 25:4).

12. а) Дәгиг билик нәјә ҝөрә ваҹибдир вә она наил олмаг үчүн нә етмәк лазымдыр? б) Мүгәддәс Китабы охујаркән һансы дөрд бәндин үзәриндә дүшүнмәк фајдалы оларды? (30-ҹу сәһифәдәки чәрчивәјә бах.) в) Абзасдакы суаллара бу бәндләрә әсасән ҹаваб вер. Ситат ҝәтирилмәјән ајәләри оху.

¹² Јеһовадан тәлим аларкән, биз ‘там дәрракәјә’, башга сөзлә дәгиг билијә јијәләнмәјә чалышмалыјыг. Чүнки дәгиг билик олмадан Аллаһын Кәламыны һәјатымызда там тәтбиг етмәк вә ја башгаларына дүзҝүн изаһ етмәк мүмкүн дејил (Колослулара 3:10; 2 Тимотејә 2:15). Дәгиг билијә јијәләнмәк үчүн Мүгәддәс Китабы диггәтлә охумаг лазымдыр. Чәтин һиссәләри баша дүшмәјәндә онлары тәкрарән охумаг олар. Охудуғумуз материалын үзәриндә һәртәрәфли вә дәриндән дүшүнмәк үчүн вахт ајырмағын да бизә фајдасы олаҹаг. Бу ишдә 30-ҹу сәһифәдә ҝөстәрилән дөрд ваҹиб бәнд јардымчы ола биләр. Мүгәддәс Китабы охујаркән бу бәндләрдән бири вә ја бир нечәси үзәриндә дүшүнмәк фајдалы олар. Нөвбәти сәһифәләрдәки суаллара ҹаваб верәркән буну тәҹрүбәдән кечирә биләрсиниз.

1) Чох вахт Мүгәддәс Јазыларда охудугларымыз Јеһованын шәхсијјәтинин мүәјјән ҹәһәтини ҝөстәрир. Мисал үчүн, Мәзмур 139:13, 14 ајәләриндә Аллаһын һәлә дүнјаја ҝәлмәмиш инсана бәсләдији гајғыдан сөз ачылыр: «Мәнә ана бәтниндән гурулуш вермисән. Сән мәни еҹазкар, әсрарәнҝиз јолла јаратмысан, она ҝөрә шүкүр едирәм. Нә гәдәр харигәли ишләр ҝөрмүсән! Буну үрәкдән јахшы дәрк едирәм». Јеһованын ишләри неҹә дә һејрәтамиздир! Инсан бәдәнинин гурулушу Аллаһын бөјүк мәһәббәтинин бариз нүмунәсидир.

Јәһја 14:9, 10 ајәләриндән ајдын олур ки, Мүгәддәс Китабда Исанын адамларла рәфтары һаггында охујаркән, әслиндә Јеһованын һәрәкәт тәрзини ҝөрмәк олар. Буну нәзәрә алараг, Лука 5:12, 13 вә 7:11-15 ајәләриндә тәсвир едилмиш һадисәләрдән Јеһова һаггында нә өјрәнирик?

2) Охудуғун һиссәнин Мүгәддәс Китабын әсас мөвзусу — вәд едилмиш Өвлад Иса Мәсиһин рәһбәрлик етдији Падшаһлыг васитәсилә Јеһованын һакимијјәтинә бәраәт газандырылмасы вә адынын мүгәддәс тутулмасы мөвзусу илә бағлылығы үзәриндә дүшүн.

«Језекел» вә «Даниел» китабларында Мүгәддәс Китабын әсас мөвзусу неҹә вурғуланыр? (Језекел 38:21-23; Даниел 2:44; 4:17; 7:9-14).

Исанын вәд едилмиш Өвлад олдуғуну Мүгәддәс Китаб неҹә ҝөстәрир? (Галатијалылара 3:16).

Падшаһлыг мөвзусу «Вәһј» китабында өз зирвәсинә неҹә чатыр? (Вәһј 11:15; 12:7-10; 17:16-18; 19:11-16; 20:1-3; 21:1-5).

3) Фикирләш: охудугларыны шәхсән өзүнә неҹә тәтбиг едә биләрсән? Мәсәлән, «Чыхыш»дан «Ганунун тәкрары»на кими исраиллиләрин әхлагсыз һәрәкәтләри вә үсјанкарлығы барәдә бәһс едилир. Биз билирик ки, онларын әһвал-руһијјәси вә һәрәкәтләри аҹы нәтиҹәләрә ҝәтириб чыхартды. Буна ҝөрә дә, һеч вахт исраиллиләр кими давранмамалы, әксинә, Јеһованы разы салмаға сәј ҝөстәрмәлијик. «Бүтүн бунлар ибрәт олараг онларын башына ҝәлирди; сон әсрләрә чатан бизләр үчүн дә мәсләһәт олараг гејд едилди» (1 Коринфлиләрә 10:11).

Габилин Һабили өлдүрмәсиндән бәһс едән һадисәдән һансы ибрәт дәрсини алырыг? (Јарадылыш 4:3-12; Ибраниләрә 11:4; 1 Јәһја 3:10-15; 4:20, 21).

Мүгәддәс Китабда ҝөјләр үмиди олан мәсиһчиләрә верилән мәсләһәтләр јердә әбәди јашамаға үмид едәнләрә дә аиддирми? (Сајлар 15:16; Јәһја 10:16).

Биз јеткин мәсиһчи кими танынсаг да, јахшы билдијимиз Мүгәддәс Китаб мәсләһәтләрини даһа неҹә тәтбиг етмәјин үзәриндә нә үчүн дүшүнмәлијик? (2 Коринфлиләрә 13:5; 1 Салониклиләрә 4:1).

4) Фикирләш: башгаларына көмәк етмәк үчүн охудугларындан неҹә истифадә едә биләрсән? Бүтүн инсанлары онларын сағламлығы нараһат едир. Буна ҝөрә дә Исанын јердә ҝөрдүјү ишләрдән онлара охуја биләрик. Мисал үчүн, Матта 15:30 ајәсиндә дејилир: «Онун јанына бөјүк бир издиһам ҝәлди вә араларында топаллар, корлар, дилсизләр, чолаглар вә даһа башга бир чохлары вар иди... вә Иса онлары сағалтды». Бу ҹүр ајәләри охумагла, онлара Исанын сәмави Падшаһлығын Падшаһы кими даһа бөјүк мигјасда ҝөрәҹәји ишләри ҝөстәрәҹәјик.

Јаирин гызынын дирилмәсиндән бәһс едән һадисә кимләрә тәсәлли верә биләр? (Лука 8:41, 42, 49-56).

13. Мүгәддәс Китабы Јеһованын тәшкилатынын тәгдим етдији програм әсасында мүнтәзәм охујуб өјрәнмәк һансы бәһрәләри ҝәтирир?

¹³ Мүгәддәс Китабы охујаркән јухарыдакы дөрд бәндин үзәриндә дүшүнмәк бизә бол хејир-дуа ҝәтирә биләр! Дүздүр, Мүгәддәс Китабы охумаг һеч дә асан иш дејил. Амма онун бизә өмүр боју фајдасы ола биләр, чүнки Мүгәддәс Јазылары охујаркән биз руһани ҹәһәтдән мөһкәмләнирик. Мүгәддәс Китабы мүнтәзәм охумаг бизи севән Атамыз Јеһова вә һәмиманлыларымызла даһа да јахынлашдыраҹаг вә бизә ‘һәјат кәламыны мөһкәм тутун’ чағырышына һај вермәјә көмәк едәҹәк (Филипилиләрә 2:15).

[Һашијә]

Тәкрар үчүн суаллар

• Мүгәддәс Китабын јазылмасынын вә ҝүнләримизә гәдәр горунмасынын сәбәби нәдир?

• Башгаларына Мүгәддәс Китабы баша дүшүб дәјәрләндирмәјә неҹә көмәк едә биләрик?

• Мүгәддәс Китабы мүнтәзәм охумаг нәјә ҝөрә фајдалыдыр? Охудугларымыз үзәриндә дүшүнәркән һансы дөрд бәнди нәзәрә алмаг јахшы оларды?

[30-ҹу сәһифәдәки чәрчивә]

МҮГӘДДӘС КИТАБЫ ОХУЈАРКӘН ДҮШҮН: БУ ҺИССӘ...

...Јеһованын шәхсијјәти һаггында нә өјрәдир?

...Мүгәддәс Китабын әсас мөвзусу илә неҹә бағлыдыр?

...һәјатына неҹә тәсир ҝөстәрә биләр?

...башгаларына неҹә көмәк едә биләр?