Өн сөз

«Һәјат бәләдчимиз олан ајәләр» нәшри үзләшдијиниз чәтинликләрин өһдәсиндән ҝәлмәјә көмәк едән әһвалатлары вә ајәләри тапмағынызы асанлашдыраҹаг. Һәмчинин бу нәшр сизә башгаларыны руһландырмаг вә онлара Јеһованы шәрәфләндирән гәрарлар вермәјә көмәк етмәк үчүн лазым олан ајәләри тапмагда бәләдчилик едәҹәк. Бунун үчүн сизә мараглы ҝәлән мөвзуну сечин. Һәр мөвзуда суаллар вә Мүгәддәс Китаб әһвалатларынын гыса иҹмалы јер алыб. (Бахын: «Нәшрин истифадә гајдасы» адлы чәрчивә.) Бу нәшр сајәсиндә сиз Мүгәддәс Китабдан еһтијаҹ дујдуғунуз мәсләһәт вә тәсәллини алаҹагсыныз. Үстәлик, башгалары илә дә бөлүшә биләҹәјиниз дәјәрли фикирләр тапаҹагсыныз. Бунун сајәсиндә онлара мүсбәт әһвал-руһијјәләрини горумаға, проблемләринин өһдәсиндән ҝәлмәјә, фајдалы мәсләһәтләр тапыб руһланмаға көмәк едәҹәксиниз.

Нәшрин истифадә гајдасы

Мөвзуну тапмаг үчүн «Ахтарыш» ханасындан истифадә едә вә ја категоријалара баха биләрсиниз. «Һәјат бәләдчимиз олан ајәләр» нәшриндәки мөвзулар једди категоријаја ајрылыб: «чәтинликләр», «давраныш», «јығынҹаг», «ҝүндәлик һәјат», «аилә», «руһанилик» вә «хүсусијјәтләр». Мөвзулар бу категоријаларын алтында јерләшир. Сизә лазым олан категоријаны сечин вә алтындакы мөвзуларын сијаһысына нәзәр салын. Әҝәр мөвзунун һансы категоријаја аид олдуғуну билмирсинизсә, онда «Үмуми» сијаһысына бахын. Һәр мөвзуда галын шрифтлә јазылмыш башлыглар ҝөрәҹәксиниз. Бәзиләри ҹүмлә, бәзиләри исә суал шәклиндәдир. Галын шрифтлә ситат ҝәтирилмиш ајәләри охудугҹа, онларын ҹүмлә вә ја суалын ҹавабы илә неҹә әлагәли олдуғуну дүшүнүн. Бәзи мөвзулар башлыглары раһат тапмаг үчүн бөлмәләрә ајрылыб. Үстәлик, «Һәмчинин бахын» ифадәсинин гаршысында мөвзуја ујғун әлавә ајәләр ҝәтирилир. Мөвзуларын чохунда «Мүгәддәс Китаб әһвалаты» башлығы јер алыб вә башлығын алтындакы ҹүмләләр ситат ҝәтирилән ајәләрдәки әсас фикирләри изаһ едир. Ајәләри охудугҹа ҝәтирилмиш ҹүмләнин үзәриндә дүшүнүн.

Бу нәшрдә ҝәтирилән мөвзулара аид ајәләрин һамысы јер алмыр. Нәшр садәҹә мөвзуја даир даһа мүнасиб ајәләри тапмаға көмәк едир, амма әлавә мәлумата еһтијаҹыныз олса, башга вәсаитләрдән истифадә едә биләрсиниз (Мс 2:1—6). Дәриндән арашдырма апармаг үчүн «Мүгәддәс Јазыларын Јени Дүнја Тәрҹүмәси»ндәки чарпаз истинадлардан вә «Јеһованын Шаһидләринин нәшрләри үзрә ахтарыш» вәсаитиндән истифадә един. Бу вәсаитләр сизә көмәк едәҹәк ки, нәшрләримиздән һәмин ајә илә бағлы ән јени изаһатлары тапа биләсиниз.

Гој «Һәјат бәләдчимиз олан ајәләр» нәшри сизә Мүгәддәс Китабдакы һикмәтә, билијә вә дәрракәјә јијәләнмәјә көмәк етсин. Бу нәшрдән истифадә етдикҹә «Аллаһын сөзү ҹанлы вә гүдрәтлидир» сөзләринин доғрулуғуна әмин олаҹагсыныз (Иб 4:12).