Долғунлуға наил оланлар вә мөһкәм әмин оланлар кими дурун
“О, һәр заман дуаларында сизин үчүн сә’ј ҝөстәрир ки, сиз нәтиҹәдә долғунлуға наил оланлар вә Аллаһын бүтүн ирадәсинә мөһкәм әмин оланлар кими дурасыныз” (КОЛОСЛУЛАРА 4:12, ЈД).
1, 2. а) Кәнар мүшаһидәчиләр илк мәсиһчиләрин һәрәкәтләриндә нәјә диггәт јетирирдиләр? б) Колослулара јазылан мәктубда башгаларынын рифаһы үчүн мәһәббәтлә диктә олунан мараг неҹә әкс олунур?
ИСАНЫН давамчыларыны, һәмиманлыларынын рифаһы һәмишә дәриндән марагландырыб. Тертуллиан (б. е. II-III әсриндә јашамыш јазычы) һәмин инсанларын јетимләрә, јохсуллара вә јашлылара ҝөстәрдикләри хејирхаһлыг барәдә данышырды. Әмәлләрлә ифадә олунан бу мәһәббәт имансызлара о гәдәр тә’сир бағышламышды ки, онлар мәсиһчиләр һаггында: “Ҝөрүн бир-бирләрини неҹә севирләр” - дејирдиләр.
2 Колослулара мәктубунда, һәвари Павелин вә јолдашы Епафранын Колосдакы баҹы-гардашларын рифаһы үчүн мәһәббәтлә диктә олунан марағы ҝөрүнүр. Павел онлара јазырды: “[Епафра] һәр заман дуаларында сизин үчүн сә’ј ҝөстәрир ки, сиз нәтиҹәдә долғунлуға наил оланлар вә Аллаһын бүтүн ирадәсинә мөһкәм әмин оланлар кими дурасыныз”. Јегованын Шаһидләринин 2001-ҹи ил үчүн иллик ајәси, Колослулара 4:12 (ЈД) ајәсинә әсасланаҹаг: “Долғунлуға наил оланлар вә Аллаһын бүтүн ирадәсинә мөһкәм әмин оланлар кими дурун”.
3. Епафра өз дуаларында һансы ики хаһиши ифадә едирди?
3 Ҝөрдүјүмүз кими, она әзиз олан инсанлар үчүн дуаларында, Епафра ики шеј һаггында хаһиш едирди: 1) онлар “нәтиҹәдә долғунлуға наил оланлар” вә 2) “Аллаһын бүтүн ирадәсинә мөһкәм әмин оланлар кими” дурсунлар. Бу мә’лумат, Мүгәддәс Китаба бизим фајдамыз үчүн дахил едилиб. Буна ҝөрә өзүнүздән сорушун: долғунлуға наил оланлар вә Аллаһын бүтүн ирадәсинә мөһкәм әмин оланлар кими дурмаг үчүн мән нә етмәлијәм? Вә белә давранараг һансы нәтиҹәләри ҝөзләмәк олар? Ҝәлин бахаг (2 Тимотејә 3:16).
“Долғунлуға наил оланлар” кими дурмаға сә’ј ҝөстәрин
4. Колос мәсиһчиләринә һансы мә’нада “долғунлуға наил олмаг” лазым иди?
4 Епафра чох арзу едирди ки, онун Колос шәһәриндә олан баҹы-гардашлары “нәтиҹәдә долғунлуға наил оланлар” кими дурсунлар. Павелин “долғунлуг” кими ишләтдији сөз камиллик, тамлыг, јеткинлик мә’насыны верә биләр (Матта 19:21; Јагуб 1:4, 25; Ибраниләрә 5:14). Сизә артыг мә’лум олдуғу кими, әҝәр инсан Јегованын вәфтиз олунмуш Шаһидидирсә, бу һеч дә онун јеткин мәсиһчи олдуғуна дәлаләт етмир. Павел, Колосдан гәрбдә јерләшән Ефес шәһәриндәки мәсиһчиләрә јазараг, руһани чобанлары вә мүәллимләри, - “иманда вә Аллаһын Оғлуну танымагда бирлијә, камил инсан сәвијјәсинә, Мәсиһин долғунлуг гамәтинин өлчүсүнә” чатмаг үчүн һамыја көмәк етмәјә чағырырды. Башга мәктубунда Павел мәсиһчиләри “әглән... камил” олмаға тәшвиг едирди (Ефеслиләрә 4:8—13; 1 Коринфлиләрә 14:20).
5. Руһани “долғунлуғу” өзүмүз үчүн неҹә башлыҹа мәгсәд едә биләрик?
5 Әҝәр Колос мәсиһчиләриндән һансынынса руһани јеткинлији чатышмырдыса, буна наил олмаг үчүн онлар сә’ј ҝөстәрмәли идиләр. Һәмин сөзләри буҝүнкү мәсиһчиләр һаггында да демәк олар. Он илләр габаг вә јахуд бу јахынларда вәфтиз олунмағымыздан асылы олмајараг, фикир сөјләмәк габилијјәтимиздә вә нөгтеји-нәзәримиздә ирәлиләјиш олдуғуну ҝөрүрүкмү? Гәрарлар гәбул едәркән Мүгәддәс Китабын принсипләрини нәзәрә алырыгмы? Демәк олармы ки, Аллаһа вә јығынҹаға аид мәсәләләр вахт кечдикҹә бизим үчүн икинҹи дәрәҹәли дејил, даһа да бөјүк мә’на кәсб едир? Бу мәгаләнин дахилиндә, руһани “долғунлуға” јахынлашмағын бүтүн үсулларыны нәзәрдән кечирмәк мүмкүн дејил, лакин ики нүмунәјә диггәт јетирәк.
6. Һансы мүнасибәтдә Јегова кими, камил олмаг үчүн ким исә сә’ј ҝөстәрә биләр?
6 Биринҹи нүмунә: фәрз едәк ки, биз башга иргин, милләтин вә ја башга әразинин сакинләринә мүнасибәтдә ишин маһијјәтини билмәдән һасил олан рә’јә әсасланан вә дүшмәнчилик олан мүһитдә бөјүмүшүк. Аллаһын, инсанларын кимлијинә бахмадығыны билирик. Ејни заманда билирик ки, биз дә тәрәфкеш олмамалыјыг (Һәвариләрин ишләри 10:14, 15, 34, 35). Тутаг ки, јығынҹағымызда, јахуд јашадығымыз әразидә башга иргә вә милләтә мәнсуб инсанлар вар вә биз онларын јанындајыг. Үрәјимизин дәринлијиндә бу инсанлара мүнасибәтдә мәнфи һиссләр бәсләмәјә вә ја шүбһә илә јанашмаға давам едирикми? Онлардан ким исә сәһвә јол верирсә вә ја өтәри хәтримизә дәјирсә, тез-тәләсик нәтиҹә чыхарараг онлара бәдхаһ мүнасибәт ҝөстәририкми? Өзүнүздән сорушун: Аллаһ кими, инсанларын кимсәлијинә бахмамаг үчүн мәнә бу саһәдә инкишаф етмәк лазым дејилми? (Матта 5:45—48).
7. Мәсиһчи “долғунлуғуна” наил олмаг үчүн, өзүмүздә башгаларына гаршы һансы мүнасибәти јетишдирмәлијик?
7 Икинҹи нүмунә: Филипилиләрин 2:3-ҹү ајәсинә әсасән, биз “рәгабәт вә ја шөһрәтпәрәстликлә һеч бир шеј” етмәмәлијик, “амма тәвазөкарлыгла” бир-биримизи өзүмүздән үстүн сајмалыјыг. Бу саһәдә инкишаф едирикми? Һәр кәсин өзүнәмәхсус ләјагәти вә чатышмазлыглары вар. Әҝәр әввәлләр башгаларынын нөгсанларына о дәгигә диггәт јетирирдиксә, инди, инсанлардан “камиллији” ҝөзләмәкдән әл чәкәрәк, јахшылыға доғру дәјишилмишикми? (Јагуб 3:2). Башгаларынын һансы хүсусијјәтләрдә биздән үстүн олдугларыны тез-тезми ҝөрүрүк, даһа доғрусу, буну етмәјә тез-тезми сә’ј ҝөстәририк? “Е’тираф етмәк лазымдыр ки, о баҹынын сәбри мәнимкиндән ҝенишдир”. “О гардашын иманы исә даһа мөһкәмдир”. “Дүзүнә галса, мүәллимлик габилијјәтиндә о гардаш мәндән үстүндүр”. “О баҹы өзүнү әлә алмағы даһа јахшы баҹарыр”. Ҝүман ки, Колос мәсиһчиләриндән кимләрә исә бу саһәдә јахшылашмаг лазым иди. Бәс бизә неҹә?
8, 9. а) Епафранын дуада сөјләдији кими, Колосдан олан мәсиһчиләр һансы мә’нада “долғунлуға наил оланлар кими дурмалы” идиләр? б) “Долғунлуға наил оланлар кими дурмаг”, ҝәләҹәклә неҹә әлагәлидир?
8 Епафра дуа едирди ки, Колос мәсиһчиләри “долғунлуға наил оланлар кими” дурсунлар. Даһа доғрусу, Епафра Аллаһдан хаһиш едирди ки, онлар артыг о вахт үчүн наил олдуглары кими долғун, “камил”, јеткин мәсиһчиләр олараг “дурсунлар” вә ја о вәзијјәтдә галсынлар.
9 Мәсиһчи олан һәр бир кәсин, ахыра гәдәр мәсиһчи олараг галаҹағына әмин олмаг олмаз; бу һәмчинин јеткин мәсиһчиләрә дә аиддир. Иса деди ки, һәтта Аллаһын оғулларындан бири олан мәләк белә “һәгигәтә бағлы галмады” (Јәһја 8:44). Павел исә Коринфдән олан мәсиһчиләрә, Јеговаја бир мүддәт хидмәт едән, лакин сонрадан хидмәти дајандыран кәсләр барәдә хатырлатды. Павел руһла мәсһ едилмиш гардашларыны хәбәрдар етди: “Ким дүшүнүрсә ки, ајаг үстә дуруб, еһтијатлы олсун ки, јыхылмасын” (1 Коринфлиләрә 10:12). Буну нәзәрә алараг, Колос мәсиһчиләринин “нәтиҹәдә долғунлуға наил оланлар кими” дурмалары һаггындакы дуа даһа бөјүк зәрурилик газаныр. Әҝәр онлар долғунлуға наил олуб, јеткинлијә чатмышдыларса, онда онлара сарсылмадан, јорулмадан вә узаглашмадан бу вәзијјәтдә дә галмаг лазым иди (Ибраниләрә 2:1; 3:12; 6:6; 10:39; 12:25). О заман онлар “Аллаһын... зијарәт етдији ҝүндә” “долғунлуға наил” олмуш вәзијјәтдә олаҹаг вә Аллаһын тә’рифини газанаҹаглар (1 Петер 2:12; 2 Коринфлиләрә 5:10).
10, 11. а) Дуа илә әлагәдар Епафра һансы нүмунәни верди? б) Епафранын дуасы сизи нәјә тәшвиг едир?
10 Конкрет шәхсләр һаггында дуа етмәјин, Јеговадан онлара мүәјјән көмәк ҝөстәрмәсини, онлара тәсәлли, хејир-дуа вә мүгәддәс руһ вермәсини хаһиш етмәјин нә гәдәр ваҹиб олдуғуну артыг мүзакирә етмишик. Епафранын Колос мәсиһчиләри һаггындакы дуасы мәһз буна бәнзәр иди. Онун сөзләриндә, Јеговадан өзүмүз һаггында хаһиш едәркән дуада дедикләримизә аид гијмәтли мәсләһәтләри ҝөрмәк олар, һәтта буну ҝөрмәк ваҹибдир дә. Һеч бир шүбһә олмадан, “нәтиҹәдә” бизләрдән һәр биримизин “долғунлуға наил оланлар кими” дурмасы үчүн, Јеговадан лазыми көмәклик һаггында хаһиш етмәк ҝәрәкдир. Сиз белә көмәклик һаггында дуа едирсинизми?
11 Нәјә ҝөрә руһани вәзијјәтимиз һаггында дуада Јеговаја данышмајаг? Мәсиһчи “долғунлуғуна”, “камиллијинә” вә јеткинлијинә ҹәһд ҝөстәрәрәк наил олдугларыныз барәсиндә Аллаһа данышын. Руһән бөјүмәниз лазым олан саһәләри мүәјјәнләшдирмәкдә сизә көмәк етмәсини хаһиш един (Мәзмур 17:3; 139:23, 24). Шүбһәсиз ки, һәр биримиздә белә саһәләр тапылаҹагдыр. Анҹаг бундан өтүрү кәдәрләнмәк әвәзинә, јахшы оларды ки, мәһз лазым билдијиниз саһәләрдә јахшылашманыз үчүн Аллаһдан сизә көмәк етмәсини хаһиш едәсиниз. Буну дәфәләрлә един. Нәјә ҝөрә “нәтиҹәдә долғунлуға наил оланлар кими» дурманыз үчүн, ҝәлән һәфтә әрзиндә дуа етмәји гәрара алмајасыныз? Иллик ајә үзәриндә дүшүнәрәк, буну ҝәләҹәкдә дә етмәји планлашдырын. Дуаларынызда диггәтинизи сарсылмағыныза, әлдән дүшмәнизә, Аллаһа хидмәтдән вә Онун халгындан “узаглашмағыныза” сәбәб ола билмәси мүмкүн олан руһани зәифликләрә ҹәмләшдирин; бүтүн бунлардан неҹә гачынмағын үсуллары барәдә данышын (Ефеслиләрә 6:11, 13, 14, 18).
Мөһкәм әминлик барәдә дуа един
12. Нәјә ҝөрә Колос мәсиһчиләринә “мөһкәм әмин олараг” дурмаг хүсусилә лазым иди?
12 Епафра даһа бир шеј һаггында дуа едирди. Нәтиҹәдә “дурмаг” вә ја Аллаһа мәгбул олмаг үчүн Колос мәсиһчиләринин буна чох еһтијаҹлары варды. Бизим буна олан еһтијаҹымыз һеч дә аз дејил. Сөһбәт нәдән ҝедир? Епафра дуа едирди ки, Колосдан олан мәсиһчиләр “Аллаһын бүтүн ирадәсинә мөһкәм әмин оланлар кими” дурсунлар. Онлары ҹәфәнҝијат вә чох зәрәрли фәлсәфәләр әһатә едирди, бунларын бә’зиләри исә үздән һәгигәтә бәнзәјирди. Мисал үчүн, Колос мәсиһчиләрини мүәјјән ҝүнләрдә оруҹ тутмаға вә ја әксинә, бајрам етмәјә тәшвиг едирдиләр - бу ән’әнәләр габаглар јәһуди дининә аид едилирди. Диҝәр јаланчы мүәллимләр исә бүтүн диггәти мәләкләрә јөнәлдәрәк, Мусанын ганунунун бу гүдрәтли руһлар васитәсилә верилдијини сөјләјирдиләр. Сизә белә тәзјиг ҝөстәрилдијини тәсәввүр един! Зиддијәтли фикирләрин чохлуғу гарышыглыға ҝәтириб чыхарырды (Галатијалылара 3:19; Колослулара 2:8, 16—18).
13. Нәји анламаг Колос мәсиһчиләринә көмәк едәрди вә буну анламаг бизә неҹә көмәк едәр?
13 Павел, Иса Мәсиһин ролуну гејд едәрәк, бу фикирләрин тә’сиринә гаршы дурду. “Рәбб Мәсиһ Исаны неҹә гәбул етдинизсә, Онун јолунда јеријин... Онда көк салыб, инкишаф един вә өјрәдилдијиниз кими иманда мөһкәмләнин”. Бәли, Колос мәсиһчиләри тамамилә әмин олмалы идиләр ки, Иса, Аллаһын нијјәтиндә вә онларын һәјатында башлыҹа ролу ојнајыр; бу бизә дә аиддир. Павел изаһ етди: “Илаһи тәбиәтин бүтүн долғунлуғу бәдәнҹә Мәсиһдә јашајыр. Сиз дә Онда долғунлуға маликсиниз. О һәр ҹүр рәјасәт вә һакимијјәтин Башчысыдыр” (Колослулара 2:6—10).
14. Нәјә ҝөрә Колос мәсиһчиләринин үмиди онлар үчүн реал иди?
14 Колос мәсиһчиләри мүгәддәс руһла мәсһ едилмишдиләр. Онларын тамамилә мүәјјән едилмиш - ҝөјләрдә јашамаг үмидләри варды вә бу үмиди ҹанлы олараг сахламаг үчүн онлар бүтүн әсаслара малик идиләр (Колослулара 1:5). “Аллаһын бүтүн ирадәси” ондан ибарәт иди ки, онлар өз үмидләриндә “мөһкәм әмин” олсунлар. Бу үмидин е’тибарлы олдуғуна шүбһә етмәјә онларын әсалары вардымы? Әлбәт ки, хејр! Бәс Аллаһ тәрәфиндән вә’д едилмиш јер үзү ҹәннәтдәки һәјаты бу ҝүн ҝөзләјәнләрин, өз ҝәләҹәкләринә шүбһә етмәјә әсаслары вармы? Хејр вә бир даһа хејр! Ахы әсаслы олан бу үмид “Аллаһын бүтүн ирадәси” илә әлагәлидир. Инди исә белә суаллар үзәриндә дүшүнүн: әҝәр “бөјүк мәшәггәтдән” сағ чыхаҹаг “бөјүк бир издиһам”ын арасында олмаг истәјирсинизсә, сизин үмидиниз нә гәдәр мөһкәмдир? (Вәһј 7:9, 14). Бу үмид “Аллаһын бүтүн ирадәсинә мөһкәм әминлијинизин” тәркиб һиссәсидирми?
15. Павел, үмидин дахил олдуғу һансы мәнтиги ардыҹыллығы ҝөстәрир?
15 “Үмид” сөзү алтында гејри-мүәјјән истәкләр, бош арзулар нәзәрдә тутулмур. Бу, Павелин әввәлләр Ромалылара мәктубунда сөјләдији мәнтиги ардыҹыллыгдан ҝөрүнүр. “Үмидин” бу мәктубда тутдуғу јерә диггәт јетирәк: “Сыхынтыдан дөзүмлүлүк [“сарсылмазлыг”, ЈД], дөзүмлүлүкдән тәҹрүбә [“бәјәнилмә”, ЈД] вә тәҹрүбәдән үмид һасил олдуғуну биләрәк, сыхынтыларла да өјүнүрүк. Вә үмид утандырмаз [“мә’јуслуға сәбәб олмаз”, ЈД]; чүнки... Мүгәддәс Руһ васитәсилә Аллаһын мәһәббәти үрәкләримиздә долуб дашыр” (Ромалылара 5:3—5).
16. Мүгәддәс Китаб һәгигәтини өјрәнәркән сиз һансы үмиди әлдә етмисиниз?
16 Јегованын Шаһидләри Мүгәддәс Китабда јазыланлар һаггында сизинлә илк дәфә сөһбәт едәркән, сизин диггәтинизи јәгин ки, бу вә ја диҝәр, мәсәлән, өлүләрин вәзијјәти вә ја дирилмә һаггындакы һәгигәт ҹәлб етди. Башланғыҹда чохларыны, Мүгәддәс Китабда бәһс олунан јер үзү ҹәннәтдә јашамаг имканы валеһ етмишдир. Бу тә’лим һаггында ешитдијиниз илк ҝүнү хатырлајын. Неҹә дә ҝөзәл үмиддир - артыг хәстәликләр вә гоҹалыг олмајаҹаг; өз әлләринин бәһрәсиндән истифадә едәрәк әбәдијјән јашамаг имканы олаҹаг; һејванларла һәмрә’јлик олаҹаг (Ваиз 9:5, 10; Ишаја 65:17—25; Јәһја 5:28, 29; Вәһј 21:3, 4). Бәли, сиз ҝөзәл үмид әлдә етмисиниз!
17, 18. а) Павелин Ромалылара јаздығы мәктубун мәнтиги ардыҹыллығы һансы јолларла ҝәтириб “үмидә” чыхарыр? б) Ромалылара 5:4, 5-ҹи ајәләриндә Павел һансы үмиддән данышыр вә сизин белә бир үмидиниз вармы?
17 Еһтимал ки, бир гәдәр вахт кечдикдән сонра сиз мүгавимәт вә ја тә’гибләрлә гаршылашмысыныз (Матта 10:34—39; 24:9). Һәтта бу јахынларда Јегованын Шаһидләринин евләри талан едилир, өзләри исә гачгын вәзијјәтинә дүшүрдүләр. Онлардан бә’зиләри һүҹумлара мә’руз галыр, Мүгәддәс Китаба әсасланан әдәбијјатлары мүсадирә едилир, күтләви информасија васитәләриндә онлар һаггында јалан сөјләнирди. Һансы нөв тә’гибләрлә гаршылашсаныз да унутмајын ки, Ромалылара 5:4-ҹү ајәсинә әсасән, һәтта кәдәр вә ја сыхынтыларыныз оланда белә өјүнмәјә әсасыныз вар вә бу өјүнмә јахшы сәмәрә ҝәтирир. Павелин дедији кими, сыхынты сиздә сарсылмазлыг һасил етмишдир. Сонра сарсылмазлыг бәјәнилмәјә сәбәб олмушдур. Сиз, Аллаһын ирадәсини јеринә јетирдијинизи, дүзҝүн һәрәкәт етдијинизи биләрәк, Онун тәрәфиндән бәјәнилдијинизә әминлијиниз артмышдыр. Павелин ифадәсинә ҝөрә, сиз һисс етдиниз ки, Аллаһ сизин һәрәкәт тәрзинизи “бәјәнир”. Сонра Павел јазыр ки, “бәјәнилмә үмид һасил едир” (ЈД). Бу бир аз тәәҹҹүблү ҝөрүнә биләр: нәјә ҝөрә мәнтиги ардыҹыллыгда “үмид” ахырда дурур? Мәҝәр сизин үмидиниз даһа әввәлләр, хош хәбәри илк дәфә ешидәндә јаранмамышдырмы?
18 Мә’лум мәсәләдир ки, бурада Павел, башланғыҹда һисс етдијимиз камил һәјат үмиди барәдә данышмыр. О, даһа дәрин, ҝүҹлү һәрәкәтә тәшвиг едән һисс барәсиндә данышыр. Биз чәтинликләрә сарсылмазлыгла таб ҝәтирир вә мүвафиг олараг Аллаһын бизи бәјәндијини анлајырыгса, бу, бизим үмидимизи даһа ашкар тәрздә мөһкәмләндирир. Һәмин илк үмидимиз инди даһа реал, мөһкәм, даһа гүввәтли олур. Вә мөһкәм әсасы олан бу үмид даһа парлаг сачмаға башлајыр. О бүтүн вүҹудумуза, бүтүн ҹанымыза һәкк олунур. “Вә үмид утандырмаз [“мә’јуслуға сәбәб олмаз”, ЈД]; чүнки... Мүгәддәс Руһ васитәсилә Аллаһын мәһәббәти үрәкләримиздә долуб дашыр”.
19. Мүнтәзәм олараг сөјләдијимиз дуаларда үмид һаггында нә демәк олар?
19 Епафра үрәкдән дуа едирди ки, онун Колосдан олан баҹы-гардашлары өз ҝәләҹәкләри үчүн нараһат олуб, “Аллаһын бүтүн ирадәсинә мөһкәм әмин оланлар кими” дурараг бундан сонра да өз ҝәләҹәкләринә шүбһә етмәсинләр. Ҝәлин биз дә мүнтәзәм олараг Аллаһа өз үмидимиз барәдә дуа едәк. Дуаларынызда јени дүнјаја олан үмидиниз барәдә данышын. Јени дүнјанын ҝәләҹәјинә шүбһә етмәдән, ону сәбирсизликлә ҝөзләдијинизи Јегова илә бөлүшүн. Әминлијинизи даһа да мөһкәмләндирмәкдә сизә көмәк етмәсини Јеговадан хаһиш един. Епафра дуа едирди ки, Колос мәсиһчиләри “Аллаһын бүтүн ирадәсинә мөһкәм әмин” олсунлар. Ҝәлин биз дә тез-тез белә хаһишләр едәк.
20. Нәјә ҝөрә бир кимсәнин мәсиһчи јолуну тәрк етмәсинә ҝөрә биз руһдан дүшмәли дејилик?
20 Һамынын долғунлуға наил оланлар вә мөһкәм әмин оланлар кими дурмадығына әһәмијјәт вермәк лазым дејил. Бундан өтүрү руһдан дүшмәк дә лазым дејил. Ким исә сәһвә јол верәр, мәсиһчи јолунда бүдрәјәр вә ја садәҹә олараг тәслим ола биләр. Белә бир һал Исанын јахын јолдашлары - һәвариләри арасында да баш верирди. Анҹаг Јәһуда сатгынлыг едәндә диҝәр һәвариләр буна неҹә реаксија ҝөстәрдиләр? Сә’јләрини итирдиләр? Исадан узаглашдылар? Әсла јох! Петер, Мәзмур 109:8-ҹи ајәсини ситат ҝәтирәрәк ҝөстәрди ки, Јәһуданын јерини башгасы тутаҹагдыр. Јәһудаја әвәз тапдылар вә Аллаһа садиг инсанлар, онлара тапшырылмыш тәблиғ ишинә сә’јлә башладылар (Һәвариләрин ишләри 1:15—26). Онлар долғунлуға наил оланлар вә мөһкәм әмин оланлар кими дурмаға там гәтијјәтли идиләр.
21, 22. Долғунлуға наил оланлар вә мөһкәм әмин оланлар кими дурмағымыз һансы мә’нада ҝизли галмајаҹаг?
21 Әҝәр сиз долғунлуға наил оланлар вә Аллаһын бүтүн ирадәсинә мөһкәм әмин оланлар кими дурурсунузса, зәррә гәдәр шүбһә етмәмәк олар ки, бу ҝизли галмајаҹаг. Буна диггәт јетирәҹәк вә гијмәтләндирәҹәкләр. Кимләр?
22 Мисал үчүн, сизи таныјан вә севән баҹы-гардашлар. Һәтта әксәријјәти буну сөзләрлә ифадә етмәсәләр дә, онлар 1 Салониклиләрә 1:2—6 ајәләриндә ифадә олунан һиссләри кечирәҹәкләр: “Даим сизин һамыныз үчүн Аллаһа шүкүр едир, дуаларымызда сизи анырыг. Чүнки Атамыз Аллаһ һүзурунда имандан ирәли ҝәлән фәалијјәтинизи, мәһәббәтдән һасил олан әмәјинизи вә Рәббимиз Иса Мәсиһә бағландығыныз үмиддән доған мәтанәтинизи дурмадан јада салырыг... билирик ки... јајдығымыз Мүждә сизә јалныз сөзлә дејил, гүдрәтлә, Мүгәддәс Руһла вә там бир е’тигадла чатмышдыр... вә сиз бизим вә Рәббин тәглидчиләри олдунуз”. “Долғунлуға наил оланлар вә Аллаһын бүтүн ирадәсинә мөһкәм әмин оланлар кими” дурдуғунузу ҝөрүб, әһатәниздә олан садиг мәсиһчиләр дә, тәхминән һәмән һиссләри кечирәҹәкләр (Колослулара 1:23).
23. Ҝәлән ил нә етмәјә һазырлашмалыјыг?
23 Сәмави Атамыз да сә’јинизи мүтләг ҝөрәҹәк вә севинәҹәк. Буна шүбһә етмәмәк олар. Нәјә ҝөрә? Чүнки сиз долғунлуға наил оланлар вә “Аллаһын бүтүн ирадәсинә” мөһкәм әмин оланлар кими дурурсунуз. Павел Колос мәсиһчиләринә “Рәббә лајиг шәкилдә һәрәкәт едиб, Ону һәр ҹәһәтдән разы салмағын” ваҹиблији барәдә руһландырыҹы сөзләр јазмышдыр. (Колослулара 1:10). Гејри-камил инсанларын, һәр бир шејдә Јегованы разы салмаға ҝүҹләри чатар. Колосдан олан баҹы-гардашларымыз белә давранырдылар. Бу ҝүн бизи әһатә едән мәсиһчиләр дә белә давранырлар. Буна сизин дә ҝүҹүнүз чатар! Беләликлә ҝәлин, ҝәлән ил әрзиндә ҝүндәлик дуаларымызла вә бүтүн һәрәкәт тәрзимизлә “нәтиҹәдә долғунлуға наил оланлар вә Аллаһын бүтүн ирадәсинә мөһкәм әмин оланлар кими” дурмаға там гәтијјәтли олдуғумузу сүбут едәк.
Хатырлајаҹагсынызмы?
• “Долғунлуға наил оланлар кими” дурмаг үчүн нә ваҹибдир?
• Өзүн һагда дуа едәркән нә барәдә сөјләмәк лазымдыр?
• Ромалылара 5:4, 5-ҹи ајәләринә әсасән һансы үмидимиз олмалыдыр?
• Бу мәгаләнин өјрәнилмәси ҝәлән ил үчүн гаршыныза һансы мәгсәди гојмаға тәшвиг етди?
[15-ҹи сәһифәдәки шәкилләр]
Сизин әсаслы үмидинизә вә мөһкәм әминлијинизә милјонларла инсанлар шәрикдир.