Теократик јолла тә’јин едилмиш нәзарәтчиләр вә хидмәти көмәкчиләр
“Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тә’јин етмишдир” (ҺӘВАРИЛӘРИН ИШЛӘРИ 20:28).
1, 2. Ишаја 60:22-ҹи ајәси неҹә јеринә јетир?
СОНУН вахтында гејри-ади шејләрин баш верәҹәјини Јегова чох илләр габагҹадан билдирмишди. О, Ишаја пејғәмбәрин васитәсилә демишди: “Кичији мин киши вә зәифи гүввәтли бир милләт олаҹаг; Мән, РӘБ, вахт ҝәлинҹә буну тезләндирәҹәјәм” (Ишаја 60:22).
2 Бу пејғәмбәрлијин бизим ҝүнләрдә јеринә јетмәсинә дәлилләр вармы? Бәли, һәгигәтән дә вар! 1870-ҹи илләрдә Аллеһанда (Пенсилванија, АБШ) Јегованын халгынын бир јығынҹағы тәшкил олунду. Бу кичик групдан, бүтүн дүнјада он минләрлә чичәкләнән јығынҹаг бөјүдү. Падшаһлығын милјонларла мүждәчиләри, јә’ни гүввәтли бир милләт, бу ҝүн дүнјанын 235 өлкәсиндә, 91 000-дән артыг јығынҹаглара мәхсусдурлар. Шүбһәсиз, бу ону ҝөстәрир ки, артыг чох јахында олаҹаг “бөјүк мәшәггәт”ин башланмасындан габаг, Јегова өзүнүн һәгиги ибадәтчиләринин јығымыны сүр’әтләндирир (Матта 24:21; Вәһј 7:9—14).
3. “Ата, Оғул вә Мүгәддәс Руһ наминә” вәфтиз олунмаг нә демәкдир?
3 Милјонларла бу инсанлар өзләрини Јеговаја һәср етдикдән сонра, Исанын бујурдуғу кими, “Ата, Оғул вә Мүгәддәс Руһ наминә вәфтиз” олундулар (Матта 28:19). “Ата... наминә” вәфтиз олунмаг о демәкдир ки, өзүнү Јеговаја һәср етмиш шәхс, Ону сәмави Атасы вә Һәјат Верәни кими гәбул едир, һәмчинин Онун һөкмранлығына табе олур. “Оғул... наминә” вәфтиз олунараг, онлар ҝөстәрирләр ки, Иса Мәсиһи Хиласкарлары, Рәһбәрләри вә Падшаһлары кими гәбул едирләр. Онлар ејни заманда, һәјатларына рәһбәрлик етмәкдә Аллаһын мүгәддәс руһунун, јә’ни фәал гүввәсинин дә ролуну гәбул едирләр. Буна ҝөрә дә демәк олар ки, онлар “Мүгәддәс Руһ наминә” дә вәфтиз олунурлар.
4. Ким исә мәсиһчи хидмәтчиси вәзифәсинә һансы јолла тә’јин олунур?
4 Вәфтиз олунаркән, јени шаҝирдләр Јегова Аллаһын хидмәтчиләри тә’јин едилирләр. Онлары ким тә’јин едир? 2 Коринфлиләрә 3:5-ҹи ајәсиндә јазылан сөзләр, әсас е’тибары илә онлара тәтбиг едиләндир: “Бизим [хидмәтчиләр олмаг] габилијјәтимиз Аллаһдандыр”. Бу ҹүр тә’јинаты Јегова Аллаһын өзүндән алмагдан даһа бөјүк шәрәф арзуламаг олмаз! Вәфтиз олундугдан сонра, Аллаһын руһунун рәһбәрлијини гәбул едир вә Онун Кәламына әсасән јашајарларса, “мүждә”нин хидмәтчиләри кими руһән бөјүмәкдә давам едәрләр (Матта 24:14; Һәвариләрин ишләри 9:31).
Демократик дејил, Теократик тә’јинат
5. Мәсиһчи нәзарәтчиләри вә хидмәти көмәкчиләр демократик јолламы сечилирләр? Изаһ един.
5 Аллаһын фәал хидмәтчиләринин сајлары артдыгҹа, онларын руһани еһтијаҹларынын тә’мин едилмәси үчүн, габилијјәтли нәзарәтчиләрин јеткин рәһбәрлији вә хидмәти көмәкчиләрин тәҹрүбәли јардымы тәләб олунур (Филипилиләрә 1:1). Руһән јеткин олан бу инсанлар неҹә тә’јин олунурлар? Онлар Христиан аләминдә олдуғу кими тә’јин олунмурлар. Мисал үчүн, Јегованын Шаһидләри арасында нәзарәтчиләр демократик јолла, јә’ни јығынҹагда сәс чохлуғу газанараг сечилмирләр. Онлар теократик јолла тә’јин олунурлар. Бу нә демәкдир?
6. а) Һәгиги теократија нәдир? б) Нәјә ҝөрә демәк олар ки, нәзарәтчиләр вә хидмәти көмәкчиләр теократик јолла тә’јин олунурлар?
6 Садә диллә десәк, һәгиги теократија - Аллаһын рәһбәрлијидир. Јегованын Шаһидләри Аллаһын рәһбәрлијинә көнүллү сурәтдә табе олурлар вә Онун ирадәсини бирликдә јеринә јетирирләр (Мәзмур 143:10; Матта 6:9, 10). Мәсиһчи нәзарәтчиләри, јә’ни ағсаггаллар, ејни заманда хидмәти көмәкчиләр теократик јолла тә’јин едилирләр, чүнки бу мәс’улијјәтли гардашларын тә’јинаты Аллаһын Мүгәддәс Китабдакы сәрәнҹамы әсасында һәјата кечирилир. Јегова, “баш олараг” ҝөрүнән тәшкилатынын неҹә һәрәкәт едәҹәјинә гәрар вермәк ихтијарына саһибдир (1 Тарихләр 29:11; Мәзмур 97:9).
7. Јегованын Шаһидләринин рәһбәрлик иши һансы үсулла кечирилир?
7 Христиан аләминин бир чох дини групларындан фәргли олараг, Јегованын Шаһидләри дини гурулушу өзләри тә’јин етмирләр. Бу сәмими гәлбли мәсиһчиләр, Јегованын нормаларына бағлы галмаға сә’ј ҝөстәрирләр. Онларын нәзарәтчиләри, килсә иҹмалары бирләшмәләриндә, пресвитериан вә ијерархија мөвҹуд олан башга килсәләрдә олдуғу кими тә’јин олунмурлар. Бу дүнја тә’јин етмә просесинә гарышса да, Јегованын хидмәтчиләри тә’јин етмә мәсәләсиндә ҝүзәштә ҝетмирләр. Онлар, биринҹи әсрдә һәвариләрин әкс етдирдикләри мөвгеји горујурлар: “Инсанлардан артыг, Аллаһа итаәт етмәк ҝәрәкдир” (Һәвариләрин ишләри 5:29). Бәли, Шаһидләр һәр шејдә Аллаһа табе олурлар (Јагуб 4:7; Ибраниләрә 12:9). Аллаһын разылығына, теократик гајдаја риајәт едәрәк наил олуруг.
8. Демократик вә теократик үсуллар арасындакы фәрг нәдәдир?
8 Даһи Теократ олан Јегованын хидмәтчиләри кими, теократик вә демократик үсулларын арасындакы фәрги јадда сахламалыјыг. Демократик үсул, һәр һансы бир вәзифәјә бәрабәр сәвијјәли намизәдләрин нүмајәндәлијини тәләб едир. Әксәр һалларда намизәдләр сечкигабағы кампанијалар кечирир вә чох сәс газананлар посту гәбул едирләр. Теократик тә’јинат заманы белә үсуллар тәтбиг едилмир. Теократик тә’јинатлар, инсанлар вә ја һүгуг органлары тәрәфиндән һәјата кечирилмир. Ҝөрүндүјү кими, Иса вә Јегова тәрәфиндән “гејри-јәһудиләрә һәвари” тә’јин олундуғуну нәзәрәдә тутараг, Павел Галатијадан олан мәсиһчиләрә - “нә инсанлар тәрәфиндән, нә дә инсан васитәсилә, анҹаг Иса Мәсиһ вә Ону өлүләрдән дирилдән Ата Аллаһ васитәсилә” тә’јин олундуғуну сөјләди (Ромалылара 11:13; Галатијалылара 1:1).
Мүгәддәс руһ васитәсилә тә’јин едилмишләр
9. Мәсиһчи нәзарәтчиләринин тә’јинаты илә әлагәдар Һәвариләрин ишләри 20:28-ҹи ајәсиндә нә дејилир?
9 Павел, Ефесдә јашајан нәзарәтчиләрә хатырлатды ки, Аллаһ онлары мүгәддәс руһ васитәсилә тә’јин едиб. О деди: “Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тә’јин етмишдир ки, Рәббин вә Аллаһын ҹәмијјәтини, Өз ганы баһасына әлдә етдији ҹәмијјәти ҝүдәсиниз” (Һәвариләрин ишләри 20:28). Бу мәсиһчи нәзарәтчиләри, Аллаһын сүрүсүнүн чобанлары вәзифәсини јеринә јетирәрәк, мүгәддәс руһун рәһбәрлијинә табе олмаға давам етмәли идиләр. Јығынҹагда мәс’улијјәтли вәзифә тутан шәхс, артыг Аллаһын нормаларына ҹаваб вермирсә, бир гәдәр вахтдан сонра мүгәддәс руһун тә’сири сајәсиндә, она һәвалә едилән вәзифәдән кәнар едилир.
10. Нәјә ҝөрә тәсдиг етмәк олар ки, мүгәддәс руһ теократик тә’јинатда бу гәдәр ваҹиб рол ојнајыр?
10 Мүгәддәс руһун бу гәдәр ваҹиб рол ојнадығыны нәјә ҝөрә иддиа етмәк олар? Илк нөвбәдә она ҝөрә ки, руһани рәһбәрлији иҹра едән кәсләр үчүн олан Мүгәддәс Китабын тәләбләри мүгәддәс руһла илһамланыб. Павелин Тимотејә вә Титуса јаздығы мәктубларында, нәзарәтчиләрин вә хидмәти көмәкчиләрин риајәт етмәләри ваҹиб олан нормалар јазылыб. Үмуми ҝөтүрдүкдә, 16 тәләб ҝөстәрилир. Мисал үчүн, нәзарәтчиләр нөгсансыз, вәрдишләринә ҹидди јанашан, сағлам дүшүнҹәли, һазырлыглы, гонагпәрвәр, өјрәтмәјә габилијјәтли вә нүмунәви аилә башчылары олмалыдырлар. Спиртли ичкиләр гәбул едәркән таразлығы ҝөзләмәли, пулпәрәст олмамалы вә өзүнә һаким олмағы баҹармалыдырлар. Хидмәти көмәкчи олмаг истәјәнләр үчүн дә јүксәк нормалар тә’јин олунмушдур (1 Тимотејә 3:1—10, 12, 13; Титуса 1:5—9).
11. Јығынҹагда мәс’улијјәтли вәзифәјә сә’ј ҝөстәрән кәсләрин риајәт етмәләри ҝәрәк олан бә’зи тәләбләр һансылардыр?
11 Бу тәләбләр нәзәрә алынарса, Јеговаја ибадәтдә рәһбәрлији өз үзәринә ҝөтүрәнләр, мәсиһчи давранышында нүмунәви олмалыдырлар. Ҝөрүнмәлидир ки, јығынҹагда мәс’улијјәтли вәзифәјә ҹан атан гардашлар мүгәддәс руһун тә’сиринә итаәт едирләр (2 Тимотејә 1:14). Ајдын олмалыдыр ки, Аллаһын руһу бу инсанларда “мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг” кими сәмәрәләр һасил едир (Галатијалылара 5:22, 23). Бу сәмәрәләр, онларын иман гардашлары илә вә башга инсанларла давранышларында әкс олунаҹаг. Шүбһәсиз ки, руһун бу вә ја диҝәр сәмәрәләри кимдә исә даһа јахшы әкс олунаркән, башгалары да нәзарәтчиләр үчүн тәләбләрә мүнасиб ҹаваб верә биләрләр. Лакин нәзарәтчи вә ја хидмәти көмәкчи тә’јинатына үмид едән һәр бир кәс, бүтүн һәјат тәрзи илә ҝөстәрмәлидир ки, о, Аллаһын Кәламынын тәләбләрини јеринә јетирән руһән јеткин бир инсандыр.
12. Кимләри мүгәддәс руһ васитәсилә тә’јин олунмуш һесаб етмәк олар?
12 Павел башгаларыны ону тәглид етмәјә тәшвиг едәндә, буну сәрбәст шәкилдә едирди, чүнки өзү Иса Мәсиһи тәглид едирди. Иса исә “бизә бир нүмунә гојараг, бизим үчүн изтираб чәкди ки, биз Онун изләри илә ҝедәк” (1 Петер 2:21; 1 Коринфлиләрә 11:1). Буна ҝөрә дә демәк олар ки, Мүгәддәс Јазыларын тәләбләринә ҹаваб верән кәсләр, нәзарәтчиләр вә хидмәти көмәкчиләр вәзифәсинә мүгәддәс руһун васитәсилә тә’јин олунурлар.
13. Кими исә јығынҹағын хидмәтчиси вәзифәсинә төвсијә едән гардашлара мүгәддәс руһ неҹә көмәк едир?
13 Нәзарәтчиләрин тә’јин олунмасына мүгәддәс руһун неҹә тә’сир етмәсини ҝөстәрән башга бир амил дә вардыр. Иса деди ки, “Сәмави Атаныз Ондан диләјәнләрә... Мүгәддәс Руһу” верәҹәкдир (Лука 11:13). Буна ҝөрә дә, јығынҹағын ағсаггаллары кими исә мәс’улијјәтли вәзифәјә тәгдим едәндә, Аллаһын мүгәддәс руһунун онлара рәһбәрлик вермәси үчүн дуа едирләр. Онлар өз тәгдим етдикләри шәхсләрин намизәдлијини илһамланмыш Мүгәддәс Јазыларда дејиләнләрә әсасландырырлар, мүгәддәс руһ исә, намизәд ҝөрүлән инсанын Мүгәддәс Китабын тәләбләринә мүнасиб олуб олмадығыны мүәјјәнләшдирмәкдә онлара көмәк едир. Кими исә вәзифәјә төвсијә едән шәхсләр јол вермәли дејилләр ки, инсанын хариҹи ҝөрүнүшү, тәһсили вә ја тәбии габилијјәтләри онларын гәрарына тә’сир ҝөстәрсин. Онлар илк нөвбәдә о инсанын руһанилијинә вә јығынҹаг үзвләринин руһани мәсләһәт үчүн она һазырлыгла мүраҹиәт едиб етмәмәләринә диггәт јетирирләр.
14. Һәвариләрин ишләри 6:1—3 ајәләрдән нә өјрәнирик?
14 Гардашлары ағсаггаллар вә хидмәти көмәкчиләр вәзифәсинә, сәјјаһ нәзарәтчиләрлә бирликдә ағсаггаллар шурасы намизәд ҝөрүр, тә’јинат исә, биринҹи әсрдә тә’сис едилмиш нүмунә әсасында һәјата кечирилир. Бир дәфә ваҹиб бир ишин јеринә јетирилмәси үчүн, руһани нөгтеји-нәзәрдән габилијјәти олан инсанлар лазым олду. Рәһбәрлик шурасы нөвбәти ҝөстәришләри верди: “Араныздан һагларында јахшы шәһадәт олунан, Мүгәддәс Руһ вә һикмәтлә долу једди нәфәр сечин ки, онлары бу иш үчүн тә’јин едәк” (Һәвариләрин ишләри 6:1—3). Намизәдләри һадисә јериндә оланлар сечсәләр дә, тә’јинат Јерусәлимдә олан мәс’ул гардашлар тәрәфиндән едилирди. Һәмин нүмунәјә бу ҝүн дә риајәт олунур.
15. Гардашларын тә’јин олунмасында Рәһбәрлик шурасы һансы ролу ојнајыр?
15 Филиалларын Комитә үзвләринин һамысы, бирбаша Рәһбәрлик шурасы тәрәфиндән тә’јин олунурлар. Бу гәдәр ағыр вәзифәләри кимә һәвалә етмәји гәрара аларкән, Рәһбәрлик шурасы Исанын дедији сөзләри нәзәрә алыр: “Кимә чох верилмишсә, ондан чох тәләб олунаҹагдыр; вә кимә чох әманәт едилмишсә, ондан даһа чох истәниләҹәкдир” (Лука 12:48). Јалныз филиалларын Комитә үзвләри дејил, һәмчинин Бејт-ел ағсаггалары вә сәјјаһ нәзарәтчиләр дә Рәһбәрлик шурасы тәрәфиндән тә’јин олунурлар. Лакин бир сыра диҝәр вәзифәләри иҹра етмәји Рәһбәрлик шурасы мәс’ул гардашлара һәвалә едир. Мүгәддәс Китабда бунун үчүн дә нүмунә вардыр.
“Сәнә тапшырдығым кими, бүтүн шәһәрләрдә... ағсаггаллар тә’јин ет”
16. Павел Титусу Критдә нәјә ҝөрә сахлады вә буҝүнкү теократик тә’јинатларла әлагәдар бу нәји ҝөстәрир?
16 Павел һәмкары олан Титуса јазырды: “Мән сәни она ҝөрә Критдә гојдум ки, натамам ишләри ә’ла ҝөрүб гуртарасан вә сәнә тапшырдығым кими, бүтүн шәһәрләрдә ҹәмијјәт ағсаггаллары тә’јин едәсән” (Титуса 1:5). Сонра Павел лазым олан хүсусијјәтләрин сијаһысыны садалады. Титус, јығынҹагда мәс’улијјәтли вәзифәләрә намизәд олан шәхсләрдә һәмин хүсусијјәтләри ҝөрмәли иди. Буна ҝөрә дә, бу ҝүн Рәһбәрлик шурасы филиалларда хидмәт едән габилијјәтли гардашлары тә’јин едир ки, онлар да өз нөвбәсиндә шуранын адындан ағсаггаллары вә хидмәти көмәкчиләри тә’јин етсинләр. Рәһбәрлик шурасы һәмишә гајғы ҝөстәрир ки, онун нүмајәндәләри, әсасында тә’јинатлар едилән Мүгәддәс Китабын ҝөстәришләрини дәгиг баша дүшүб, јеринә јетирсинләр. Беләликлә, бүтүн дүнја үзрә Јегованын Шаһидләринин јығынҹагларында габилијјәтли инсанлар Рәһбәрлик шурасы тәрәфиндән тә’јин олунурлар.
17. Филиалда нәзарәтчиләр вә хидмәти көмәкчиләр барәсиндәки мәсләһәтләрлә әлагәдар неҹә давранырлар?
17 Нәзарәтчиләр вә хидмәти көмәкчиләр барәсиндәки төвсијәләр Ҝөзәтчи Гүлләси Ҹәмијјәтинин филиалына ҝөндәрилир вә орада тәҹрүбәли гардашлар Аллаһын руһунун рәһбәрлијинә ҝүвәнәрәк тә’јинатлары иҹра едирләр. Бу гардашлар онлара тапшырылмыш ишин ваҹиблијини хатырлајараг, башгаларынын ҝүнаһында иштирак етмәмәк үчүн, һеч кимин үзәринә тәләсик әл гојмурлар (1 Тимотејә 5:22).
18, 19. а) Бә’зи тә’јинатлар һаггында неҹә хәбәр верилир? б) Намизәдлик вә тә’јин олунма просеси неҹә кечирилир?
18 Бә’зи һалларда тә’јинатлар рәсми мәктубларла билдирилир. Белә мәктубда јығынҹагда бир нечә гардашын тә’јинат алмасы барәдә хәбәр верилә биләр.
19 Теократик тә’јинатлар Јегова Аллаһ тәрәфиндән верилир; Оғлу, һәмчинин Аллаһын јер үзүндәки каналы олан “садиг вә ағыллы гул” вә онун Рәһбәрлик шурасы тәрәфиндән иҹра олунур (Матта 24:45—47). Намизәдлик вә тә’јин олунма просеси бүтүнлүклә мүгәддәс руһун рәһбәрлији алтында кечир. Буну она ҝөрә тәсдиг етмәк олар ки, ҝәрәкли тәләбләр мүгәддәс руһла илһамланмыш Мүгәддәс Китабда гејд олунмушдур, тә’јин едиләнләр исә һәмин руһун сәмәрәләрини әкс етдирирләр. Буна ҝөрә дә, бу тә’јинатлары мүгәддәс руһ тәрәфиндән иҹра едилән кими гәбул етмәк лазымдыр. Биринҹи әсрдә нәзарәтчиләр вә хидмәти көмәкчиләр теократик јолла тә’јин олунурдулар, онлар бу ҝүн дә һәмин јолла тә’јин олунурлар.
Јегованын рәһбәрлији үчүн миннәтдарыг
20. Биз нәјә ҝөрә Давудун, Мәзмур 133:1-ҹи ајәсиндә јазылмыш һиссләринә шәрик олуруг?
20 Бу ҝүн, руһани чичәкләнмә вахтында вә сәмави Падшаһлыг һаггындакы тәблиғ фәалијјәтинин ҝенишләндији бир вахтда, нәзарәтчиләрин вә хидмәти көмәкчиләрин Јегова тәрәфиндән тә’јин олундуглары үчүн чох миннәтдарыг. Чүнки биз, Јегованын Шаһидләри, Аллаһын јүксәк әхлаг нормаларына, Мүгәддәс Китабын васитәсилә мүәјјән едилмиш гајдаларын сајәсиндә риајәт едә билирик. Бундан әлавә, мәсиһчи руһу вә бу гардашларын фәдакар зәһмәти, Јегованын хидмәтчиләринин арасында сүлһүн вә бирлијин һөкм сүрмәсинә чох көмәк едир. Биз, мәзмурчу Давудун дедикләрини тәкрар етмәјә тәшвиг олуруг: “Будур, гардашларын бир јердә јашамасы нә јахшыдыр вә нә хошдур!” (Мәзмур 133:1).
21. Ишаја 60:17 ајәси бу ҝүн неҹә һәјата кечир?
21 Биз Јегованын, Кәламы вә мүгәддәс руһу васитәсилә һәјата кечирдији рәһбәрлијә ҝөрә чох миннәтдарыг. Бәли, Ишаја 60:17-дә јазылмыш сөзләрдә һәгигәтән дә дәрин мә’на вардыр: “Тунҹ јеринә гызыл ҝәтирәҹәјәм вә дәмир јеринә ҝүмүш вә ағаҹ јеринә тунҹ вә даш јеринә дәмир ҝәтирәҹәјәм. Вә мә’мурларыны сүлһ едәҹәјәм, нәзарәтчиләрини дә әдаләт”. Јегованын Шаһидләри арасында теократик үсуллар тәдриҹән даһа ҝениш шәкилдә тәтбиг олунур вә бунун сајәсиндә Аллаһын јер үзүндә олан ҹәмијјәти, јухарыда тәсвир едилән хејир-дуалары әлдә едир.
22. Биз нәјә ҝөрә миннәтдарлыг һисси кечиририк вә нә етмәјә гәрарлы олмалыјыг?
22 Биздә гәбул олунмуш теократик гајданы, һәмчинин теократик јолла тә’јин олунмуш нәзарәтчиләрин вә хидмәти көмәкчиләрин ағыр, лакин мәмнунлуг ҝәтирән зәһмәтләрини дәриндән гијмәтләндиририк. Бизә руһани зәнҝинлик верән вә бизи бол-бол хејир-дуаландыран, севән сәмави Атамызы үрәкдән иззәтләндиририк (Сүлејманын мәсәлләри 10:22). Буна ҝөрә дә, ҝәлин Јегованын тәшкилаты илә ајаг-ајаға јеримәк үчүн гәрарлы олаг! Ән әсасы исә, ҝәлин Јегованын адына иззәт, һөрмәт вә шәрәф ҝәтирәрәк, Она бирликдә хидмәт етмәји давам етдирәк!
Сиз неҹә ҹаваб верәрдиниз?
• Нәјә ҝөрә демәк олар ки, нәзарәтчиләр вә хидмәти көмәкчиләр демократик дејил, теократик јолла сечилирләр?
• Мәс’ул мәсиһчи гардашлар мүгәддәс руһла неҹә тә’јин олунурлар?
• Нәзарәтчиләрин вә хидмәти көмәкчиләрин тә’јин олунмасында Рәһбәрлик шурасынын һансы ролу вар?
• Теократик тә’јинатларла әлагәдар нәјә ҝөрә Јеговаја миннәтдар олмалыјыг?
[10-ҹу сәһифәдәки шәкилләр]
Ағсаггаллар вә хидмәти көмәкчиләр теократик јолла тә’јин олунурлар.