Һәгигәти мәнимсәмисинизми?

“Аллаһын јахшы, мәгбул вә камил ирадәсинин нә олдуғуну дәрк етмәк үчүн ағлынызын јениләнмәси илә көкүндән дәјишин” (РОМАЛЫЛАРА 12:2).

1, 2. Бу ҝүн мәсиһчи олмаг нә үчүн асан дејил?

БУ СОН ҝүнләрдә - “чәтин анлар”да - мәсиһчи олмаг асан дејилдир (2 Тимотејә 3:1). Мәсиһин ҝөстәрдији нүмунәјә риајәт етмәк үчүн, дүнјаја галиб ҝәлмәк лазымдыр (1 Јәһја 5:4). Исанын мәсиһчи јолу һаггында дедијини хатырлајаг: “Дар гапыдан ҝирин; чүнки һәлака апаран гапы ҝениш вә јол енлидир; вә ондан ҝирәнләр чохдур. Чүнки һәјата апаран гапы дар вә јол енсиздир вә ону тапанлар аздыр”. О, һәмчинин деди: “Ким ардымҹа ҝәлмәк истәјирсә, гој өзүнү инкар етсин вә чармыхыны ҝөтүрүб Мәни изләсин” (Матта 7:13, 14; Лука 9:23).

² Һәјата апаран енсиз јолу тапдыгдан сонра, мәсиһчинин нөвбәти чәтинлији бу јолда галмагдыр. Бу нәјә ҝөрә асан дејил? Она ҝөрә ки, Аллаһа һәср едилиб вәфтиз олундугдан сонра, Шејтан бизә гаршы һијләләр гурмаға башлајыр (Ефеслиләрә 6:11). О, бизим зәиф јерләримизи тапыр вә руһанилијимизи парчаламаг мәгсәдилә бу зәиф јерләрә һүҹум едир. Әҝәр Шејтан, Исаны руһән сарсытмаға чалышырдыса, бизи раһат бурахаҹағына үмид етмәк олармы? (Матта 4:1—11).

Шејтанын һијләләри

3. Шејтан Һәвванын зеһниндә шүбһә тохумуну неҹә әкди?

³ Шејтанын һијләҝәр үсулларындан бири, зеһнимизә шүбһә тохуму сәпмәкдир. О, руһани дәбилгәмиздә зәиф јерләр ахтарыр. Бу үсулу лап башланғыҹда Һәвваја гаршы тәтбиг едәрәк сорушду: “Ҝерчәк, Аллаһ: “Бағчанын һеч бир ағаҹындан јемәјәҹәксиниз” дедими?” (Тәквин 3:1). Башга сөзләрлә десәк, Шејтан сорушурду: “Аллаһ сизә неҹә гадаған едә биләрди? О, сизи бу ҹүр не’мәтләрдән неҹә мәһрум едә биләрди? Аллаһ билир ки, ондан једијиниз ҝүн ҝөзләриниз ачылаҹаг вә сиз, јахшыны вә писи биләрәк Аллаһ кими олаҹагсыныз!” Шејтан шүбһә тохуму әкиб, онун ҹүҹәрмәсини ҝөзләди (Тәквин 3:5).

4. Бизим зәманәдә кимдә исә һансы шүбһәләр јарана биләр?

⁴ Шејтан һәмин үсулдан бу ҝүн неҹә истифадә едир? Әҝәр биз, Мүгәддәс Китабын охунмасына, шәхси өјрәнмәјә, дуаја, мәсиһчи хидмәтинә вә јығынҹаг ҝөрүшләринә лазыми диггәти ајырмырыгса, башгалары тәрәфиндән сөјләнилән шүбһәли фикирләрин гаршысында мүдафиәсиз бир вәзијјәтдә олаҹағыг. Мәсәлән, ким исә соруша биләр: биз һарадан билирик ки, бу, Исанын өјрәтдији һәгигәтдир? Доғрудурму ки, биз сон ҝүнләрдә јашајырыг? Ахы артыг XXI әсрдир. Һар-Меҝидон јахындырмы, јохса һәлә чохму узагдыр? Әҝәр кимдә исә бу ҹүр шүбһәләр јаранырса, онларла неҹә мүбаризә апармаг олар?

5, 6. Шүбһәләр јаранан заман биз нә етмәлијик?

⁵ Јагуб белә бир практики мәсләһәт верди: “Әҝәр сизләрдән биринин һикмәти әксикдирсә, һәр кәсә ҹомәрдликлә вә ҝилејләнмәјәрәк верән Аллаһдан [“даима”, ЈД] диләсин, она вериләҹәкдир. Амма гој иманла диләсин, һеч шүбһә етмәсин. Чүнки шүбһә едән, күләјин галдырдығы вә тәлатүмә ҝәтирдији дәниз далғасына бәнзәр. Гој белә бир адам дүшүнмәсин ки, Рәббдән бир шеј алаҹагдыр. Мүтәрәддид адам етдији һеч бир шејдә сабит дејил” (Јагуб 1:5—8).

⁶ Беләликлә, биз нә етмәлијик? “Аллаһдан даима” иман вә анлајыш, һәмчинин бу вә ја диҝәр суаллары ајдынлашдырмаг, ја да шәхси өјрәнмә заманы шүбһәләри һәлл етмәк үчүн сә’јләримиздә бизә јардым етмәсини диләмәлијик. Ејни заманда Јегованын бизә лазым олан јардымы ҝөстәрәҹәјинә шүбһә етмәдән, иманда ҝүҹлү оланлардан да көмәк диләјә биләрик. Јагуб һабелә јазырды: “Аллаһа табе олун, иблисә исә гаршы дурун вә о, сиздән гачаҹагдыр. Аллаһа јахынлашын, О да сизә јахынлашар”. Бәли, әҝәр биз өјрәнмә вә дуа васитәсилә Аллаһа јахынлашарыгса, шүбһәләримиз арадан галдырылаҹагдыр (Јагуб 4:7, 8).

7, 8. Исанын өјрәтдији ибадәт үсулуну мүәјјән етмәкдә бә’зи ме’јарлар һансылардыр вә бу ме’јарлара кимләр ҹаваб верир?

⁷ Мисал үчүн, белә бир суал үзәриндә дүшүнәк: Нәдән биләк ки, Аллаһа, Исанын өјрәтдији кими ибадәт едирик? Буну һансы ме’јарларла мүәјјән етмәк олар? Мүгәддәс Китабын ҝөстәрдији кими, мәсиһчиләр арасында һәгиги мәһәббәт олмалыдыр (Јәһја 13:34, 35). Онлар Аллаһын Јегова адыны иззәтләндирмәлидирләр (Ишаја 12:4, 5; Матта 6:9). Онлар бу ады бәјан етмәлидирләр (Чыхыш 3:15; Јәһја 17:26).

⁸ Һәгиги ибадәтин башга бир фәргләндириҹи ҹәһәти - Аллаһын Кәламы олан Мүгәддәс Китаба һөрмәт ҝөстәрмәкдир. Бу, Аллаһын шәхсијјәтини вә нијјәтләрини ачыглајан јеҝанә китабдыр (Јәһја 17:17; 2 Тимотејә 3:16, 17). Бундан әлавә, мәсиһчиләр Аллаһын Падшаһлығы һаггындакы мүждәни - јер үзү ҹәннәтдә әбәди һәјата јеҝанә үмид верән мүждәни - бәјан едирләр (Марк 13:10; Вәһј 21:1—4). Онлар, бу дүнјаја хас олан позуҹу сијасәтдән вә ләкәләјиҹи һәјат тәрзиндән кәнар дурурлар (Јәһја 15:19; Јагуб 1:27; 4:4). Бу ҝүн бу ме’јарлара кимләр ҹаваб верир? Фактлар ҝөстәрир ки, јалныз Јегованын Шаһидләри.

Шүбһәләр давам едирсә, нә етмәли?

9, 10. Шүбһәләр кечиб ҝетмирсә нә етмәли?

⁹ Шүбһәләр кечиб ҝетмирсә, нә етмәли? Неҹә олмалы? Мүдрик падшаһ Сүлејман ҹаваб верир: “Оғлум, гулағыны һикмәтә чевирәрәк вә анлајыша үрәјини мејлләндирәрәк, сөзләрими гәбул едәр вә әмрләрими јанында сахларсанса; ҝерчәк, әҝәр идракы чағырар вә анлајыша сәсини јүксәлдәрсәнсә; әҝәр ҝүмүш ахтарар кими ону ахтарар вә хәзинәләр араштырар кими ону арашдырарсанса; РӘБ горхусуну о заман анлајаҹагсан вә Аллаһ билијини тапаҹагсан” (Сүлејманын мәсәлләри 2:1—5).

¹⁰ Ҝөзәл фикирдир, елә дејилми? Аллаһын мүдриклијинә диггәт јетирмәјә һазырыгса, “Аллаһ билијини тапарыг”. Бәли, Аллаһын сөзләрини гәбул етмәјә вә горујуб сахламаға һазырыгса, о заман Күлл-Ихтијар Рәбб һаггында билик әлдә едә биләрик. Бунун үчүн исә, дуанын вә шәхси өјрәнмәнин көмәји илә Јеговаја мүраҹиәт етмәк ваҹибдир. Онун Кәламынын ҝизләдилмиш хәзинәләри, һәр һансы шүбһәләри һәлл етмәјә вә һәгигәт ишығыны ҝөрмәјә бизә көмәк едәр.

11. Шүбһәләр Елишанын гуллугчусуна неҹә тә’сир етди?

¹¹ Дуанын, Аллаһын горху вә шүбһә ичиндә олан хидмәтчисинә неҹә көмәк етмәсинә әјани нүмунәни 2 Краллар 6:11—18 ајәләриндә ҝөрмәк олар. Елишанын гуллугчусунун руһани анлајышы зәиф иди. О, Сурија гошунлары тәрәфиндән мүһасирәјә алынмыш Аллаһын хидмәтчисинә көмәк етмәјә һазыр олан сәмави ордулары иманын ҝөзләри илә ҝөрмүрдү. Горху ичиндә олан гуллугчу гышгырды: “Ејваһ, әфәндим, неҹә едәҹәјик?” Елиша нә ҹаваб верди? “Горхма, чүнки бизимлә оланлар, онларла оланлардан чохдур”. Бәс гуллугчу буна неҹә әмин ола биләрди, ахы о, сәмави ордулары һәгиги мә’нада ҝөрмүрдү?

12. а) Елишанын гуллугчусунун шүбһәләри арадан неҹә галдырылды? б) Һәр һансы шүбһәләри биз неҹә арадан галдыра биләрик?

¹² “Елиша јалварыб деди: Ја РӘБ, риҹа едирәм, онун ҝөзләрини ач ки, ҝөрсүн. РӘБ дә гуллугчунун ҝөзләрини ачды; вә ҝөрдү; вә будур, Елишанын чеврәсиндә; дағ атәш атлары вә арабалары илә долу иди”. Бу һадисәдә Јегова имкан верди ки, гуллугчу Елишаны мүдафиә едән сәмави ордулары ҝөрсүн. Лакин бу ҝүн биз јухарыдан белә көмәјин вериләҹәјинә үмид бәсләјә билмәрик. Унутмамалыјыг ки, Елишанын гуллугчусунун, өјрәнәрәк иманыны мөһкәмләдә биләҹәји бүтөв Мүгәддәс Китабы јох иди. Бизим исә Мүгәддәс Китабымыз вар. Ону диггәтлә охујарыгса, иманымыз мөһкәмләнәр. Мисал үчүн, Јегованы сәмави һәјәтиндә тәсвир едән һиссәләр үзәриндә дәриндән дүшүнмәк олар. Бу һиссәләр бизи әмин едир ки, Јегованын, бу ҝүн јер үзүндә маарифләндирмә фәалијјәтинин кечирилмәсиндә хидмәтчиләринә көмәк едән сәмави тәшкилаты вар (Ишаја 6:1—4; Һезекиел 1:4—28; Даниел 7:9, 10; Вәһј 4:1—11; 14:6, 7).

Шејтанын һијләләриндән горунун!

13. Шејтан нәјин васитәсилә һәгигәтдә мөһкәм дурмағымыза манечилик төрәтмәјә чалышыр?

¹³ Руһанилијимизи зәифләтмәк вә һәгигәтдә мөһкәм галмағымыза мане олмаг үчүн, Шејтан даһа һансы үсуллардан истифадә едир? Мәсәлән, бунун үчүн о, бизи әхлагсызлығын бүтүн нөвләринә тәшвиг едир. Бу ҝүн әхлагсызлыға гәрг олан дүнјада ешг маҹәрасы (һәр шеји олдуғу кими адландырсаг - һәјат јолдашына хәјанәткарлыг) вә ја тәсадүфи ҹинси әлагәләр тәбии һалдыр. Зөвг алмаг һәсрәтиндә олан индики нәсил, нәјин баһасына олурса-олсун кеф чәкмәјә ҹан атыр. Бу ҹүр һәјат тәрзи киноларда вә видеофилмләрдә, һәмчинин телевизија верилишләриндә тәблиғ едилир. Күтләви информасија васитәләри, хүсусилә дә Интернет порнографија илә долудур. Һәр шејә мараг ҝөстәрәнләри тәһлүкә ҝөзләјир (Јагуб 1:13—15; 1 Салониклиләрә 4:3—5).

14. Бә’зи мәсиһчиләр нәјә ҝөрә Шејтанын һијләләринин гурбаны олдулар?

¹⁴ Бә’зи мәсиһчиләр, һәр шејә олан марағын онлар үзәриндә һакимлик етмәсинә јол вермиш вә үстүөртүлү вә ја һәтта ачыг порнографијаја бахмагла өз зәкаларыны вә үрәкләрини мурдарламышлар. Шејтанын тәлә јеми онлары ҹәлб етмиш вә онлар бу тәләјә дүшмүшләр. Әксәр һалларда бу, онларын руһән гәзаја уғрамасына сәбәб олмушдур. Бу инсанлар “пислик барәдә көрпәләр кими” олмадылар. Онлар “әглән... камил” олмадылар (1 Коринфлиләрә 14:20). Аллаһын Кәламынын принсипләринә вә нормаларына риајәт етмәдикләри үчүн, һәр ил минләрлә инсанлар јығынҹагдан узаглашдырылырлар. Онлар “Аллаһын бүтүн зиреһләринә” е’тинасыз јанашыр вә ону ҝејмирдиләр (Ефеслиләрә 6:10—13; Колослулара 3:5—10; 1 Тимотејә 1:18, 19).

Наил олдугларынызы гијмәтләндирин

15. Бә’зиләринә руһани мирасыны гијмәтләндирмәк нә үчүн чәтин олур?

¹⁵ Иса деди: “Сиз һәгигәти дәрк едәҹәксиниз; вә һәгигәт сизи азад едәҹәкдир” (Јәһја 8:32). Јегованын Шаһидләринин әксәријјәти бир заманлар әввәлки һәјат тәрзини кәнара гојуб, јалан диндән узаглашмышлар. Буна ҝөрә дә, һәгигәтин ҝәтирдији азадлыг онлар үчүн чох дәјәрлидир. Диҝәр тәрәфдән, Шаһид олан валидејнләринин тәрбијәси алтында бөјүјән јенијетмәләрдән бә’зиләринә, руһани мирасларыны гијмәтләндирмәк чәтин олур. Онлар һеч заман јалан динә вә ја даима зөвг ахтаран, наркоманија вә әхлагсызлыгла долу олан бу дүнјаја мәхсус олмамышлар. Бу сәбәбдән онлар, бизим руһани ҹәннәтимизлә, Шејтанын парчаланан дүнјасы арасындакы кәскин фәрги ҝөрмүрләр. Бә’зиләри исә нәји итирдикләрини билмәк үчүн, дүнјәви зәһәрдән дадмаг һәвәсинә тәслим ола биләрләр (1 Јәһја 2:15—17; Вәһј 18:1—5).

16. а) Өзүмүзә һансы суаллары верә биләрик? б) Бизи нәјә өјрәдир вә нәјә тәшвиг едирләр?

¹⁶ Ағры вә изтирабы дадмаг үчүн өзүмүзү нә иләсә јандырмаға дәјәрми? Башгаларынын аҹы тәҹрүбәләри үзәриндә өјрәнмәк даһа јахшы олмазмы? Нә итирдијимизи јохламаг үчүн, бу дүнјанын “мурдарлыгларына јенидән гапылмаға” дәјәрми? (2 Петер 2:20—22). Петер, бир заманлар Шејтан дүнјасына мәхсус олан биринҹи әсрин мәсиһчиләринә хатырлатды: “Јетәр ки, сиз кечмиш заманларда иман ҝәтирмәјәнләрин истәкләрини јеринә јетириб, өмрүнүзү сәфаһәтлә, шәһвәтлә, сәрхошлугла, ишрәт аләмләри илә, ички мәҹлисләри илә вә ијрәнҹ бүтпәрәстликлә кечирдиниз”. Хејр, инсанын нә дәрәҹәдә алчала биләҹәјини анламаг үчүн, бизә бу дүнјанын “позғунлуғунда” иштирак етмәк лазым дејил (1 Петер 4:3, 4). Әксинә, Падшаһлыг Залларында - Мүгәддәс Китабын тә’лим мәркәзләриндә - бизә Јегованын јүксәк әхлаг нормаларыны өјрәдирләр. Бундан әлавә, һәгигәтдә олдуғумуза әмин олмамыз вә бунунла да һәгигәти мәнимсәмәмиз үчүн дүшүнҹәмизи ишләтмәјә тәшвиг олунуруг (Јешу 1:8; Ромалылара 12:1, 2; 2 Тимотејә 3:14—17).

Адымыз - садәҹә сөзләр дејил

17. Биз һансы тәрздә Јегованын јарарлы Шаһидләри ола биләрик?

¹⁷ Әҝәр һәгигәти мәнимсәмишиксә, онда һәр бир мүнасиб имкан јарананда, ону башгалары илә бөлүшмәјә ҹан атаҹағыг. Бу о демәк дејил ки, мараг ҝөстәрмәјән инсанлары һәгигәти гәбул етмәјә вадар едәҹәјик (Матта 7:6). Бу о демәкдир ки, Јегованын Шаһидләри олдуғумузу башгаларына ҹәсарәтлә билдирәҹәјик. Әҝәр инсан ҹүз’и мараг ҝөстәрирсә - сәмими гәлбдән суаллар верир вә ја биздән Мүгәддәс Китаб нәшрләрини гәбул едирсә - үмидимизи онунла бөлүшмәјә һазыр олаҹағыг. Буна ҝөрә һарада олсаг да - евдә, ишдә, мәктәбдә, мағазада вә ја истираһәт ҝушәләриндә - јахшы олар ки, өзүмүзлә һәмишә һансыса әдәбијјат олсун (1 Петер 3:15).

18. Мәсиһчи олдуғумузу башгаларына ајдын шәкилдә билдирәрәк, неҹә чохлу фајда әлдә етмәк олар?

¹⁸ Мәсиһчи олдуғумузу әтрафдакылара ајдын тәрздә билдирәрәк, Шејтанын мәкрли һүҹумларындан даһа јахшы мүдафиә олуна биләрик. Јегованын Шаһидләри ишләјән јерләрдә киминсә ад ҝүнүнү, Милад бајрамыны гејд едир вә ја лотереја ојнајырларса, чох вахт белә сөзләр ешитмәк олар: “Она мүраҹиәт етмәјин һеч бир хејри јохдур. О, Јегованын Шаһидидир”. Мәһз елә бу сәбәбдән, инсанлар бизим јанымызда әдәбсиз зарафатлардан да чәкинә биләрләр. Буна ҝөрә дә, башгаларына мәсиһчи иманымыз барәсиндә данышарыгса, бу бизә чох фајда ҝәтирәҹәкдир. Һәвари Петер гејд етди: “Әҝәр јахшылыг етмәјә сә’ј ҝөстәрсәниз, сизә ким пислик едәр? Амма әҝәр салеһлик уғрунда әзијјәт чәксәниз белә, сиз бәхтијарсыныз” (1 Петер 3:13, 14).

19. Ахыр ҝүнләрин сонуна јахынлашдығымызы һарадан билирик?

¹⁹ Һәгигәти мәнимсәјәрәк башга фајда да әлдә едирик - бу әшјалар системинин сон ҝүнләриндә јашадығымыза әмин олуруг. Билирик ки, Мүгәддәс Китабын чох пејғәмбәрликләри сон иҹрасына јахынлашырa. Павелин “ахыр ҝүнләрдә чәтин анлар”ын ҝәләҹәји һагдакы хәбәрдарлығы, кечән јүзиллијин чохлу дәһшәтли һадисәләри илә тәсдиг олунур (2 Тимотејә 3:1—5; Марк 13:3—37). Бу јахынларда дәрҹ олунан гәзетдә, ХХ әср һаггындакы мәгаләләрдән бири белә адланырды: “Бу әср тарихә вәһшилик әсри кими дахил олаҹагдыр”. Мәгаләдә дејилирди: “1999-ҹу ил, ән ганлы јүзиллијин икинҹи јарысынын ән ганлы или олмушдур”.

20. Бизим зәманәмиздә нә етмәк лазымдыр?

²⁰ Инди сарсылмағын вахты дејил. Һәр шејдән ҝөрүнүр ки, Јегова, милләтләрин һамысына шәһадәт олсун дејә бүтүн дүнјада кечирилән Мүгәддәс Китабын бөјүк маарифләндирмә ишини хејир-дуаландырыр (Матта 24:14). Һәгигәти мәнимсәјин вә ону башгалары илә бөлүшүн. Әбәдијјән јашамағыныз, инди ҝөрдүјүнүз ишдән асылыдыр. “Котан”дан лазыми тәрздә јапышмајан инсан, Јегованын хејир-дуасыны ала билмәз (Лука 9:62). Инди “мөһкәм, сарсылмаз” олмағын, “һәр заман Рәббин ишиндә тәрәгги” етмәјин вә “Рәббин јолунда” чәкдијимиз әмәјин әбәс олмадығыны дүшүнмәјин вахтыдыр (1 Коринфлиләрә 15:58).

[Һашијә]

Хатырлајырсынызмы?

• Шүбһәләри арадан неҹә галдыра биләрик?

• Елишанын гуллугчусунун нүмунәси әсасында нә өјрәнә биләрик?

• Өзүмүзү даима һансы алдадыҹы шејләрдән горумалыјыг?

• Јегованын Шаһидләри олдуғумузу башгаларына нәјә ҝөрә ајдын шәкилдә билдирмәлијик?

[19-ҹу сәһифәдәки шәкил]

Ҝөрүнмә, шүбһәләриндән азад олмагда Елишанын гуллугчусуна көмәк етди.

[20-ҹи сәһифәдәки шәкилләр]

Мүгәддәс Китабы мүнтәзәм өјрәнмәк вә дуа етмәк, шүбһәләри арадан галдырмагда бизә көмәк едәҹәкдир.

[21-ҹи сәһифәдәки шәкил]

Бениндәки бу Залда олдуғу кими, Падшаһлыг Залларында бизә Јегованын јүксәк әхлаг нормаларыны өјрәдирләр.