Унутган динләјиҹиләр олмајын
“Аллаһ кәламыны јалныз ешитмәклә кифајәтләниб, өзүнүзү алдатмајын; бу кәламын иҹрачысы да олун” (ЈАГУБ 1:22).
1. Гәдим Исраил халгы һансы мө’ҹүзәләрин шаһиди олмаг шәрәфинә лајиг ҝөрүлдү?
“УНУДУЛМАЗ” — бу сөз, гәдим Мисирдә Јегованын ҝөстәрдији мө’ҹүзәләри тәсвир етмәк үчүн мүнасиб сөздүр. Он ҹәзадан һәр бири, шүбһәсиз ки, горху ојадан иди. Бу зәрбәләрдән сонра исә, Гырмызы дәнизин араланмыш сулары арасындан кечәрәк, Исраил халгы валеһедиҹи тәрздә азад едилди (Тәснијә 34:10—12). Әҝәр сиз бу һадисәләрин шаһиди олсајдыныз, үмидварыг ки, һәмин һадисәләри өз ирадәсинә әсасән һәјата кечирән Шәхси һеч заман унутмаздыныз. Амма мәзмурчу охујурду: [Исраиллиләр] Аллаһы, хиласкарларыны унутдулар, Мисирдә әзәмәтли ишләр гөрәни, Һам өлкәсиндә мөһтәшәм ишләр гөрәни, Гырмызы дәниздә вәһмли ишләр гөрәни унутдулар” (Мәзмур 106:21, 22).
2. Нәдән ҝөрүнүр ки, исраиллиләр Аллаһа олан миннәтдарлыг һиссини тез итирдиләр?
2 Исраиллиләр Гырмызы дәниздән кечәркән “Рәбдән горхдулар вә Рәббә... инандылар” (Чыхыш 14:31). Кишиләр Муса илә бирликдә Јеговаја зәфәр нәғмәси охудулар, Мәрјәм илә диҝәр гадынлар исә дәфләрдә чалыб, ојнајараг һәмин нәғмәни тәкрар етдиләр (Чыхыш 15:1, 20). Бәли, Јегованын гүдрәтли ишләри, Онун халгына бөјүк тә’сир бағышламышды. Амма исраиллиләр бу ишләри Едәнә гаршы миннәтдарлыг һиссини тез итирдиләр. Артыг тезликлә, онлардан чоху јаддашдан мәһрум олан инсанлар кими даврандылар. Онлар Јеговаја гаршы дејинмәјә вә ҝилејләнмәјә башладылар. Бә’зиләри исә бүтпәрәстлик вә әхлагсызлыгла мәшғул олдулар (Сајлар 14:27; 25:1—9).
Бизи нә унутган едә биләр?
3. Гејри-камил олдуғумуз үчүн нәләри унуда биләрик?
3 Исраиллиләрин нанкорлуғуну анламаг, доғрудан да чәтиндир. Анҹаг бу ҹүр һадисә бизимлә дә баш верә биләр. Бәли, биз, Аллаһын мө’ҹүзәләринин шаһиди олмамышыг. Анҹаг Аллаһла мүнасибәтимиз инкишаф етмәјә башладығы ҝүндән руһани һәјатымызда, шүбһәсиз ки, унудулмаз һадисәләр олубдур. Бә’зиләри Мүгәддәс Китаб һәгигәтини неҹә гәбул етдикләрини хатырлајырлар. Диҝәр севинҹли анлары, мәсәлән, өзүмүзү Јеговаја һәср етмәк үчүн Она сөјләдијимиз дуаны, мәсиһчи хүсусунда суда вәфтиз олунмағымызы да садаламаг олар. Бизләрдән чохумуз Јегованын көмәјини һәјатын башга саһәсиндә һисс едибдир (Мәзмур 118:15). Ән әсасы исә одур ки, Аллаһын Оғлу Иса Мәсиһин гурбанлыг өлүмү васитәсилә хилас олмаг үмидинә маликик (Јәһја 3:16). Бүтүн бунлара бахмајараг, хошаҝәлмәз мејлләримиз јарананда вә ја һәјат чәтинликләрилә гаршылашанда, гејри-камил олдуғумуза ҝөрә, Јегованын бизим үчүн етдији хејирхаһлыглары асанлыгла унуда биләрик.
4, 5. а) Унутган динләјиҹиләр олмаг тәһлүкәси һаггында Јагуб һансы хәбәрдарлығы верди? б) Јагубун инсан вә ҝүзҝү һаггында истифадә етдији әјани нүмунәсиндәки принсипә биз неҹә риајәт едә биләрик?
4 Исанын анабир гардашы Јагуб һәмиманлыларына јаздығы мәктубунда, унутган динләјиҹиләр олмағын тәһлүкәси һаггында хәбәрдарлыг едирди. О јазырды: “Аллаһ кәламыны јалныз ешитмәклә кифајәтләниб, өзүнүзү алдатмајын; бу кәламын иҹрачысы да олун. Чүнки кәламы ешидиб ону иҹра етмәјән, ҝүзҝүдә өз сифәтинин ҹизҝиләрини сејр едән адама бәнзәјир: о өз-өзүнә бахыр, кәнара чәкилир вә дәрһал неҹә олдуғуну унудур” (Јагуб 1:22—24). Јагуб бу сөзләрлә нә демәк истәјирди?
5 Биз, хариҹи ҝөрүнүшүмүздә дүзәлишә еһтијаҹ олан јерләри ҝөрмәк үчүн адәтән һәр сәһәр ҝүзҝүјә бахырыг. Анҹаг башымыз мүхтәлиф ишләрә гарышанда, ҝүзҝүдә ҝөрдүкләримиз һаггында артыг фикирләшмирик. Руһани мә’нада да буна бәнзәр һал баш верә биләр. Аллаһын Кәламында “өзүмүзә бахараг”, һазырда неҹә олдуғумуз вәзијјәти Јегованын биздән ҝөзләдији вәзијјәтлә мүгајисә едирик. Бу заман нөгсанларымыз үзә чыхыр. Нөгсанларымызы ашкар етдикдә исә, өзүмүздә дәјишиклик етмәјә тәшвиг һисси дујмалыјыг. Амма ҝүндәлик ишләрлә вә проблемләримизин һәлли илә мәшғул оларкән, руһани ишләр барәдә фикирләшмәји асанлыгла унуда биләрик (Матта 5:3; Лука 21:34). Бунунла да санки, севән Аллаһын бизим үчүн етдији ишләри унудуруг. Әҝәр буна јол веририксә, ҝүнаһлы мејлләр бизә һаким ола биләр.
6. Јегованын сөзүнү унутмамагда Мүгәддәс Китабын һансы ајәләри бизә көмәк едә биләр?
6 Һәвари Павел, коринфлиләрә јаздығы биринҹи мәктубунда, сәһрада ҝәзән унутган исраиллиләрдән дә бәһс едир. Павелин јаздыглары, биринҹи әсрдәки мәсиһчиләрә фајда вердији кими, Јегованын сөзләрини унутмамагда бизә дә көмәк едә биләр. Беләликлә, ҝәлин 1 Коринфлиләрә 10:1—12 ајәләрини нәзәрдән кечирәк.
Дүнјәви еһтираслары рәдд един
7. Исраиллиләр Јегованын онлары севдијинә даир һансы әсаслы шәһадәтлији алдылар?
7 Павелин исраиллиләр һаггында јаздыглары мәсиһчиләр үчүн хәбәрдарлыгдыр. О јазырды: “Гардашлар, сизи хәбәрсиз гојмаг истәмирәм ки, аталарымызын һамысы булуд алтында иди вә һамысы дәниздән кечди; вә һамысы Мусаја, булуда вә дәнизә вәфтиз олундулар” (1 Коринфлиләрә 10:1—4, И—93). Мусанын ҝүнләриндә Исраил халгы Аллаһын гүввәсинин гүдрәтли тәрздә тәзаһүрүнү, о ҹүмләдән онлара ҝүндүз јол ҝөстәрән вә Гырмызы дәнизи кечәрәк гачыб хилас олмагда көмәк едән гејри-тәбии булуд сүтунуну ҝөрдү (Чыхыш 13:21; 14:21, 22). Бәли, исраиллиләр Јегованын онлары севдијинә даир әсаслы шәһадәтлик алдылар.
8. Исраиллиләрин руһани ишләри унутмалары нәјә ҝәтириб чыхарды?
8 “Амма Аллаһ онларын чохундан разы дејилди; чүнки ҹәсәдләри сәһраја сәрилди”, дејә Павел давам едир (1 Коринфлиләрә 10:5). Неҹә дә кәдәрлидир! Мисирдән чыхан исраиллиләрин әксәријјәти Вә’д едилән дијара дахил олмаға лајиг ҝөрүлмәди. Онлар, имансызлыглары уҹбатындан Аллаһын лүтфүнү итирәрәк сәһрада өлдүләр (Ибраниләрә 3:16—19). Биз бундан һансы ибрәт дәрсини ала биләрик? Павел дејир: “Бу һадисәләр бизим үчүн ибрәт олсун дејә баш верди ки, биз онлар кими пислијә мејл ҝөстәрмәјәк” (1 Коринфлиләрә 10:6).
9. Јегова өз халгынын гејдинә неҹә галды вә исраиллиләр буна неҹә мүнасибәт ҝөстәрдиләр?
9 Сәһрада руһани мөһкәмликләрини горумаг үчүн исраиллиләр чох шејә малик идиләр. Онлар Јегова илә әһд бағладылар вә Она һәср олунмуш халг олдулар. Онлара каһинлик, һәмчинин ибадәтин мәркәзи сајылан сәјјар мә’бәд вә Јеговаја гурбанлар тәгдим етмәјә даир ганунлар верилмишди. Исраиллиләр исә бу руһани бәхшишләрә ҝөрә севинмәк әвәзинә, Аллаһын онлара вердији мадди не’мәтләрә наразылыг етмәјә башладылар (Сајлар 11:4—6).
10. Биз нәјә ҝөрә Аллаһы даима хатиримиздә сахламалыјыг?
10 Сәһрада ҝәзиб-долашан исраиллиләрдән фәргли олараг, Јегованын мүасир халгы Онун лүтфүнә маликдир. Анҹаг ајры-ајрылыгда һәр биримиз үчүн Аллаһы һеч заман унутмамаг олдугҹа ваҹибдир. Бу, руһани нәзәрләримизи зәифләдә билән мәнфәәтпәрәст мејлләрә мүгавимәт ҝөстәрмәкдә бизә көмәк едәр. Биз, “Аллаһа гаршы һөрмәтсизлији вә дүнјәви еһтираслары рәдд едиб, бу дүнјада тәмкинли, салеһ вә Аллаһ јолуна ујғун бир өмүр” сүрмәјә гәти гәрарлы олмалыјыг (Титуса 2:12). Бизләрдән мәсиһчи јығынҹағына ушаглыгдан мәхсус олан кәсләр, јахшы бир шеј итирдијини дүшүнмәмәлидирләр. Әҝәр ағлымыза белә фикирләр ҝәлирсә, Јегованы вә Онун бизим үчүн һазырладығы ҝөзәл хејир-дуалары хатырламаг ваҹибдир (Ибраниләрә 12:2, 3).
Јеговаја һәр шејдә итаәткарлыг
11, 12. Инсан, сурәтләрә пәрәстиш етмәдән, неҹә бүтпәрәст ола биләр?
11 Павел бизи даһа бир тәһлүкә һаггында хәбәрдар едир: “Онларын бә’зиләри кими бүтпәрәст дә олмајын. Онларын һаггында белә јазылмышдыр: “Халг јејиб-ичмәк үчүн отурду вә галхыб чылғынлыгла әјләнмәјә башлады” (1 Коринфлиләрә 10:7). Павел бу ајәдә, гызыл дана дүзәлтмәк үчүн исраиллиләрин Һаруну јола ҝәтирдикләри һаггында сөјләјир (Чыхыш 32:1—4). Чәтин ки, бизләрдән ким исә һәгиги мә’нада бүтпәрәстлијә ҹан атсын. Лакин башга бир тәһлүкә мөвҹуддур. Егоист мејлләрин, бизи Јеговаја үрәкдән ибадәт етмәкдән јајындырмасына јол вермәклә бүтпәрәстлијә гапыла биләрик (Колослулара 3:5).
12 Павел башга мәктубунда, руһани јох, илк нөвбәдә мадди шејләрин гајғысыны чәкән адамлар һаггында јазмышдыр. О, “Мәсиһин чармыхынын дүшмәнләри кими һәрәкәт едән” инсанлар һаггында јазырды: “Онларын сону өлүм, онларын танрысы гарын”дыр (Филипилиләрә 3:18, 19). Бу адамларын ибадәт етдикләри бүт ојма сурәт дејилди. Онларын бүтү мадди шејләрә ҹан атмалары иди. Сөзсүз ки, истәкләрин һамысы пис дејил. Јегова бизи мүхтәлиф тәләбатларла вә мүхтәлиф шејләрдән һәзз алмаг габилијјәти илә јарадыб. Анҹаг кеф-сәфа далынҹа гачмағы Аллаһла мүнасибәтдән үстүн тутан шәхсләри ҹәсарәтлә бүтпәрәст адландырмаг олар (2 Тимотејә 3:1—5).
13. Гызыл дана әһвалатындан биз нәјә өјрәнә биләрик?
13 Исраиллиләр Мисирдән чыхдыгдан сонра, ибадәт етмәк үчүн гызыл дана дүзәлтдиләр. Бу һадисәнин сөјләнилмәсиндә, бүтпәрәстлијә гаршы хәбәрдарлыгдан әлавә, ваҹиб олан башга бир ибрәт дәрси дә вар. Исраиллиләр Јегованын ајдын ҝөстәришинә итаәтсизлик етдиләр (Чыхыш 20:4—6). Лакин онлар, Јегованы өз Аллаһлары кими инкар етмәк нијјәтиндә дејилдиләр. Онлар төкмә данаја гурбанлар кәтирир вә бу мәрасими “Јеговаја бајрам” (ЈД) адландырырдылар. Етдикләри бүтпәрәстлијә Аллаһын диггәт јетирмәјәҹәјини дүшүнәрәк, исраиллиләр өзләрини алдадырдылар. Бу давраныш Јегова үчүн тәһгиредиҹи иди вә Ону чох гәзәбләндирди (Чыхыш 32:5, 7—10; Мәзмур 106:19, 20).
14, 15. а) Унутган динләјиҹиләр олмалары исраиллиләрә нә үчүн бәраәт газандырмырды? б) Әҝәр унутган динләјиҹиләр олмамаға гәти гәрарлыјыгса, Јегованын әмрләрилә әлагәдар неҹә давранаҹағыг?
14 Чәтин ки, Јегованын Шаһидләриндән ким исә јалан динә гошулмаг фикринә дүшсүн. Лакин јығынҹағын үзвү олдуғуна бахмајараг да, ким исә Јегованын ҝөстәришинә зидд даврана биләр. Унутган динләјиҹиләр олмалары Исраил халгына бәраәт газандырмырды. Онлар Он әмри ешитмиш вә Муса Аллаһын: “Мәнимлә башга илаһиләр дүзәлтмәјәҹәксиниз; өзүнүз үчүн ҝүмүшдән илаһиләр, гызылдан илаһиләр дүзәлтмәјәҹәксиниз” әмрини охујанда иштирак етмишдиләр (Чыхыш 20:18, 19, 22, 23). Буна бахмајараг, исраиллиләр гызыл данаја ибадәт едирдиләр.
15 Унутган динләјиҹиләр оларыгса, биз дә бәраәт газана билмәрик. Мүгәддәс Јазыларда һәјатын мүхтәлиф саһәләринә аид Аллаһын ҝөстәришләри вар. Мәсәлән, Јегованын Кәламы, борҹ пул алыб ҝери гајтармајан инсанлары гәти шәкилдә мүһакимә едир (Мәзмур 37:21). Мүгәддәс Китаб ушаглара валидејнләринә табе олмағы, аталара исә өвладларыны “Рәббин... нәсиһәти илә” бөјүтмәји бујурур (Ефеслиләрә 6:1—4). Субај мәсиһчиләрә ҝөстәриш верилир ки, “јалныз... Рәббә бағлы” оланларла аилә гурсунлар, Аллаһын евли олан хидмәтчиләринә исә дејилир: “Гој һәр кәс никаһа һөрмәт етсин вә кәбин јатағы ләкәсиз олсун; чүнки Аллаһ, әхлагсызлары вә зинакарлары мәһкум едәҹәкдир” (1 Коринфлиләрә 7:39; Ибраниләрә 13:4). Әҝәр биз унутган динләјиҹиләр олмамаға гәти гәрарлыјыгса, Аллаһын бу вә ја диҝәр ҝөстәришләринә чох ҹидди јанашыб, һәмин ҝөстәришләрә мүвафиг сурәтдә давранаҹағыг.
16. Гызыл данаја ибадәт етмәк нә илә нәтиҹәләнди?
16 Јегова, исраиллиләрин өз истәдикләри кими Она ибадәт етмәк ҹәһдләрини мүһакимә етди. Үч мин адам мәһв едилди — онлар, еһтимала ҝөрә, гызыл данаја иғтишашлы ибадәтин сәбәбкарлары идиләр. Диҝәр ганунсузлары исә Јегова өзү һәлак етди (Чыхыш 32:28, 35). Аллаһын Кәламыны охујан, лакин Аллаһа нәдә итаәткар олуб-олмамағы өзү гәрара алан кәсләр үчүн бу һадисә неҹә дә ибрәтвериҹидир!
“Ҹинси әхлагсызлыгдан чәкинин”
17. 1 Коринфлиләрә 10:8 ајәсиндә һансы һадисәдән бәһс олунур?
17 Дүнјәви еһтираслара ујмаг нәтиҹәсиндә јаранан руһани унутганлығын нәјә сәбәб олдуғуну Павелин бу сөзләри ҝөстәрир: “Ҹинси әхлагсызлыг етмәјәк; онлардан бә’зиләри елә етдиләр вә бир ҝүндә ијирми үч мин нәфәр өлдү” (1 Коринфлиләрә 10:8). Бурада Павел, Исраил халгынын 40 иллик сәјаһәтинин сонунда Моав дүзәнлијиндә баш верән һадисәни нәзәрдә тутур. Бу һадисәләрдән бир гәдәр әввәл Јегова онлара Иорданын шәргиндәки мәмләкәти әлә кечирмәјә көмәк етди, амма онлардан чоху унутган вә нанкор чыхдылар. Вә’д едилән дијарын сәрһәдди јахынлығында Исраил халгы ҹинси әхлагсызлыға вә Баал-пеора едилән натәмиз ибадәтә ујду. Тәхминән 24 мин адам мәһв едилди, онлардан мин нәфәри исә һәмин ишләрин сәбәбкары иди (Сајлар 25:9).
18. Һансы һәрәкәтләр ҹинси әхлагсызлыға сөвг едә биләр?
18 Бу ҝүн Јегованын халгы өзүнүн јүксәк әхлаг нормалары илә таныныр. Амма бә’зи мәсиһчиләр, ҹинси әхлагсызлыға һәвәс јаранан заман, Аллаһ вә Онун принсипләри һаггында дүшүнмәјә сон гојдулар. Онлар унутган динләјиҹиләр олдулар. Әввәлҹә зина етмәк јох, порнографијаја бахмаг, налајиг зарафатлар, ешгбазлыг етмәк вә ја әхлаги ҹәһәтдән сүрүшкән олан инсанларла јахын үнсијјәтдә олмаг һәвәси јарана биләр. Бүтүн бунлар мәсиһчини ҝүнаһ ишләтмәјә тәһрик едир (1 Коринфлиләрә 15:33; Јагуб 4:4).
19. Мүгәддәс Китабын һансы нәсиһәти “ҹинси әхлагсызлыгдан чәкинмәјә” бизә көмәк едир?
19 Әҝәр әхлагсызлыгла мәшғул олмаг һәвәси јаранырса, Јегова һаггында дүшүнмәјә сон гојмаг олмаз. Әксинә, Онун Кәламындакы “хатырлатмалара” риајәт етмәк лазымдыр (Мәзмур 119:1, 2, ЈД). Биз мәсиһчиләрдән чоху әхлагҹа тәмиз галмаға чалышыр, анҹаг Аллаһын нормалары әсасында давранмаг үчүн, даима гүввә сәрф етмәк лазымдыр (1 Коринфлиләрә 9:27). Павел Ромада јашајан мәсиһчиләрә јазырды: “Сизин итаәтиниз һамыја бәллидир; бунун үчүн мән сизә ҝөрә севинирәм. Амма сизин јахшылыг барәдә, мүдрик вә пислик барәдә мә’сум олманызы истәјирәм” (Ромалылара 16:19). Исраиллиләрин 24 мин нәфәри ишләтдији ҝүнаһлара ҝөрә е’дам олундуғу кими, мүасир зинакарлар вә ганунсузлар үзәриндә дә тезликлә Јегованын мәһкәмәси олаҹагдыр (Ефеслиләрә 5:3—6). Буна ҝөрә дә биз, унутган динләјиҹиләр олмамалы, “ҹинси әхлагсызлыгдан чәкинмәјә” давам етмәлијик (1 Коринфлиләрә 6:18).
Јегованын бәхшишләрини һәмишә гијмәтләндирин
20. Исраиллиләр Јегованы неҹә сынадылар вә бу нәјә сәбәб олду?
20 Мәсиһчиләрин бөјүк әксәријјәти ҹинси әхлагсызлыға ујмурлар. Буна бахмајараг, өзүмүздә дејинҝәнлији вәрдиш етдирмәкдән гачынмалыјыг, чүнки бу хүсусијјәтлә Јегованын наразылығыны газана биләрик. Павел бизә нәсиһәт едир: “Мәсиһи [“Јегованы”, ЈД] сынамајаг; онлардан [исраиллиләрдән] бә’зиләри елә етди вә иланларла һәлак едилдиләр. Дејинмәјин; онлардан бә’зиләри дејиндиләр вә өлдүрүҹү мәләк тәрәфиндән мәһв едилдиләр” (1 Коринфлиләрә 10:9, 10). Исраил халгы Мусаја вә Һаруна — һәтта Аллаһын өзүнә гаршы да дејинди: онлар мө’ҹүзәли шәкилдә верилән маннаја наразылыг етдиләр (Сајлар 16:41; 21:5). Онларын дејинмәләри, Јегова үчүн зинакарлыгдан азмы тәһгир олду? Мүгәддәс Китаб ҝөстәрир ки, дејинҝәнләрин әксәријјәти иланларла һәлак едилди (Сајлар 21:6). Бу һадисәдән әввәл исә 14 700-дән чох дејинҝән адам мәһв едилмишди (Сајлар 16:49). Ҝәлин, вердији бәхшишләрә һөрмәтсиз јанашмагла Јегованын сәбрини түкәндирмәјәк.
21. а) Павел, Аллаһ тәрәфиндән илһамланан һансы хәбәрдарлығы јазмышды? б) Јагуб 1:25 ајәсинә әсасән, бизи әсл мә’нада нә хошбәхт едә биләр?
21 Мәсиһчиләрә јаздығы хәбәрдарлығы Павел бу нәсиһәтлә тамамлајыр: “Бүтүн бунлар ибрәт олараг онларын башына ҝәлирди; сон әсрләрә чатан бизләр үчүн дә мәсләһәт олараг гејд едилди. Буна ҝөрә дә, ким дүшүнүрсә ки, ајаг үстә дуруб, еһтијатлы олсун ки, јыхылмасын” (1 Коринфлиләрә 10:11, 12). Исраиллиләр кими, биз дә Јеговадан чох хејир-дуалар алмышыг. Амма хејирхаһ ишләринә ҝөрә Аллаһа миннәтдарлыг етмәји унутмагла, исраиллиләрә бәнзәмәмәлијик. Һәјатын чәтинликләри бизи әлдән саланда, ҝәлин Аллаһын Кәламындакы валеһедиҹи вә’дләр үзәриндә дүшүнәк. Ҝәлин Јегова илә олан дәјәрли мүнасибәтимизи һәмишә јадда сахлајаг вә Падшаһлыг һаггында тәблиғ етмәк үчүн бизә һәвалә олунан иши јеринә јетирмәјә давам едәк (Матта 24:14; 28:19, 20). Белә давранмағымыз бизи мүтләг хошбәхт едәҹәкдир, чүнки Мүгәддәс Јазылар вә’д едир: “Лакин ким камил гануна, азадлыг ганунуна диггәтлә бахыб она бағлы галарса вә унутган динләјиҹи дејил, иҹраедиҹидирсә, өз әмәлиндә хошбәхт олаҹагдыр” (Јагуб 1:25).
Сиз неҹә ҹаваб верәрдиниз?
• Унутган динләјиҹиләр олмағымыза нә сәбәб ола биләр?
• Аллаһа һәр шејдә итаәткар олмаг нәјә ҝөрә чох ваҹибдир?
• “Ҹинси әхлагсызлыгдан” неҹә чәкинә биләрик?
• Јегованын бәхшишләринә неҹә јанашмалыјыг?
[9-ҹу сәһифәдәки шәкил]
Исраиллиләр Аллаһын онлар үчүн етдији гүдрәтли ишләри унутдулар.
[10-ҹу сәһифәдәки шәкил]
Јегованын хидмәтчиләри јүксәк әхлаг нормаларына риајәт етмәјә гәти гәрарлыдырлар.