Рәббин Хатирә ҝеҹәси неҹә гејд олунур?

РӘББИН Хатирә Ҝеҹәсинин неҹә гејд едилмәли олдуғуна ајдынлыг ҝәтирәрәк, мәсиһчи олан һәвари Павел јазыр: “Мән сизә Рәббин Өзүндән алдығымы чатдырдым вә дедим ки, Рәбб Иса әлә верилдији ҝеҹә чөрәк ҝөтүрдү вә шүкүр едиб, ону парчалады вә деди: “Алын, јејин. Бу, Мәним сизин үчүн гырылан бәдәнимдир; буну Мәни анмаг үчүн един”. Еләҹә дә, ахшам јемәјиндән сонра касаны ҝөтүрүб деди: “Бу каса Мәним ганымла ҝерчәкләнән Әһди-Ҹәдиддир; буну, ичдијиниз һәр заман, Мәни анмаг үчүн един”. Чүнки бу чөрәји једијиниз вә бу касадан ичдијиниз һәр заман, сиз Рәббин өлүмүнү О ҝәлинҹәјәдәк е’лан етмиш олурсунуз” (1 Коринфлиләрә 11:23-26).

Павелин сөзләринә әсасән, Рәббин Хатирә Ҝеҹәсини Иса өзүнүн “әлә верилдији ҝеҹә” тә’сис етмишдир. Исаны, ромалылары Мәсиһи дирәјә чәкмәјә тәһрик едиб јәһуди дин рәһбәрләринин әлинә Јәһуда Искарјот вермәли иди. Иса Хатирә Ҝеҹәсини б. е. 33-ҹү илинин 31 март ҹүмә ахшамынын ҝеҹә јарысы тә’сис етди. О, ҹүмә ҝүнү апрелин 1-и ҝүнортадан сонра ишҝәнҹә дирәјиндә өлдү. Јәһуди тәгвиминә әсасән ҝүн бир ҝүнүн ахшамы башлајыб, диҝәр ҝүнүн ахшамы сона чатдығы үчүн һәр ики һадисә — Рәббин Хатирә Ҝеҹәси вә Иса Мәсиһин өлүмү — бир ҝүндә, б. е. 33-ҹү илинин 14 нисанында баш верди.

Чөрәк вә шәрабдан гәбул едәнләрә тапшырылыб ки, онлар буну, Исаны “анмаг үчүн” етсинләр. Буна ҝөрә дә, Рәббин Хатирә Ҝеҹәсинә, һәмчинин Мәсиһин өлүмүнүн Хатирә Ҝеҹәси дә дејилир.

Исанын өлүмүнү нәјә ҝөрә гејд етмәк лазымдыр?

Бу суалын ҹавабыны, Мәсиһин өлүмүнүн нә илә бағлы олдуғуну анладыгдан сонра билмәк олар. Иса өз өлүмү илә ҝөстәрди ки, о, Јеһованын һөкмранлығынын садиг тәрәфдарыдыр. Бунунла о, сүбут етди ки, инсанларын Аллаһа јалныз мәнфәәт ҝүдмәк мәгсәди илә хидмәт етдикләринә даир Шејтанын ирәли сүрдүјү иддиа јаландыр (Ејуб 2:1-5; Сүлејманын мәсәлләри 27:11). Иса камил инсан олдуғу үчүн, ејни заманда өз өлүмү илә “бир чохлары үчүн ҹаныны фидијә олараг” верди (Матта 20:28). Адәм Аллаһа гаршы ҝүнаһ ишләтдикдә, камил инсан һәјатыны вә бу һәјатын она верәҹәји һәр шеји итирди. Лакин “Аллаһ дүнјаны [бәшәријјәти] елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун” (Јәһја 3:16). Һәгигәтән дә “ҝүнаһын әвәзи өлүм, Аллаһын ән’амы исә Рәббимиз Мәсиһ Исада әбәди һәјатдыр” (Ромалылара 6:23).

Беләликлә, Иса Мәсиһин өлүмү ики ән бөјүк мәһәббәтин тәзаһүрү илә әлагәлидир: Јеһова инсанлара ән бөјүк мәһәббәти Өз Оғлуну гурбан вермәклә тәзаһүр етдирди, Иса исә өз инсан һәјатыны һазырлыгла гурбан вермәклә инсанлара фәдакар мәһәббәт ҝөстәрди. Исанын өлүмүнүн Хатирә Ҝеҹәси илә мәһәббәтин бу ики тәзаһүрү уҹалдылыр. Бу мәһәббәт бизә гаршы тәзаһүр олундуғу үчүн, миннәтдар олмалы дејиликми? Биз өз миннәтдарлығымызы, мисал үчүн, Рәббин Хатирә Ҝеҹәсинә ҝәлмәклә билдирә биләрик.

Чөрәјин вә шәрабын мә’насы

Иса, Рәббин Хатирә Ҝеҹәсини тә’сис едәндә, символлар хүсусунда чөрәк вә бир каса шәрабдан истифадә етмишди. Иса чөрәји ҝөтүрдү, “шүкүр едиб, ону парчалады вә деди: “...Бу, Мәним сизин үчүн гырылан бәдәнимдир” (1 Коринфлиләрә 11:24). Судан вә маја гатылмамыш ундан һазырланмыш чөрәк чох көврәк олдуғундан, пајламаг вә јемәк үчүн ону парчаламаг лазым иди. Мүгәддәс Јазыларда маја ҝүнаһы тәмсил едир (Матта 16:11, 12; 1 Коринфлиләрә 5:6, 7). Иса ҝүнаһсыз иди. Буна ҝөрә дә онун камил инсан бәдәни инсанлар үчүн мүвафиг фидијә олараг хидмәт едирди (1 Јәһја 2:1, 2). Мәсиһин ҝүнаһсыз бәдәнини тәмсил едән чөрәјин мајасыз олмасы неҹә дә мүнасибдир!

Иса, һәмчинин бир каса тәмиз гырмызы шәраба ҝөрә дә миннәтдарлығыны билдириб деди: “Бу каса Мәним ганымла ҝерчәкләнән Әһди-Ҹәдиддир” (1 Коринфлиләрә 11:25). Касадакы гырмызы шәраб Исанын ганыны тәмсил едир. Б. е. ә. 1513-ҹү илдә гурбан ҝәтирилән бузов вә кечиләрин ганы Аллаһла Исраил халгы арасындакы Ганун әһдинә гануни гүввә вердији кими, еләҹә дә Исанын төкүлән ганы сајәсиндә јени әһд бәргәрар едилди.

Символлардан кимләр гәбул етмәлидир?

Хатирә Ҝеҹәсиндә символлардан кимләрин гәбул етмәк һүгугуна малик олдугларыны мүәј­јән етмәк үчүн, јени әһдин нәдән ибарәт олдуғуну вә бу әһддә һансы тәрәфләрин иштирак етдијини баша дүшмәк лазымдыр. Мүгәддәс Китабда дејилир: “Будур, Рәбб дејир, Исраил еви илә вә Јагубун еви илә јени бир әһд кәсәҹәјим ҝүнләр ҝәлир [...] Шәриәтими онларын ичләринә гојуб, үрәкләри үзәринә ону јазаҹағам; вә мән онлара Аллаһ олаҹағам вә онлар мәнә халг олаҹаглар. [Мән онларын]... фәсадларыны бағышлајаҹағам вә артыг ҝүнаһларыны анмајаҹағам” (Јеремја 31:31-34).

Јени әһд Јеһова Аллаһла хүсуси мүнасибәтләрин олмасыны мүмкүн гылыр. Бу әһдин васитәсилә мүәјјән груп инсанлар Онун халгы, О исә онларын Аллаһы олур. Јеһованын гануну онларын дахилиндә, үрәјиндә јазылыб вә һәтта ҹисмән сүннәтли јәһуди олмајанлар белә јени әһдә дахил олуб, Аллаһла мүнасибәт јарада биләрләр (Ромалылара 2:29). Лука “Аллаһын гејри-јәһудиләрдән Өз ады наминә бир халг тәшкил етмәк үчүн” онлара диггәт јетирмәк нијјәти һаггында дејир (Һәвариләрин ишләри 15:14). 1 Петер 2:10 ајәсинә әсасән онлар ‘халг дејилдиләр, инди исә Аллаһын халгыдырлар’. Мүгәддәс Јазыларда онлар һаггында “Аллаһын Исраили”, јә’ни руһани Исраил кими данышылыр (Галатијалылара 6:16; 2 Коринфлиләрә 1:21). Беләликлә, јени әһд — Јеһова Аллаһла руһани Исраил арасындакы әһддир.

Ахырынҹы ахшам өз шаҝирдләри илә бирликдә оларкән, Иса да онларла әһд бағлады. “Атам мәнимлә падшаһлыг һаггында әһд бағладығы кими, мән дә сизинлә әһд бағлајырам” (Лука 22:29, ЈД). Бу әһд — Падшаһлыг әһдидир. Падшаһлыг әһдинә гәбул едилән гејри-камил инсанларын сајы 144 000 нәфәрдир. Онлар ҝөјләр һәјатына дирилдикдән сонра, падшаһ вә каһинләр кими Мәсиһлә бирликдә идарә едәҹәкләр (Вәһј 5:9, 10; 14:1-4). Беләликлә, Јеһова Аллаһла јени әһдә дахил оланлар, һәмчинин Иса Мәсиһлә Падшаһлыг әһдинә дә дахил олурлар. Рәббин Хатирә Ҝеҹәсиндә символлардан гәбул етмәк һүгугуна јалныз онлар маликдирләр.

Символлардан гәбул етмәк һүгугу оланлар Аллаһла хүсуси мүнасибәтләрә малик олдугларыны вә Мәсиһин һәмварисләри олдугларыны нәдән билирләр? Павел изаһ едир: “[Мүгәддәс] Руһ биздәки руһа [әһвал-руһијјәјә] шәһадәт едир ки, биз Аллаһын өвладларыјыг. Вә әҝәр өвладыјыгса, демәли, ејни заманда варисләрик, Аллаһын варисләријик; вә әҝәр Мәсиһлә бәрабәр иззәт газанмаг үчүн Онунла изтираб чәкириксә, Мәсиһин һәмварисләријик” (Ромалылара 8:16, 17).

Аллаһ Өз мүгәддәс руһу, јә’ни фәал гүввәси васитәсилә Мәсиһин һәмварисләрини мәсһ едир. Бу онлара әминлик верир ки, онлар Падшаһлығын һәмварисләридирләр. Мәсһ едилмиш мәсиһчиләрин ҝөјләр үмиди јараныр. Онлар Мүгәддәс Китабда ҝөјләр һәјаты һаггында дејилән сөзләрин һамысыны өзләринә мүраҹиәт кими гәбул едирләр. Бундан әлавә, онлар јер үзүндәки һәјатла бағлы олан һәр шеји, о ҹүмләдән јер үзүндәки һәјатын өзүнү вә башга инсанларла олан бүтүн мүнасибәтләрини дә гурбан вермәјә һазырдырлар. Мүгәддәс руһла мәсһ едилмишләр јер үзүндә гурулаҹаг Ҹәннәтдәки һәјатын чох ҝөзәл олаҹағыны дәрк етсәләр дә, бу үмид онлар үчүн дејил (Лука 23:43). Онлар јалан дини бахышлара дејил, Аллаһын руһунун тә’сиринин нәтиҹәси олан мөһкәм ҝөјләр үмидинә маликдирләр, буна ҝөрә дә онлар һаглы олараг Хатирә Ҝеҹәсиндә символлардан гәбул едирләр.

Әҝәр ким исә јени әһдә вә Падшаһлыг ­әһдинә дахил олуб-олмадығына там әмин дејилсә, бәс онда неҹә? Әҝәр онун Мәсиһин һәмвариси олмасына даир Аллаһын руһунун шәһадәтлији чатмырса, онда неҹә? Онда һәмин адамын символлардан гәбул етмәси дүзҝүн олмазды. Аллаһ, сөзсүз ки, өзүнү ҝөјләрдә падшаһ вә каһин олмаг үчүн дә’вәтли кими ҝөстәриб, әслиндә исә бу ҹүр дә’вәтә малик олмајан адамдан разы галмазды (Ромалылара 9:16; Вәһј 22:5).

Хатирә Ҝеҹәсини нечә дәфә гејд етмәк лазымдыр?

Исанын өлүмүнү һәр һәфтә вә ја һәтта, ола билсин, һәр ҝүн гејд етмәк лазымдырмы? Мәсиһ Рәббин Хатирә Ҝеҹәсини тә’сис етди вә исраиллиләрин Мисир көләлијиндән азад олунмалары гејд олунан Пасха заманы әдаләтсизҹәсинә өлдүрүлдү. Јәһуди Пасхасы јалныз илдә бир дәфә, 14 нисанда гејд олунурду (Чыхыш 12:6, 14; Левилиләр 23:5). Буна ҝөрә дә “бизим пасха гузумуз” олан Мәсиһин өлүмүнү дә һәр һәфтә вә ја һәр ҝүн дејил, јалныз илдә бир дәфә гејд етмәк лазымдыр (1 Коринфлиләрә 5:7). Рәббин Хатирә Ҝеҹәсини гејд етмәклә, мәсиһчиләр Исанын тә’сис етдији гајдаја риајәт едирләр.

Бәс онда Павелин: “Бу чөрәји једијиниз вә бу касадан ичдијиниз һәр заман, сиз Рәббин өлүмүнү О ҝәлинҹәјәдәк е’лан етмиш олурсунуз” сөзләрини неҹә баша дүшмәк олар? (1 Коринфлиләрә 11:26). Павел дејирди ки, мәсһ едилмиш мәсиһчиләр символлардан нә вахт гәбул етсәләр, о заман Исанын фидијә гурбанлығына олан иманларыны е’лан етмиш олаҹаглар.

Мәсһ едилмиш мәсиһчиләр Мәсиһин өлүмүнү “О ҝәлинҹәјәдәк”, јә’ни Иса өзүнүн “иштиракы” (ЈД) заманы ҝәлиб өз мәсһ едилмиш давамчыларыны дирилмә васитәсилә ҝөјләрә, руһани һәјата гәбул единҹәјәдәк гејд етмәлидирләр (1 Салониклиләрә 4:14-17). Бу, Мәсиһин өз 11 садиг һәварисинә мүраҹиәт етдији сөзләрә мүвафигдир: “Әҝәр ҝедиб јер һазырласам, тәкрар ҝәлиб сизи Өз јаныма ҝәтирәҹәјәм ки, Мән һарадајамса, сиз дә орада оласыныз” (Јәһја 14:3).

Хатирә Ҝеҹәси сизин үчүн нә әһәмијјәт кәсб едир?

Исанын гурбанлығынын сизә фајда ҝәтирмәси вә сизин јер үзүндә әбәди һәјат алманыз үчүн, символлардан мүтләг гәбул етмәк лазымдырмы? Јох. Мүгәддәс Китабын һеч бир јериндә дејилмир ки, Нуһ, Ибраһим, Сара, Исһаг, Ребека, Јусиф, Муса вә Давуд кими Аллаһ горхусуна малик олан инсанлар јер үзүндә јашамаг үчүн дирилдикдән сонра, бу символлардан гәбул едәҹәкләр. Лакин онлар вә јер үзүндә әбәди јашамаг истәјән галан инсанлар Аллаһа вә Мәсиһә, һәмчинин Јеһованын тәгдим етдији Исанын фидијә гурбанлығына иман етмәли олаҹаглар (Јәһја 3:36; 14:1). Әбәди һәјаты алмаг үчүн сиз дә бу ҹүр иман тәзаһүр етдирмәлисиниз. Әҝәр сиз Мәсиһин өлүмүнүн хатирәсинә һәср олунмуш иллик ҝөрүшдә иштирак етсәниз, бу, сизә һәмин ҝөркәмли гурбанлығы хатырладаҹаг вә ола билсин, бу гурбанлыға олан миннәтдарлығынызы артыраҹаг.

Һәвари Јәһја Исанын гурбанлығынын ваҹиблијини белә сөзләрлә гејд етмишдир: “Бунлары сизә [мәсһ едилмиш гардашлара] она ҝөрә јазырам ки, ҝүнаһ ишләтмәјәсиниз. Әҝәр бири ҝүнаһа батса белә, Атанын јанында Мүдафиәчијә, јә’ни адил олан Иса Мәсиһә маликик. О Өзү ҝүнаһларымыз вә јалныз бизим дејил, бүтүн дүнјанын ҝүнаһлары үчүн әфв тә’мин едән гурбандыр” (1 Јәһја 2:1, 2). Мәсһ едилмишләр Исанын гурбанлығынын ҝүнаһларын әфвини тә’мин едән гурбанлыг олдуғуну дејә биләрләр. Лакин бу, һәмчинин бүтүн дүнјанын ҝүнаһлары үчүн верилән гурбандыр, бу гурбанлығын сајәсиндә исә итаәткар бәшәријјәт әбәди һәјаты алмаг имканына маликдир!

Сиз 2004-ҹү ил апрелин 4-дә Исанын ­өлүмүнүн Хатирә Ҝеҹәсиндә иштирак едәҹәксинизми? Бүтүн дүнјада Јеһованын Шаһидләри өз јығынҹагларыны кечирдикләри јерләрдә бу унудулмаз һадисәни гејд едәҹәкләр. Әҝәр ҝәлсәниз, сиз Мүгәддәс Китаб әсасында сөјләниләҹәк ваҹиб мә’рузәдән бөјүк фајда әлдә едәҹәксиниз. Бу мә’рузәдән Јеһованын вә Иса Мәсиһин бизим үчүн нәләр етдикләри барәдә өјрәнәҹәксиниз. Сиз, һәмчинин Аллаһа вә Мәсиһә дәриндән миннәтдар олан вә Исанын фидијә гурбанлығыны јүксәк гијмәтләндирән инсанларла үнсијјәтдән руһани фајда әлдә едәҹәксиниз. Тамамилә мүмкүндүр ки, сизин бурада иштирак етмәјиниз сајәсиндә, Аллаһын әбәди һәјата апаран мәрһәмәтини өз үзәриниздә һисс етмәк арзунуз даһа да ҝүҹләнәҹәкдир. Гој сәмави Атамыз Јеһова Аллаһы севиндирән вә Она иззәт ҝәтирән бу сәмими ҝөрүшә ҝәлмәкдә сизә һеч нә мане олмасын!

[5-ҹи сәһифәдәки шәкил]

Исанын өлүмү ики ән бөјүк мәһәббәтин тәзаһүрү илә әлагәлидир.

[6-ҹы сәһифәдәки шәкил]

Мајасыз чөрәк вә шәраб Исанын ҝүнаһсыз бәдәнинин вә төкүлән ганынын мүвафиг символларыдыр.