Јер үзүндә Аллаһын ирадәси јеринә јетән заман

ИСА шаҝирдләринә: “Ҝөјдә олдуғу кими, јердә дә Сәнин ирадән олсун” дејә дуа етмәји өјрәдән заман, бундан әввәл ҝөјдә Атасы илә јашамыш бир шәхс кими данышырды (Матта 6:10; Јәһја 1:18; 3:13; 8:42). Иса һәлә инсан кими мөвҹуд олмаздан әввәл, ҝөјдә вә јердә баш верән һадисәләрин һамысынын Аллаһын ирадәсинә мүвафиг олдуғу дөврү ҝөрмүшдү. Бу, јүксәк јарадыҹылыг вә мәмнунлуг ҝәтирән ҝөзәл бир дөвр иди (Сүлејманын мәсәлләри 8:27-31).

Аллаһын илк јаратдығы варлыглар, Онун “кәламыны иҹра едән, гүдрәти чох олан мәләкләр”, руһани шәхсијјәтләр иди. Онлар Аллаһын “ирадәсини иҹра едән хидмәтчиләр” олмуш вә олараг галмагдадырлар (Мәзмур 103:20, 21). Бәс мәләкләрин һәр бири ирадә азадлығына малик идими? Бәли, јерин әсасы гојулан заман ‘Аллаһын [бу] оғуллары севинҹлә чағырышырдылар’ (Ејуб 38:7). Онлар Аллаһын нијјәтләринин јеринә јетдији үчүн дујдуглары севинҹләрини бу ҹүр ифадә едир вә өз ирадәләрини Аллаһын ирадәсинә табе едирдиләр.

Аллаһ Јери јаратдыгдан сонра, ону инсанларын һәјаты үчүн һазырлады вә ахырда илк киши вә гадыны јаратды (Тәквин 1-ҹи фәсил). Бу һадисә үчүн дә севинмәјә дәјәрдими? Мүгәддәс Китабда дејилир: “Аллаһ јаратдығы һәр шеји ҝөрдү вә будур, чох јахшы иди”. Бәли, Аллаһын јаратдыгларында һеч бир чатышмазлыг јох иди, һәр шеј камил иди (Тәквин 1:31).

Аллаһын улу валидејнләримиз вә онларын нәсилләри үчүн олан ирадәси нәдән ибарәт иди? Тәквин 1:28 ајәсинә ҝөрә бу ирадә чох ҝөзәл иди: “Аллаһ онлары мүбарәк гылды; вә Аллаһ онлара деди: Сәмәрәли олун вә чохалын вә јер үзүнү долдурун вә она саһиб олун; вә дәнизин балыгларына вә ҝөјләрин гушларына вә јер үзәриндә һәрәкәт едән һәр ҹанлы шејә һаким олун”. Бу ҝөзәл тапшырығы јеринә јетирмәк үчүн, илк инсанлара вә онларын нәсилләринә јашамаг — әбәдијјән јашамаг лазым иди. Бәдбәхтлијә, әдаләтсизлијә, изтираба вә ја өлүмә ишарә едән һеч бир шеј јох иди.

О заман Аллаһын ирадәси һәм јер үзүндә, һәм дә ҝөјдә јеринә јетирди. Онун ирадәсини јеринә јетирән һәр бир кәс ҝәләҹәкдә дә бундан мәмнунлуг һисси дуја биләрди. Бәс нәјә ҝөрә бу ҝүн белә дејил?

Ҝөзләнилмәдән Аллаһын ирадәси шүбһә алтына алынды. Әлбәттә ки, вәзијјәт чыхылмаз дејилди. Амма буна ҝөрә инсанларда Аллаһын бәшәријјәт үчүн олан ирадәсинә даир чашгынлыг јарадан узун мүддәтли изтираб вә фәлакәт дөврү башланды. Һәр биримиз бундан әзијјәт чәкирик. Ахы нә баш верди?

Үсјан заманы Аллаһын ирадәси

Аллаһын руһани оғулларындан бири өз мәнфәәтини ҝүдәрәк Аллаһын инсанлара даир нијјәтинә мүдахилә етмәк имканы олдуғуну ҝөрдү. Бу руһани варлыг өз планыны нә гәдәр чох ҝөтүр-гој едирдисә, план бир о гәдәр дә һәјата кечә билән вә ширникдириҹи ҝөрүнүрдү (Јагуб 1:14, 15). Ола билсин, о белә дүшүнүрдү: әҝәр илк инсан ҹүтүнү Аллаһа дејил, она итаәт етмәјә тәһрик едә билсә, онда Аллаһ инсанлар үчүн алтернатив һакимијјәти е’тираф етмәли олаҹагдыр. Ҝөрүнүр, о, Аллаһын онлары мәһв етмәјәҹәјинә үмид едирди, чүнки бу Аллаһын нијјәтини позмуш оларды. Чох еһтимал ки, Јеһова Аллаһ инди јаратдығы инсанларын табе олдуғу бу руһани оғулун тутдуғу вәзифәни е’тираф едәрәк, Өз нијјәтини дәјишмәк мәҹбуријјәтиндә гала биләрди. Бу үсјанчынын нәјә ҝөрә сонрадан “дүшмән” мә’насыны дашыјан Шејтан адландырылмасынын сәбәби ајдындыр (Ејуб 1:6).

Шејтан арзусуну һәјата кечирмәк үчүн гадына јахынлашды. О, гадыны Аллаһын ирадәсинә лагејдлик ҝөстәрмәјә вә мә’нәви мүстәгиллик әлдә етмәјә тәһрик едәрәк деди: “Гәтијјән өлмәзсиниз. ...Јахшыны вә писи биләрәк Аллаһ кими олаҹагсыныз” (Тәквин 3:1-5). Гадын бу јолла азадлығы газана биләҹәјини дүшүндү. О, ән ҝөзәл һәјат јолуну сечдијинә үмид едәрәк дејиләнләрә ујду. Даһа сонра әрини дә она гошулмаға тәһрик етди (Тәквин 3:6).

Илк инсан ҹүтү үчүн Аллаһын ирадәси бу дејилди. Бу, онларын ирадәси иди. Бу сечим дәһшәтли нәтиҹәләрә ҝәтириб чыхарды. Аллаһ әввәлҹәдән хәбәрдарлыг етмишдир ки, итаәтсизлик онларын өлүмүнә сәбәб олаҹаг (Тәквин 3:3). Аллаһ инсанлары Ондан асылы олмадан јашамаг вә ејни заманда мүвәффәгијјәтли олмаг үчүн јаратмамышды (Јеремја 10:23). Итаәтсизлик онлары һәмчинин гејри-камиллијә ҝәтириб чыхарды, гејри-камиллик вә өлүм исә онларын нәслинә кечди (Ромалылара 5:12). Шејтан бу нәтиҹәләри арадан галдыра билмәди.

Һадисәләрин бу ҹүр ҝедишаты Аллаһын бәшәријјәтә вә јер үзүнә даир нијјәтини, јә’ни Онун ирадәсини һәмишәлик дәјишдими? Хејр (Ишаја 55:9-11). Лакин ҹаваб тәләб едән бир сыра суаллар ортаја чыхды: Шејтанын иддиа етдији кими, инсанлар “јахшыны вә писи биләрәк Аллаһ кими” ола биләрләрми? Башга сөзләрлә десәк, әҝәр бизә кифајәт гәдәр вахт версәләр, сәрбәст олараг һәјатымызын бүтүн саһәләриндә нәјин јахшы, нәјин пис олдуғуну, нәјин фајдалы, нәјин исә зәрәрли олдуғуну мүәјјән едә биләрикми? Аллаһын һакимијјәти ән јахшы һакимијјәт олдуғу үчүн О, там итаәтә лајигдирми? Һәр шејдә Онун ирадәсинә табе олмаға дәјәрми? Бу суаллара сиз неҹә ҹаваб верәрдиниз?

Бу мәсәләләри бүтүн дәрракәли варлыгларын өнүндә анҹаг бир үсулун көмәји илә һәлл етмәк мүмкүн иди: мүстәгиллик ахтаранларын мүвәффәгијјәт газанмаларына имкан вермәк. Онларын мәһви һеч нәји һәлл етмәзди. Јаранмыш вәзијјәтдән чыхыш јолу инсанлара өз нијјәтләрини һәјата кечирмәк үчүн кифајәт гәдәр вахт вермәк иди. О заман Аллаһдан асылы олмадан јашамағын нәтиҹәләри ҝөз габағында оларды. Аллаһ гадына өвладлары олаҹағыны сөјләмәклә, мәсәләни неҹә һәлл едәҹәјини ҝөстәрди. Бәшәр аиләсинин башланғыҹы белә гојулду. Бизим һәр биримиз бунун сајәсиндә дүнјаја ҝөз ачмышыг! (Тәквин 3:16, 20).

Лакин бүтүн бунлар о демәк дејилди ки, Аллаһ инсанлара вә үсјанчы олан руһани оғлуна һәр шејдә өз истәдикләри кими давранмаға јол верәҹәкдир. Аллаһ Өз һөкмранлығындан вә нијјәтләриндән имтина етмәди (Мәзмур 83:18). О, үсјан тәһрикчисинин там мәһв едиләҹәјини вә итаәтсизлијин бүтүн мәнфи нәтиҹәләринин арадан галдырылаҹағыны ајдын сурәтдә әввәлҹәдән хәбәр верди (Тәквин 3:15). Беләликлә, лап башланғыҹдан бәшәријјәтә азадлыг вә’д едилмишди.

Бу арада улу валидејнләримиз Аллаһын һакимијјәтиндән узаглашдылар вә ҝәләҹәк нәсилләрини дә өз архаларынҹа апардылар. Онлары гәбул етдикләри гәрарын һәр ҹүр пис нәтиҹәләриндән мүһафизә етмәк үчүн, Аллаһ ҝәрәк Өз ирадәсини онлара һәр дәфә зорла гәбул етдирәјди. Лакин бу, азадлыг вермәмәјә бәрабәр оларды.

Әлбәттә ки, ајры-ајры инсанлар Аллаһын рәһбәрлијини сечә биләрләр. Онлар бу ҝүн јашајан инсанлара даир Аллаһын ирадәсини өјрәнә вә мүмкүн гәдәр она дәгигликлә риајәт едә биләрләр (Мәзмур 143:10). Бунунла белә, онлар проблемләрдән азад дејилләр, белә ки, Шејтанын инсанларын там мүстәгиллијинә даир галдырдығы суал һәлә һәлл олунмајыб.

Инсанларын шәхси гәрарларынын нәтиҹәси артыг бәшәр тарихинин лап башланғыҹында өзүнү ҝөстәрди. Бәшәр аиләсинин илки олан Габил өз гардашы Һабили өлдүрдү, она ҝөрә ки, “онун әмәлләри пис, гардашынын әмәлләри исә салеһ иди” (1 Јәһја 3:12). Габилин һәрәкәтләриндә Аллаһын ирадәси әкс олунмурду, буна ҝөрә Аллаһ ону хәбәрдар етди, сонра исә ҹәзаландырды (Тәквин 4:3-12). Габил Шејтан тәрәфиндән тәклиф олунан мә’нәви мүстәгиллији сечди, чүнки о, “шәрирдән” иди. Башгалары да онун кими етдиләр.

1 500 илдән артыг вахт кечдикдән сонра “Аллаһын өнүндә јер үзү позулмушду вә јер үзү зоракылыгла долмушду” (Тәквин 6:11). Јер үзүнү позғунлугдан јалныз гәти аддымлар хилас едә биләрди. Буна ҝөрә дә, Аллаһ јер үзүнә Үмумдүнја туфаны ҝөндәрди вә о заман јашајан јеҝанә салеһ аиләни — Нуһу, онун арвадыны, оғулларыны вә онларын арвадларыны хилас етди (Тәквин 7:1). Биз һамымыз онларын нәслијик.

Бәшәр тарихи боју Аллаһ Онун ирадәсини билмәји үрәкдән арзу едәнләрә рәһбәрлик верир. О, садиг кишиләри тәшвиг етди ки, Аллаһын рәһбәрлијини ахтаранларын һамысы үчүн Онун сөзләрини јазсынлар. Бу сөзләри Мүгәддәс Китабда тапмаг олар (2 Тимотејә 3:16). Аллаһ мәһәббәт ҝөстәрәрәк сәдагәтли инсанлара Онунла мүнасибәт јаратмаға, һәтта Онун досту олмаға јол вермишди (Ишаја 41:8). Вә Аллаһ, мин илләрлә давам едән мүстәгиллик әрзиндә бәшәријјәти парчалајан проблемләрин өһдәсиндән ҝәлә билмәләри үчүн онлара гүввә вермишдир (Мәзмур 46:1; Филипилиләрә 4:13). Мәҝәр бу биздә Аллаһа гаршы миннәтдарлыг һиссини ојатмалы дејилми?

Һәр шејдә “Сәнин ирадән олсун”

Аллаһын индијә гәдәр ҝөрдүјү ишләр Онун ирадәсинин там тәзаһүрү дејил. Мәсиһчи һәвари Петер јазмышдыр: “Биз Онун вә’динә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр” (2 Петер 3:13). Бу ајәдә мәҹази диллә, инсанлары идарә едәҹәк јени һөкумәтдән вә бу һөкумәтин дөврүндә мөвҹуд олаҹаг јени инсан ҹәмијјәтиндән данышылыр.

Даниел пејғәмбәр садә дилдә јазмышдыр: “О падшаһларын ҝүнләриндә ҝөјләрин Аллаһы әбәдијјән дағылмајаҹаг бир падшаһлыг гураҹаг... бу падшаһлыгларын һамысыны о парчалајаҹаг вә мәһв едәҹәк, өзү исә әбәдијјән дураҹаг” (Даниел 2:44). Бу пејғәмбәрлик индики тутарсыз системин сонундан вә онун јеринә Аллаһын Падшаһлығынын, јә’ни һөкумәтинин ҝәләҹәјиндән хәбәр верир. Неҹә дә хош хәбәрдир! Буҝүнкү дүнјаны гәддарлыгла долдуран вә јер үзүнү јенидән позмаг тәһлүкәси јарадан мүнагишәләр вә хүдбинлик архада галаҹагдыр.

Бүтүн бунлар нә заман баш верәҹәк? Исанын шаҝирдләри ондан сорушдулар: “Бу дедикләрин нә заман олаҹаг? Сәнин ҝәлишинә вә дөврүн сонуна әламәт нә олаҹаг?” Иса ҹавабында деди: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир” (Матта 24:3, 14, И–93).

Јахшы мә’лумдур ки, бу ҝүн бүтүн дүнјада белә бир тәблиғ иши апарылыр. Еһтимал ки, сизин јашадығыныз әразидә дә тәблиғ иши апарылдығына диггәт јетирмисиниз. “Онлар да инанырлар” китабында профессор Чарлз Браден јазыр: “Јеһованын Шаһидләри өз шаһидликләри илә сөзүн әсл мә’насында бүтүн јер үзүнү әһатә едибләр. ...Дүнјада елә бир дини груп тапылмаз ки, Падшаһлыг һаггындакы хош хәбәрин јајылмасында Јеһованын Шаһидләриндән артыг сә’ј вә сәбат ҝөстәрсинләр” (“These Also Believe”). Шаһидләр хош хәбәри 230-дан чох өлкә вә әразиләрдә, тәхминән 400 дилдә фәал сурәтдә тәблиғ едирләр. Бу иш һеч вахт бу гәдәр ҝениш вүс’әт алмамышдыр. Бу, Падшаһлығын инсан һөкумәтләрини әвәз едәҹәји вахтын јахынлашдығына даир олан сүбутлардан биридир.

Тәблиғ олунаҹаг Падшаһлыг, Исанын дедији кими, нүмунәви дуада бизә һаггында дуа етмәји өјрәтдији елә һәмин Падшаһлыгдыр: “Падшаһлығын ҝәлсин; ҝөјдә олдуғу кими, јердә дә Сәнин ирадән олсун” (Матта 6:10, И–93). Бәли, бу Падшаһлығын васитәсилә Аллаһ бәшәријјәтә вә јер үзүнә даир нијјәтләрини вә ирадәсини һәјата кечирәҹәкдир.

Бу нә демәкдир? Гој бу суала Вәһј 21:3, 4 ајәләри ҹаваб версин: “Ҝөјдән ҝәлән јүксәк бир сәс ешитдим. Дејирди: “Будур, Аллаһын мәскәни инсанларла бәрабәрдир вә О, онларла бәрабәр јашајаҹагдыр. Онлар Онун халгы олаҹаг вә Аллаһын Өзү онларла олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди”. О заман Аллаһын ирадәси әсл мә’нада һәм јердә, һәм дә ҝөјдә — һәр шејдә јеринә јетәҹәкдирa. Сиз бүтүн бунлары ҝөрмәк истәмәздинизми?

[Һашијә]

[5-ҹи сәһифәдәки шәкил]

Аллаһын ирадәсиндән асылы олмамаг изтираблар ҝәтирди.