«Сиз чох баһа гијмәтә алынмысыныз»
«Сиз чох баһа гијмәтә алынмысыныз. Буна ҝөрә... Аллаһы иззәтләндирин» (1 КОРИНФЛИЛӘРӘ 6:20).
1, 2. а) Мусанын ганунуна әсасән исраилли гуллар илә неҹә давранмаг лазым иди? б) Ағасыны севән гулун һансы сечими вар иди?
«ҺОЛМАНЫН шәкилли Мүгәддәс Китаб лүғәти»ндә дејилир: «Көләлик гәдим дүнјада ҝениш јајылмыш вә һамы тәрәфиндән гәбул едилмишдир. Мисирин, Јунаныстанын вә Романын игтисадијјатынын әсасыны гул әмәји тәшкил едирди. Ерамызын I әсриндә Италијада һәр үчүнҹү, бүтүн дүнјада исә һәр бешинҹи адам гул иди».
2 Көләлијин гәдим Исраилдә дә мөвҹуд олмасына бахмајараг, Мусанын гануну ибрани гулларыны мүдафиә едирди. Мәсәлән, Гануна ҝөрә исраилли алты илдән артыг гул кими хидмәт едә билмәзди. Једдинҹи илдә исә «пулу өдәмәдән азад» олунмалы иди. Лакин гулларла давраныш тәрзинә даир Ганун о гәдәр адил вә инсани иди ки, орада белә бир имкан нәзәрдә тутулмушду: «Гул тә’кидлә: “Ағамы, арвадымла ушагларымы севирәм вә азад олмаг истәмирәм” десә, онда гој гулун ағасы ону мә’бәдә — Аллаһын һүзуруна ҝәтирсин; гулуну гапыја јахуд гапынын јан тахтасына сөјкәјиб гулағыны бизлә дешсин. Бу гул ағасына өмүрлүк гуллуг етсин» (Чыхыш 21:2-6; Левилиләр 25:42, 43; Ганунун тәкрары 15:12-18).
3. а) Биринҹи әсрин мәсиһчиләри һансы көләлији гәбул етдиләр? б) Бизи Аллаһа гуллуг етмәјә тәшвиг едән нәдир?
3 Бу ҹүр көнүллү көләлик, һәгиги мәсиһчиләрин буҝүнкү көләлијинин сурәти иди. Мәсәлән, Мүгәддәс Китабын јазылмасында иштирак едән Павел, Јагуб, Петер вә Јәһуда өзләрини Аллаһын вә Мәсиһин гулу адландырырдылар (Јагуб 1:1; 2 Петер 1:1; Јәһуда 1; Титуса 1:1). Павел Салоникдән олан мәсиһчиләрә хатырлатды ки, онлар ‘јашајан вә һәгиги Аллаһа гуллуг етмәк үчүн бүтләрдән Аллаһа дөнүбләр’ (1 Салониклиләрә 1:10, И–93). Бу мәсиһчиләри көнүллү сурәтдә Аллаһын гуллары олмаға тәшвиг едән нә иди? Бәс исраилли гулу шәхси азадлығындан имтина етмәјә тәшвиг едән һансы гүввә иди? Ағасына олан мәһәббәт дејилдими? Мәсиһчи көләлијинин әсасыны Аллаһа мәһәббәт тәшкил едир. Һәгиги вә јашајан Аллаһла таныш олдугҹа вә Ону севдикҹә, ‘бүтүн гәлбимизлә вә бүтүн варлығымызла’ Она гуллуг етмәјә тәшвиг олунуруг (Ганунун тәкрары 10:12, 13). Бәс Аллаһын вә Мәсиһин гуллары олмаг нә демәкдир? Бу бизим ҝүндәлик һәјатымыза неҹә тә’сир едир?
«Һәр шеји Аллаһын иззәти үчүн един»
4. Биз Аллаһын вә Мәсиһин гулларына неҹә чеврилирик?
4 Тә’рифә ҝөрә гул — «саһибкарын гануни мүлкијјәти олуб, она бүтүнлүклә табе олан адамдыр». Биз һәјатымызы Јеһоваја һәср едиб вәфтиз олунанда, Онун гануни мүлкијјәтинә чеврилирик. Һәвари Павел буну ‘сиз өзүнүзә мәхсус дејилсиниз, чүнки сиз чох баһа гијмәтә алынмысыныз’ дејәрәк изаһ едир (1 Коринфлиләрә 6:19, 20). Әлбәттә, бизим үчүн өдәнилән гијмәт — Иса Мәсиһин фидијә гурбанлығыдыр. Мәсһ едилмиш мәсиһчиләр вә ја онларын јер үзүндә јашамаг үмидинә малик олан јолдашлары олмағымыздан асылы олмајараг, Аллаһ бизи бу фидијәнин сајәсиндә Өз хидмәтчиләри кими гәбул едир (Ефеслиләрә 1:8; 2:13; Вәһј 5:9). Беләликлә, вәфтиз олундуғумуз андан биз «Рәббиник», јә’ни Јеһоваја мәхсусуг (Ромалылара 14:8). Иса Мәсиһин гијмәтли ганы илә хилас олундуғумуз үчүн, биз онун да гуллары олуруг. Бу исә үзәримизә онун әмрләринә риајәт етмәк мәс’улијјәтини гојур (1 Петер 1:18, 19).
5. Јеһованын гуллары кими һансы ваҹиб мәс’улијјәти дашыјырыг вә биз ону неҹә јеринә јетирә биләрик?
5 Гул өз ағасына табе олмалыдыр. Биз өз истәјимизлә вә Ағамыза мәһәббәтдән ирәли ҝәләрәк гул олуруг. 1 Јәһја 5:3 ајәсиндә дејилир: «Аллаһы севмәк Аллаһын әмрләринә әмәл етмәк демәкдир. Онун әмрләри исә ағыр дејилдир». Бу сәбәбдән, итаәткарлығымыз мәһәббәтимизин вә табечилијимизин сүбутудур. О, бизим бүтүн һәрәкәтләримиздә тәзаһүр олунур. Павел демишдир: «Јејирсинизсә, ичирсинизсә, нә едирсинизсә, һәр шеји Аллаһын иззәти үчүн един» (1 Коринфлиләрә 10:31). Ҝүндәлик һәјатымызда, һәтта ән кичик ишләримиздә белә, Јеһоваја Онун гуллары кими хидмәт етдијимизи ҝөстәрмәк истәјирик (Ромалылара 12:11).
6. Аллаһын гуллары олмағымыз гәрарларымызда неҹә әкс олунур? Нүмунә әсасында изаһ един.
6 Мисал үчүн, гәрар гәбул едәркән сәмави Ағамыз олан Јеһованын ирадәсини унутмаг олмаз (Малаки 1:6). Ҹидди гәрарлар гәбул етдијимиз һалларда Аллаһа итаәткарлығымыз сынаға чәкилә биләр. Белә вәзијјәтдә «һијләҝәр» вә «сағалмаз хәстәлији» олан үрәјимизин истәкләринә табе олмаг әвәзинә, Аллаһын мәсләһәтинә әмәл едәҹәјикми? (Јеремја 17:9). Мелиса адлы субај мәсиһчи вәфтиз олундугдан гыса мүддәт сонра, бир ҝәнҹ она мараг ҝөстәрмәјә башлады. О, јахшы адама охшајырды, үстәлик Јеһованын Шаһидләри илә Мүгәддәс Китабы өјрәнирди. Буна бахмајараг, ағсаггал Мелиса илә Јеһованын ‘јалныз Рәббә бағлы олан’ кәслә аилә гурмаг әмринә риајәт етмәјин мүдрик олдуғу һагда сөһбәт етди (1 Коринфлиләрә 7:39; 2 Коринфлиләрә 6:14). Мелиса е’тираф едир: «Бу мәсләһәтә риајәт етмәк мәним үчүн асан дејилди. Лакин мән белә гәрара ҝәлдим: мадам ки, Јеһованын ирадәсини јеринә јетирмәк үчүн өзүмү Она һәср етмишәм, онда Онун ајдын ҝөстәришинә мүвафиг давранаҹағам». Сонрадан баш верәнләрин үзәриндә дүшүнәрәк о дејир: «Мәсләһәтә гулаг асдығым үчүн чох шадам. Һәмин оғлан гыса мүддәтдән сонра Мүгәддәс Китабы өјрәнмәјә сон гојду. Әҝәр мән о вахт онунла мүнасибәтләрими дајандырмасајдым, инди һәгигәтдә олмајан бир нәфәрлә евли олардым».
7, 8. а) Нәјә ҝөрә инсанлары мәмнун етмәк үчүн һәддиндән артыг нараһат олмалы дејилик? б) Инсанлар гаршысындакы горхуну дәф етмәјин үсулуну нүмунә әсасында изаһ един.
7 Аллаһын гуллары олдуғумуза ҝөрә, инсанлара гул олмалы дејилик (1 Коринфлиләрә 7:23). Сөзсүз ки, һеч ким әтрафдакыларын ондан кәнар ҝәзмәсини истәмәзди. Анҹаг јадда сахламалыјыг ки, мәсиһчиләр, бу дүнјанын нормаларындан фәргләнән нормалара маликдирләр. Павел сорушур: «Инсанларымы мәмнун етмәк истәјирәм?» Өзү дә ҹаваб верир: «Әҝәр мән һәлә дә инсанлары мәмнун етмәк истәсәјдим, Мәсиһин гулу олмаздым» (Галатијалылара 1:10). Садәҹә олараг, әтрафдакыларын тәзјигинә тәслим олмаға вә јалныз инсанлары мәмнун етмәјә һаггымыз јохдур. Бәс бу ҹүр тәзјиглә гаршылашдығымыз заман нә едә биләрик?
8 Испанијада јашајан ҝәнҹ мәсиһчи баҹымыз Еленанын нүмунәсини нәзәрдән кечирәк. Онун курс јолдашларындан бә’зиләри донор идиләр. Онлар Еленанын Јеһованын Шаһиди олдуғуну, буна ҝөрә дә башгаларына ган вермәјәҹәјини вә өзүнә ган көчүрүлмәсинә разы олмајаҹағыны билирдиләр. Өз әгидәсини бүтүн групун гаршысында изаһ етмәк имканы јарананда, Елена бу имкандан истифадә етди. О дејир: «Ачығыны десәм, чох һәјәҹанланырдым. Лакин јахшы һазырлашдым вә нәтиҹә чох ҝөзәл алынды. Курс јолдашларымдан чохунун һөрмәтини газандым, мүәллимим исә, мәшғул олдуғум фәалијјәтлә фәхр етдијини сөјләди. Бундан әлавә, Јеһованын адыны мүдафиә едә вә Мүгәддәс Китабын көмәји илә әгидәмин нәјә әсасландығыны ҝөстәрә билдијим үчүн мәмнунлуг дујдум» (Јарадылыш 9:3, 4; Һәвариләрин ишләри 15:28, 29). Бәли, Аллаһын вә Мәсиһин гуллары олдуғумуз үчүн, башгаларындан фәргләнирик. Лакин өз е’тигадларымызы еһтирамла вә нәзакәтлә мүдафиә етмәјә һазырыгса, инсанларын һөрмәтини газана биләрик (1 Петер 3:15).
9. Һәвари Јәһјанын гаршысында дуран мәләјин нүмунәсиндән нә өјрәнирик?
9 Аллаһын гуллары олдуғумузу дәрк етмәк һәлим олараг галмағымыза да көмәк едир. Бир дәфә сәмави Јерусәлимин мөһтәшәм ҝөрүнтүсү һәвари Јәһја елә тә’сир бағышламышды ки, Аллаһын елчиси олан мәләјә сәҹдә етмәк үчүн онун ајагларына дүшдү. Мәләк она деди: «Бах, буну етмә! Мән сәнин пејғәмбәр гардашларынын вә бу китабын сөзләринә риајәт едәнләрин һәмкарыјам. Аллаһа сәҹдә ејлә» (Вәһј 22:8, 9). Мәләк Аллаһын бүтүн гулларына неҹә дә ҝөзәл нүмунә верди! Бә’зи мәсиһчиләр јығынҹагда хүсуси тапшырыглары јеринә јетирирләр. Бунунла белә Иса демишди: «Аранызда бөјүк олмаг истәјән, диҝәрләринин нөкәри олсун. Вә аранызда биринҹи олмаг истәјән, диҝәрләринин гулу олсун» (Матта 20:26, 27). Исанын давамчылары кими бизим һамымыз гулуг.
«Иҹра етмәли олдуғумузу етдик»
10. Мүгәддәс Китаб нүмунәләри әсасында, Аллаһын садиг хидмәтчиләринә Онун ирадәсини јеринә јетирмәјин һәмишә асан олмадығыны ҝөстәрин.
10 Гејри-камил инсанлара Аллаһын ирадәсини јеринә јетирмәк һәмишә асан олмур. Јеһова Муса пејғәмбәрә ҝедиб Исраил оғулларыны Мисир көләлијиндән азад етмәји тапшыранда, о бу тапшырығы дәрһал јеринә јетирмәди (Чыхыш 3:10, 11; 4:1, 10). Јунус Ниневанын сакинләринә һөкм хәбәрини чатдырмаг тапшырығыны аланда, «Рәббин һүзурундан Таршишә гачмаг үчүн галхды» (Јунус 1:2, 3). Јеремја пејғәмбәрин мирзәси Барук јорулдуғу һагда ҝилејләнирди (Јеремја 45:2, 3). Арзуларымыз вә ја үстүнлүк вердијимиз шејләр Аллаһын ирадәсинә зидд ҝедәндә неҹә давранмалыјыг? Ҹавабы Исанын сөјләдији әјани нүмунәдә тапырыг.
11, 12. а) Исанын Лука 17:7-10 ајәләриндәки мәсәлини гысаҹа олараг данышын. б) Исанын мәсәлиндән нә өјрәнирик?
11 Иса бүтүн ҝүнү тарлада ағасынын сүрүләрини отаран гул һаггында данышды. Он ики саатлыг ағыр әмәкдән сонра јорғун-арғын евә гајыданда, ағасы гула истираһәт етмәји вә дојунҹа чөрәк јемәји тәклиф етмәди. Әксинә, деди: «Ахшам јемәјими һазырла вә гуршаныб мәнә гуллуг ет ки, мән јејиб ичим, сонра да сән өзүн је ич». Гул јалныз ағасына гуллуг етдикдән сонра өз гајғысына гала биләрди. Иса сөһбәтини бу сөзләрлә битирди: «Инди сиз дә, сизә әмр олунан һәр шеји јеринә јетирдикдән сонра дејин: “Биз һеч бир гијмәти олмајан гулларыг, чүнки иҹра етмәли олдуғумузу етдик”» (Лука 17:7-10).
12 Исанын бу нүмунәни чәкмәкдә мәгсәди, Јеһованын Она хидмәтдәки сә’јләримизи гијмәтләндирмәдијини ҝөстәрмәк дејилди. Мүгәддәс Китабда ајдын дејилир: «Аллаһ һагсыз дејилдир ки... Онун ады наминә ҝөстәрдијиниз мәһәббәти унутсун» (Ибраниләрә 6:10). Әслиндә, Исанын мәсәлиндәки әсас фикир ондадыр ки, гул өзүнү разы салмалы вә шәхси раһатлығыны дүшүнмәли дејил. Аллаһа һәср олунуб, Онун гуллары олмаг гәрарына ҝәләрәк, Онун ирадәсини өзүмүзүнкүндән үстүн тутмаға разы олмушуг. Биз өз ирадәмизи Аллаһын ирадәсинә табе етдирмәлијик.
13, 14. а) Биз һансы һалларда өз арзуларымыза вә мејлләримизә гаршы ҝетмәлијик? б) Биз нәјә ҝөрә Аллаһын ирадәсинә үстүнлүк вермәлијик?
13 Аллаһын Кәламыны, һәмчинин «садиг вә ағыллы гул»ун нәшрләрини мүнтәзәм олараг өјрәнмәк биздән бөјүк сә’ј тәләб едә биләр (Матта 24:45). Хүсусилә дә, әҝәр охумаг бизә һәмишә чәтин ҝәлирсә, ја да ки, әдәбијјатда «Аллаһын дәрин дүшүнҹәләр»и мүзакирә едилирсә, чох сә’ј ҝөстәрмәјимиз тәләб олуна биләр (1 Коринфлиләрә 2:10). Буна бахмајараг, шәхси өјрәнмәјә вахт ајырмаг лазым дејилми? Отуруб шәхси өјрәнмә илә мәшғул олмаг үчүн бә’зән өзүмүзү мәҹбур етмәлијик. Әкс тәгдирдә, камилләр үчүн нәзәрдә тутулан гүввәтли јемәјә иштаһамызы неҹә артыра биләрик? (Ибраниләрә 5:14).
14 Бәс узун иш ҝүнүндән сонра евә јорғун-арғын ҝәлдијимиз заманлар һаггында нә демәк олар? Еһтимал ки, өзүмүзү мәсиһчи ҝөрүшләринә ҝетмәјә мәҹбур едирик. Ја да ки, танымадығымыз инсанларла сөһбәт етмәјә мејлли олмадығымыз үчүн тәблиғ етмәк асан олмур. Һәтта Павел е’тираф едирди ки, бә’зән биз хош хәбәри көнүлсүз бәјан едирик (1 Коринфлиләрә 9:17). Лакин биз бүтүн бунлары, чох севдијимиз сәмави Ағамыз олан Јеһованын бујурдуғу үчүн едирик. Вә мәҝәр өјрәнмә илә мәшғул олмаг, јығынҹаг ҝөрүшүнә вә ја тәблиғ хидмәтинә ҝетмәк үчүн һәр дәфә сә’ј ҝөстәрдикдән сонра мәмнунлуг вә севинҹ дујмуругму? (Мәзмур 1:1, 2; 122:1; 145:10-13).
«Архаја» бахмајын
15. Иса Аллаһа итаәткарлыға даир һансы нүмунәни верди?
15 Иса Мәсиһ сәмави Атаја итаәткарлыға даир ҝөзәл нүмунә верди. О, өз шаҝирдләринә деди: «Мәним ирадәми дејил, Мәни ҝөндәрән Атамын ирадәсини јеринә јетирмәк үчүн ҝөјдән ендим» (Јәһја 6:38). Ҝетсамани бағында сыхынты ичиндә оларкән, Иса дуа едирди: «Атам, әҝәр мүмкүнсә, гој бу каса Мәндән кечсин; амма Мәним истәдијим кими дејил, Сәнин истәдијин кими олсун» (Матта 26:39).
16, 17. а) Архада гојдугларымыза неҹә мүнасибәт ҝөстәрмәлијик? б) Павелин дүнјанын она тәклиф етдији һансы үстүнлүкләрдән имтина етдијини анладығыны ҝөстәрин.
16 Иса Мәсиһ Аллаһын гуллары олмаг гәрарымыза садиг галмағымызы истәјир. О демишдир: «Әлини котан үстүнә гојуб архаја бахан кимсә Аллаһын Сәлтәнәтинә [Падшаһлығына] јарашмаз» (Лука 9:62). Аллаһа хидмәт едәркән диггәтимизи архада гојдуғумуз шејләрә јөнәлтмәли дејилик. Әксинә, Аллаһын гулу олмаг гәрарына ҝәлдикдән сонра әлдә етдијимиз шејләри гијмәтләндирмәлијик. Павел Филипилиләрә јазырды: «Уғрунда һәр шејин зәрәрини чәкдијим Рәббим Мәсиһ Исаны танымағын үстүн дәјәри јанында һәр шеји зијан һесаб едир вә зибил сајырам ки, Мәсиһи әлдә едим» (Филипилиләрә 3:8).
17 Павелин Аллаһын хидмәтчиси олмағын ҝәтирдији руһани мүкафатлар уғрунда зибил сајараг тәрк етдији шејләр һаггында дүшүнәк. О, јалныз бу дүнјанын тәгдим етдији раһатлыгдан дејил, һәм дә јәһудилијин лидери олмаг имканындан имтина етди. Әҝәр Павел јәһудилијә е’тигад етмәјә давам етсәјди, өз мүәллими Гамлијелин оғлу Шимеон кими үстүн мөвгејә саһиб ола биләрди (Һәвариләрин ишләри 22:3; Галатијалылара 1:14). Шимеон фәрисејләрин лидери олду вә ерамызын 66-70-ҹи илләриндә јәһудиләрин Ромаја гаршы үсјанына даир бә’зи е’тиразларынын олмасына бахмајараг, бу үсјанда әһәмијјәтли рол ојнады. Бу тоггушма заманы о, ја јәһуди екстремистләри, ја да ки, Рома әсҝәрләри тәрәфиндән өлдүрүлдү.
18. Јеһоваја хидмәтин һансы хејир-дуалар ҝәтирдијини нүмунә әсасында ҝөстәрин.
18 Бир чох Јеһованын Шаһидләри Павелин нүмунәсини тәглид етмишләр. Ҹин адлы баҹымыз сөјләјир: «Орта мәктәби битирдикдән бир нечә ил сонра Лондонун мәшһур һүгугшүнасларындан биринин јанында мәс’ул катиб ишләмәјә башладым. Ишими чох севирдим, јахшы да пул газанырдым. Лакин үрәјимдә Јеһоваја даһа чох хидмәт едә биләҹәјими баша дүшүрдүм. Нәһајәт мән ишдән чыхдым вә пионер хидмәтинә башладым. 20 ил әввәл бу аддымы атдығым үчүн чох шадам! Таммүддәтли хидмәт һәјатымы, катиблик ишиндән даһа чох зәнҝинләшдирди. Јеһованын Кәламынын инсанларын һәјатыны неҹә дәјишдијини ҝөрәндә, мүгајисәолунмаз мәмнунлуг дујурсан. Вә бу ишдә иштирак етмәк чох хошдур! Јеһоваја вердикләримиз, Онун бизә вердикләринин јанында һечдир».
19. Һансы әһвал-руһијјәјә малик олмалыјыг вә нәјә ҝөрә?
19 Вахт өтдүкҹә, шәраитләримиз дәјишә биләр, лакин Аллаһа һәср олунмағымыз дәјишмәз олараг галыр. Биз әввәлки кими Јеһованын гулларыјыг вә О бизә вахтымызы, гүввәмизи, баҹарыгларымызы вә диҝәр имканларымызы ән јахшы тәрздә истифадә етмәјә изн верир. Буна ҝөрә дә бүтүн бунлардан неҹә истифадә етмәјимиз Аллаһа мәһәббәтимизи, һәм дә нә дәрәҹәдә гурбанлар вермәјә һазыр олдуғумузу ҝөстәрә биләр (Матта 6:33). Шәраитләримиздән асылы олмајараг, малик олдугларымызын ән јахшысыны Јеһоваја вермәјә гәтијјәтли олмалы дејиликми? Павел јазырды: «Әҝәр шөвг варса, инсанда олмајан мала ҝөрә дејил, олан мала ҝөрә мәгбулдур» (2 Коринфлиләрә 8:12).
Аллаһа хидмәт бәһрә ҝәтирир
20, 21. а) Аллаһын гуллары һансы бәһрәни ҝәтирирләр? б) Јеһова, Она бүтүн үрәкдән хидмәт едәнләри неҹә мүкафатландырыр?
20 Аллаһын гуллары олмаг әзијјәт дејил. Әксинә, хошбәхтлијимизи әлимиздән алан ағыр көләликдән азад олунмағымыза көмәк едир. Павел јазырды: «Ҝүнаһдан азад едилиб Аллаһа гул олдуғунуза ҝөрә, бәһрәниз мүгәддәслик, ахырыныз әбәди һәјатдыр» (Ромалылара 6:22). Мүгәддәслик — Аллаһын гуллары кими етдијимиз хидмәтин бәһрәсидир. Белә ки, биз мүгәддәс, јә’ни мә’нәви ҹәһәтдән тәмиз давраныш тәрзинин хејир-дуаларыны газанырыг. Бундан әлавә, бу хидмәт әбәди һәјата апарыр.
21 Јеһова Өз гулларына гаршы сәхавәтлидир. Хидмәтдә әлимиздән ҝәлән һәр шеји едәндә, О, «ҝөјләрин пәнҹәрәләрини» ачыр вә ‘үзәримизә еһтијаҹларымыздан да чох бәрәкәт јағдырыр’ (Малаки 3:10). Бүтүн әбәдијјәт боју Јеһованын гуллары олараг хидмәт етмәк неҹә дә хош олаҹаг!
Хатырлајырсынызмы?
• Биз нәјә ҝөрә Аллаһын гуллары олуруг?
• Аллаһын ирадәсинә табе олдуғумузу неҹә ҝөстәририк?
• Нәјә ҝөрә Јеһованын ирадәсини өзүмүзүнкүндән үстүн тутмаға һазыр олмалыјыг?
• Нәјә ҝөрә архаја бахмалы дејилик?
[14 вә 15-ҹи сәһифәләрдәки шәкил]
Исраилдәки көнүллү көләлик мәсиһчи көләлијинин сурәти иди.
[15-ҹи сәһифәдәки шәкил]
Вәфтиз олунаркән Аллаһын гуллары олуруг.
[15-ҹи сәһифәдәки шәкилләр]
Аллаһын ирадәси мәсиһчиләрин һәјатында әсас јери тутур.
[16-ҹы сәһифәдәки шәкил]
Муса Аллаһын тапшырығыны дәрһал јеринә јетирмәди.