Сән һәр ишдәми садигсән?
«Ән балаҹа бир ишдә садиг олан, бөјүк ишдә дә садигдир» (ЛУКА 16:10).
1. Јеһованын сәдагәтли олдуғу нәдән ҝөрүнүр?
ҜҮН әрзиндә ағаҹын көлҝәси илә нә баш вердијинә диггәт јетирмисәнми? Өз истигамәтини дәјишәрәк о ҝаһ ҝөдәлир, ҝаһ да узаныр. Инсанларын тәшәббүсләри вә вә’дләри дә чох вахт бу көлҝә кими дәјишкән олур. Јеһова Аллаһ исә һеч вахт дәјишмир. Јеһованы ‘нурлар Атасы’ адландырараг шаҝирд Јагуб јазыр ки, «Онда нә дәјишиклик вар, нә дә дөнүклүк көлҝәси» (Јагуб 1:17). Јеһова һәтта ән ҹүз’и шејләрдә белә дәјишмәздир, Она һәр заман е’тибар етмәк олар. О, «сәдагәт Аллаһыдыр» (Ганунун тәкрары 32:4, КМ).
2. а) Нәјә ҝөрә садиглик ҝөстәриб-ҝөстәрмәдијимизә әмин олмалыјыг? б) Һансы суаллары мүзакирә едәҹәјик?
2 Аллаһ Өз сәдагәтли хидмәтчиләринә неҹә мүнасибәт бәсләјир? Буну Давуд падшаһын нүмунәсиндән ҝөрмәк олар. О демишдир: «Ҝөзүм өлкәнин садиг инсанларына бахар, гој онлар јанымда јашасын. Камиллик јолу илә ҝедәнләр гуллуғумда дајанар» (Мәзмур 101:6). Бәли, Јеһова хидмәтчиләринин садиглијини чох гијмәтләндирир. Буна ҝөрә һәвари Павел јазмышдыр: «Тәсәррүфатчылардан исә тәләб олунур ки, һәр бири садиг олсун» (1 Коринфлиләрә 4:2). Садиг олмаг нә демәкдир? Һәјатын һансы саһәләриндә садиглик ҝөстәрмәлијик? Вә «камиллик јолу илә ҝедәнләр»и һансы хејир-дуалар ҝөзләјир?
Садиг олмаг нә демәкдир?
3. Садиг олуб-олмағымыз нәдән ајдын олур?
3 Ибраниләрә 3:5 ајәсиндә дејилир ки, «Муса... бир хидмәтчи кими садиг галды». Нәјә ҝөрә бу пејғәмбәр һаггында белә демәк олар? Чадыр гурулан заман «Рәбб Мусаја неҹә әмр етмишдисә, о да бу ҹүр етди» (Чыхыш 40:16). Јеһованын хидмәтчиләри олдуғумуз үчүн садиглијимизи итаәткарлыг ҝөстәрмәклә тәзаһүр етдиририк. Шүбһәсиз ки, Јеһоваја олан садиглијимизи ағыр сынагларда белә горумалыјыг. Лакин садиглик тәкҹә ағыр сынаглара неҹә таб ҝәтирмәјимиздә әкс олунмур. Иса демишдир: «Ән балаҹа бир ишдә садиг олан, бөјүк ишдә дә садигдир, лакин ән балаҹа бир ишдә садиг олмајан, бөјүк ишдә дә садиг дејил» (Лука 16:10). Бу сөзләрдән ајдын олдуғу кими, һәтта ҹүз’и ҝөрүнә билән шејләрдә белә садиг галмалыјыг.
4, 5. Бизим «ән балаҹа бир ишдә» садиг галмағымыз нәји әкс етдирир вә нәјә тә’сир ҝөстәрир?
4 Ҝүндәлик олараг «ән балаҹа бир ишдә» белә садиг галмағымыз ики сәбәбә ҝөрә ваҹибдир. Әввәла бу, Јеһованын һакимијјәтинә олан мүнасибәтимизи әкс етдирир. Илк инсан ҹүтү олан Адәмлә Һәвванын садиглијинин неҹә сынаға чәкилмәси һаггында дүшүн. Аллаһын тәләбини јеринә јетирмәк чәтин дејилди, чүнки Еден бағында кифајәт гәдәр мејвә ағаҹлары варды. Адәмлә Һәвва «анҹаг хејирлә шәри билмә ағаҹынын мејвәсиндән јемә»ли дејилдиләр (Јарадылыш 2:16, 17). Әҝәр онлар садиг галыб бу садә әмрә гулаг ассајдылар, онда бунунла Аллаһын һакимијјәтини гәбул етдикләрини ҝөстәрәрдиләр. Биз дә ҝүндәлик һәјатымызда Јеһованын рәһбәрлијинә риајәт етмәклә Онун тәрәфиндә олдуғумузу сүбут едирик.
5 Икинҹи сәбәб исә, «ән балаҹа бир ишдә» итаәткар олмағымыз, даһа ҹидди сынагларла үзләшәндә неҹә давранаҹағымыза тә’сир ҝөстәрир. Ҝәлин Даниелин вә онун үч јолдашынын — Хананја, Азарја вә Мишаелин нүмунәсини нәзәрдән кечирәк. Бизим ерадан әввәл 617-ҹи илдә онлар узаг Бабил шәһәринә сүрҝүн едилмишдиләр. Һәлә ҝәнҹ јашларында икән онлары падшаһ Навуходоносорун сарајына ҝәтирмишдиләр. О заман «падшаһ онлара өзүнүн једији јемәкләрдән вә ичдији шәрабдан ҝүндәлик јемәк пајы тә’јин етди ки, үч ил онлара тәрбијә версинләр вә сонра исә падшаһын хидмәтинә ҝәтирсинләр» (Даниел 1:3-5).
6. Даниел вә онун үч јолдашы Бабил падшаһынын сарајында һансы чәтин вәзијјәтлә гаршылашды?
6 Бу дөрд ҝәнҹ јәһуди үчүн Бабил падшаһынын једији јемәкләрлә гидаланмаг мәгбул дејилди. Еһтимал ки, падшаһын ләзиз јемәкләринин арасында Мусанын Ганунунун гадаған етдији јемәкләрдән дә вар иди (Ганунун тәкрары 14:3-20). Бундан башга, бабиллиләр өлдүрүлән һејванларын ганыны неҹә лазымдыр ахытмаја да биләрдиләр. Белә әти јемәк исә Аллаһын ганунуна там зидд иди (Ганунун тәкрары 12:23-25). Вә нәһајәт һәмән гида бүтләрә гурбан ҝәтирилмиш ола биләрди, чүнки адәтән бабиллиләр бирликдә јемәк јемәкдән әввәл өз аллаһларына гида гурбаны ҝәтирирдиләр.
7. Даниелин вә онун үч јолдашынын садиглији нәјә шәһадәт едирди?
7 Бабил сарајында, шүбһәсиз ки, гида илә әлагәдар мәһдудијјәтләрә хүсуси әһәмијјәт вермирдиләр. Лакин Даниел вә онун јолдашлары мурдар олмамаға вә Аллаһын исраиллиләрә вердији ганун илә гадаған олунан гиданы јемәмәјә гәти гәрарлы идиләр. Беләликлә онларын садиглији сынагдан кечди. Онлар хаһиш етдиләр ки, падшаһын сүфрәсиндән ҝәтирилән јемәкләр тәрәвәз вә су илә әвәз олунсун вә онларын хаһиши јеринә јетирилди (Даниел 1:9-14). Бу ҝүн бә’зиләри үчүн бу дөрд ҝәнҹин давранышы мә’насыз ҝөрүнә биләр. Лакин онларын садиглији Јеһованын тәрәфини тутдугларыны вә Онун һакимијјәтинә һөрмәт бәсләдикләрини ҝөстәрир.
8. а) Даниелин үч јолдашы һансы чәтин сынагла гаршылашдылар? б) Онларын сынағы нә илә нәтиҹәләнди вә бундан нә өјрәнә биләрик?
8 Әһәмијјәтсиз ҝөрүнә билән шејләрдә садиглик ҝөстәрәрәк, Даниелин үч јолдашы өзләрини даһа ҹидди сынаға һазырламышдылар. Ҝәлин «Даниел» китабынын 3-ҹү фәслини ачыб, бу үч јәһудинин өлүм тәһлүкәсилә гаршылашдыглары һагда олан мә’луматы охујаг. Онлар падшаһ Навуходоносорун гојдуғу гызыл бүтә сәҹдә етмәкдән имтина етдиләр вә падшаһын һүзурунда дуруб там әминликлә дедиләр: «Гуллуг етдијимиз Аллаһымыз бизи одла гызмыш собадан хилас етмәјә гадирдир вә сәнин дә әлиндән гуртараҹаг. Сәнә мә’лум олсун ки, еј падшаһ, әҝәр белә олмаса да, биз сәнин аллаһларына гуллуг едән дејилик вә сәнин гојдуғун гызыл һејкәлә дә сәҹдә етмәјәҹәјик» (Даниел 3:17, 18). Јеһова Өз хидмәтчиләрини хилас етдими? Бәли, онлар сағ галдылар, од онлара һеч бир зәрәр јетирмәди. Онлары одла гызмыш собаја атан адамлар исә һәлак олдулар. Бу ҝәнҹләр артыг садиглик ҝөстәрмәјә вәрдиш етдикләри үчүн даһа бөјүк сынаға таб ҝәтирә билдиләр. Мәҝәр бу нүмунә, ән балаҹа бир ишдә белә садиг галмағын ваҹиблијини ҝөстәрмирми?
«Һагсыз маммона гаршы садиг»лик
9. Лука 16:10 ајәсиндә јазылан сөзләри Иса һансы контекстдә сөјләмишдир?
9 Иса «ән балаҹа бир ишдә садиг олан, бөјүк ишдә дә садигдир» принсипини вермәздән әввәл өз динләјиҹиләрини тәшвиг етмишдир: «Һагсыз маммонла өзүнүзә достлар әлдә един ки, дөвләт түкәндикдә онлар сизи әбәди мәскәнләрә гәбул етсинләр». Бу сөзләрдән сонра ән балаҹа бир ишдә белә садиг олмағын ваҹиблијини вурғулајараг Иса давам етди: «Беләликлә, әҝәр сиз һагсыз маммона гаршы садиг олмасаныз, ҝерчәк сәрвәти сизә ким е’тибар едәр? [...] Һеч бир нөкәр ики ағаја гуллуг едә билмәз: чүнки, ја биринә нифрәт едәҹәк, диҝәрини исә севәҹәк; јахуд, биринә бағлы галаҹаг, диҝәринә исә хор бахаҹагдыр. Сиз Аллаһа вә маммона гуллуг едә билмәзсиниз» (Лука 16:9-13, И–93).
10. ‘Һагсыз маммондан’ истифадә едәркән садиглијимизи неҹә ҝөстәрә биләрик?
10 Контекстдән ајдын олдуғу кими, Исанын Лука 16:10 ајәсиндәки сөзләри әслиндә ‘һагсыз маммонун’, јә’ни мадди вәсаитләрин вә әмлакын истифадә едилмәси илә бағлы иди. Бу вар-дөвләт она ҝөрә һагсыз адландырылмышдыр ки, мадди вәсаитләр, хүсусилә дә пул, гејри-камил инсанларын нәзарәти алтындадыр. Бундан башга, варланмаг арзусу һагсыз давраныша ҝәтириб чыхара биләр. Мадди вәсаитләрдән мүдрикликлә истифадә едәндә садиглијимизи ҝөстәририк. Онлары худбинликлә тәк өзүмүз үчүн хәрҹләмәк әвәзинә, Падшаһлығын марагларыны дәстәкләмәјә вә еһтијаҹы оланлара көмәк етмәјә чалышырыг. Бу саһәдә садиглик ҝөстәрәрәк «әбәди мәскәнләрин» саһибләри олан Јеһова Аллаһла вә Иса Мәсиһлә достлуг мүнасибәтләри әлдә едирик. Ҝәләҹәкдә бизә әбәди һәјаты бәхш едәрәк, онлар бизи ја ҝөјдә, ја да јер үзү Ҹәннәтдә гәбул едәҹәкләр.
11. Инсанлара Јеһованын Шаһидләринин үмүмдүнја иши үчүн едилән көнүллү ианәләри гәбул етдијимизи демәкдән нәјә ҝөрә чәкинмәмәлијик?
11 Ҝәлин, Мүгәддәс Китабы вә она әсасланан әдәбијјаты тәклиф етдијимиз инсанлара, Падшаһлыг һаггындакы хәбәри сөјләјән вә Јеһованын халгынын үмүмдүнја фәалијјәтинин көнүллү ианәләр сајәсиндә кечирилдијини хатырладан заман, онлара һансы имканы тәгдим етдијимиз һаггында дүшүнәк. Биз онлары өз мадди вәсаитләриндән мүдрикликлә истифадә етмәјә тәшвиг етмирикми? Ҝөрдүјүмүз кими, Лука 16:10 ајәсиндәки сөзләр мадди вәсаитләрин истифадә едилмәсинә аид олса да, орадакы принсипи һәјатын башга саһәләриндә дә тәтбиг етмәк олар.
«Һәр ҹәһәтҹә өзүмүзү јахшы апармаға ҹан атырыг»
12, 13. Биз һансы саһәләрдә виҹданла даврана биләрик?
12 Һәвари Павел јазырды: «Биз әминик ки, виҹданымыз тәмиздир, чүнки һәр ҹәһәтҹә өзүмүзү јахшы апармаға [«дүзҝүнлүјә», ЈД] ҹан атырыг» (Ибраниләрә 13:18). «Һәр ҹәһәтҹә» ифадәси, сөзсүз ки, өзүнә малијјә ишләрини дә дахил едир. Биз борҹларымызы вә бүтүн верҝиләри вахтында өдәмәјә чалышырыг. Нәјә ҝөрә? Чүнки буна бизим виҹданымыз — ән әсасы исә Аллаһа олан мәһәббәтимиз вә Онун әмрләринә риајәт етмәк арзумуз тәшвиг едир (Ромалылара 13:5, 6). Бизә мәхсус олмајан бир шеји тапан заман биз неҹә давранаҹағыг? Әлбәттә ки, биз һәмән шеји өз саһибинә гајтармаға чалышаҹағыг. Буну етмәјә бизи нәјин тәшвиг етдији һагда данышмагла неҹә дә ҝөзәл шаһидлик едә биләрик!
13 Һәр ҹәһәтдән дүзҝүнлүјә ҹан атмаг вә садиг олмаг, иш јериндә вәзифәмизә виҹданла јанашмаг демәкдир. Иш јериндә ишимизи виҹданла јеринә јетирдикдә, тәмсил етдијимиз Аллаһ һаггында шәһадәтлик едирик. Биз тәнбәллик етмирик вә беләликлә мүдирин вахтыны ‘оғурламырыг’. Әксинә, һәр шеји Јеһова үчүн едирмиш кими, ҹанла-башла етмәјә чалышырыг (Ефеслиләрә 4:28; Колослулара 3:23). Бә’зи мә’луматлара ҝөрә, Авропа өлкәләриндән бириндә ишчиләрин үчдә бири өзләрини хәстәлијә вуруб хәстәлик кағызы алырлар. Аллаһын һәгиги хидмәтчиләри ишдән гачмаг үчүн јалан әмәлләрә әл атмырлар. Адәтән, иш саһибләри Јеһованын Шаһидләринин виҹданлы олдугларына вә сә’јлә чалышдыгларына гијмәт верир вә һәрдән онлара јүксәк вәзифәләр һәвалә едирләр (Сүлејманын мәсәлләри 10:4).
Мәсиһчи хидмәтиндә садиглик
14, 15. Мәсиһчи хидмәтиндә садиглији неҹә ҝөстәрмәк олар?
14 Бизә һәвалә едилән хидмәтдә садиглији неҹә ҝөстәрмәлијик? Мүгәддәс Китаб дејир: «Һәмишә... Аллаһа һәмд гурбаныны, јә’ни Онун адыны играр едән додагларын бәһрәсини тәгдим едәк» (Ибраниләрә 13:15). Тәблиғ хидмәтиндә садиглик ҝөстәрмәк, онда мүнтәзәм сурәтдә иштирак етмәк демәкдир. Мәҝәр биз јол верә биләрикми ки, ај әрзиндә һеч кимлә Јеһова вә Онун нијјәтләри һаггында данышмајаг? Хош хәбәрин бәјан едилмәсиндә сә’јлә иштирак етмәјимиз, тәҹрүбә газанмағымыза вә хидмәтимизин кејфијјәтини јахшылашдырмағымыза да көмәк едәҹәк.
15 Садиглији ҝөстәрмәјин диҝәр ҝөзәл үсулу «Ҝөзәтчи Гүлләси» журналында вә «Бизим Падшаһлыг Хидмәтимиз»дә верилән мәсләһәтләри тәтбиг етмәкдир. Һазырлашанда вә тәклиф олунан тәгдимәләрдән истифадә едәндә хидмәтимизин нә гәдәр сәмәрәли олдуғуну мүшаһидә едирикми? Падшаһлыг һаггындакы хәбәрә мараг ҝөстәрәнләрә мүмкүн гәдәр тез баш чәкмәјә чалышырыгмы? Бәс Мүгәддәс Китаб өјрәнмәләрини неҹә кечиририк? Бу тапшырыға мәс’улијјәтлә јанашырыгмы? Хидмәтдә садиглик ҝөстәрәрәк биз һәм өзүмүзүн, һәм дә бизи динләјәнләрин һәјатыны горуја биләрик (1 Тимотејә 4:15, 16).
Дүнјадан ајры дурмаг
16, 17. Дүнјадан ајры олдуғумузу неҹә ҝөстәрә биләрик?
16 Аллаһа дуада мүраҹиәт едәркән, Иса өз давамчылары һаггында деди: «Мән онлара Сәнин сөзүнү вердим, вә дүнја онлара нифрәт ејләди; чүнки Мән дүнјадан олмадығым кими, онлар да дүнјадан дејилләр. Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан. Мән дүнјадан олмадығым кими, онлар да дүнјадан дејилләр» (Јәһја 17:14-16). Биз, әлбәттә ки, битәрәфлик мөвгеји, дини бајрамлар, адәт-ән’әнәләр вә әхлагсызлыг кими ҹидди мәсәләләрдә дүнјадан ајры дурмаға гәти гәрарлыјыг. Бәс бир о гәдәр дә әһәмијјәтли олмајан мәсәләләр һагда нә демәк олар? Бу дүнја хәлвәти олараг бизә өз тә’сирини ҝөстәрә биләрми? Мисал үчүн, еһтијатсызлыг үзүндән асанлыгла налајиг ҝејим тәрзини мәнимсәмәк олар. Лакин садиглик бизи тәшвиг едәҹәк ки, ҝејим вә сач дүзүмү кими мәсәләләрә «утанҹаглыг вә мө’тәдилликлә» јанашаг (1 Тимотејә 2:9, 10). Һәгигәтән дә «һеч бир шәкилдә кимсәнин бүдрәмәсинә сәбәб олмадыг ки, хидмәтимиз е’тибардан дүшмәсин. Лакин һәр шејдә өзүмүзү Аллаһын хидмәткарлары кими тәгдим едирик» (2 Коринфлиләрә 6:3, 4).
17 Јеһованы иззәтләндирмәк арзусунда олдуғумуз үчүн, биз јығынҹаг ҝөрүшләринә ҝедәркән лајигли шәкилдә ҝејинмәјә чалышырыг. Биз Јеһованы хариҹи ҝөрүнүшүмүзлә конгресләрдә дә иззәтләндирмәк истәјирик. Палтарымыз тәмиз, сәлигәли вә шәраитә ујғун олмалыдыр. Бу, бизи ҝөрәнләр үчүн јахшы шаһидлик ола биләр. Мәләкләр Павел вә онун һәмиманлыларыны мүшаһидә етдикләри кими, бизи дә мүшаһидә едирләр (1 Коринфлиләрә 4:9). Буна ҝөрә биз һәр заман ләјагәтли ҝөрүнмәк истәјирик. Ҝејим мәсәләсиндә садиглији горумаг кимин үчүнсә әһәмијјәтсиз ҝөрүнә биләр, лакин Аллаһ буну ваҹиб һесаб едир.
Садиг оланлар үчүн хејир-дуалар
18, 19. Садиглик һансы хејир-дуалара сәбәб олур?
18 Һәгиги мәсиһчиләр ‘Аллаһын чохҹәһәтли лүтфүнүн јахшы тәсәррүфатчылары’ адландырылмышлар. Бу сәбәбдән онлар ‘Аллаһын тә’мин етдији гүввәјә’ ҝүвәнирләр (1 Петер 4:10, 11). Бундан әлавә, Аллаһын мәрһәмәтинә ҝөрә, биз ‘тәсәррүфатчылара’ бизә мәхсус олмајан бир чох шеј һәвалә едилмишдир; бура мәсиһчи хидмәти дә дахилдир. Биз Аллаһын тә’мин етдији гүввәјә, «ән үстүн гүдрәт»ә ҝүвәнсәк, өзүмүзү ‘јахшы тәсәррүфатчылар’ кими ҝөстәрәрик (2 Коринфлиләрә 4:7). Бу бизи ҝәләҹәкдә гаршылашаҹағымыз һәр бир сынаға һазырлајаҹаг.
19 Мәзмурчу охујурду: «Рәбби севин, сиз еј бүтүн мө’минләр! Рәбб һәмишә Она садиг галаны горујур» (Мәзмур 31:23). Ҝәлин Јеһоваја — ‘бүтүн инсанларын, хүсусән иман едәнләрин Хиласкарына’ там ҝүвәнәрәк, садиг галмаға там гәрарлы олаг (1 Тимотејә 4:10).
Хатырлајырсынызмы?
• Нәјә ҝөрә «ән балаҹа бир ишдә садиг» олмаг лазымдыр?
• Дүзҝүнлүк тәзаһүр етдирмәклә неҹә садиг олмаг олар?
• Хидмәтдә садиг олмаг нә демәкдир?
• Өзүмүзү дүнјадан кәнар сахлајараг садиглијимизи неҹә горуја биләрик?
[17-ҹи сәһифәдәки шәкилләр]
Ән балаҹа бир ишдә садиг оланлар, бөјүк ишдә дә садигдирләр.
[19-ҹу сәһифәдәки шәкил]
«Һәр ҹәһәтҹә өзүмүзү јахшы апармаға ҹан атырыг».
[19-ҹу сәһифәдәки шәкил]
Садиглијимизи ҝөстәрмәјин ән ҝөзәл үсулу, тәблиғ ҝөрүшүнә јахшы һазырлашмагдыр.
[20-ҹи сәһифәдәки шәкил]
Гој сизин ҝејиминиз вә сач дүзүмүнүз тәвазөкарлығынызы әкс етдирсин.