Ҝәләҹәк сизи горхудурму?
ИНСАНЛАР чох шејдән горхурлар. Мәсәлән, бә’зиләрини Јер күрәсинин ҝәләҹәји горхудур. «Тајм» журналынын 2006-ҹы ил 3 апрел сајында дејилир: «Һаваларын һәддән артыг исти кечмәси, гасырғалар, дашгынлар, јанғынлар, ири бузлагларын әримәси планетин иглиминин позулдуғуну ҝөстәрир».
БМТ-нин Әтраф Мүһитин Мүһафизәси үзрә Програмы 2002-ҹи илин мајында «Глобал Еколожи Иҹмал-3» адланан һесабат дәрҹ етди. Һесабатын һазырланмасында 1000-дән чох адам иштирак етмишдир. Һесабатда јазыланлар һагда хәбәрләрдә дејилирди: «Планетимиз ики јол арасында галыб: бу ҝүн гәбул едилән гәрарлар индики вә ҝәләҹәк нәсилләрин јашамасы үчүн зәрури олан мешәләр, океанлар, чајлар, дағлар, һејванат аләми вә еколоҝијанын диҝәр саһәләринә ҹидди зәрәр вурур».
Инсанлары нараһат едән јалныз әтраф мүһитин индики вәзијјәти дејил. Дүнјанын һансы нөгтәсиндә јашамасындан асылы олмајараг, инсанларын һамысы терроризм горхусу алтында јашајыр. Канаданын Тәһлүкәсизлик вә Кәшфијјат Хидмәтинин директор мүавини демишди: «Сабаһ башымыза нә ҝәләҹәјини билмәдијимиздән ҝеҹә јухусундан да олмушуг». Тәкҹә ахшам хәбәрләринә бахмаг јетәр ки, раһатлығымызы итирәк!
Ган-тәр ичиндә пул газанан адамларын чоху ишини итирмәкдән горхур. Ишдә ихтисара дүшмәк, фабрик-заводларын бағланмасы, иш јериндә рәгабәт вә ишчиләрә гаршы ирәли сүрүлән јүксәк тәләбләр ишсиз галмаг тәһлүкәси јарадыр. Јенијетмәләр јашыдлары тәрәфиндән гәбул едилмәмәкдән горхурлар. Ушаглар нараһат ола биләрләр ки, валидејнләри онлары севмир. Бәс онлары әһатә едән дүнја һаггында нә демәк олар? Ушаглары үчүн нараһат олан бир ана дејир: «Евдән кәнара чыхдыгда һәрдән дүнја балаҹа вә тәҹрүбәсиз ушаглара бөјүк, мүдһиш бир јер кими ҝөрүнүр». Дүнјанын ҝет-ҝедә ашағы дүшән әхлаг нормаларынын доғмаларына, хүсусилә дә ушагларына тә’сир ҝөстәрмәси бир чох валидејнләри нараһат едир.
Гоҹалар горхурлар ки, пилләкәнләрдән јыхыларлар вә ја күчәдә онларын үстүнә һүҹум чәкәрләр. Бәли, ‘онлар уҹа јердән горхур, јолда јеримәк дә тәһлүкәли олур’ (Ваиз 12:5). Һәлә дәһшәтли хәстәликләри демирик. Өлүмҹүл грип вируслары, хәрчәнҝ вә јолухуҹу хәстәликләр һаггында ешидәндә ҹанымыза вәлвәлә дүшүр ки, бирдән өзүмүз вә ја аилә үзвләримиз өлүмлә, јахуд әлилликлә нәтиҹәләнән јени вә гејри-ади хәстәликләрә тутуларыг. Бир заманлар сағлам, енержи долу адамын зәиф, ҝүҹсүз дүшдүјүнү ҝөрәндә ејни шејин бизимлә вә ја доғмаларымызла да баш верәҹәјиндән горхмамаг мүмкүн дејил. Хәстә адамын үмидсизликлә долу ҝөзләринә бахмаг неҹә дә кәдәрлидир!
Горхмаға бу гәдәр сәбәб ола-ола, ҝәләҹәјә үмидлә бахмаға әсасымыз вармы? Никбинлији неҹә горуја биләрик? Нөвбәти мәгалә бу суаллара ҹаваб верир.
[Иҹазә илә]
Jeroen Oerlemans/Panos Pictures