Һәјатын мәнасы нәдәдир?

БУ СУАЛЫН ҸАВАБЫНЫ ТАПМАГ НӘ ҮЧҮН ВАҸИБДИР? Һәјатын мәнасынын олмамасы фикри гәдәр инсаны үмидсизлијә салан шеј јохдур. Инсан һәјатын мәнасыны ајдын баша дүшәндә сарсылмаз олур. Јәһудиләрин сојгырымыны јашамыш невролог Виктор Франкл јазырды: «Әминликлә дејә биләрәм ки, һәтта ән дәһшәтли вәзијјәтләрдә белә, инсанын јашамаг уғрунда мүбаризә апармасы үчүн, һәјатынын мәнасы олдуғуну билмәкдән тәсирли шеј јохдур».

Лакин бу мәсәләјә даир чохлу зиддијјәтли фикирләр мөвҹуддур. Чохлары дүшүнүр ки, һәјатын мәнасынын нәдә олдуғуну һәр бир инсан өзү үчүн өзү гәрар верир. Тәкамүлә инананларын бәзиләри исә һәјатын конкрет мәнасы олмадығыны өјрәдирләр.

Анҹаг һәјатын мәнасыны тапмағын ән мәнтигли јолу Һәјатверәнимиз Јеһова Аллаһа мүраҹиәт етмәкдир. Ҝөрүн Мүгәддәс Китаб бу һагда нә дејир.

Мүгәддәс Китаб нә дејир?

Мүгәддәс Китаб өјрәдир ки, Јеһова Аллаһ киши вә гадыны мүәјјән мәгсәдлә јаратмышды. О, улу валидејнләримизә нөвбәти тапшырығы вермишди:

Јарадылыш 1:28. «Төрәјиб чохалын вә јер үзүнү бүрүјүб она саһиб олун: дәниздәки һејванлар, ҝөјдәки гушлар, јердә сүрүнән бүтүн ҹанлылар үзәриндә һөкмранлыг един».

Аллаһ истәјирди ки, Адәмлә Һәвва вә онларын ушаглары бүтүн јер үзүнү Ҹәннәтә чевирсинләр. Нә инсанларын гоҹалыб өлмәси, нә дә онларын әтраф мүһитә зәрәр вурмасы Онун нијјәтинә дахил дејилди. Анҹаг улу валидејнләримиз сәһв сечим етдикләри үчүн биз ҝүнаһ вә өлүмү мирас алмышыг (Јарадылыш 3:2-6; Ромалылара 5:12). Буна бахмајараг, Јеһованын нијјәти дәјишмәјиб, тезликлә јер үзү Ҹәннәтә чевриләҹәк (Јешаја 55:10, 11).

Јеһова Онун нијјәтини јеринә јетирә билмәјимиз үчүн бизи физики вә әгли габилијјәтләрлә јарадыб. О, бизи Ондан мүстәгил јашамаг үчүн јаратмајыб. Ҝөрүн Мүгәддәс Китабын нөвбәти парчалары Аллаһын бизә даир нијјәти һаггында нә дејир.

Ваиз 12:13. «Һәр шеј ашкар олду, нәтиҹә бундан ибарәтдир: Аллаһдан горх, Онун әмрләрини јеринә јетир. Бәли, инсанын әсас вәзифәси будур».

Микеја 6:8. «Рәбб сиздән бундан башга нә истәјир ки? Адил олун, мәһәббәт ҝөстәрмәји севин, Аллаһынызын өнүндә һәлим үрәклә ҝәзин».

Матта 22:37-39. «“Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев”. Бу, биринҹи вә ән бөјүк әмрдир. Вә буна бәнзәјән икинҹиси будур: “Гоншуну өзүн кими сев”».

Мүгәддәс Китабын вердији ҹаваблар әсл гәлб раһатлығыны неҹә ҝәтирир?

Мүрәккәб бир ҹиһазын дүзҝүн ишләмәси үчүн ону тәјинаты вә истеһсалчынын вердији рәһбәрлик үзрә истифадә етмәк ҝәрәкдир. Буна бәнзәр тәрздә, өзүмүзә истәр руһани, истәр психи, истәр емосионал, истәрсә дә физики зәрәр јетирмәкдән гачынмаг истәјириксә, Јараданын бизим үчүн олан нијјәтинә ујғун јашамалыјыг. Ҝәлин Аллаһын нијјәтини билмәјимизин нөвбәти вәзијјәтләрдә бизә гәлб раһатлығыны неҹә ҝәтирәҹәји үзәриндә дүшүнәк.

Һәјатда нәјин даһа ваҹиб олдуғуну мүәјјән едәндә чохлары өз вахтларыны варланмаға һәср едирләр. Анҹаг Мүгәддәс Китаб хәбәрдар едир ки, «варланмаг истәјәнләр... јолдан чыхыр вә тора дүшүрләр... бир чох мәнасыз вә зијанвериҹи еһтираслара гапылырлар» (1 Тимотејә 6:9, 10).

Пулу јох, Аллаһы севмәји өјрәнәнләр исә малик олдуглары илә кифајәтләнмәјин сиррини тапыблар (1 Тимотејә 6:7, 8). Онлар баша дүшүрләр ки, чалышганлыгла ишләмәли вә өзләрини тәмин етмәлидирләр (Ефеслиләрә 4:28). Онлар Исанын бу хәбәрдарлығына да ҹидди јанашырлар: «Һеч ким ики ағаја гуллуг едә билмәз. Чүнки ја биринә нифрәт едәҹәк, диҝәрини исә севәҹәк, ја да биринә бағлы галаҹаг, диҝәринә исә хор бахаҹагдыр. Сиз Аллаһа вә маммона [вар-дөвләтә] гуллуг едә билмәзсиниз» (Матта 6:24).

Буна ҝөрә дә, Аллаһы севәнләр Онун ирадәсини јеринә јетирмәји карјера, јахуд вар-дөвләтдән ваҹиб санырлар. Онлар билирләр ки, Аллаһын ирадәсини јеринә јетирмәји һәјатларында биринҹи јерә гојсалар, Јеһова Аллаһ онларын гејдинә галаҹаг. Јеһова бу өһдәчилији Өз үзәринә ҝөтүрүр (Матта 6:25-33).

Инсанларла мүнасибәтдә бир чохлары илк нөвбәдә өзләрини дүшүнүрләр. Бу ҝүн јер үзүндә сүлһүн олмамасынын башлыҹа сәбәби әксәр инсанларын ‘худбин вә шәфгәтсиз’ олмасыдыр (2 Тимотејә 3:2, 3). Кимсә онларын үмидләрини доғрултмајанда вә ја фикирләри илә разылашмајанда онлар «һиддәт, гәзәб, чығырты, күфр» илә ҹаваб верирләр (Ефеслиләрә 4:31). Өзүнә һаким олмамаг гәлб раһатлығы ҝәтирмир, әксинә, «дава јарадар» (Сүлејманын мәсәлләри 15:18).

Аллаһын гоншуну өзүн кими севмәјә даир вердији әмрә табе оланлар исә ‘бир-биринә гаршы лүтфкар, шәфгәтли олур вә бир-бирини бағышлајырлар’ (Ефеслиләрә 4:32; Колослулара 3:13). Һәтта диҝәрләри онларла пис даврананда ‘сөјүләркән, ҹавабында сөјмәјән’ Исаны тәглид етмәјә чалышырлар (1 Петер 2:23). Иса кими онлар да дәрк едирләр ки, бәзиләринин нанкорлуғуна бахмајараг, башгаларына хидмәт етмәк әсл мәмнунлуг ҝәтирир (Матта 20:25-28; Јәһја 13:14, 15; Һәвариләрин ишләри 20:35). Јеһова Аллаһ Онун Оғлуну тәглид едәнләрә мүгәддәс руһундан верир вә бу руһ онларын һәјатында әсл әмин-аманлыг һасил едир (Галатијалылара 5:22).

Бәс ҝәләҹәјә даир нөгтеји-нәзәримиз гәлб раһатлығы тапмағымызла неҹә бағлыдыр?

[6-ҹы сәһифәдәки чәрчивә]

Инсанын һәјатда конкрет мәгсәди олмалыдыр

[7-ҹи сәһифәдәки шәкил]

Иса гәлб раһатлығына неҹә наил олмағы өјрәдирди