Инсанлара Јеһованын ҝөзү илә бахырсынызмы?
«Бәдәндә ајрылыг олмасын, әксинә бүтүн үзвләр бир-биринин гајғысына галсын». 1 КОР. 12:25
1. Илк дәфә руһани ҹәннәтә дахил оланда һансы һиссләри кечирмишдиниз?
БИЗ илк дәфә пис дүнјадан чыхыб Јеһованын халгы илә үнсијјәт етмәјә башлајанда, чох еһтимал ки, онлардакы сәмими мәһәббәт вә гајғыкешлик чох хошумуза ҝәлмишди. Онлар Шејтанын идарә етдији кобуд, давакар вә кинли инсанлардан неҹә дә фәргләнирдиләр! Биз сүлһ вә бирлијин һөкм сүрдүјү руһани ҹәннәтә дахил олмушдуг (Јешаја 48:17, 18; 60:18; 65:25).
2. а) Бизим башгаларына олан мүнасибәтимизә нә тәсир едә биләр? б) Бизә нә етмәк лазым ҝәлә биләр?
2 Анҹаг вахт кечдикҹә, гејри-камиллик уҹбатындан гардашларымыза јанлыш нөгтеји-нәзәрдән бахмаға башлаја биләрик. Гејри-камиллијимизә ҝөрә гардашларымызын руһани кејфијјәтләрини ҝөрмәк әвәзинә, онларын сәһвләрини шиширдә биләрик. Гысаҹа олараг десәк, һәрдән онлара Јеһованын ҝөзү илә бахмағы унудуруг. Әҝәр бу бизимлә дә баш верибсә, онда инсанлара олан мүнасибәтимизә диггәт јетирмәјин вә онлара Јеһова кими мүнасибәт бәсләмәји өјрәнмәјин вахтыдыр (Чых. 33:13).
Јеһова гардашларымыза неҹә бахыр?
3. Мүгәддәс Китаб мәсиһчи јығынҹағыны нә илә мүгајисә едир?
3 Һәвари Павел, 1 Коринфлиләрә 12:2-26 ајәләриндә јазылдығы кими, мәсһ олунмушларын јығынҹағыны ‘чохлу үзвләрә малик’ бәдәнлә мүгајисә етмишди. Бәдәнин органлары мүхтәлиф олдуғу кими, јығынҹағын үзвләри дә хасијјәтләринә вә баҹарыгларына ҝөрә бир-бириндән олдугҹа фәргләнирләр. Анҹаг Јеһова бу мүхтәлифлији гәбул едир. О, јығынҹағын һәр бир үзвүнү севир вә гијмәтләндирир. Буна ҝөрә һәвари Павел дә мәсләһәт ҝөрүр ки, јығынҹағын үзвләри «бир-биринин гајғысына галсын». Башгаларынын хасијјәти бизимкиндән хејли фәргләндији үчүн, бу мәсләһәтә әмәл етмәк чәтин ола биләр.
4. Нәјә ҝөрә гардашларымыза олан мүнасибәтимизи дәјишмәјә еһтијаҹ ола биләр?
4 Биз һәтта диггәти башгаларынын зәиф ҹәһәтләринә ҹәмләшдирмәјә мејлли ола биләрик. Белә етдикдә биз санки диггәтимизи шәклин анҹаг мүәјјән бир һиссәсинә ҹәмләшдиририк. Јеһова исә һәртәрәфли бахдығы үчүн шәкли бүтүнлүклә ҝөрүр. Јеһова инсаны, онун бүтүн јахшы кејфијјәтләри дә дахил олмагла, бүтүнлүклә ҝөрүр, биз исә диггәтимизи хошумуза ҝәлмәјән шејә јөнәлтмәјә мејлли ола биләрик. Јеһоваја нә гәдәр чох бәнзәмәјә чалышсаг, бир о гәдәр дә јығынҹагда мәһәббәт вә бирлијин олмасына көмәк едә биләрик (Ефес. 4:1-3; 5:1, 2).
5. Башгаларыны мүһакимә етмәк нә үчүн дүзҝүн дејил?
5 Иса билирди ки, гејри-камил инсанлар чох вахт башгаларыны мүһакимә етмәјә мејлли олурлар. О мәсләһәт вермишди: «Мүһакимә етмәјин ки, мүһакимә олунмајасыныз» (Мат. 7:1). Диггәтинизә чатдырмаг истәјәрдик ки, орижинал мәтнә әсасән, Иса «мүһакимә етмәјин» дејил, «мүһакимә етмәјә сон гојун» демишди. О билирди ки, динләјиҹиләринин чоху башгаларыны тәнгид етмәјә өјрәшибләр. Ола биләрми ки, биздә дә бу ҹүр вәрдиш олсун? Әҝәр биздә белә бир мејл варса, дәјишилмәк үчүн ҹидди сәј ҝөстәрмәлијик ки, өзүмүз дә һөкмә уғрамајаг. Доғрудан да, биз кимик ки, Јеһованын һансыса ишә тәјин етдији адамы мүһакимә едәк вә ја онун јығынҹағын үзвү олмаға лајиг олмадығыны дејәк? Гардашын зәифликләри ола биләр, анҹаг Јеһова ону гәбул едирсә, бизим ону рәдд етмәјимиз дүзҝүн олардымы? (Јәһ. 6:44). Бәс биз Јеһованын Өз тәшкилатына рәһбәрлик етдијинә вә дәјишиклик лазым ҝәлсә, вахтында тәдбир ҝөрәҹәјинә доғрудан да инанырыгмы? (Ромалылара 14:1-4 ајәләрини оху.)
6. Јеһова Өз хидмәтчиләринә неҹә бахыр?
6 Јеһованын ҝөзәл хүсусијјәтләриндән бири одур ки, О, һәр бир мәсиһчинин јени дүнјада камиллијә чатанда неҹә ола биләҹәјини ҝөрүр. О, һәм дә мәсиһчинин индијәдәк һансы руһани наилијјәтләри әлдә етдијини билир. Буна ҝөрә дә, Она һәр бир зәифлијә диггәти јөнәлтмәк лазым ҝәлмир. Мәзмур 103:12 ајәсиндә охујуруг: «Нә гәдәр шәрг гәрбдән узагдырса, асиликләримизи биздән о гәдәр узаглашдырыб». Шәхсән биз бунун үчүн неҹә дә миннәтдар олмалыјыг! (Мәз. 130:3).
7. Јеһованын Давуда олан мүнасибәтиндән нә өјрәнирик?
7 Мүгәддәс Јазылардан Јеһованын диггәти инсанын јахшы кејфијјәтләринә јөнәлтмәк кими гејри-ади баҹарыға малик олдуғуну ҝөрүрүк. Аллаһ Давуду ‘әмрләринә әмәл едиб ҝөзүндә јалныз доғру олан иши ҝөрмәк үчүн бүтүн үрәји илә Она хидмәт едән’ адам кими тәсвир етмишди (1 Пад. 14:8). Әлбәттә, биз Давудун бәзи дүзҝүн олмајан һәрәкәтләрә јол вердијини билирик. Анҹаг Јеһова диггәтини Давудун јахшы кејфијјәтләринә ҹәмләшдирирди, чүнки онун үрәјинин дүз олдуғуну билирди (1 Салн. 29:17).
Гардашлара Јеһованын ҝөзү илә бахын
8, 9. а) Јеһоваја нәдә бәнзәјә биләрик? б) Нүмунә әсасында буну неҹә ҝөстәрмәк олар вә бу һансы нәтиҹәни ҝәтирәҹәк?
8 Биздән фәргли олараг, Јеһова инсанларын үрәјини охуја билир. Елә бунун өзү башгаларыны мүһакимә етмәмәк үчүн тутарлы сәбәбдир. Биз гаршымыздакынын нијјәтләрини там билмирик. Јеһованы тәглид етмәјә чалышараг, диггәтимизи инсанын әввәл-ахыр јох олаҹаг гејри-камиллијинә ҹәмләмәли дејилик. Бу ҹәһәтдән Јеһоваја бәнзәмәји гаршымыза мәгсәд гојмаг јахшы олмаздымы? Белә етмәк баҹы-гардашларымызла сүлһдә олмағымыза чох көмәк едәҹәк (Ефес. 4:23, 24).
9 Мисал үчүн, учулуб дағылмыш бир еви тәсәввүрүнүзә ҝәтирин. Онун навалчалары салланыб, пәнҹәрәләри сыныб, таваныны исә су јарарсыз һала салыб. Ҹамаат бу евә баханда фикирләшир ки, ону учурмаг лазымдыр, онсуз да һеч нәјә јарамыр. Анҹаг еви ҝөрәнләрдән бири тамамилә башга ҹүр фикирләшир. Чүнки о, евә үздән бахмыр, онун мөһкәм тикилдијини вә бәрпа едилә биләҹәјини ҝөрүр. Еви алыб тәмир едир вә онун ҝөркәми дәјишир. Бундан сонра јолдан кечәнләр евин чох ҝөзәл олдуғуну дејирләр. Биз дә еви тәмир вә ја бәрпа етмәјә чалышан бу адам кими ола биләрикми? Диггәтимизи гардашларымызын илк бахышдан нәзәрә чарпан сәһвләринә ҹәмләшдирмәкдәнсә, онларын јахшы кејфијјәтләрини вә руһани ҹәһәтдән инкишаф едә биләҹәкләрини ҝөрүрүкмү? Әҝәр белә едириксә, биз дә Јеһова кими, гардашларымызы ҝөзәл руһани кејфијјәтләринә ҝөрә севмәјә башлајаҹағыг. (Ибраниләрә 6:10 ајәсини оху.)
10. Филипилиләрә 2:3, 4 ајәләриндәки мәсләһәт бизә неҹә көмәк едә биләр?
10 Һәвари Павел јығынҹагдакы бүтүн һәмиманлыларымызла мүнасибәтдә бизә көмәк едәҹәк бир нечә мәсләһәт вермишди. О, мәсиһчиләри тәшвиг едирди: «Рәгабәт вә ја шөһрәтпәрәстликлә һеч бир шеј етмәјин, амма тәвазөкарлыгла бир-биринизи өзүнүздән јухары сајын. Һәр кәс јалныз өз мәнфәәтини дејил, башгаларынын да мәнфәәтини ҝүдсүн» (Филип. 2:3, 4). Һәлимлик бизә башгаларына дүзҝүн мүнасибәт ҝөстәрмәјә көмәк едәҹәк. Һәмчинин инсанлара шәхси мараг ҝөстәрмәјин вә онларда јахшы кејфијјәтләр ахтармағын сајәсиндә онлара Јеһованын ҝөзү илә бахмағы өјрәнәҹәјик.
11. Бәзи јығынҹагларда һансы дәјишикликләр баш вермишдир?
11 Сон заманларда бүтүн дүнјада баш верән дәјишикликләр нәтиҹәсиндә чохлары башга өлкәләрә көчмәли олмушлар. Инди бир чох шәһәрләрдә мүхтәлиф өлкәләрдән олан адамлар јашајырлар. Әразимизә јени көчән адамлардан бәзиләри Мүгәддәс Китаб һәгигәти илә марагланмыш вә Јеһоваја ибадәтдә бизә гошулмушдур. Онлар «һәр милләтдән, бүтүн гәбиләләрдән, халглардан вә дилләрдән олан» адамлардыр (Вәһј 7:9). Нәтиҹәдә, јығынҹагларымызын чоху дүнјанын мүхтәлиф јерләриндән ҝәлән адамлардан ибарәтдир.
12. Биз бир-биримизә неҹә мүнасибәт бәсләмәлијик вә нә үчүн бу һәрдән чәтин ола биләр?
12 Бу сәбәбдән башгаларына дүзҝүн мүнасибәти горумаг үчүн бизә даһа чох диггәтли олмаг лазым ҝәлә биләр. Бунун үчүн һәвари Павелин ‘гардашлар үчүн ријасыз мәһәббәт’ ҝөстәрмәли вә ‘бир-биримизи вар гүввәмизлә сәмими гәлбдән севмәли’ олдуғумуза даир вердији мәсләһәти јадда сахламаг лазымдыр (1 Пет. 1:22). Чохмилләтли јығынҹагларда һәгиги мәһәббәт вә бағлылығы инкишаф етдирмәк чәтин ола биләр. Һәмиманлыларымызын мәдәнијјәти, еләҹә дә тәһсили, игтисади вә етник мәншәји бизимкиндән көклү сурәтдә фәргләнә биләр. Сән онларын дүшүнҹә тәрзини вә јахуд һәрәкәтләрини баша дүшмәјә чәтинлик чәкирсәнми? Онлар да сәнин һаггында ејни фикирдә ола биләрләр. Буна бахмајараг, бизим һамымыза мәсләһәт едилир: «Гардашлығы севин» (1 Пет. 2:17).
13. Дүшүнҹә тәрзимиздә һансы дәјишикликләри етмәк лазым ҝәлә биләр?
13 Гардашларымызын һамысыны севмәк үчүн дүшүнҹә тәрзимиздә нәјисә дәјишмәк лазым ҝәлә биләр. (2 Коринфлиләрә 6:12, 13 ајәләрини оху.) Һәрдән белә дедијимизи мүшаһидә едирикми: «Мән һеч ким һаггында мәнфи фикирдә дејиләм, амма...», сонра да башлајырыг өз фикримизҹә һансыса халга хас олан бәзи мәнфи хүсусијјәтләри садаламаға? Бу ҹүр сөзләр дахилимиздә көк салмыш мәнфи фикирләри силиб атмаға еһтијаҹымыз олдуғуну үзә чыхарыр. Өзүмүздән соруша биләрик: «Мән һәмишә башга мәдәнијјәтдән олан инсанларла таныш олмаға ҹәһд ҝөстәрирәмми?» Өзүмүзү бу ҹүр јохламағымыз бејнәлхалг гардашлығымызы гәбул едиб, ону даһа чох севмәјимизә көмәк едә биләр.
14, 15. а) Мүгәддәс Китабда адлары чәкилән бәзи адамларын дүшүнҹә тәрзини ким дәјишдирди? б) Биз онлары неҹә тәглид едә биләрик?
14 Мүгәддәс Китабда өз дүшүнҹә тәрзини дәјишән адамларын ҝөзәл нүмунәләри јазылыб. Онлардан бири дә һәвари Петер олмушдур. Јәһуди олдуғу үчүн Петер бүтпәрәстләрин евинә ҝетмирди. Она башга халгдан олан, сүннәт олунмамыш Корнелиусун евинә ҝетмәк тапшырыланда, тәсәввүр един, өзүнү неҹә һисс етмишди! Анҹаг Петер дүшүнҹә тәрзини дәјишди, чүнки о, баша дүшдү ки, Аллаһ бүтүн халглардан олан инсанларын мәсиһчи јығынҹағынын үзвү олмасыны истәјир (Һәв. иш. 10:9-35). Сонралар һәвари Павел олан Шаул да дүшүнҹә тәрзини дәјишди вә мәнфи фикирләри өзүндән узаглашдырды. О етираф етди ки, мәсиһчиләрә о гәдәр нифрәт едирди ки, ‘һәддини билмәјәрәк Аллаһын ҹәмијјәтини тәгиб едиб, ону виран гојурду’. Бунунла белә, Иса Мәсиһ Павелин дүшүнҹә тәрзинә дүзәлиш верәндән сонра о, бөјүк дәјишикликләр етди вә һәтта бир заманлар тәгиб етдији адамларын рәһбәрлијини гәбул етмәјә башлады (Галат. 1:13-20).
15 Шүбһәсиз, биз Јеһованын руһунун көмәјилә мүнасибәтимизи дәјишә биләрик. Әҝәр өзүмүздә мәнфи фикирләрин изләрини ашкар едириксә, ҝәлин онлары арадан галдырмаг үчүн тәдбир ҝөрәк вә ‘руһун вәһдәтини сүлһ бағы илә сахламаға сәј ҝөстәрәк’ (Ефес. 4:3-6). Мүгәддәс Китаб бизи ‘камил бирлијин бағы олан мәһәббәти ҝејинмәјә’ тәшвиг едир (Колос. 3:14).
Тәблиғ ишиндә Јеһованы тәглид едирик
16. Аллаһын инсанлара даир ирадәси нәдән ибарәтдир?
16 «Аллаһ өнүндә ајры-сечкилик јохдур», дејә һәвари Павел јазмышдыр (Ром. 2:11). Јеһованын нијјәти ондан ибарәтдир ки, бүтүн халглардан олан инсанлар Она ибадәт едә билсин. (1 Тимотејә 2:3, 4 ајәләрини оху.) Бу нијјәтини һәјата кечирмәк үчүн О, ‘әбәди Мүждәнин’ «һәр милләтә, һәр гәбиләјә, һәр дилә вә һәр халга» тәблиғ едилмәсинин гајғысына галыб (Вәһј 14:6). Иса демишди ки, «тарла... дүнјадыр» (Мат. 13:38). Бу сизин үчүн вә аилә үзвләриниз үчүн һансы мәнаны кәсб едир?
17. Бүтүн инсанлара неҹә көмәк едә биләрик?
17 Падшаһлыг хәбәрини инсанлара чатдырмаг үчүн һамынын узаг јерләрә ҝетмәк имканы јохдур. Буна бахмајараг, биз бу хәбәри јашадығымыз әразидә дүнјанын мүхтәлиф јерләриндән ҝәлән инсанлара чатдыра биләрик. Тәкҹә илләр бојунҹа тәблиғ етдијимиз инсанлара дејил, бүтүн инсанлара шаһидлик етмәк үчүн фүрсәт ахтарырыгмы? Нә үчүн һәлә әсаслы сурәтдә тәблиғ едилмәјән инсанлара шаһидлик етмәји гаршыныза мәгсәд гојмајасыныз? (Ром. 15:20, 21).
18. Иса инсанлара неҹә гајғы ҝөстәрирди?
18 Иса һамыја көмәк етмәк лазым олдуғуну јахшы баша дүшүрдү. О, тәкҹә бир әразидә тәблиғ етмирди. Мүгәддәс Китабын бир јериндә онун ‘бүтүн шәһәр вә кәндләри долашдығы’ дејилир. Бундан башга, ‘издиһамы ҝөрдүкдә Исанын онлара јазығы ҝәлмиш’ вә онлара көмәк етмәк лазым олдуғуну билдирмишди (Мат. 9:35-37).
19, 20. Јеһованын вә Исанын бүтүн инсанлара ҝөстәрдији гајғыны неҹә әкс етдирә биләрик?
19 Инсанлара гајғы ҝөстәрмәкдә Исаны неҹә тәглид едә биләрик? Бәзиләри әразиләринин тез-тез ишләнмәјән јерләриндә, мәсәлән, ишҝүзар әразиләрдә, паркларда, автомобил дајанаҹагларында вә мүһафизә олунан јашајыш биналарынын габағында тәблиғ етмәјә чалышырлар. Башгалары әразиләриндә јашајан мүәјјән етник груплара вә ја әввәлләр тез-тез шаһидлик едилмәјән груплара тәблиғ етмәк үчүн јени дил өјрәнмәјә сәј ҝөстәрирләр. Инсаны доғма дилиндә саламламағымыз онунла нә дәрәҹәдә марагландығымызы ҝөстәрә биләр. Әҝәр өзүмүзүн башга дили өјрәнмәјимиз мүмкүн дејилсә, башгаларыны буна тәшвиг едә биләрик. Әлбәттә, биз башга өлкәләрдән олан адамлара тәблиғ етмәк истәјәнләри руһдан салмаг вә ја онларын нијјәтини шүбһә алтына алмаг истәмәздик. Аллаһын ҝөзүндә инсанларын һәјаты гијмәтлидир, биз дә һәр шејә Аллаһын ҝөзү илә бахмаг истәјирик (Колос. 3:10, 11).
20 Һәмчинин инсанлара Аллаһын ҝөзү илә бахмаг, шәраитиндән асылы олмајараг, һамыја тәблиғ етмәк демәкдир. Бәзиләри евсиз-ешиксиз, сәлигәсиз ола биләр вә ја ачыг-ашкар әхлагсыз һәјат тәрзи сүрә биләр. Киминсә бизимлә пис рәфтары бүтүн халг вә ја етник груп һаггында мәнфи рәјдә олмаға әсас вермир. Бәзиләри Павеллә пис рәфтар етсәләр дә, о јол вермәди ки, бу, һәмин халгдан олан инсанлара тәблиғ етмәјә она мане олсун (Һәв. иш. 14:5-7, 19-22). О инанырды ки, хәбәрә јахшы һај верәнләр тапыла биләр.
21. Јеһованын инсанлара мүнасибәтини әкс етдирмәк сизә неҹә көмәк едәҹәк?
21 Ајдындыр ки, јерли гардашлара, бејнәлхалг гардашлығымыза вә ја әразимиздәки инсанлара гаршы дүзҝүн нөгтеји-нәзәрә — Јеһованын нөгтеји-нәзәринә малик олмаг лазымдыр. Јеһованын инсанлара мүнасибәти үзәриндә нә гәдәр чох дүшүнсәк, бир о гәдәр дә сүлһ вә бирлијин олмасына көмәк едәҹәјик. Еләҹә дә, инсанлара көмәк едә биләҹәјик ки, Өз ‘әлләри јаратдығы’ үчүн, һамыја мәһәббәтлә гајғы ҝөстәрән, «тәрәфкешлик етмәјән» Аллаһы, Јеһованы севсинләр (Әјј. 34:19).
Ҹаваб верә биләрсинизими?
• Гардашларымыза һансы мүнасибәти бәсләмәли дејилик?
• Гардашларымыза олан мүнасибәтимиздә Јеһовадан неҹә нүмунә ҝөтүрә биләрик?
• Бејнәлхалг гардашлығымыза мүнасибәт һаггында нә өјрәндиниз?
• Јеһованын инсанлара мүнасибәтини хидмәтимиздә неҹә тәглид едә биләрик?
[26-ҹы сәһифәдәки шәкил]
Башга мәдәнијјәтләрдән олан инсанларла јахындан неҹә таныш олмаг олар?
[28-ҹи сәһифәдәки шәкилләәр]
Хош хәбәри даһа чох инсана неҹә чатдырмаг олар?