Сәмими-гәлбдән садиг гал

«Сәнин һәгигәтинлә аддымлајым. Гәлбими сәмими ет, гој Сәнин исминдән горхум» (МӘЗ. 86:11).

1, 2. а) Мәзмур 86:2, 11 ајәләринә әсасән, сынаг вә ја ширникдириҹи тәсирләрлә үзләшәндә Јеһоваја садиг галмаға нә көмәк едәр? б) Үрәкдән ҝәлән садиглији нә заман мөһкәмләндирмәк ҝәрәкдир?

НӘЈӘ ҝөрә һәбсләрә вә ја тәгибләрә бахмајараг, узун илләр садиг галан бәзи мәсиһчиләр сонралар вар-дөвләт һәрислијинин тәләсинә дүшмүшләр? Суалын ҹавабы символик үрәјимизлә — әслиндә дахилән ким олмағымызла бағлыдыр. 86-ҹы мәзмур садиглији сәмими гәлблә — бөлүнмәјән, бүтөв үрәклә әлагәләндирир. Мәзмурчу Давуд белә дуа едирди: «Мөминәм [«садигәм», ЈД], Сән Өзүн мәни гору, еј Аллаһым, Сәнә ҝүвәнән бәндәни гуртар». Давуд һәм дә јалварырды: «Ја Рәбб, мәнә јолуну ҝөстәр, Сәнин һәгигәтинлә аддымлајым. Гәлбими сәмими ет, гој Сәнин исминдән горхум» (Мәз. 86:2, 11).

² Јеһоваја бүтүн үрәјимизлә ҝүвәнмәсәк, башга гајғылар вә мејлләр һәгиги Аллаһа садиглијимизи зәифләдәҹәк. Худбин арзулар ҝетдијимиз јолда ҝизләдилән миналара бәнзәјир. Һәтта ағыр вәзијјәтләрдә Јеһоваја садиглијимизи горусаг да, Шејтанын тәләләринин вә ја торунун гурбаны ола биләрик. Инди, сынаг вә ја ширникдириҹи тәсирләрә мәруз галмаздан өнҹә, Јеһоваја үрәкдән ҝәлән садиглији мөһкәмләндирмәк неҹә дә ваҹибдир! Мүгәддәс Китаб дејир: «Һәр шејдән әввәл өз үрәјини гору» (Сүл. мәс. 4:23). Бунунла бағлы Јеһованын Исраилин падшаһы Јаровамын јанына ҝөндәрдији јәһудалы пејғәмбәрин башына ҝәләнләрдән өзүмүзә дәјәрли ибрәт дәрсләри ҝөтүрә биләрик.

«Мән сәнә һәдијјә верәрәм»

3. Јаровам Аллаһын пејғәмбәринин ҝәтирдији һөкм хәбәринә неҹә мүнасибәт ҝөстәрди?

³ Белә бир сәһнәни тәсәввүрүнә ҝәтир. Елә индиҹә Аллаһ адамы шимали онгәбиләли Исраил падшаһлығында данаја ибадәти тәсис едән Јаровам падшаһа сәрт хәбәр чатдырыб. Падшаһ һиддәтләнир, адамларына пејғәмбәри јахаламағы әмр едир. Анҹаг Јеһова Өз хидмәтчиси иләдир. Һәмин андаҹа гәрибә бир шеј баш верир: падшаһын гәзәблә узатдығы әли гурујур, јалан ибадәт үчүн истифадә олунан гурбанҝаһ исә јарылыр. Бирдән Јаровам өзүнү башга ҹүр апармаға башлајыр. О, Аллаһ адамына јалварыр: «Аллаһын Рәбби рәһмә ҝәтир вә мәним үчүн дуа ет ки, әлими өзүмә тәрәф дөндәрә билим». Пејғәмбәр дуа едир вә падшаһын әли сағалыр (1 Пад. 13:1-6).

4. а) Нәјә ҝөрә демәк олар ки, падшаһын тәклифи пејғәмбәрин садиглијини сөзүн әсл мәнасыны сынаға чәкди? б) Пејғәмбәрин ҹавабы нә олду?

⁴ Сонра Јаровам һәгиги Аллаһын ҝөндәрдији адама дејир: «Мәнимлә бирҝә евә ҝедиб наһар едәк. Мән сәнә һәдијјә верәрәм» (1 Пад. 13:7). Бәс пејғәмбәр нә етмәлидир? Падшаһа һөкм хәбәрини чатдырандан сонра онун гонагпәрвәрлијини гәбул етмәлидирми? (Мәз. 119:113). Јохса падшаһын пешман олмуш кими ҝөрүнмәсинә бахмајараг, онун дәвәтини рәдд етмәлидир? Јаровамын достларына чохлу гијмәтли һәдијјәләр вермәјә сөзсүз ки, имканы вар иди. Әҝәр Аллаһын пејғәмбәринин үрәјиндә мала-пула истәк олсајды, падшаһын тәклифи онун үчүн чох ширникдириҹи ҝөрүнәрди. Анҹаг Јеһова пејғәмбәрә тапшырмышды: «Орада чөрәк јејиб су ичмә вә ҝетдијин јолла ҝери гајытма». Буна ҝөрә дә пејғәмбәр там гәтијјәтлә ҹаваб верир: «Сән мәнә малынын јарысыны да версән, сәнинлә ҝетмәрәм, бу јердә чөрәк јејиб су ичмәрәм». Бу минвалла, пејғәмбәр Бет-Елдән башга јолла ҝери гајыдыр (1 Пад. 13:8-10). Пејғәмбәрин гәрарындан үрәкдән ҝәлән садиглик һаггында нә өјрәнирик? (Ром. 15:4).

‘Кифајәтләнин’

5. Пула мејл һансы мәнада садиглик мәсәләсидир?

⁵ Пула мејл садәгәт мәсәләси кими ҝөрүнмәјә биләр, анҹаг бу беләдир. Биз Јеһованын әсл еһтијаҹларымызы тәмин едәҹәјинә даир вәдинә етибар едирикми? (Мат. 6:33; Ибр. 13:5). Һәјатымызы даһа раһат едә биләҹәк шејләри нәјин баһасына олурса-олсун әлдә етмәјә ҹан атмагданса, онларсыз кечинә биләрикми? (Филипилиләрә 4:11-13 ајәләрини оху.) Инди әлдә етмәк истәдијимиз шејләр наминә теократик мәсулијјәтләрә наил олмаг имканыны әлдән веририкми? Јеһоваја сәдагәтлә хидмәт етмәк һәјатымызда биринҹи јерими тутур? Бу суаллара неҹә ҹаваб верәҹәјимиз әсас етибарилә Аллаһа үрәкдән хидмәт едиб-етмәмәјимиздән асылы олаҹаг. Һәвари Павел јазмышды: «Әлиндәки илә кифајәтләнәрәк Аллаһ јолу илә јеримәк исә бөјүк газанҹдыр. Чүнки биз дүнјаја һеч бир шеј ҝәтирмәмишик; вә ајдындыр ки, орадан һеч бир шеј дә апара билмәрик. Амма јемәјимиз вә палтарымыз варса, бунларла кифајәтләнирик» (1 Тим. 6:6-8).

6. Бизә һансы ‘һәдијјәләр’ тәклиф олуна биләр вә онлары гәбул едиб-етмәмәји гәрара алмаға нә көмәк едә биләр?

⁶ Мәсәлән, ола биләр ки, ишдә бизә өзү илә јахшы мәваҹиб вә әлавә имканлар ҝәтирән ирәлиләјиш тәклиф олунсун. Јахуд иш тапмаг үчүн башга өлкәјә вә ја јерә ҝедәриксә, даһа чох газана биләҹәјимизи фикирләшә биләрик. Илк бахышдан белә имканлар Јеһованын хејир-дуасы кими ҝөрүнә биләр. Анҹаг аддым атмаздан өнҹә өз нијјәтләримизи јохламалы дејиликми? Бизи башлыҹа олараг бир суал марагландырмалыдыр: «Гәрарым Јеһова илә мүнасибәтләримә неҹә тәсир едәҹәк?»

7. Варланмаг арзусуну көкүндән силиб-атмаг нәјә ҝөрә ваҹибдир?

⁷ Шејтанын системи инсанлара арамсыз олараг пулпәрәстлији ашылајыр. (1 Јәһја 2:15, 16 ајәләрини оху.) Иблисин мәгсәди бизим үрәјимизи корламагдыр. Буна ҝөрә дә, үрәјимиздәки варланмаг арзусуну ҝөрмәк вә ону јерли-дибли силиб атмаг үчүн ајыг олмаг лазымдыр (Вәһј 3:15-17). Шејтан дүнјанын бүтүн падшаһлыгларыны Исаја тәклиф едәндә, бу тәклифи рәдд етмәк онун үчүн һеч дә чәтин олмады (Мат. 4:8-10). Иса хәбәрдарлыг етмишди: «Диггәтли олун, һәр нөв тамаһкарлыгдан өзүнүзү сахлајын, чүнки инсан һәјаты онун вар дөвләтинин чохлуғундан асылы дејилдир» (Лука 12:15). Садиглик бизә өзүмүзә дејил, Јеһоваја ҝүвәнмәјә көмәк едәҹәк.

Гоҹа пејғәмбәр «она јаландан сөјләди»

8. Аллаһын пејғәмбәринин сәдагәти неҹә сынанды?

⁸ Аллаһын пејғәмбәри бирбаша евинә ҝетсәјди, һәр шеј јахшы оларды. Анҹаг демәк олар ки, елә һәмин анда о, башга бир сынагла үзләшди. Мүгәддәс Китабда нәгл едилир ки, «Бет-Елдә гоҹа бир пејғәмбәр јашајырды. Онун оғулларындан бири ҝәлиб» һәмин ҝүн баш верән һадисәләри она данышыр. Гоҹа киши бу әһвалаты ешидән кими, Аллаһын пејғәмбәринә чатсын дејә, өзү үчүн бир ешшәк паланламағы тапшырыр. Чох ҝетмәмиш пејғәмбәри бөјүк ағаҹын алтында динҹәлән тапыб дејир: «Мәнимлә бирҝә евә ҝедиб наһар едәк». Һәгиги Аллаһын ҝөндәрдији адам дәвәти гәбул етмәјәндә гоҹа киши она дејир: «Мән дә сәнин кими бир пејғәмбәрәм. Бир мәләк Рәббин сөзү илә мәнә деди: “Ону гајтарыб өзүнлә евинә ҝәтир, чөрәк јејиб су ичсин”». Анҹаг Мүгәддәс Јазыларда дејилир ки, «буну она јаландан сөјләди» (1 Пад. 13:11-18).

9. Мүгәддәс Јазылар јаланчы адамлар һаггында нә дејир вә онлар кимләрә зәрәр вурурлар?

⁹ Гоҹа пејғәмбәрин буну һансы нијјәтлә етдијини билмәсәк дә, о, јалан сөјләмишди. Јәгин бу гоҹа бир вахтлар Јеһованын садиг пејғәмбәри олмушду. Анҹаг бу јердә о кәләк ҝәлди. Мүгәддәс Јазылар бу ҹүр һәрәкәти гәти писләјир. (Сүлејманын мәсәлләри 6:16, 17 ајәләрини оху.) Јаланчылар тәкҹә өзләринә дејил, чох вахт башгаларына да руһани ҹәһәтдән зәрәр ҝәтирирләр.

Аллаһ адамы гоҹа илә гајытды

10. Аллаһын пејғәмбәри гоҹа кишинин дәвәтинә неҹә һај верди вә бу нә илә нәтиҹәләнди?

¹⁰ Јәһудадан олан пејғәмбәр гоҹа пејғәмбәрин кәләк ҝәлдијини анламалы иди. О өзүндән соруша биләрди: «Нәјә ҝөрә Јеһова мәнә јени ҝөстәриш вермәк үчүн башгасынын јанына мәләк ҝөндәрсин?» О, Јеһовадан ҝөстәришинә ајдынлыг ҝәтирмәји хаһиш едә биләрди, анҹаг Мүгәддәс Јазыларда онун белә етдији дејилмир. Әксинә, «Аллаһ адамы онунла [гоҹа илә] гајытды, онун евиндә чөрәк јејиб су ичди». Бу, Јеһованын хошуна ҝәлмәди. Алданмыш пејғәмбәр Јәһудаја гајыданда гаршысына бир шир чыхыб ону парчалады. Онун пејғәмбәрлик фәалијјәти неҹә дә фаҹиәли шәкилдә сона чатды! (1 Пад. 13:19-25)a.

11. Ахија һансы ҝөзәл нүмунәни гојуб?

¹¹ Диҝәр тәрәфдән исә, Јаровамы падшаһ кими мәсһ етмәјә ҝөндәрилән Ахија пејғәмбәр гоҹаланадәк садиг галды. Јаровам өз арвадыны хәстә оғлу һаггында сорушмаг үчүн гоҹалыб ҝөзүнүн нуруну итирмиш Ахијанын јанына ҝөндәрәндә, о, ҹәсарәтлә ушағын өләҹәјини хәбәр верди (1 Пад. 14:1-18). Ахијанын алдығы хејир-дуалардан бири дә о олду ки, Аллаһын илһамланмыш Кәламынын јазылмасында онун да пајы олду. Неҹә? Сонралар каһин Езра онун јазыларындан бир мәнбә кими истифадә етди (2 Салн. 9:29).

12-14. а) Ҹаван пејғәмбәрин башына ҝәлән һадисәдән нә өјрәнә биләрик? б) Ағсаггалын Мүгәддәс Китаба әсасланараг вердији мәсләһәт үзәриндә диггәтлә вә дуа едәрәк дүшүнмәјин ваҹиблијини нүмунә әсасында ҝөстәрин.

¹² Мүгәддәс Китаб ҹаван пејғәмбәрин гоҹа илә гајыдыб јејиб-ичмәздән әввәл Јеһова илә мәсләһәтләшмәмәсинин сәбәбини ачыгламыр. Бәлкә гоҹа кишинин дедикләри онун елә ешитмәк истәдији шејләр иди? Өзүмүзә бундан һансы дәрси ҝөтүрә биләрик? Бизә Јеһованын тәләбләринин әдаләтли олдуғуна там архајын олмаг лазымдыр. Һәм дә нә олурса-олсун, онлара әмәл етмәјә гәти гәрарлы олмалыјыг.

¹³ Мәсләһәтә ҝәлдикдә, бәзиләри ешитмәк истәдикләри шеји ешидирләр. Мәсәлән, тәблиғчијә елә иш тәклиф едә биләрләр ки, бу онун аиләсинә вә теократик ишләрә сәрф етдији вахтындан алсын. О, ағсаггалдан мәсләһәт истәјә биләр. Ағсаггал, гардаша аиләсини неҹә доландырмалы олдуғуну сөјләјә билмәјәҹәјини етираф етмәклә сөзүнә башлаја биләр. Сонра ағсаггал, һәмин иши гәбул едәрсә, һансы руһани тәһлүкәләрлә үзләшәҹәјини гардашла бирликдә мүзакирә едә биләр. Гардаш ағсаггалын јалныз илк сөзләриними јадда сахлајаҹаг, јохса сонракы сөзләри үзәриндә дә ҹидди дүшүнәҹәк? Ајдындыр ки, гардаша өзү үчүн руһани бахымдан нәјин јахшы олдуғуну мүәјјән етмәк лазымдыр.

¹⁴ Башга бир вәзијјәти дә нәзәрдән кечирәк. Ола билсин, баҹы ағсаггалдан иманына шәрик олмајан әриндән ајрылыб-ајрылмамағы сорушур. Шүбһәсиз, ағсаггал она изаһ едәҹәк ки, бу барәдә өзү гәрар вермәлидир. Сонра о бу мәсәләјә даир Мүгәддәс Китабын мәсләһәтини нәзәрдән кечирә биләр (1 Кор. 7:10-16). Баҹы ағсаггалын дедикләри үзәриндә ҹидди дүшүнәҹәкми? Јохса о артыг әриндән ајрылмағы бејнинә гојуб? Гәрар верәркән онун Мүгәддәс Китаба әсасланан мәсләһәт үзәриндә дуа едәрәк дүшүнмәси мүдриклик оларды.

Тәвазөкар ол

15. Аллаһын пејғәмбәринин сәһвиндән нә өјрәнирик?

¹⁵ Јәһудадан олан пејғәмбәрин сәһвиндән өзүмүзә башга һансы дәрси ҝөтүрә биләрик? Сүлејманын мәсәлләри 3:5 ајәсиндә дејилир: «Бүтүн гәлбинлә Рәббә ҝүвән, өз идракына етибар етмә». Јәһудадан олан пејғәмбәр әввәлки кими Јеһоваја ҝүвәнмәк әвәзинә, бу дәфә өз ағлына етибар етди. Сәһви она һәјаты вә Аллаһын јанында јахшы ады баһасына баша ҝәлди. Онун әһвалаты Јеһоваја тәвазөкарлыгла вә сәдагәтлә хидмәт етмәјин ваҹиб олдуғуна неҹә дә инандырыҹы сүбутдур!

16, 17. Јеһоваја садиг галмаға бизә нә көмәк едәҹәк?

¹⁶ Худбин үрәјимиз бизи алдатмаға мејиллидир. «Инсан үрәји һәр шејдән һијләҝәрдир, сағалмаз хәстәлији вар» (Јер. 17:9). Јеһоваја садиг галмаг үчүн даим әлимиздән ҝәләни етмәлијик ки, көһнә мәнлији өзүндән разылыға вә өзүнә ҝүвәнмәјә мејли илә бирликдә кәнара атаг. Биз һәм дә ‘Аллаһын бәнзәјишинә ҝөрә һәгиги салеһлик вә мүгәддәсликлә [«садигликлә», ЈД] јарадылмыш јени мәнлији ҝејинмәлијик’. (Ефеслиләрә 4:22-24 ајәләрини оху.)

¹⁷ Сүлејманын мәсәлләри 11:2 ајәсиндә дејилир: «Һикмәт тәвазөкарын јанына ҝәләр». Тәвазөкарлыгла Јеһованын көмәјинә архаланмаг бизә баһа баша ҝәлән сәһвләрдән гачмаға көмәк едәҹәк. Мәсәлән, руһ дүшкүнлүјү асанлыгла бизим дүшүнҹәмизи тутгунлашдыра биләр (Сүл. мәс. 24:10). Бизләрдән һәр бири мүгәддәс хидмәтин һансыса саһәсиндән јорулуб, дүшүнмәјә башлаја биләр ки, артыг илләрдир етдијим кифајәтдир, инди башгаларынын бу јүкү дашымаг вахтыдыр. Јахуд биз «нормал» јашамағы арзулаја биләрик. Анҹаг ‘чалышмағымыз’ вә ‘һәр заман Рәббин ишиндә тәрәгги етмәјимиз’ үрәјимизи горујаҹаг (Лука 13:24; 1 Кор. 15:58).

18. Һансы гәрары верәҹәјимизи билмәјәндә нә едә биләрик?

¹⁸ Һәрдән елә вәзијјәт ола биләр ки, бизә чәтин гәрарлар вермәк лазым ҝәлсин вә тутмалы олдуғумуз дүзҝүн јол ајдын ҝөрүнмәсин. Белә һалда биздә мәсәләни өз билдијимиз кими һәлл етмәк мејли јаранаҹагмы? Һәр дәфә белә вәзијјәтләрә дүшәндә Јеһовадан јардым диләмәк мүдриклик оларды. Јагуб 1:5 ајәсиндә дејилир: «Әҝәр сизләрдән биринин һикмәти әксикдирсә, һәр кәсә ҹомәрдликлә... верән Аллаһдан диләсин». Сәмави Атамыз еһтијаҹымыз олан мүгәддәс руһундан бизә верәҹәк ки, јахшы гәрарлар гәбул едә биләк. (Лука 11:9, 13 ајәләрини оху.)

Садиг галмаға гәти гәрарлы ол

19, 20. Нә етмәјә гәти гәрарлы олмалыјыг?

¹⁹ Сүлејманын һәгиги ибадәтдән дөнмәсиндән сонракы тәлатүмлү илләрдә Аллаһын хидмәтчиләринин садиглији шиддәтли сынаглара мәруз галды. Дүздүр, чохлары нәдәсә ҝүзәштә ҝетдиләр. Буна бахмајараг, бәзиләри Јеһоваја садиг галдылар.

²⁰ Һәр ҝүн биз садиглијимизи сынаға чәкән сечимләр вә гәрарларла үзләширик. Садиглијимизи биз дә сүбут едә биләрик. Ҝәлин Јеһованын Өз садиг бәндәләринә даима хејир-дуа верәҹәјинә там әмин олараг Јеһоваја һәмишә сәмими-гәлбдән садиг галаг (2 Шам. 22:26).

[Һашијә]

Неҹә ҹаваб верәрдиниз?

• Варланмаг арзусуну үрәјимиздән нә үчүн силиб-атмаға чалышмалыјыг?

• Јеһоваја садиг галмаға бизә нә көмәк едәр?

• Тәвазөкарлыг Јеһоваја садиг галмаға бизә неҹә көмәк едә биләр?

[9-ҹу сәһифәдәки шәкил]

Ширникдириҹи тәсирләрә гаршы дурмаг сәнә чәтиндирми?

[10-ҹу сәһифәдәки шәкилләр]

Мүгәддәс Китаб әсасында верилән мәсләһәт үзәриндә ҹидди дүшүнәҹәксәнми?