Јеһова нәвазишлә јашлы хидмәтчиләринин гајғысына галыр
«Аллаһ һагсыз дејилдир ки, сизин ишинизи,.. Онун ады наминә ҝөстәрдијиниз мәһәббәти унутсун» (ИБР. 6:10).
1, 2. а) Ағсачлы адам сизә нәји хатырлада биләр? б) Јеһова гоҹа мәсиһчиләрә неҹә јанашыр?
ЈЫҒЫНҸАГДА ағсачлы гоҹа ҝөрәндә Мүгәддәс Јазыларын «Даниел» китабындан бир парча јадына дүшмүрмү? Даниелә вердији ҝөрүнтүдә Јеһова Аллаһ Өзүнү ағсачлы тәсвир едир. Даниел јазырды: «Нәһајәт, мән ҝөрдүм ки, тахтлар гурулду вә Әзәлдән Вар Олан отурду. Онун әјниндә гар кими бәјаз палтар вар иди вә сачлары јун кими ағаппаг иди» (Дан. 7:9).
2 Адәтән тәбии јун тутгун ағ рәнҝдә олур. Ағ сачлар, һәмчинин «Әзәлдән Вар Олан» титулу Аллаһын јашынын вә мүдриклијинин бөјүклүјүнә диггәти јөнәлдир ки, онларын да һәр бири дәрин еһтирама лајигдир. Бәс белә исә, Әзәлдән Вар Олан Јеһова садиг јашлы хидмәтчиләринә неҹә јанашыр? Аллаһын Кәламы дејир ки, «ағаран сачлар шәрәф таҹыдыр, салеһлик јолунун газанҹыдыр» (Сүл. мәс. 16:31). Бәли, әҝәр садиг мәсиһчинин сачлары ағарырса, белә јеткин ҝөркәм Аллаһын ҝөзүндә ҝөзәлдир. Сиз дә гоҹа баҹы-гардашларымыза Јеһованын ҝөзү илә бахырсынызмы?
Нә үчүн белә дәјәрлидирләр?
3. Нәјә ҝөрә гоҹа һәмиманлылар бизим үчүн белә дәјәрлидирләр?
3 Јеһованын севимли гоҹа хидмәтчиләри арасында јығынҹагларымызда сәдагәтлә хидмәт едән баҹы-гардашларымыз — Јеһованын Шаһидләринин Рәһбәрлик Шурасынын үзвләри, индики вә кечмиш сәјјар нәзарәтчиләр, чалышган пионерләр вә Падшаһлығын јеткин тәблиғчиләри вардыр. Ола билсин, сән узун илләр әрзиндә хош хәбәри сәјлә тәблиғ едән вә јахшы нүмунәләри илә ҝәнҹләри һәвәсләндириб онлара дүзҝүн һәјат јолу тутмаға көмәк едән мәсиһчиләри таныјырсан. Бәзи јашлы һәмиманлылар ағыр мәсулијјәт јүкүнү дашымыш вә хош хәбәр наминә тәгибләрә таб ҝәтирмишләр. Јеһова вә «садиг вә ағыллы гул» онларын Падшаһлыг үчүн кечмишдә вә инди етдикләри һәр бир иши јүксәк гијмәтләндирир (Мат. 24:45)
4. Биз гоҹа мәсиһчиләрә нәјә ҝөрә һөрмәтлә јанашмалы вә онлар үчүн дуа етмәлијик?
4 Белә садиг гоҹалар Јеһова Аллаһын диҝәр хидмәтчиләринин миннәтдарлығына вә һөрмәтинә лајигдирләр. Јеһованын Муса васитәсилә вердији Ганунунда гоҹалара һөрмәт вә диггәтин Аллаһ горхусу илә әлагәли олдуғу ҝөстәрилир (Лев. 19:32). Биз бу садиг һәмиманлыларымыз үчүн мүнтәзәм олараг дуа етмәли вә мәһәббәтдән ирәли ҝәләрәк чәкдикләри әмәјә ҝөрә Аллаһа миннәтдарлығымызы билдирмәлијик. Һәвари Павел һәм ҹаван, һәм дә гоҹа әмәкдашлары үчүн дуа едирди. (1 Салоникилиләрә 1:2, 3 ајәләрини оху.)
5. Јеһованын гоҹа хидмәтчиләри илә үнсијјәтдән неҹә фајдалана биләрик?
5 Бундан башга, јығынҹагдакыларын һамысы јашлы мәсиһчиләрлә үнсијјәтдән фајда әлдә едә биләрләр. Өјрәнмә, мүшаһидә вә тәҹрүбә сајәсиндә Јеһованын садиг гоҹа хидмәтчиләри зәнҝин билик топламышлар. Онлар сәбирли олмағы, шәфгәт ҝөстәрмәји өјрәнмишләр, билдикләрини ҝәләҹәк нәсилләрә өтүрмәк исә онлара севинҹ вә мәмнунлуг ҝәтирир (Мәз. 71:18). Ҹаванлар, мүдрик олун вә дәрин гујудан су чәкирмиш кими, бу билик мәнбәјиндән фајдаланын (Сүл. мәс. 20:5).
6. Јашлылары доғрудан да гијмәтләндирдијини неҹә ҝөстәрә биләрсән?
6 Гоҹалара онлары Јеһованын гијмәтләндирдији гәдәр гијмәтләндирдијини ҝөстәрирсәнми? Буну етмәјин үсулларындан бири садигликләринә ҝөрә онлары нә гәдәр чох севдијини вә фикирләрини нә гәдәр гијмәтләндирдијини демәкдир. Бундан башга, онлардан өјрәндикләринә ујғун һәрәкәт етмәклә һөрмәтинин сәмими олдуғуну ҝөстәрәҹәксән. Бир чох јашлы мәсиһчиләр вахтилә өзләриндән бөјүк садиг һәмиманлыларындан алдыглары мүдрик мәсләһәтләри вә һәмин мәсләһәтләрә ујғун һәрәкәт етмәјин бүтүн һәјатлары боју онлара неҹә фајда ҝәтирдијини јада сала биләрләрa.
Зәриф һиссләрини әмәлдә ҝөстәр
7. Јеһова гоҹаларын гајғысына галмаг мәсулијјәтини әсас етибарилә кимләрә һәвалә едиб?
7 Аллаһ гоҹаларын гајғысына галмаг мәсулијјәтини әсас етибарилә аиләләринин үзәринә гојур. (1 Тимотејә 5:4, 8 ајәләрини оху.) Аиләләрин гоҹа гоһумлары илә бағлы өһдәчиликләрини јеринә јетирмәси вә бунунла да, Јеһова кими, гоҹаларын гајғысына галдыгларыны ҝөстәрмәси Јеһованын хошуна ҝәлир. Аллаһ бу аиләләрә дајаг дурур, бүтүн ҹәһдләринә вә вердикләри гурбанлара ҝөрә онлара хејир-дуа верирb.
8. Нә үчүн јығынҹаглар јашлы мәсиһчиләрин гајғысына галмалыдырлар?
8 Ејнилә, јерли јығынҹаглар көмәјә еһтијаҹы олан, лакин аилә үзвләри иманына шәрик олмајан, јахуд гајғыларына галмаг истәмәјән гоҹалара әл тутанда Јеһова бундан разы галыр (1 Тим. 5:3, 5, 9, 10). Бунунла јығынҹаглар гоҹаларын «дәрдләринә шәрик», онлара гаршы «гардаш севән, шәфгәтли, меһрибан» олдугларыны ҝөстәрирләр (1 Пет. 3:8). Јығынҹагларын өз гоҹа үзвләринин гајғысына галмасы Павелин инсан бәдәнинин бир үзвүнүн әзаб чәкирсә, «диҝәрләри дә онунла бәрабәр әзаб чәкир» сөзләри илә јахшы тәсвир олунур (1 Кор. 12:26). Гоҹалар үчүн шәфгәтлә нә исә етмәк Павелин мәсләһәтиндәки принсипи әкс етдирир: «Бир-биринизин јүкләрини дашыјын вә Мәсиһин Ганунуну бу јолла иҹра един» (Галат. 6:2).
9. Гоҹалыг инсанын үзәринә һансы јүкү гоја биләр?
9 Гоҹалар үчүн јүк нә ола биләр? Чохлары тез јорулур. Ади ишләр — һәкимә ҝетмәк, кағыз-куғуз ишләри, ев јығышдырмаг, јемәк биширмәк онлара ҝүҹләриндән артыг ҝөрүнә биләр. Чох вахт јаш өтдүкҹә суја тәләбат вә иштаһа азалдығындан онлара елә ҝәлә биләр ки, лазым олан гәдәр јејиб-ичмәсәләр дә олар. Руһани гидаја ҝәлдикдә дә белә ола биләр. Зәиф ҝөрдүкләриндән вә ағыр ешитдикләриндән онлар үчүн охумаг вә јығынҹаг ҝөрүшләринә гулаг асмаг чәтин, һәмчинин ҝөрүшләрә ҝетмәјә һазырлашмаг јоруҹу ола биләр. Белә һалда башгалары гоҹалар үчүн нә едә биләр?
Сән неҹә көмәк едә биләрсән?
10. Ағсаггаллар гоҹалара лазыми көмәклик ҝөстәрилмәси үчүн нә едә биләрләр?
10 Бир чох јығынҹаглар гоҹаларын гајғысына галмагда ҝөзәл нүмунә верирләр. Мәһәббәтли баҹы-гардашлар онлара базарлыг етмәкдә, јемәк һазырламагда вә тәмизлик ишиндә әл тутурлар. Бунунла јанашы, өјрәнмәкдә, ҝөрүшләрә һазырлашмагда вә хидмәтдә мүнтәзәм иштирак етмәкдә дә өз көмәкликләрини әсирҝәмирләр. Ҹаван Шаһидләр онлары мүшајиәт едир вә нәглијјат сарыдан јардым ҝөстәрирләр. Әҝәр гоҹа һәмиманлылар евдән чыха билмирләрсә, телефон вә ја лент јазылары васитәсилә ҝөрүшләрә гулаг асырлар. Ағсаггаллар имкан дахилиндә јығынҹагдакы гоҹаларын еһтијаҹларынын өдәнилмәси үчүн лазыми тәдбирләр ҝөрүрләрc.
11. Бир аиләнин гоҹа гардаша неҹә көмәк етдијини данышын.
11 Һәмчинин һәр бир мәсиһчи шәхсән гонагпәрвәрлик вә сәхавәт ҝөстәрә биләр. Бир јашлы гардаш арвады өләндән сонра, онун тәгаүдү олмадан кирајә һаггыны өдәјә билмирди. О, арвады илә бирликдә ата, ана вә ики јенијетмә гыздан ибарәт бир аилә илә Мүгәддәс Китабы өјрәнирди. Онларын евләри бөјүк олдуғундан, отағын икисини һәмин гардаша вердиләр. 15 ил әрзиндә онлар бир сүфрәдә јејиб-ичир, дејиб-ҝүлүр вә меһрибан јашајырдылар. Ҹаванлар онун иманындан вә зәнҝин тәҹрүбәсиндән чох шеј өјрәнир, гардаш исә хош мүнасибәтдән севинҹ тапырды. Бу гардаш 89 јашында вәфат едәнә кими онларла јашады. Һәмин аилә гардашла үнсијјәтдән алдығы хејир-дуалара ҝөрә индијәдәк Аллаһа миннәтдарлығыны билдирир. Онлар Иса Мәсиһин шаҝирдинә јардым етдикләри үчүн ‘мүкафатсыз галмадылар’ (Мат. 10:42)d.
12. Јашлы баҹы-гардашлара нәвазишлә јанашдығыны неҹә ҝөстәрә биләрсән?
12 Бәлкә дә, сәнин гоҹа баҹы-гардашлара бу аилә кими көмәк етмәк имканын јохдур, анҹаг јәгин ки, ҝөрүшләрә ҝәлмәкдә вә хидмәтә чыхмагда онлара көмәк едә биләрсән. Онлары һәм дә евинә гонаг дәвәт едә, јахуд онларла бирликдә ҝәзмәјә чыха биләрсән. Хүсусилә дә хәстә оланда, јахуд евдән чыха билмәјәндә онлара баш чәкмәк олар. Бундан башга, сән һәмишә онларла јеткин инсанлар кими рәфтар едә биләрсән, белә етмәк һәм дә ваҹибдир. Нә гәдәр ки, әгли габилијјәтләрини итирмәјибләр, онлара аидијјәти олан бүтүн гәрарларын верилмәсиндә гоҹа мәсиһчиләрин өзләри дә иштирак етмәлидирләр. Һәтта әгли габилијјәтини итирәнләр дә, өз ләјагәтләринә һөрмәт едилиб-едилмәдијини һисс едирләр.
Јеһова ишинизи унутмајаҹаг
13. Јаша долмуш мәсиһчиләрин һиссләрини нәзәрә алмаг нәјә ҝөрә ваҹибдир?
13 Гоҹаларын һиссләрини нәзәрә алмаг хүсусилә ваҹибдир. Чох вахт гоҹалар ҹаван вә сағлам оларкән баҹардыглары иши инди ҝөрә билмәдикләри үчүн кәдәрләнирләр. Мәсәлән, Јеһоваја тәхминән 50 ил фәал хидмәт етмиш вә даими пионер олмуш бир баҹы ағыр хәстәлијә тутулмушду вә ҝөрүшләрә чәтинликлә ҝедирди. О, әввәлки хидмәтини индики мәһдуд имканлары илә мүгајисә едәндә, башыны ашағы салыб ағлаја-ағлаја деди: «Мәним инди етдикләрим һеч нәдир».
14. Мәзмурлар Јеһованын јашлы хидмәтчиләрини неҹә руһландыра биләр?
14 Әҝәр сән дә јаша долмусанса, белә аҹы һиссләр сәни дә чулғајырмы? Јахуд елә анлар олурму ки, Јеһованын сәни тәрк етдијини дүшүнәсән? Јәгин мәзмурчу да аһыл јашларында ејни һиссләри кечирмишди, чүнки о јалварырды: «Јаша доланда да мәни рәдд етмә, тагәтдән дүшәндә дә мәни тәрк етмә... Јаша долуб сачыма дән дүшәнә гәдәр... еј Аллаһ, мәни тәрк етмә» (Мәз. 71:9, 18). Сөзсүз ки, Јеһова бу мәзмуру јазаны тәрк етмәјә һазырлашмырды, О сәни дә тәрк етмәјәҹәк. Башга бир мәзмурда Давуд Јеһованын дәстәјинә архајын олдуғуну демишди. (Мәзмур 68:19 ајәсини оху.) Әҝәр аһыл чағында Јеһоваја садиг галырсанса, әмин ол ки, О сәнинләдир вә һәр ҝүн сәнә көмәк едәҹәк.
15. Гоҹалара никбин әһвал-руһијјәни горумаға нә көмәк едә биләр?
15 Јеһова јашлы Шаһидләринин Ону иззәтләндирмәк үчүн әввәлләр вә инди етдикләрини һеч вахт јадындан чыхармыр. Мүгәддәс Китабда дејилир: «Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун» (Ибр. 6:10). Буна ҝөрә дә, мәнфи фикирләрлә мүбаризә апарын, јанлыш олараг, гоҹалыг уҹбатындан артыг Јеһова үчүн фајдалы олмадығынызы дүшүнмәјин. Бәдбин вә мәјуседиҹи фикирләри никбин фикирләрлә әвәз етмәјә чалышын. Хејир-дуаларыныза вә ҝәләҹәјә олан үмидинизә ҝөрә севинин! Биз ән јахшы шејә, ‘үмидли бир ҝәләҹәјә’ маликик ки, буна да Јараданымыз Өзү зәманәт верир (Јер. 29:11, 12; Һәв. иш. 17:31; 1 Тим. 6:19). Үмидиниз үзәриндә дүшүнүн, руһән вә әглән ҝүмраһ галмаға чалышын вә һеч вахт ҝөрүшләрдә иштирак етмәјинизи дәјәрсиз санмајын!e
16. Нәјә ҝөрә бир јашлы гардаш ағсаггал кими хидмәтини дајандырмалы олдуғуну дүшүнүрдү, анҹаг ағсаггаллар шурасы ону неҹә руһландырды?
16 Сәксәнјашлы Јоһан инди әлил олан сәдагәтли арвады Санинин бүтүн ҝүнү гајғысына галырf. Онун ҝөрүшләрә вә хидмәтә ҝедә билмәси үчүн баҹылар нөвбә илә Санинин јанында галырлар. Анҹаг бу јахынларда Јоһан гардаш емосионал ҹәһәтдән тагәтдән дүшәрәк фикирләшмәјә башлады ки, артыг јығынҹагда ағсаггал кими хидмәт етмәмәлидир. Ҝөзләри јашла долмуш бу гардаш сорушду: «Мәним ағсаггал олмағымын нә мәнасы вар? Артыг јығынҹаға һеч бир фајдам дәјмир». Ағсаггаллар гардашы әмин етдиләр ки, онун тәҹрүбәси вә фикирләри чох дәјәрлидир. Һәтта јығынҹағын ишләриндә мәһдуд иштирак етсә дә, ону ағсаггал кими хидмәтини давам етдирмәјә тәшвиг етдиләр. Бундан чох руһланан Јоһан ағсаггал кими хидмәтини давам етдирир, бу да јығынҹаг үчүн бөјүк хејир-дуадыр.
Јеһова һәгигәтән дә гајғыкешдир
17. Мүгәддәс Китаб гоҹа мәсиһчиләри нәјә әмин едир?
17 Мүгәддәс Китаб ачыглајыр ки, јашлылар гоҹалығын проблемләринә бахмајараг, руһани инкишафларыны давам етдирә биләрләр. Мәзмурчу дејирди ки, Јеһованын ‘евиндә әкиләнләр гоҹаланда да бар верәҹәкләр, тәравәтли, јамјашыл галаҹаглар’ (Мәз. 92:13, 14). Еһтимал ки, сағламлығы илә бағлы проблемләри олан һәвари Павел ‘заһири варлығы позулса да, руһдан дүшмәди’. (2 Коринфлиләрә 4:16-18 ајәләрини оху.)
18. Гоҹа һәмиманлылар вә онларын гајғысына галанлар нә үчүн башгаларынын көмәјинә еһтијаҹ дујурлар?
18 Бир чох мүасир нүмунәләр гоҹаларын ‘бар верә’ билдикләрини сүбут едир. Лакин хәстәлијин вә гоҹалығын ҝәтирдији проблемләр, һәтта гајғыкеш вә вәфалы аилә үзвләри олан гоҹалары да горхуја сала биләр. Хәстәјә баханлар да тагәтдән дүшә биләрләр. Јығынҹағын гоҹалара вә онлара баханлара әмәлдә мәһәббәт ҝөстәрмәк имканы вар, бу һәм дә онларын үзәринә гојулан мәсулијјәтдир (Галат. 6:10). Белә көмәк етмәклә ҝөстәририк ки, биз бу ҹүр инсанлара әл тутмадан, садәҹә ҝедин, «исинин вә дојун» демирик (Јаг. 2:15-17).
19. Нә үчүн садиг гоҹа мәсиһчиләр ҝәләҹәјә әминликлә баха биләрләр?
19 Гоҹалыг мәсиһчинин фәалијјәтини бир гәдәр дәјишдирә биләр, лакин өтүб-кечән илләр Јеһованын Өз садиг гоҹа хидмәтчиләринә олан севҝисини азалтмыр. Әксинә, Аллаһ бүтүн бу садиг мәсиһчиләри јүксәк гијмәтләндирир вә онлары һеч вахт тәрк етмәјәҹәк (Мәз. 37:28; Јешаја 46:4). Јеһова гоҹалыг илләриндә онлара сипәр олуб, јол ҝөстәрәҹәк (Мәз. 48:14).
[Һашијәләр]
a «Ҝөзәтчи Гүлләси»нин 2007-ҹи ил 1 ијун сајындакы «Ҝәнҹләр үчүн хејир-дуа олан гоҹалар» адлы мәгаләјә бахын.
b «Ојанын!» журналынын 1994-ҹү ил 8 феврал сајынын 3-10-ҹу сәһифәләринә (инҝ.) бахын.
c Бәзи өлкәләрдә бура гоҹалара дөвләтдән јардым алмаға көмәк етмәк дахил ола биләр. «Ҝөзәтчи Гүлләси»нин 2006-ҹы ил 1 ијун сајындакы «Аллаһ јашлыларын гејдинә галыр» адлы мәгаләјә бахын.
d «Ҝөзәтчи Гүлләси»нин 2003-ҹү ил 1 сентјабр сајындакы «Јеһова һәмишә гајғымыза галыр» (рус.) адлы мәгаләјә бахын.
e «Ҝөзәтчи Гүлләси»нин 1993-ҹү ил 15 март сајындакы «Ағ сачлар зинәт верәр» (рус.) адлы мәгаләјә бахын.
f Адлар дәјишдирилиб.
Неҹә ҹаваб верәрдиниз?
• Нәјә ҝөрә садиг гоҹа мәсиһчиләр сәнин үчүн дәјәрлидир?
• Гоҹа һәмиманлыларымыза зәриф һиссләримизи неҹә ҝөстәрә биләрик?
• Јеһованын јашлы хидмәтчиләринә никбин олмаға нә көмәк едә биләр?
[18-ҹи сәһифәдәки шәкилләр]
Јығынҹағын үзвләри гоҹалара дәрин һөрмәтлә јанашырлар