Нөгсансызлығыны горујаҹагсанмы?

«Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм» (ӘЈЈ. 27:5).

1, 2. Биз һансы «тикинти ишиндә» иштирак етмәлијик вә һансы суаллары нәзәрдән кечирәҹәјик?

ТӘСӘВВҮР ет ки, сән тикиләҹәк евинин планыны ҝөздән кечирирсән. Лајиһәнин практики олмасы сәни валеһ едир. Бу евдә аиләнлә бирҝә јашајаҹағынызын неҹә дә ҝөзәл олаҹағыны дүшүнәндә үрәјин севинҹлә долур. Мәҝәр разы дејилсән ки, бу еви тикмәсән, ичинә көчмәсән вә ону јахшы вәзијјәтдә сахламасан, планынын вә бу һагда фикирләшмәјинин фајдасы олмајаҹаг?

² Бунун кими дә, биз фикирләшә биләрик ки, нөгсансызлыг бизә вә севдијимиз инсанлара бөјүк фајда ҝәтирәҹәк чох ваҹиб хүсусијјәтдир. Амма бу һагда нә гәдәр мүсбәт фикирдә олсаг да, мәсиһчи нөгсансызлығына малик олмасаг вә ону горујуб сахламасаг, бу хүсусијјәтин бизә фајдасы олмајаҹаг. Мүасир дүнјада тикинти лајиһәләринин һәјата кечирилмәси чох вахт баһа баша ҝәлир (Лука 14:28, 29). Еләҹә дә, нөгсансызлыға малик олмаг үчүн вахт вә сәј тәләб олунур, амма бу она дәјәр. Буна ҝөрә дә ҝәл үч суалы мүзакирә едәк: биз нөгсансыз инсан неҹә ола биләрик? Мәсиһчи нөгсансызлығымызы неҹә горуја биләрик? Әҝәр кимсә нөгсансызлығыны итирибсә, нә едә биләр?

Биз нөгсансыз инсан неҹә ола биләрик?

3, 4. а) Јеһова бизә нөгсансызлыға јијәләнмәјә неҹә көмәк едир? б) Исанын нүмунәсини изләмәклә нөгсансызлыға неҹә јијәләнә биләрик?

³ Әввәлки мәгаләдә гејд олундуғу кими, нөгсансыз инсан олуб-олмамаг сечимини Јеһова өһдәмизә бурахыр вә бунунла О бизә һөрмәтлә јанашдығыны ҝөстәрир. Хошбәхтликдән, бу мәсәләдә О бизи көмәксиз гојмур. О бизә бу дәјәрли хүсусијјәтә неҹә јијәләнмәји өјрәдир вә тәлимләрини тәтбиг етмәјимизә көмәк едән мүгәддәс руһундан бол-бол верир (Лука 11:13). Бундан әлавә, нөгсансызлыг јолу илә јеримәјә чалышанлары руһани мүдафиә илә тәмин едир (Сүл. мәс. 2:7).

⁴ Јеһова бизә нөгсансыз инсан олмағы неҹә өјрәдир? Илк нөвбәдә, Оғлу Исаны јер үзүнә ҝөндәрмәклә. Иса бурада јашајанда мүкәммәл итаәткарлыг тәзаһүр етдирди. О, «өлүмәдәк итаәткарлыг етди» (Филип. 2:8). Иса етдији һәр шејдә, һәтта ән чәтин анларда белә сәмави Атасына итаәткар олурду. О, Јеһоваја деди: «Мәним ирадәм дејил, гој Сәнинки олсун» (Лука 22:42). Һәр биримиз өзүмүздән сорушмалыјыг: «Мәндә дә бу ҹүр итаәткарлыг руһу вармы?» Дүзҝүн мотивләрлә итаәткарлыға ҹан атмагла нөгсансыз инсан олаҹағыг. Ҝәл һәјатымызын һансы саһәләриндә итаәткарлығын хүсусилә ваҹиб олдуғуну нәзәрдән кечирәк.

5, 6. а) Тәкликдә галанда белә нөгсансыз давранмағын ваҹиблијини Давуд неҹә вурғуламышды? б) Мәсиһчиләр тәкликдә оланда онларын нөгсансызлығы неҹә сынаныр?

⁵ Һәтта тәкликдә оланда да Јеһоваја итаәт етмәлијик. Мәзмурчу Давуд белә анларда нөгсансыз олмағын ваҹиблијини вурғулајыр. (Мәзмур 101:2 ајәсини охуa.) Бир падшаһ кими, Давуд һәмишә халгын ҝөзү гаршысында иди. Шүбһә јохдур ки, она чох вахт јүзләрлә, һәтта минләрлә инсан бахырды. (Мәзмур 26:12 ајәси илә мүгајисә ет.) Белә һалларда нөгсансызлыг тәзаһүр етдирмәк ваҹиб иди, чүнки падшаһ халгына јахшы нүмунә олмалы иди (Ганун. т. 17:18, 19). Бунунла белә, Давуд өјрәнди ки, «евиндә» тәк оланда да нөгсансыз давранмалыдыр. Бәс бизим барәмиздә нә демәк олар?

⁶ Мәзмур 101:3 ајәсиндә Давудун сөзләрини охујуруг: «Ијрәнҹ шејләрдән ҝөзүмү чәкәҹәјәм». Бу ҝүн, хүсусилә дә биз тәк оланда ијрәнҹ шејләрә бахмаг имканы чохдур. Интернетә дахил олмаг имканы чохларына бу саһәдә проблемләр јарадыб. Налајиг, һәтта порнографик материаллара бахмаг тәләсинә дүшмәк асандыр. Бәс биз белә едириксә, Давуду јухарыдакы сөзләри јазмаға илһамландыран Аллаһа итаәт едирикми? Порнографија аҹы нәтиҹәләр верир, чүнки дүзҝүн олмајан вә тамаһкар арзулары аловландырыр, виҹданы корлајыр, әр-арвад арасында мүнасибәтләри позур вә һәр кәсин ләјагәтини алчалдыр (Сүл. мәс. 4:23; 2 Кор. 7:1; 1 Салон. 4:3-5).

7. Тәкликдә оланда нөгсансызлыг тәзаһүр етдирмәјимизә һансы принсипләр көмәк едәр?

⁷ Әлбәттә, Јеһованын һеч бир хидмәтчиси һеч дә тәк дејил. Сәмави Атамыз бизә мәһәббәтлә нәзарәт едир. (Мәзмур 11:4 ајәсини оху.) Сәнин ширникдириҹи тәсирә мүгавимәт ҝөстәрдијини ҝөрәндә Јеһова неҹә дә севинир! Белә давранмагла сән Исанын Матта 5:28 ајәсиндә јазылан хәбәрдарлығына диггәт јетирирсән. Сәни дүзҝүн олмајан һәрәкәтләрә тәшвиг едән тәсвирләрә бахмамаға вар ҝүҹүнлә гәти гәрарлы ол. Дәјәрли нөгсансызлығыны биабырчы порнографијаја бахмаға вә ја ону охумаға дәјишмә!

8, 9. а) Даниел вә онун достлары нөгсансызлыгла бағлы һансы чәтинликлә үзләшмишдиләр? б) Бу ҝүн ҝәнҹ мәсиһчиләр Јеһованы вә һәмиманлыларыны неҹә севиндирирләр?

⁸ Иманымыза шәрик олмајанлар арасында оланда да Јеһоваја итаәткарлыг ҝөстәрмәклә нөгсансызлыг тәзаһүр етдирә биләрик. Даниели вә онун үч достуну хатырла. Јенијетмә икән онлар Бабилә әсир апарылмышдылар. Јеһова һаггында чох аз вә ја һеч нә билмәјән имансызлар арасында олан бу дөрд ибрани Аллаһын ганунунда гадаған олунмуш јемәкләри јемәк мәҹбуријјәти илә үзләшмишди. Бу ҝәнҹләр Аллаһын ганунуна риајәт етмәмәк үчүн асанлыгла чохлу бәһанәләр тапа биләрдиләр. Ахы валидејнләри, Исраил ағсаггаллары вә каһинләр онларын нә етдикләрини ҝөрә билмирдиләр. Бәс онлары ким ҝөрүрдү? Јеһова! Тәзјигә вә рискә бахмајараг, онлар мөһкәм мөвге тутдулар вә Аллаһа итаәт етдиләр (Дан. 1:3-9).

⁹ Бунун кими дә, Јеһоваја дүнјанын һәр јериндә хидмәт едән ҝәнҹ Шаһидләр ејни мөвгеји тутурлар — онлар Аллаһын мәсиһчиләр үчүн гојдуғу нормалара риајәт едир вә һәмјашыдларынын зәрәрли тәзјигинә ујмурлар. Сиз ҝәнҹләр наркотикләр гәбул етмәкдән, зоракы әмәлләрдән, сөјүш сөјмәкдән, әхлагсызлыгдан вә дүзҝүн олмајан башга һәрәкәтләрдән имтина едәндә Јеһоваја итаәткарлыг ҝөстәрмиш олурсунуз. Белә етмәклә сиз нөгсансызлыг ҝөстәрир, һәм өзүнүзә фајда ҝәтирир, һәм дә Јеһованы вә һәмиманлыларынызы севиндирирсиниз (Мәз. 110:3).

10. а) Ҹинси әхлагсызлыға даир һансы јанлыш нөгтеји-нәзәр бәзи ҝәнҹләрин нөгсансызлыгда ҝүзәштә ҝетмәләринә сәбәб олмушдур? б) Нөгсансызлыг бизи ҹинси әхлагсызлыг тәһлүкәсиндән неҹә горујаҹаг?

¹⁰ Биз әкс ҹинсдән олан инсанларла давранышымызда да итаәткарлыг ҝөстәрмәлијик. Әхлагсызлығын Аллаһын Кәламында гадаған олундуғуну билирик. Лакин итаәткар инсандан итаәтсиз инсана чеврилмәк асандыр. Мәсәлән, бәзи ҝәнҹләр орал вә ја анал секслә, јахуд бир-бирләринин ҹинсијјәт органларыны сығалламагла мәшғул олурлар вә белә һәрәкәтләрин «әслиндә ҹинси әлагә» олмадығыны дүшүндүкләри үчүн бунун бир о гәдәр дә пис олмадығы гәнаәтинә ҝәлирләр. Белә ҝәнҹләр Мүгәддәс Китаба әсасән ҹинси әхлагсызлыг сөзүнүн мәнасына дүзҝүн олмајан бүтүн бу һәрәкәтләрин дахил олдуғуну вә буна ҝөрә инсанын јығынҹагдан кәнар олуна билдијини ја унудурлар, ја да буна мәһәл гојмурларb. Дәһшәтлиси исә одур ки, онлар нөгсансызлығын ваҹиблијинә әһәмијјәт вермирләр. Биз нөгсансызлығы тәзаһүр етдирмәјә чалышдығымыз үчүн пис әмәлләримизә бәраәт газандырмаға ҹәһд етмирик. Биз мүмкүн гәдәр ҝүнаһа јахынлашмаға вә ејни заманда ҹәзасыз галмаға чалышмырыг. Биз јалныз дүзҝүн олмајан һәрәкәтләримизә ҝөрә алаҹағымыз ҹәза барәдә дүшүнмүрүк. Әксинә, Јеһованы севиндирән ишләр едәҹәјик, Ону кәдәрләндирән шејләрдән исә гачынаҹағыг. Ҝүнаһа нә дәрәҹәдә јахынлаша биләҹәјимизи дүшүнмәк әвәзинә, ондан узаг дураҹағыг вә ‘ҹинси әхлагсызлыгдан чәкинәҹәјик’ (1 Кор. 6:18). Белә етмәклә һәгигәтән дә нөгсансыз инсан олдуғумузу ҝөстәририк.

Нөгсансызлығымызы неҹә горуја биләрик?

11. Нәјә ҝөрә итаәткарлыг тәзаһүр олунан һәр бир әмәл әһәмијјәтлидир? Нүмунә ҝәтир.

¹¹ Биз итаәткарлыг ҝөстәрмәклә нөгсансызлыға јијәләнирик, итаәткар галмагла исә нөгсансызлығымызы горујуруг. Бир дәфә итаәткарлыг ҝөстәрмәк әһәмијјәтсиз, хырда иш кими ҝөрүнә биләр. Лакин итаәткарлыг тәзаһүр олунан белә әмәлләр заман кечдикҹә үст-үстә јығылыр. Нүмунә үчүн: бир кәрпиҹ әһәмијјәтсиз ҝөрүнә биләр, амма онлары сәлигә илә үст-үстә јығсаг, ҝөзәл ев тикәрик. Беләликлә, итаәткарлыг тәзаһүр олунан әмәлләримизи артырмагла нөгсансызлығымызы горујуруг (Лука 16:10).

12. Давуд пис рәфтарла вә әдаләтсизликлә үзләшәндә нөгсансызлығы горумагда бизә неҹә нүмунә гојду?

¹² Чәтинликләрә, пис рәфтара вә ја үзләшдијимиз әдаләтсизлијә таб ҝәтирәндә нөгсансызлығымыз хүсусилә нәзәрә чарпыр. Мүгәддәс Китабдан Давудун нүмунәсинә нәзәр салаг. О, ҹаванлығында Јеһованын һакимијјәтинин тәмсилчиси һесаб олунан падшаһ тәрәфиндән тәгибләрә таб ҝәтирирди. Падшаһ Шаул Јеһованын лүтфүнү итирмишди вә Аллаһын илтифат ҝөстәрдији Давуда пахыллыг едирди. Буна бахмајараг, Шаул бир мүддәт һакимијјәт башында галды вә Давуду тәгиб етмәк үчүн Исраил ордусундан истифадә едирди. Јеһова бу әдаләтсизлијин бир нечә ил давам етмәсинә јол верди. Бәс Давуд буна ҝөрә Аллаһдан инҹидими? Артыг таб ҝәтирмәјин мәнасыз олдуғу гәнаәтинә ҝәлдими? Гәтијјән! О, һәтта әлинә фүрсәт дүшәндә белә Шаулу архадан вурмагдан имтина етмәклә онун мөвгејинә дәрин һөрмәтини горујуб сахлады (1 Шам. 24:2-7).

13. Әҝәр гәлбимизә тохунубларса вә ја бизи инҹидибләрсә, нөгсансызлығымызы неҹә горуја биләрик?

¹³ Давудун нүмунәси бизә неҹә дә бөјүк тәсир бағышлајыр! Биз гејри-камил инсанлардан ибарәт олан үмумдүнја јығынҹағынын бир һиссәсијик. Онлардан һәр бири истәнилән ан бизә гаршы һагсызлыг едә, һәтта һәгигәтдән узаглаша биләр. Хошбәхтликдән, биз елә бир дөврдә јашајырыг ки, Јеһованын халгынын һамысыны позмаг гејри-мүмкүндүр (Јешаја 54:17). Амма јенә дә, әҝәр кимсә бизи мәјус едир вә ја һиссләримизә тохунурса, буна неҹә реаксија вермәлијик? Әҝәр үрәјимиздә һәмиманлымыза гаршы кин-күдурәт сахлајырыгса, Аллаһ өнүндә нөгсансызлығымыз тәһлүкә алтындадыр. Башгаларынын һәрәкәтләри Аллаһдан инҹимәјимизә, јахуд сәдагәтсиз олмағымыза әсла бәраәт газандырмыр (Мәз. 119:165). Һәтта сынагларла үзләшәндә белә тәһәммүл етмәјимиз нөгсансызлығымызы горумаға көмәк едәҹәк.

14. Нөгсансызлығы тәзаһүр етдирән инсанлар тәшкилати вә тәлим дәјишикликләринә неҹә мүнасибәт ҝөстәрирләр?

¹⁴ Тәшкилатда олан дәјишикликләрдә сәһв ахтармамагла вә тәнгиди олмамагла да нөгсансызлығымызы горуја биләрик. Бу исә Јеһоваја садиг олмаг демәкдир. О Өз халгыны инди даһа чох хејир-дуаландырыр. Тәмиз ибадәт һәлә һеч заман бәшәр тарихиндә бу гәдәр уҹа тутулмамышдыр (Јешаја 2:2-4). Мүгәддәс Китаб ајәләринин изаһатларына вә ја нәји неҹә етмәјә даир дәјишикликләр оланда онлары гәбул етмәк истәјирик. Руһани ишығын ҝет-ҝедә артдығынын сүбутларыны ҝөрмәк бизә севинҹ бәхш едир (Сүл. мәс. 4:18). Әҝәр биз дәјишиклији баша дүшмәкдә чәтинлик чәкириксә, онда Јеһовадан көмәк диләмәлијик. Нөгсансызлығымызы горумагла итаәткарлыг тәзаһүр етдиририк.

Әҝәр кимсә нөгсансызлығыны итирибсә, нә едә биләр?

15. Нөгсансызлығыны јалныз ким әлиндән ала биләр?

¹⁵ Бу суал бизи ҹидди дүшүнмәјә вадар едир, елә дејилми? Әввәлки мәгаләдән өјрәндијимиз кими, нөгсансызлыг олдугҹа ваҹиб хүсусијјәтдир. Онсуз бизим нә Јеһова илә мүнасибәтимиз, нә дә ҝәләҹәјә ҝерчәк үмидимиз оларды! Јадда сахла: сәнин нөгсансызлығыны каинатда јалныз бир шәхс әлиндән ала биләр. О шәхс дә сәнин өзүнсән. Әјјуб бу һәгигәти јахшы баша дүшүрдү. О демишдир: «Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм» (Әјј. 27:5). Әҝәр сән дә белә гәти гәрарлысанса вә Јеһова илә јахын мүнасибәтләрдә галырсанса, нөгсансызлығыны һеч вахт итирмәјәҹәксән (Јаг. 4:8).

16, 17. а) Әҝәр кимсә ҹидди ҝүнаһ ишләдибсә, нә етмәли дејил? б) О, нә етмәлидир?

¹⁶ Лакин бәзиләри өз нөгсансызлыгларыны горуја билмәмишләр. Һәвариләрин ҝүнләриндә олдуғу кими, мүасир мәсиһчиләрин бәзиләри дәфәләрлә ҹидди ҝүнаһа јол вермишләр. Әҝәр бу сәнинлә дә баш верибсә, вәзијјәтдән чыхыш јолу вармы? Бәли, вар. Бәс нә етмәк олар? Әввәлҹә ҝәл ҝөрәк нәји етмәмәлијик. Инсан ишләтдији ҝүнаһы валидејнләриндән, һәмиманлыларындан вә ја ағсаггаллардан ҝизләтмәјә мејллидир. Лакин Мүгәддәс Китаб бизә хатырладыр: «Ҝүнаһларыны өрт-басдыр едән уғур газанмаз, ону етираф едәрәк тәрк едән мәрһәмәт тапар» (Сүл. мәс. 28:13). Ҝүнаһыны өрт-басдыр етмәјә чалышанлар ҹидди сәһвә јол верирләр, чүнки Аллаһдан бир шеј ҝизләтмәк мүмкүн дејил. (Ибраниләрә 4:13 ајәсини оху.) Бәзиләри һәтта икили һәјат сүрүрләр: онлар өзләрини елә ҝөстәрирләр ки, санки Јеһоваја хидмәт едирләр, амма ејни заманда ҝүнаһ да ишләдирләр. Белә инсанлар артыг нөгсансызлыгларыны итирибләр. Ҹидди ҝүнаһларыны өрт-басдыр едән адамларын ибадәти Јеһоваја мәгбул дејил. Әксинә, белә икиүзлүлүк Ону гәзәбләндирир (Сүл. мәс. 21:27; Јешаја 1:11-16).

¹⁷ Әҝәр мәсиһчи ҹидди ҝүнаһа јол верибсә, онун неҹә давранаҹағына даир Мүгәддәс Китабын ајдын рәһбәрлији вар. О, ағсаггаллардан көмәк истәмәлидир. Ҹидди руһани хәстәлијә тутуланлара көмәк етмәк үчүн Јеһова ағсаггаллар тәјин едиб. (Јагуб 5:14 ајәсини оху.) Јол вермә ки, јығынҹағын сәнә гаршы тәтбиг едәҹәји интизам вә ја ислаһ тәдбирләри гаршысында горху руһани сағламлығыны бәрпа етмәјә мане олсун. Мәҝәр мүдрик инсан өлүмҹүл хәстәликдән сағалмаг үчүн мүвәггәти ағрыја сәбәб олаҹаг ијнәдән вә ја ҹәрраһијјә әмәлијјатындан имтина едәҹәкми? (Ибр. 12:11).

18, 19. а) Нөгсансызлығы бәрпа етмәјин мүмкүн олдуғуну Давудун нүмунәси неҹә ҝөстәрир? б) Нөгсансызлығыны горумаға нә дәрәҹәдә гәтијјәтлисән?

¹⁸ Тамамилә сағалмаг үчүн һансыса үмид вармы? Итирилмиш нөгсансызлығы бәрпа етмәк мүмкүндүрмү? Давудун нүмунәсинә гајыдаг. О, ҹидди ҝүнаһа јол верди: башгасынын арвадына тамаһ салды, зина етди вә ҝүнаһсыз әрин өлдүрүлмәсини тәшкил етди. О заман Давудун нөгсансыз олдуғуну дүшүнмәк чох чәтин иди, елә дејилми? Онун вәзијјәти чыхылмаз идими? Давуд буна ҝөрә ҹәзаландырылмалы иди вә ҹәзаландырылды да. Сидг-үрәкдән төвбә етдији үчүн Јеһова она мәрһәмәт ҝөстәрди. Бу, Давуд үчүн дәрс олду вә һеч нәјә бахмајараг, итаәткарлыг ҝөстәрмәклә өз нөгсансызлығыны бәрпа етди. Давудун һәјаты Сүлејманын мәсәлләри 24:16 ајәсиндә јазыланларын нүмунәси иди: «Салеһ једди дәфә јыхылса белә, јенә галхар». Бунун нәтиҹәси нә олду? Давудун өлүмүндән сонра онун һаггында Јеһованын Сүлејмана дедијинә диггәт јетирәк. (1 Падшаһлар 9:4 ајәсини оху.) Аллаһ Давуду Она «үрәк бүтөвлүјү» илә хидмәт едән, јәни нөгсансыз инсан кими јадында сахлады. Јеһова төвбә едән инсаны һәтта ҹидди ҝүнаһ ләкәсиндән дә тәмизләјә биләр (Јешаја 1:18).

¹⁹ Бәли, сән Јеһоваја мәһәббәтдән ирәли ҝәләрәк итаәткарлыг ҝөстәрмәклә нөгсансыз инсан олаҹагсан. Садиг гал вә ҹидди ҝүнаһ етсән, сәмими-гәлбдән төвбә ет. Нөгсансызлығымыз неҹә дә гијмәтлидир! Ҝәлин һәр биримиз: «Мән исә камалла [«нөгсансызлыгла», ЈД] ҝәзирәм» сөзләрини дејән Давуд кими гәти гәрарлы олаг (Мәз. 26:11).

[Һашијәләр]

Неҹә ҹаваб верәрдиниз?

• Сән нөгсансыз инсан неҹә ола биләрсән?

• Сән нөгсансызлығыны неҹә горуја биләрсән?

• Нөгсансызлығы неҹә бәрпа етмәк олар?

[8-ҹи сәһифәдәки чәрчивә]

«СИЗИН ҺӘРӘКӘТИНИЗ... ТӘРИФӘЛАЈИГДИР»

Бу сөзләри һамиләлијинин бешинҹи ајында олан гадын танымадығы бир адамын хејирхаһлығы вә нөгсансызлығы барәдә демишди. О, кафедә отурмушду вә ораны тәрк етдикдән бир нечә саат сонра пул кисәсини итирдијини ашкар етди. Онун ичиндә 2 000 доллар вар иди вә бу гадын адәтән өзү илә бу гәдәр пул ҝәздирмирди. «Мән мүтәәссир олмушдум», — дејә о, бир гәдәр сонра јерли гәзетә вердији мүсаһибәсиндә билдирди. Лакин һәмин пул кисәсини тапан бир ҝәнҹ гадын дәрһал онун саһибини ахтармаға башлады. Ахтарышлары һеч бир нәтиҹә вермәјәндә кисәни полис мәнтәгәсинә апарды вә полис онун саһибини тапды. «Сизин һәрәкәтиниз һәгигәтән дә тәрифәлајигдир», — дејә һәмин һамилә гадын миннәтдарлығыны билдирди. Нәјә ҝөрә бу ҝәнҹ гадын пулу гајтармаг үчүн чохлу сәј ҝөстәрди? Һәмин гәзетдә гејд едилирди ки, о, «Јеһованын Шаһиди кими тәрбијә олундуғу үчүн нөгсансызлыг тәзаһүр етдирди».

[9-ҹу сәһифәдәки шәкил]

Ҝәнҹләр сынагларла үзләшәркән нөгсансызлыгларыны горуја биләрләр

[10-ҹу сәһифәдәки шәкил]

Давуд нөгсансызлығыны итирсә дә, ону бәрпа етди