Корејада аллаһын халгынын инкишафынын шаһиди олмушам
Нәгл етди Милтон Һамилтон
«Тәәссүфлә сизә чатдырырыг ки, Кореја Республикасынын һөкумәти сиз миссионерләрин визаларыны ләғв едиб вә сизин өлкәдә арзуолунмаз шәхсләр олдуғунузу билдириб... Бу сәбәбдән сиз мүвәггәти олараг Јапонијаја тәјин олунурсунуз».
АРВАДЫМЛА мән јухарыда ҝәтирилән мәктубу 1954-ҹү илин сонуна јахын Бруклиндән (Нју-Јорк, АБШ) алдыг. Һәмин ил, бир аз өнҹә биз Нју-Јорк штатында јерләшән Ҝилеад Мәктәбинин 23-ҹү синфинин мәзунлары олдуг. Бу мәктубу аланда биз мүвәггәти олараг Индиана штатынын Индианаполис шәһәриндә хидмәт едирдик.
Арвадым Лиз (әввәлләр Лиз Семок) вә мән јухары синифләрдә бирҝә охујурдуг. 1948-ҹи илдә биз евләндик. О, таммүддәтли хидмәти чох севирди, лакин хариҹи өлкәдә хидмәт етмәк үчүн Бирләшмиш Штатлары тәрк етмәјә тәрәддүд едирди. Бәс нәјә ҝөрә о, фикрини дәјишди?
Лиз Ҝилеад Мәктәбиндә охумаг истәјәнләр үчүн тәшкил едилмиш ҝөрүшә мәнимлә ҝетмәјә разылашды. Һәмин ҝөрүш 1953-ҹү илин јајында Нју-Јоркун «Јанки» стадионундакы бејнәлхалг конгрес заманы кечирилмишди. Бу руһландырыҹы ҝөрүшдән сонра биз Ҝилеад Мәктәби үчүн бланк долдурдуг. Биз 1954-ҹү илин февралында башланаҹаг нөвбәти синфә дәвәт аланда тәәҹҹүбләндик.
Корејада үч ил чәкән вә өлкәни виран едән мүһарибәнин 1953-ҹү илин јајында тәзәҹә сона јетмәсинә бахмајараг, биз бу өлкәјә тәјин олундуг. Јухарыда ҝәтирилән мәктубда дејилдији кими, биз илк өнҹә Јапонијаја јола дүшдүк. Бизимлә Корејаја тәјин олунан алты миссионерлә бирҝә 1955-ҹи илин јанварында 20 ҝүнлүк океан сәјаһәтиндән сонра мәнзилимизә ҝәлиб чатдыг. Һәмин илләрдә Јапонија филиалына нәзарәт едән Ллојд Берри сәһәр саат алтыда бизи ҝәминин јан алдығы көрпүдә гаршылајыб, Јокоһамадакы миссионер евинә апарды. Һәмин ҝүн биз хидмәтә дә ҝетдик.
Нәһајәт, Корејада
Бир мүддәт сонра Корејаја виза алдыг. 1955-ҹи ил мартын 7-дә тәјјарәмиз Токионун Бејнәлхалг Һанеда Һава Лиманындан галхыб үч саатдан сонра Сеулдакы Јоидо Һава Лиманына енди. 200-дән чох корејалы Шаһид бизи гаршыламаға ҝәлди. Һамынын ҝөзү севинҹдән јашармышды. О заман Корејада ҹәми-ҹүмләтани 1 000 Шаһид варды. Гәрбдә јашајан бир чох инсанлар кими, биз дә фикирләширдик ки, һансы өлкәдә јашамаларындан асылы олмајараг, Шәрг халглары заһирән вә хасијјәтҹә бир-бириндән фәргләнмир. Лакин тезликлә бунун белә олмадығыны анладыг. Корејалыларын нәинки өз дили вә әлифбасы, һәм дә милли мәтбәхи, ҝејими вә өзүнәмәхсус физики ҹизҝиләри вар, онларын тикдији биналар да фәрглидир.
Илк бөјүк чәтинлијимиз дили өјрәнмәк олду. Кореја дилини өјрәнмәк үчүн һеч бир вәсаит јох иди. Тезликлә анладыг ки, инҝилис сәсләриндән истифадә едәрәк Кореја сөзләринин сәсләрини тәләффүз етмәк мүмкүн дејил. Јалныз Кореја әлифбасыны өјрәнәндән сонра дүзҝүн тәләффүзә наил олмаг олар.
Сәһвләримиз дә олурду. Мәсәлән, бир дәфә Лиз ев саһибиндән Мүгәддәс Китабы олуб-олмадығыны сорушмушду. Лакин о, тәәҹҹүблә она бахыб, евдән кибрит гутусу ҝәтирди. Сән демә, о, «сәнгјáнг» (кибрит) вә «сәнгјúнг» (Мүгәддәс Китаб) сөзләрини сәһв салыбмыш.
Бир нечә ај сонра бизә өлкәнин ҹәнубунда јерләшән лиман шәһәри Пусанда миссионер еви үчүн бир јер тапмаг тапшырылды. Арвадымла мәнә вә бизимлә бирҝә бу шәһәрә тәјин олунан ики баҹыја үч кичик отаг кирајәләдим. Отаглара су чәкилмәмишди вә туалетдә лазыми шәраит јох иди. Су јалныз ҝеҹәләр ҝүҹлү ҝәлдији үчүн ону шлангла үчүнҹү мәртәбәјә галдыра билирдик. Буна ҝөрә биз нөвбә илә сүбһ чағы галхыб габлары су илә долдурурдуг. Ичмәли олсун дејә сују гајнадыр, јахуд да хлорлајырдыг.
Башга чәтинликләримиз дә олурду. Електрик енержиси о гәдәр зәиф иди ки, биз палтарјујан машыныны вә үтүнү истифадә едә билмирдик. Дәһлизи мәтбәх кими истифадә едирдик вә орада олан јеҝанә мәтбәх ләвазиматы нефтлә ишләјән печ иди. Шәраитә ујғунлашараг нөвбә илә орада хөрәк биширирдик. Үч илдән сонра Лиз илә мән һепатит хәстәлијинә јолухдуг. Һәмин илләрдә миссионерләрин әксәријјәти бу хәстәлијә тутулурду. Сағалмағымыз бир нечә ај чәкди, амма бундан сонра да сәһһәтимиздә проблемләр олурду.
Нүмунәмиз гардашлары руһландырыр
Сон 55 ил әрзиндә Кореја јарымадасында вәзијјәт гејри-стабил олараг галыр. Демилитаризасија зонасы јарымаданы ики һиссәјә бөлүр. Бу хәтт Кореја Республикасынын пајтахты Сеулдан 55 километр аралыда кечир. 1971-ҹи илдә Бруклиндәки мәркәзи идарәдән Фредерик Франс бизә баш чәкди. Мән ону демилитаризасија зонасына — дүнјада ән мөһкәмләндирилмиш сәрһәдә гәдәр мүшајиәт етдим. Илләр әрзиндә Бирләшмиш Милләтләр Тәшкилатынын рәсмиләри һәр ики һөкумәтин нүмајәндәләри илә бурада тез-тез ҝөрүшүбләр.
Әлбәттә, Кореја јарымадасындакы вәзијјәт дә дахил олмагла, биз дүнјанын сијасәтинә битәрәф мөвге тутуруг (Јәһ. 17:14). 13 миндән чох корејалы Шаһид әлинә силаһ алыб башгаларыны өлдүрмәкдән имтина етдији үчүн, үмумиликдә ҝөтүрсәк, 26 000 ил һәбсханада олуб (2 Кор. 10:3, 4). Бу өлкәдә јашајан бүтүн ҝәнҹ гардашлар бу мәсәлә илә үз-үзә ҝәләҹәкләрини билирләр, лакин бу онлары горхутмур. Әфсуслар олсун ки, Кореја һөкумәти мәсиһчиләрә «ҹинајәткар» дамғасы вуруб. Онларын јеҝанә «ҹинајәти» одур ки, онлар мәсиһчи битәрәфлији илә ҝүзәштә ҝетмәкдән имтина едирләр.
1944-ҹү илдә мән дә һәрби хидмәтә ҝетмәкдән имтина етдијимә ҝөрә ики ил јарым АБШ-ын Пенсилванија штатынын Лүисбург федерал һәбсханасында јатмалы олдум. Корејадакы ҝәнҹ гардашларын һәбсханадакы сынаглары даһа чәтин олса да, онларын нәләрлә гаршылашдығыны јахшы баша дүшүрәм. Корејада хидмәт едән биз миссионерләрин дә ејни сынагларла үзләшдијини билмәк бир чохларыны руһландырды (Јешаја 2:4).
Чәтинликләрлә үзләширик
Битәрәф мөвгејимизә ҝөрә 1977-ҹи илдә галдырылан мәсәләјә ҹәлб олундуг. Мәмурлар фикирләширдиләр ки, ҝәнҹ корејалылар бизим тәсиримизә ујдуглары үчүн һәрби хидмәтдән вә әлләринә силаһ алмагдан имтина едирләр. Буна ҝөрә дә һөкумәт һансыса сәбәбә ҝөрә өлкәдән чыхан миссионерләри өлкәјә бурахмамаг гәрарына ҝәлди. Һәмин мәһдудијјәт 1977-ҹи илдән 1987-ҹи иләдәк давам етди. Бу илләр әрзиндә Корејаны тәрк етсәјдик, сонра бизи өлкәјә бурахмаздылар. Она ҝөрә дә бу илләр әрзиндә һәтта доғмаларымыза баш чәкмәк үчүн Корејадан чыхмадыг.
Биз дәфәләрлә һөкумәт мәмурлары илә ҝөрүшүб Мәсиһин давамчылары кими тутдуғумуз битәрәф мөвгејимизи изаһ едирдик. Нәһајәт, онлар баша дүшдүләр ки, бизи горхутмаг мүмкүн дејил вә он ил давам едән мәһдудијјәт арадан галдырылды. Бу илләр әрзиндә бир нечә миссионер сәһһәти илә бағлы вә диҝәр проблемләрә ҝөрә өлкәни тәрк етмәли олду, галанлар исә хидмәтләрини давам едирдиләр. Биз өлкәдә галдығымыза ҝөрә чох шадыг.
Бизә дүшмән кәсиләнләр 1980-ҹи илләрин орталарында һүгуги ҹәмијјәтимизин идарә һејәтинин үзвләрини ҝәнҹләри һәрби хидмәтдән јајындырмагда иттиһам етдиләр. Буна ҝөрә дә һөкумәт һәр биримизи диндирди. 1987-ҹи ил јанварын 22-дә прокурорлуг иттиһамларын әсассыз олдуғуну мүәјјән етди. Бу бизә ҝәләҹәкдә јаранан һәр һансы анлашылмазлығы арадан галдырмагда көмәк етди.
Аллаһ ишимизи хејир-дуаландырыр
Битәрәф мөвгејимизә ҝөрә Корејада тәблиғ хидмәтимизә ҝөстәрилән мүгавимәт илбәил артырды. Һәтта конгресләри кечирмәк үчүн даһа бөјүк јер тапмаг да чәтинләшди. Буна ҝөрә дә Шаһидләр Пусан шәһәриндә Конгрес Залы тикмәк гәрарына ҝәлдиләр. Бу, Шәргдә илк Конгрес Залы иди. 1976-ҹы ил апрелин 5-дә 1 300 нәфәрин гаршысында һәср олунма мәрузәси илә чыхыш етмәк мәним үчүн бөјүк шәрәф иди.
1950-ҹи илдән башлајараг он минләрлә америкалы әсҝәр Корејада хидмәт етмәјә ҝөндәрилмишди. Бирләшмиш Штатлара гајыдандан сонра чохлары Аллаһын фәал хидмәтчиләри олдулар. Онлар бизә тез-тез мәктуб јазырлар. Биз чох шадыг ки, Јеһованы танымагда онлара көмәк етмишик.
Әфсуслар олсун ки, 2006-ҹы ил сентјабрын 26-да әзиз арвадым Лизи итирдим. Мән онун үчүн чох дарыхырам. О, бурада хидмәт етдијимиз 51 ил әрзиндә алдығымыз һәр тәјинаты севинҹлә гәбул едирди вә һеч вахт ҝилеј-ҝүзар етмирди. Лиз бир вахтлар тәрк етмәк истәмәдији өлкәјә — Бирләшмиш Штатлара гајытмағы тәклиф етмирди вә һәтта буна ејһам да вурмурду!
Мән Корејанын Бет-Ел аиләсиндә хидмәт етмәјә давам едирәм. Башланғыҹда Бет-Елдә бир нечә адам хидмәт едирди. Инди исә онларын сајы тәхминән 250 нәфәрдир. Бурадакы ишә нәзарәт едән једди нәфәрлә бирҝә комитәнин үзвү кими хидмәт етмәк мәним үчүн бөјүк шәрәфдир.
Илк дәфә Корејаја ҝәләндә бу өлкә чох касыб иди. Инди исә о, дүнјанын ән инкишаф етмиш өлкәләри сырасындадыр. Бурада 95 000-дән артыг Шаһид вар вә онларын тәхминән 40 фаизи даими, ја да көмәкчи пионер кими хидмәт едир. Бурада хидмәт етдијим вә Аллаһын халгынын инкишафыны ҝөрдүјүм үчүн Аллаһа миннәтдарам.
[24-ҹү сәһифәдәки шәкил]
Диҝәр миссионерләрлә Корејаја ҝәләндә
[24-ҹү сәһифәдәки шәкил]
Пусанда хидмәт едирик
[25-ҹи сәһифәдәки шәкил]
Фредерик Франсла демилитаризасија зонасынын јахынлығында, 1971-ҹи ил
[26-ҹы сәһифәдәки шәкил]
Лиз илә, өлүмүндән бир аз өнҹә
[26-ҹы сәһифәдәки шәкил]
Хидмәт етдијим Кореја филиалы