Гардашлыг мәһәббәтинизи мөһкәмләндирин

‘Мәсиһ бизи севдији кими, сиз дә мәһәббәтлә һәрәкәт един’ (ЕФЕС. 5:2).

1. Иса давамчыларыны танымаға көмәк едәҹәк һансы ваҹиб хүсусијјәти вурғулады?

АЛЛАҺЫН ПАДШАҺЛЫҒЫ һагда хош хәбәрин евдән-евә тәблиғи Јеһованын Шаһидләринин фәргләндириҹи ҹәһәтидир. Лакин Иса Мәсиһ онун әсил шаҝирдләрини танымаға көмәк едәҹәк башга бир сәҹијјәви хүсусијјәти вурғулады. О деди: «Сизә бир-биринизи севәсиниз дејә јени бир әмр верирәм: сизи севдијим кими сиз дә бир-биринизи севин. Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһ. 13:34, 35).

2, 3. Гардашлыг мәһәббәтимиз јығынҹаға јени ҝәләнләрә неҹә тәсир едир?

² Һәгиги мәсиһчиләр арасында олан мәһәббәтә даһа һеч бир јердә раст ҝәлә билмәрик. Магнит дәмири өзүнә чәкдији кими, мәһәббәт дә Јеһованын хидмәтчиләрини бирләшдирир вә сәмими инсанлары һәгиги ибадәтә ҹәлб едир. Мисал үчүн, ҝөтүрәк, Камерундан олан Марселинону. О, иш јериндә ҝөрмә габилијјәтини итириб. Бу бәдбәхт һадисәдән сонра сөз-сөһбәт ҝәзирди ки, ҝуја о, ҹадуҝәр олдуғу үчүн кор олуб. Кешиш вә килсәнин диҝәр үзвләри она тәсәлли вермәк әвәзинә, килсәдән говдулар. Јеһованын Шаһидләриндән бири ону јығынҹаг ҝөрүшүнә дәвәт едәндә Марселино әввәлҹә тәрәддүд етди. Чүнки о, јенидән рәдд едилмәкдән горхурду.

³ Марселинонун Падшаһлыг Залында өзүнә гаршы ҝөрдүјү мүнасибәт ону чох тәәҹҹүбләндирди. Јығынҹаг үзвләри ону меһрибанлыгла гаршылады вә орада ешитдији Мүгәддәс Китаб тәлимләри она тәсәлли верди. О ҝүндән етибарән Марселино һеч бир јығынҹаг ҝөрүшүндән галмады, Мүгәддәс Китабы өјрәнмәкдә тәрәгги етди вә 2006-ҹы илдә вәфтиз олунду. Һал-һазырда о, һәгигәти аилә үзвләри вә гоншулары илә бөлүшүр, һәтта бир нечә инсана Мүгәддәс Китабы өјрәнмәјә көмәк едир. Марселино истәјир ки, онун Аллаһын халгы арасында дујдуғу мәһәббәти Мүгәддәс Китабы өјрәтдији инсанлар да өз үзәрләриндә һисс етсинләр.

4. Павелин: «Мәһәббәтлә һәрәкәт един» нәсиһәтинә нәјә ҝөрә табе олмалыјыг?

⁴ Бу гардашлыг мәһәббәти өзү-өзлүјүндә ҹәлбедиҹи олса да, ону горумаг үчүн биз әлимиздән ҝәләни етмәлијик. Ахшам чағы дүшәрҝәдә гызынмаг үчүн тонгалын әтрафына топлашан инсанлары тәсәввүр едәк. Әҝәр онлар оҹаға одун атмасалар, о сөнәҹәк. Ејнилә, һәр биримиз јығынҹагдакы ҝөзәл мәһәббәт бағларыны мөһкәмләндирмәјә чалышмасаг, о, ҝетдикҹә зәифләјәҹәк. Бунун баш вермәмәси үчүн биз нә етмәлијик? Бу суала һәвари Павел белә ҹаваб верир: «Мәсиһ бизи севиб, Өзүнү бизим үчүн Аллаһа хош әтирли бир совгат вә гурбан олараг фәда етдији кими, сиз дә мәһәббәтлә һәрәкәт един» (Ефес. 5:2). Ҝәлин мәһәббәтлә неҹә һәрәкәт едә биләҹәјимизи нәзәрдән кечирәк.

«Сиз дә үрәјинизи ачын»

5, 6. Нәјә ҝөрә Павел Коринф мәсиһчиләрини ‘үрәкләрини ачмаға’ сәсләјирди?

⁵ Һәвари Павел гәдим Коринф мәсиһчиләринә јазырды: «Еј коринфлиләр, сизинлә ачыг данышдыг, сизә үрәјимизи ачдыг. Биз сиздән севҝи әсирҝәмирик, лакин сиз биздән севҝинизи әсирҝәдиниз. Бунун мүгабилиндә (сизә өз өвладларым кими мүраҹиәт едирәм) сиз дә үрәјинизи ачын» (2 Кор. 6:11-13). Нәјә ҝөрә Павел коринфлиләри үрәкләрини мәһәббәт үчүн ачмаға тәшвиг едирди?

⁶ Ҝәлин гәдим Коринф јығынҹағынын тәмәлинин неҹә гојулдуғуна нәзәр салаг. Павел бураја ҝәләндә б. е. 50-ҹи илинин ахырлары иди. Тәблиғ етмәјә башлајанда чәтинликләрлә гаршылашса да, о, руһдан дүшмәди. Гыса мүддәт әрзиндә бу шәһәрдә бир чохлары хош хәбәрә иман ҝәтирди. «Бир ил алты ај» әрзиндә Павел јени јығынҹаға тәлим вермәк вә ону мөһкәмләндирмәк иши илә мәшғул иди. Бурадан ајдын ҝөрмәк олур ки, Павел Коринф мәсиһчиләринә дәрин мәһәббәт бәсләјирди (Һәв. иш. 18:5, 6, 9-11). Онларын да Павелә гаршылыглы мәһәббәт вә һөрмәт ҝөстәрмәјә һәр бир әсасы вар иди. Лакин јығынҹагдакыларын бәзиләри ондан узаглашмышдылар. Ола билсин, онун бирбаша вердији мәсләһәтләр кимләринсә хошуна ҝәлмирди (1 Кор. 5:1-5; 6:1-10). Башгалары исә, ҝөрүнүр, «фөвгәлһәвариләр»ин бөһтанларына гулаг асырдылар (2 Кор. 11:5, 6). Павел истәјирди ки, бүтүн баҹы-гардашлар ону үрәкдән севсинләр. Буна ҝөрә дә Павел һәмин мәсиһчиләри ‘үрәкләрини ачараг’ она вә диҝәр һәмиманлыларына јахынлашмаға сәсләјирди.

7. Гардашлыг мәһәббәти тәзаһүр етдирмәк үчүн үрәкләримизи неҹә ача биләрик?

⁷ Бәс бизим һаггымызда нә демәк олар? Гардашлыг мәһәббәти тәзаһүр етдирмәк үчүн үрәкләримизи неҹә ача биләрик? Ејни јаша вә ја ејни етник група мәнсуб олан инсанларын бир-биринә мәһәббәт ҝөстәрмәси тәбиидир. Ејни әјләнҹә нөвүнү севән инсанлар да бирҝә чох вахт кечирә биләрләр. Анҹаг әҝәр мараг даирәмиз башгаларынкындан фәргләндији үчүн онлардан узаг ҝәзириксә, онда биз үрәкләримизи ҝениш ачмалыјыг. Јахшы оларды ки, өзүмүздән сорушаг: «Чох вахт мәнә јахын олан баҹы-гардашларламы хидмәтә чыхыр вә ја вахт кечирирәм? “Онларын мәним достум олмаларына һәлә чох вар”,— дејә дүшүнәрәк јығынҹаға јени ҝәләнләрлә мүнасибәтә сәрһәд гојураммы? Јығынҹаға ҝәләндә һәм ҝәнҹләрлә, һәм дә јашлыларла ҝөрүшүрәмми?»

8, 9. Павелин Ромалылара 15:7 ајәсиндәки мәсләһәтә әсасән, башгалары илә неҹә ҝөрүшмәлијик ки, бу, гардашлыг мәһәббәтимизи мөһкәмләндирсин?

⁸ Башгаларыны саламламаға ҝәлдикдә, Павелин ромалылара үнванладығы сөзләри һәмиманлыларымыза дүзҝүн мүнасибәт инкишаф етдирмәјә көмәк едә биләр. (Ромалылара 15:7 ајәсини оху.) «Гәбул един» кими тәрҹүмә олунан јунан сөзү «кимисә меһрибанлыгла вә ја гонагпәрвәрликлә гәбул етмәк, өзүнә јахын бурахмаг вә онунла достлуг етмәк» мәнасыны дашыјыр. Гәдим заманларда гонагпәрвәр ев саһибинин достлары евинә гонаг ҝәләндә о, онлары бөјүк севинҹлә гәбул едирди. Мәсиһ мәҹази мәнада бизи гәбул едир, биз дә ондан нүмунә ҝөтүрәрәк һәмиманлыларымызы гәбул етмәлијик.

⁹ Падшаһлыг Залында вә башга јерләрдә баҹы-гардашларымызла ҝөрүшәркән чохдан ҝөрмәдијимиз вә ја үнсијјәт етмәдијимиз инсанлара диггәт јетирә биләрик. Нәјә ҝөрә онларла бир нечә дәгигә сөһбәт етмәјәсән? Нөвбәти ҝөрүшдә исә башгаларына јахынлашмаг олар. Гыса вахт әрзиндә бир чох баҹы-гардашларла ҝөзәл сөһбәт едә биләрик. Бир дәфәјә һамы илә үнсијјәт едә билмәдијимиз үчүн нараһат олмамалыјыг. Әҝәр һәр ҝөрүшдә һамы илә һал-әһвал тутмаг алынмырса, һеч ким буна ҝөрә инҹимәмәлидир.

10. Јығынҹагда һәр биримиз үчүн һансы ҝөзәл имкан вар вә биз бундан неҹә фајдалана биләрик?

¹⁰ Саламлашмаг — башгаларыны гәбул етмәк үчүн биринҹи аддымдыр. Бу аддым хош үнсијјәтә вә мөһкәм достлуға јол ача биләр. Мәсәлән, конгресләрдә иштирак едәнләр бир-бирләри илә таныш олуб сөһбәт едәндә јенидән ҝөрүшәҹәкләри ҝүнү ҝөзләјирләр. Падшаһлыг Залынын тикинтисиндә иштирак едән, еләҹә дә фәлакәт баш верән әразидә јардым едән көнүллүләр чох вахт јахын дост олурлар, чүнки онлар бир јердә ишләјәркән бир-биринин ҝөзәл хүсусијјәтләрини ҝөрүрләр. Јеһованын тәшкилатында мөһкәм достлуг телләри гурмаг имканы чохдур. Әҝәр үрәјимизи ҝениш ачсаг, бизи һәгиги ибадәтдә бирләшдирән мәһәббәт телләри мөһкәмләнәҹәк вә чохлу достларымыз олаҹаг.

Башгаларына вахт ајыр

11. Марк 10:13-16 ајәләриндән ҝөрүндүјү кими, Иса бизим үчүн һансы нүмунәни гојуб?

¹¹ Бүтүн мәсиһчиләр, Иса кими, әлчатан олмаға чалышмалыдыр. Ҝәлин ҝөрәк, валидејнләр өз ушагларыны Исанын јанына ҝәтирәндә шаҝирдләринин буна мане олмасына Иса неҹә мүнасибәт ҝөстәрди: «Гојун ушаглар Мәним јаныма ҝәлсинләр! Онлара мане олмајын! Чүнки Аллаһын Сәлтәнәти беләләрининдир». Сонра «онлары гуҹаглајыб, әлләрини үзәрләринә гојараг, хејир-дуа верди» (Марк 10:13-16). Бөјүк Мүәллим тәрәфиндән белә мәһәббәт ҝөрән бу ушагларын неҹә севиндијини бир тәсәввүр един!

12. Әлчатан олмағымыза нә мане ола биләр?

¹² Һәр бир мәсиһчи өзүндән сорушмалыдыр: «Мән башгалары үчүн әлчатанам, јохса өзүмү елә ҝөстәрирәм ки, ҝуја һәмишә мәшғулам?» Өз-өзлүјүндә пис олмајан вәрдишләр бәзән үнсијјәтә мане ола биләр. Мәсәлән, әҝәр биз башгаларынын јанында тез-тез мобил телефонла данышыр вә ја гулағымызда гулагҹыг маһныја гулаг асырыгса, бунунла ҝөстәририк ки, онларла үнсијјәт етмәк бизим үчүн о гәдәр дә мараглы дејил. Башгалары исә тез-тез башымызын ҹиб компүтеринә гарышдығыны ҝөрәрләрсә, елә гәнаәтә ҝәлә биләрләр ки, биз онларла данышмаг истәмирик. Әлбәттә, «сусмағын өз вахты» вар. Лакин инсанларын әһатәсиндә оланда әксәр һалларда ‘данышмаг вахтыдыр’ (Ваиз 3:7). Бәзиләри белә дејә биләр: «Һәр шеји үрәјимдә сахламаға үстүнлүк верирәм» вә ја «Сәһәр тездән ағзымы ачмаға һалым јохдур». Амма данышмаға һәвәсли олмадығымыз һалда белә меһрибанлыгла үнсијјәт етсәк, сәмими мәһәббәт ҝөстәрмиш оларыг (1 Кор. 13:5).

13. Павел Тимотеји баҹы-гардашларына неҹә јанашмаға тәшвиг едирди?

¹³ Павел ҝәнҹ Тимотеји јығынҹағын бүтүн үзвләринә һөрмәтлә јанашмаға тәшвиг едирди. (1 Тимотејә 5:1, 2 ајәләрини оху.) Биз дә јашҹа өзүмүздән бөјүк олан мәсиһчиләрә ата-анамыз, кичикләрә исә доғма баҹы-гардашларымыз кими јанашмалыјыг. Әҝәр биздә әзиз баҹы-гардашларымыза гаршы белә мүнасибәт оларса, онда һеч ким бизим јанымызда өзүнү артыг һисс етмәјәҹәк.

14. Башгалары илә руһландырыҹы үнсијјәт етмәк һансы фајданы ҝәтирир?

¹⁴ Башгаларыны руһландырыҹы үнсијјәтә ҹәлб едәндә биз онлары руһани вә емосионал ҹәһәтдән мөһкәмләндирмиш олуруг. Филиалларын бириндә хидмәт едән бир гардаш хатырлајыр ки, о, Бет-Елә тәзә ҝәләндә узун илләр орада хидмәт едән бир нечә гардаш онунла сөһбәт етмәјә вахт ајырырды. Онларын руһландырыҹы сөзләри сајәсиндә о, һәгигәтән дә Бет-Ел аиләсинин үзвү олдуғуну һисс едирди. Инди о, һәмин гардашлар кими, Бет-Ел аиләсинин диҝәр үзвләри илә үнсијјәт едир.

Һәлимлик сүлһјарадан олмагда бизә көмәк едир

15. Мәсиһчиләр арасында фикир ајрылығынын гачылмаз олдуғу нәдән ҝөрүнүр?

¹⁵ Гәдим Филипидә јашајан Еводија вә Синтихи адлы ики мәсиһчи баҹы арасында, еһтимал ки, һәлл етмәкдә чәтинлик чәкдикләри бир проблем вар иди (Филип. 4:2, 3). Павел вә Барнаба арасында олан гызғын мүбаһисә һамыја бәлли олду вә онлар бир мүддәтә јолларыны ајырдылар (Һәв. иш. 15:37-39). Бу һадисәләр ҝөстәрир ки, һәгиги мәсиһчиләр арасында да фикир ајрылығынын олмасы гачылмаздыр. Мүнагишәни һәлл едиб достлуғу јенидән бәрпа едә билмәјимиз үчүн Јеһова биздән көмәјини әсирҝәмир. Анҹаг О, биздән дә мүәјјән бир шеј тәләб едир.

16, 17. а) Шәхси мүнагишәләрин һәлл олунмасында һәлимлик нә дәрәҹәдә ваҹибдир? б) Јагубун Есава јахынлашмасы һаггындакы мәлумат һәлимлијин дәјәрини неҹә вурғулајыр?

¹⁶ Тәсәввүр едәк ки, сән достунла бирликдә автомобиллә сәјаһәтә чыхмаға һазырлашырсан. Јола дүшмәздән әввәл, сән јандырма ачарыны чевириб мүһәррики ишә салмалысан. Ејнилә, фикир ајрылығыны һәлл етмәјә башламаг үчүн дә ачардан истифадә етмәк лазымдыр. Бу ачар — һәлимликдир. (Јагуб 4:10 ајәсини оху.) Мүгәддәс Китабын нөвбәти нүмунәсиндән ҝөрүндүјү кими, бу ачар араларында фикир ајрылығы јаранан ики нәфәрә Мүгәддәс Китаб принсипләрини тәтбиг етмәјә көмәк едир.

¹⁷ Есав илк оғуллуг һаггыны әкиз гардашы Јагуба сатдығы үчүн ону әлдән вермишди, буна ҝөрә гәзәб ичиндә гардашыны өлдүрмәк истәјирди. Бу һадисәнин үстүндән ијирми ил кечмишди. Бу гәдәр вахтдан сонра әкиз гардашлар јенидән ҝөрүшмәли идиләр вә буна ҝөрә ‘Јагуб чох горхуб һәјәҹанланырды’. Гардашы Есавын онун үзәринә һүҹум едәҹәји еһтималы чох бөјүк иди. Анҹаг онлар ҝөрүшәндә Јагуб Есавын ҝөзләмәдији бир аддымы атды: о, «гардашына јахынлашанда једди дәфә јерә әјилди». Бәс сонра нә баш верди? «Есав Јагубу гаршыламаг үчүн гачыб ону гуҹаглады вә бојнуна сарылыб өпдү. Онлар ағлашдылар». Тәһлүкә совушмушду. Јагубун һәлимлији Есавдакы истәнилән нифрәт һиссинә үстүн ҝәлмишди (Јар. 27:41; 32:3-8; 33:3, 4).

18, 19. а) Шәхси ихтилафлар заманы Мүгәддәс Китаб мәсләһәтләрини тәтбиг етмәк тәшәббүсүнү өз үзәримизә ҝөтүрмәк нәјә ҝөрә ваҹибдир? б) Әҝәр мүнагишәни һәлл етмәк үчүн ҝөстәрдијимиз илк ҹәһдләримиз боша чыхырса, нәјә ҝөрә тәслим олмамалыјыг?

¹⁸ Мүгәддәс Китабда ихтилафлары һәлл етмәк үчүн ҝөзәл мәсләһәтләр вар (Мат. 5:23, 24; 18:15-17; Ефес. 4:26, 27)a. Лакин бу мәсләһәтләри һәлимликлә тәтбиг етмәјинҹә сүлһ јаратмаг чәтин олаҹаг. Гаршы тәрәфдән һәлимлик ҝөзләмәк вәзијјәтдән чыхыш јолу дејил, бир һалда ки, өзүмүз һәлимлик ҝөстәрә биләрик.

¹⁹ Әҝәр фикир ајрылығыны һәлл етмәк үчүн ҝөстәрдијимиз илк ҹәһдләримиз мүәјјән сәбәбләрә ҝөрә боша чыхарса, тәслим олмамалыјыг. Чүнки гаршы тәрәфин өз һиссләрини ҝөтүр-гој етмәси үчүн вахт тәләб олуна биләр. Јусифин гардашлары онунла хаинҹәсинә давранмышдылар. Узун илләр иди ки, онлар ҝөрүшмүрдүләр вә инди Јусиф Мисирдә фирондан сонра икинҹи шәхс иди. Бир ҝүн онлар сәһвләрини баша дүшдүләр вә ондан үзр истәдиләр. Јусиф онлары бағышлады вә Јагубун оғуллары Јеһованын адыны дашымаг шәрәфинә лајиг ҝөрүлән бир халг олду (Јар. 50:15-21). Баҹы вә гардашларымызла сүлһү горумагла биз јығынҹағын бирлијини вә севинҹини горумуш олуруг. (Колослулара 3:12-14 ајәләрини оху.)

Ҝәлин «әмәллә вә һәгигәтлә севәк»

20, 21. Исанын өз һәвариләринин ајагларыны јумасындан һансы ибрәт дәрсини ҝөтүрә биләрик?

²⁰ Өлүмүндән бир аз әввәл Иса һәвариләринә демишди: «Мәним сизә етдијим кими сиз дә едәсиниз дејә, сизә бир нүмунә ҝөстәрдим» (Јәһ. 13:15). О, 12 һәварсинин ајагларыны тәзәҹә јујуб гуртармышды. Исанын бу һәрәкәти нә дини ајин иди, нә дә ки о, буну кимәсә гуллуг етмәк хатиринә етмишди. Исанын һәвариләринин ајагларыны јумасы һаггында данышмаздан өнҹә, Јәһја јазыр: «Иса дүнјада Өзүнә аид оланлары севмиш олараг, онлары сона гәдәр севди» (Јәһ. 13:1). Шаҝирдләринә гаршы мәһәббәти Исаны, адәтән, гулларын ҝөрдүјү иши ҝөрмәјә тәшвиг етди. Инди онлар бир-бириләри үчүн һәлимликлә хејирхаһ ишләр ҝөрмәли идиләр. Бәли, әсил гардашлыг мәһәббәти һәр биримизи бүтүн баҹы-гардашларымызын гајғысына галмаға тәшвиг етмәлидир.

²¹ Һәвари Петер Аллаһын Оғлунун онун ајагларыны јумасынын сәбәбини анлады. О дејир: «Руһ васитәсилә һәгигәтә итаәт едәрәк, ҹанларынызы тәмизләјиб гардашлар үчүн ријасыз мәһәббәтә саһиб олдунуз. Буна ҝөрә, бир-биринизи вар гүввә илә сәмими гәлбдән севин» (1 Пет. 1:22). Исанын ајагларыны јудуғу һәвариләр арасында Јәһја да вар иди. О јазыр: «Ушагларым, сөзлә вә диллә дејил, әмәллә вә һәгигәтлә севәк» (1 Јәһ. 3:18). Гој үрәјимиз бизи баҹы вә гардашларымыза олан мәһәббәтимизи әмәлдә тәсдиг етмәјә тәшвиг етсин!

[Һашијә]

Јадыныздадырмы?

• Гаршылыглы мәһәббәт үчүн үрәјимизи неҹә ача биләрик?

• Башгаларына вахт ајырмагда бизә нә көмәк едәҹәк?

• Һәлимлик сүлһү јаратмагда һансы ролу ојнајыр?

• Һәмиманлыларымызын гајғысына галмаға бизи нә тәшвиг етмәлидир?

[21-ҹи сәһифәдәки шәкил]

Һәмиманлыларынызы меһрибанлыгла саламлајын

[23-ҹү сәһифәдәки шәкил]

Башгаларына вахт ајырмаг имканыны әлдән вермәјин