Гаврама габилијјәтинизи инкишаф етдирмәјә давам един
МӘҺАРӘТЛИ ҝимнастын ҝөзәл вә ҹәлд һәрәкәтләрини сејр етмәк неҹә дә һејрәтамиздир! Мүгәддәс Китаб мәсиһчиләри тәшвиг едир ки, ҝимнаст мәшг етдији кими, онлар да дүшүнмә габилијјәтләрини мәшг етдирсинләр.
Ибраниләрә мәктубда һәвари Павел јазмышдыр: «Бәрк гида... јеткин адам үчүндүр. Белә адам гаврајышыны даима ишләтмәклә ону јахшыны писдән ајырмаға өјрәшдириб» (Ибр. 5:14, ЈД). Нәјә ҝөрә Павел, мәһарәтли ҝимнастын әзәләләрини мәшг етдирдији кими, ибрани мәсиһчиләри дүшүнмә габилијјәтләрини мәшг етдирмәјә тәшвиг едирди? Биз өз гаврама габилијјәтимизи неҹә инкишаф етдирә биләрик?
«Сиз индијәдәк мүәллим олмалы идиниз»
Павел Исанын «Мәлкиседег рүтбәли Баш Каһин» кими тутдуғу вәзифәни изаһ едәрәк јазырды: «[Иса] барәдә дејиләси сөзүмүз чохдур, амма бунлары изаһ етмәк чәтиндир. Чүнки сиз ағыр ешидирсиниз. Һәрчәнд сиз индијәдәк мүәллим олмалы идиниз; анҹаг һәлә дә буна мөһтаҹсыныз ки, кимсә сизә тәкрарән Аллаһын сөзләринин ибтидаи гајдаларыны өјрәтсин; вә гүввәтли јемәјә дејил, сүдә мөһтаҹ олмусунуз» (Ибр. 5:9—12).
Ҝөрүнүр, биринҹи әсрдә јашајан ибрани мәсиһчиләрдән бәзиләри һәгигәтин дәринликләрини анламаға ҹан атмыр вә руһани ҹәһәтдән инкишаф етмирдиләр. Мәсәлән, онлар Ганун вә сүннәтә даир ҝет-ҝедә артан нуру гәбул етмәкдә чәтинлик чәкирдиләр (Һәв. иш. 15:1, 2, 27—29; Галат. 2:11—14; 6:12, 13). Бәзиләри исә һәфтәлик шәнбә вә иллик Кәффарә ҝүнү кими бајрам вә адәтләрдән әл чәкә билмирдиләр (Колос. 2:16, 17; Ибр. 9:1—14). Буна ҝөрә дә Павел онлары јахшыны писдән ајыра билмәләри үчүн гаврама габилијјәтләрини инкишаф етдирмәјә вә ‘камиллијә [«јеткинлијә», ЈД] доғру тәрәгги етмәјә’ тәшвиг едирди (Ибр. 6:1, 2). Чох еһтимал ки, онун нәсиһәти бәзиләринә дүшүнмә габилијјәтләриндән неҹә истифадә етдикләри һагда дүшүнмәјә вә руһән инкишаф етмәјә көмәк етмишди. Бәс бизим барәмиздә нә демәк олар?
Гаврама габилијјәтинизи инкишаф етдирин
Руһән јеткинләшмәк үчүн биз дүшүнмә габилијјәтимизи неҹә инкишаф етдирә биләрик? «Даима ишләтмәклә»,— дејә Павел јазыр. Ҝөзәл вә мүрәккәб һәрәкәтләри иҹра етмәк үчүн әзәләләрини вә бәдәнини мәшг етдирән ҝимнаст кими, биз дә јахшыны писдән ајырмаг үчүн дүшүнмә габилијјәтимизи инкишаф етдирмәлијик.
Һарвард Университетинин тибб факүлтәсинин психиатрија үзрә кафедра профессору Ҹон Рети јазыр: «Бејниниз үчүн едә биләҹәјиниз ән јахшы вә јеҝанә шеј мәшг етмәкдир». Ҹорҹ Вашингтон адына Университетин нәздиндә олан мәркәзин рәһбәри Ҹин Коуенин сөзләринә әсасән, «бејнимизә чәтин тапшырыг верәндә бејин һүҹејрәләри јени дендритләр әмәлә ҝәтирир, бунун сајәсиндә дә синапсларын, јәни әлагәләрин сајы артыр».
Буна ҝөрә дә биз дүшүнмә габилијјәтимизи инкишаф етдирәндә вә Аллаһын Кәламындан билијимизи артыранда мүдрик давранарыг. Белә етмәклә биз ‘Аллаһын камил ирадәсини’ јеринә јетирмәк үчүн даһа јахшы һазыр олаҹағыг (Ром. 12:1, 2).
«Бәрк гида» үчүн иштаһанызы артырын
Әҝәр биз јеткинлијә доғру тәрәгги етмәк истәјириксә, өзүмүздән сорушмалыјыг: «Мүгәддәс Китаб һәгигәтини даһа јахшы баша дүшмәкдә тәрәгги едирәмми? Башгалары мәним руһән јеткин мәсиһчи олдуғуму ҝөрүрмү?» Адәтән, көрпәсини сүд вә сыјыгла бәсләмәк анаја хош олур. Амма илләр өтдүкҹә ушағынын башга һеч бир јемәк јемәдијини ҝөрән ананын нараһатчылығыны тәсәввүр етмәк олар. Биз дә Мүгәддәс Китабы өјрәтдијимиз инсанын инкишаф етдијини вә нәтиҹәдә өзүнү Аллаһа һәср едиб вәфтиз олундуғуну ҝөрәндә чох севинирик. Туталым ки, бундан сонра һәмин инсан руһән инкишаф етмир. Мәҝәр биз мәјус олмаздыг? (1 Кор. 3:1—4). Мүәллим јени шаҝирдинин мүәјјән вахтдан сонра мүәллим олаҹағына үмид едир.
Гаврама габилијјәтимизи истифадә едәрәк һансыса мәсәлә барәдә мүлаһизә јүрүтмәк үчүн дүшүнмәк ҝәрәкдир, бу исә сәј тәләб едир (Мәз. 1:1—3). Биз јол вермәмәлијик ки, бејнимизи ишә салмағы тәләб етмәјән телевизор вә севимли мәшғулијјәтләр кими јајындырыҹы шејләр ваҹиб мәсәләләр һаггында дүшүнмәјимизә мане олсун. Дүшүнмә габилијјәтимизи инкишаф етдирмәк үчүн биз Мүгәддәс Китабы вә «садиг вә ағыллы гул»ун нәшрләрини өјрәнмәк истәјинә јијәләнмәли вә ону тәмин етмәлијик (Мат. 24:45—47). Мүгәддәс Китабы мүнтәзәм охумагдан савајы, аиләви ибадәтә вә Мүгәддәс Китаб мөвзуларыны дәриндән арашдырмаға да вахт ајырмаг ваҹибдир.
Мексикада хидмәт едән сәјјар нәзарәтчи Херонимо дејир ки, «Ҝөзәтчи Гүлләси»нин һәр сајыны алан кими арашдырыр. О һәмчинин һәјат јолдашы илә бирҝә өјрәнмәк үчүн вахт ајырыр. Херонимо дејир: «Биз һәр ҝүн Мүгәддәс Китабы бирликдә охујур вә “Ҝөзәл торпаг” брошүрасы кими вәсаитләрдән истифадә едирик». Роналд адлы мәсиһчи исә јығынҹағын Мүгәддәс Китабын һәфтәлик охунмасы графикинә һәмишә риајәт етдијини дејир. О һәмчинин бир-ики мөвзу сечиб узун мүддәт әрзиндә арашдырыр. Роналд дејир: «Мән нөвбәти мәшғәләни сәбирсизликлә ҝөзләјирәм».
Бәс биз? Аллаһын Кәламыны өјрәнмәк вә онун үзәриндә дүшүнмәк үчүн кифајәт гәдәр вахт ајырырыгмы? Дүшүнмә габилијјәтимизи инкишаф етдирир вә Мүгәддәс Китаб принсипләри әсасында гәрарлар гәбул етмәк тәҹрүбәсинә јијәләнирикми? (Сүл. мәс. 2:1—7). Ҝәлин гаршымыза руһән јеткин инсан олмаг мәгсәдини гојаг ки, јахшыны писдән ајырмаг үчүн гаврама габилијјәтләрини инкишаф етдирәнләрин әлдә етдикләри билик вә мүдриклијә јијәләнә биләк!
[23-ҹү сәһифәдәки шәкил]
Биз дүшүнмә габилијјәтимизи «даима ишләтмәклә» инкишаф етдиририк