Јеһованын гојдуғу јолла ҝедәҹәксәнми?
«Бүтүн сәһв [јоллара] нифрәт едирәм» (МӘЗ. 119:128).
1, 2. а) Мүәјјән јерә ҝетмәји планлашдыраркән сәнә нә лазым ола биләр вә нәјә ҝөрә? б) Јеһова хидмәтчиләрини нә барәдә хәбәрдар едир вә Ону буну етмәјә нә тәшвиг едир?
ТӘСӘВВҮР ЕТ КИ, сән мүәјјән бир јерә ҝетмәлисән, амма јолу танымадығын үчүн көмәјә еһтијаҹын вар. Буна ҝөрә дә о јолу јахшы билән етибарлы достуна мүраҹиәт едирсән. О, сәнә ҝедәҹәјин јолу әтрафлы баша салыр вә јолда гаршына чыха биләҹәк тәһлүкәләрдән хәбәрдар едир. Мәсәлән, о дејир: «Бу дөнҝәдә еһтијатлы ол, чүнки јол ишарәси етибарсыздыр. Чохлары бу јолла ҝедиб азмышлар». Јәгин, достун сәни тәһлүкәләр барәдә хәбәрдар етдији үчүн севинәҹәксән вә онун мәсләһәтләрини гулагардына вурмајаҹагсан. Јеһованы белә бир достла мүгајисә етмәк олар. Биз әбәди һәјата апаран јолла ҝедирик вә бу һәјата наил олмағымыз үчүн Јеһова бизә конкрет ҝөстәришләр верир. Һәмчинин јолумузу азмајаг дејә Аллаһ гаршымыза чыхаҹаг тәһлүкәләр барәдә дә бизи хәбәрдар едир (Ганун. т. 5:32; Јешаја 30:21).
2 Бу вә нөвбәти мәгаләдә һәмин тәһлүкәләр барәдә данышаҹағыг. Ҝәлин унутмајаг ки, Достумуз олан Јеһова Аллаһ бизи севдији вә бизә ҝөрә нараһат олдуғу үчүн бу тәһлүкәләр барәдә бизи хәбәрдар едир. О истәјир ки, һәр биримиз јолумузу уғурла баша вураг. Инсанларын хәбәрдарлыглара мәһәл гојмајыб јолларыны аздыгларыны ҝөрмәк Она үрәкағрысы верир (Јез. 33:11). Бу мәгаләдә үч тәһлүкәдән — инсанлардан, дахилимиздән вә гејри-реал шејләрдән ҝәлән тәһлүкәләрдән сөһбәт ҝедәҹәк. Биз бунларын нә олдуғуну вә онлардан гачынмаг үчүн сәмави Атамызын бизә неҹә көмәк етдијини билмәлијик. Бир мәзмурчу Јеһоваја демишди: «Бүтүн сәһв [јоллара] нифрәт едирәм» (Мәз. 119:128). Сән онун һиссләринә шәриксән? Ҝәл ҝөрәк, дүз јолдан дөнмәмәк гәтијјәтимизи неҹә мөһкәмләндирә биләрик.
Чохлуғун ардынҹа ҝетмә
3. а) Һара ҝедәҹәјимизи билмәјәндә башга сәјјаһларын ардынҹа ҝетмәк нәјә ҝөрә тәһлүкәли ола биләр? б) Чыхыш 23:2 ајәсиндә һансы ваҹиб принсип јер алыб?
3 Артыг јолда оларкән бир дә ҝөрүрсән ки, һансы јолла ҝетмәли олдуғуну билмирсән. Бу заман бир чох сәјјаһын мүәјјән истигамәтдә ҝетдијини ҝөрүрсән. Сән нә едәҹәксән? Онларын ардынҹа ҝедәҹәксән? Ахы бу тәһлүкәлидир. Әввәла, ола билсин, онлар сәнин ҝетмәк истәдијин јерә ҝетмирләр, јахуд да сәнин кими азыблар. Бу нүмунә бизә Јеһованын исраиллиләрә вердији бир ганунун әсасыны тәшкил едән принсипи баша дүшмәјә көмәк едир. Јеһова һакимләрә вә мәһкәмәдә шаһид гисминдә чыхыш едәнләрә хәбәрдарлыг етмишди ки, чохлуғун ардынҹа ҝетмәсинләр, чүнки бу тәһлүкәлидир. (Чыхыш 23:2 ајәсини оху.) Әлбәттә, гејри-камил инсан асанлыгла әтрафдакыларын тәзјигинә ујараг һәгигәти тәһриф едә биләр. Бәс чохлуғун ардынҹа ҝетмәмәк принсипи јалныз мәһкәмә ишләринә аиддир? Хејр.
4, 5. Јешуа илә Калев һансы тәһлүкә илә үзләшмишдиләр? Бу заман онлара ҹәсарәт верән нә иди?
4 Биз, демәк олар ки, һәр ан башгаларынын ардынҹа ҝетмәк тәһлүкәси илә үзләширик. Белә вәзијјәт гәфләтән јарана биләр вә бу заман һамыдан фәргли шәкилдә давранмаг чәтин ола биләр. Нүмунә үчүн Јешуа вә Калевин башына ҝәләнләри јадымыза салаг. Онлар Вәд едилмиш дијары нәзәрдән кечирмәк үчүн ҝөндәрилән 12 кәшфијјатчынын арасында иди. Кәшфијјатчылар гајыданда онлардан он нәфәри Вәд едилмиш дијар барәдә чох пис данышды вә халг руһдан дүшдү. Бу азмыш кими, онлар орада үсјанкар мәләкләрлә гадынларын өвладларынын нәслиндән олан нәһәнҝ адамларын, башга сөзлә, Нефилимләрин јашадығыны сөјләдиләр (Јар. 6:4). Бу, ҹәфәнҝијат иди, чүнки нәһәнҝ инсанлар әсрләр өнҹә баш вермиш Дашгында мәһв олмушдулар вә онларын нәслиндән һеч ким галмамышды. Һәтта бу ҹүр әсассыз фикирләр белә иманлары зәиф олан инсанлара ҝүҹлү тәсир ҝөстәрә биләр. Он нәфәрин ҝәтирдији бәд хәбәр халг арасында тәлаш вә чахнашма салды. Тезликлә чохлары елә гәнаәтә ҝәлди ки, Јеһованын ҝөстәришинә әмәл едәрәк Вәд едилмиш дијара дахил олмаг сәһв оларды. Белә бир чәтин вәзијјәтдә Јешуа илә Калев неҹә давранды? (Сај. 13:25—33).
5 Онлар издиһама гошулмады. Исраиллиләр һәгигәти ешитмәк истәмәсәләр дә, бу ики нәфәр ҹәсарәтлә онлара һәгигәти сөјләди вә һәтта сојдашлары онлары дашгалаг етмәк истәјәндә белә өз сөзләриндән дөнмәдиләр. Јешуаны вә Калеви ҹәсарәтли вә горхмаз едән нә иди? Јеһоваја олан иманлары. Јеһоваја иман едән шәхс инсанларын әсассыз фикирләри илә Онун мүгәддәс вәдләри арасында фәрги ајдын ҝөрүр. Һәм Јешуа, һәм дә Калев сонралар иманлары барәдә данышаркән Јеһованын Өз вәдләрини һәмишә јеринә јетирдијини гејд етди. (Јешуа 14:6, 8; 23:2, 14 ајәләрини оху.) Онлар садиг Аллаһ олан Јеһоваја бағлы идиләр вә имансыз издиһамын ардынҹа ҝетмәклә Онун хәтринә дәјмәји һеч ағылларындан белә кечирмирдиләр. Буна ҝөрә онлар сарсылмаз галдылар. Онлар бизим үчүн неҹә дә ҝөзәл нүмунә гојдулар! (Сај. 14:1—10).
6. Биз һансы саһәләрдә чохлуғун ардынҹа ҝетмәк тәһлүкәси илә үзләшә биләрик?
6 Үрәјиндән нә вахтса һамы кими давранмаг истәји кечиб? Јеһоваја һөрмәт етмәјән вә Онун әхлаг нормаларыны ағылсызлыг һесаб едән инсанлар бу ҝүн чохлуг тәшкил едир. Әјләнҹә вә истираһәтә даир онларын өз сәһв фикирләри вар. Белә инсанлар иддиа едә биләрләр ки, буҝүнкү верилишләрдә, филмләрдә вә видеоојунларда јер алан әхлагсызлыг, зоракылыг вә спиритизм зәрәрсиздир (2 Тим. 3:1—5). Өзүн вә ја аилән үчүн әјләнҹә сечәркән нәји әлдә рәһбәр тутурсан? Гәрарына виҹданлары позулмуш инсанларын тәсир етмәсинә вә ја онларын сәнин виҹданыны формалашдырмасына јол верирсәнми? Әҝәр јол верирсәнсә, мәҝәр бу, издиһама гошулмаг демәк дејил?
7, 8. а) Гаврама габилијјәтимизи јахшыны писдән ајырмаға неҹә өјрәдә биләрик вә нәјә ҝөрә бу, конкрет гајдалар вә гадағалар сијаһысындан даһа јахшыдыр? б) Бир чох ҝәнҹ мәсиһчиләрин ҝөзәл нүмунәси сәндә һансы һиссләр доғурур?
7 Дүзҝүн гәрарлар вермәјимиз үчүн Јеһова бизә чох гијмәтли әнам бәхш едиб. Бу, гаврама габилијјәтидир. Амма биз ону даима ишләтмәлијик ки, ону јахшыны писдән ајырмаға өјрәдәк (Ибр. 5:14). Садәҹә олараг чохлуғун ардынҹа ҝетмәклә биз ону өјрәдә билмәрик; виҹдан мәсәләсинә даир конкрет гајдалар топлусу да бизә бу саһәдә көмәк едә билмәз. Елә буна ҝөрә дә Јеһованын халгы үчүн гадаған олунмуш филмләр, китаблар вә Интернет сәһифәләри сијаһысы тәртиб олунмур. Бу ҹүр сијаһынын јазылмасы илә көһнәлмәси бир оларды, чүнки дүнја дурмадан дәјишир (1 Кор. 7:31). Анҹаг белә бир сијаһыја еһтијаҹ олмадығынын ән ваҹиб сәбәби одур ки, Јеһова бизә бәхш етдији гаврама габилијјәтиндән истифадә едәҹәјимизи ҝөзләјир. О истәјир ки, биз Мүгәддәс Китаб принсипләри үзәриндә дүшүнәк, Ондан дуада рәһбәрлик диләјәк вә сонра Она мәгбул олан гәрарлар верәк (Ефес. 5:10).
8 Етираф етмәк лазымдыр ки, Мүгәддәс Китаба әсасланан гәрарларымыз һеч дә һамынын хошуна ҝәлмәјәҹәк. Мәктәбдә охујан ҝәнҹ Шаһидләр һамы кими давранмаг вә ја һамынын бахдығы шејләрә бахмаг тәзјигинә мәруз гала биләрләр (1 Пет. 4:4). Лакин бир чох ҝәнҹ мәсиһчиләр чохлуғун ардынҹа ҝетмир. Аллаһын һәм ҝәнҹ, һәм дә јашлы хидмәтчиләринин Јешуа вә Калевин иман нүмунәсини изләдијини ҝөрмәк бизә фәрәһ ҝәтирир.
«Өз үрәјинизин вә ҝөзләринизин истәкләринә» гапылмајын
9. а) Нәјә ҝөрә сәјаһәт едәркән истәдијимиз һәр јолла ҝетмәјимиз тәһлүкәли ола биләр? б) Нәјә ҝөрә Сајлар 15:37—39 ајәләриндә јазылан ганун Аллаһын гәдим халгы үчүн ваҹиб иди?
9 Мүзакирә едәҹәјимиз икинҹи тәһлүкә исә бизим дахилимиздән ҝәлир. Тәсәввүр ет ки, сән һараса ҝедирсән вә әлиндә хәритә вар. Бәс әҝәр хәритәни кәнара атыб ҝөзүнә хош ҝәлән һәр јолла ҝетсән, нә баш верәр? Әлбәттә ки, истәдијин јерә һеч вахт чатмајаҹагсан. Бунунла әлагәдар Јеһованын Исраил халгына вердији диҝәр гануна нәзәр салаг. Билдијимиз кими, Јеһова исраиллиләрә ҝејимләринин әтәјинә готаз тикмәји вә готазын үзәринә бәнөвшәји гајтан салмағы тапшырмышды. Бир чох инсанлар бунун сәбәбини баша дүшмүрләр. (Сајлар 15:37—39 ајәләрини оху.) Бәс сән бу ганунун ваҹиблијини дәрк едирсән? Исраиллиләр бу гануна риајәт етмәклә өзләрини әтрафдакы бүтпәрәст халглардан узаг сахлаја вә онлардан фәргләнә биләрдиләр. Јеһованын рәғбәтини газанмаг вә ону горујуб сахламаг үчүн бу, сон дәрәҹәдә ваҹиб иди (Лев. 18:24, 25). Бунунла јанашы, бу ганун бизи әбәди һәјата апаран јолдан аздыра биләҹәк дахили тәһлүкәдән хәбәр верир. Бу, һансы тәһлүкәдир?
10. Јеһованын инсан тәбиәтинә бәләд олдуғу нәдән ҝөрүнүр?
10 Јеһова халгына бу гануну нәјә ҝөрә вердијини изаһ етди: «Өз үрәјинизин вә ҝөзләринизин истәкләринә гапылыб Мәнә хәјанәт етмәјин». Јеһова инсан тәбиәтинә јахшы бәләддир. О, чох ҝөзәл билир ки, үрәјимиз асанлыгла ҝөзләримизин ҝөрдүјү шејләри арзулаја биләр. Мүгәддәс Китаб бизи хәбәрдар едир: «Инсан үрәји һәр шејдән һијләҝәрдир, чарәси јохдур. Ону ким баша дүшә биләр?» (Јер. 17:9). Јеһованын исраиллиләрә вердији бу хәбәрдарлығын јериндә олдуғуну ҝөрмәк чәтин дејил. О, чох јахшы билирди ки, исраиллиләр әтрафларындакы бүтпәрәст халглара баханда үрәкләриндә онлар кими олмаг арзусу јаранаҹаг. Сонра онлар заһирән бу имансызлар кими ҝөрүнмәк истәјәҹәкләр. Ахырда исә онлар кими дүшүнмәјә вә давранмаға башлајаҹаглар (Сүл. мәс. 13:20).
11. Ҝөзләримизин ҝөрдүкләри бизи неҹә јолдан чыхара биләр?
11 Бу ҝүн исә һијләҝәр үрәјимиз чох асанлыгла ҝөзләримизин ҝөрдүјүнү арзулаја биләр. Чүнки јашадығымыз дөврдә ҹисмани арзуларымызын тәмин олунмасы үчүн һәр ҹүр шәраит јарадылыб. Белә исә, Сајлар 15:39 ајәсиндәки принсипи неҹә тәтбиг етмәк олар? Ҝөтүрәк ҝејим мәсәләсини. Ола билсин, мәктәбдә, ишдә вә ја јашадығымыз әразидә инсанлар ҝетдикҹә ачыг-сачыг ҝејинирләр. Бу кими шејләри һәр ҝүн ҝөрдүјүмүз үчүн үрәјимиздә јаваш-јаваш онлар кими ҝөрүнмәк арзусу баш галдыра биләр вә биз мәсиһчиләр кими јох, бу дүнјанын инсанлары кими ҝејинмәјә башлајаҹағыг (Ром. 12:1, 2).
12, 13. а) Ҝөзләримиз лазым олмајан јерләрдә ҝәзирсә, нә етмәлијик? б) Башгалары үчүн сынаг олмајаг дејә нәдән гачмалыјыг?
12Нәфсимизә һаким олмағы өјрәнмәк олдугҹа ваҹибдир. Әҝәр ҝөзләримиз лазым олмајан јерләрдә ҝәзирсә, ҝәлин садиг Әјјубун нүмунәсини јадымыза салаг. О, ҝөзләри илә әһд бағламышды вә гадынлара шәһвәтлә бахмамаг гәрарында гәти иди (Әјј. 31:1). Падшаһ Давуд да буна бәнзәр гәрар вермишди. О демишди: «Ијрәнҹ шејләрдән ҝөзүмү чәкәҹәјәм» (Мәз. 101:3). «Ијрәнҹ шеј» дејилдикдә тәмиз виҹданымызы ләкәләјән вә ја Јеһова илә мүнасибәтләримизә зәрәр вуран һәр шеј нәзәрдә тутулур. Бу, үрәјимиздә пис арзу јарадан, сонра да бизи пис јола чәкән ҝөзүмүзүн ҝөрдүјү истәнилән һәр шеј ола биләр.
13 Әҝәр башгаларында әхлагсыз арзулар вә ја фикирләр ојадан бир һәрәкәт едириксә, онда биз дә мүәјјән мәнада онлар үчүн «ијрәнҹ шеј» ола биләрик. Амма әлбәттә ки, биз буну истәмәздик. Буна ҝөрә дә Аллаһын Мүгәддәс Китаб васитәсилә вердији һәја вә әдәб-әрканла ҝејинмәк мәсләһәтинә ҹидди јанашмалыјыг (1 Тим. 2:9). Әдәб-әркан сөзүнү һәр кәс өзү истәдији кими баша дүшмәмәлидир. Биз әтрафдакы инсанларын виҹданыны вә һиссләрини нәзәрә алмалыјыг, еләҹә дә онларын гәлб раһатлығыны вә рифаһыны өз истәкләримиздән үстүн тутмалыјыг (Ром. 15:1, 2). Мәсиһчи јығынҹағында бу саһәдә нүмунәви олан минләрлә ҝәнҹ баҹы-гардашлар вар. Онларын өз үрәкләринин вә ҝөзләринин истәкләринә ҝөрә һәрәкәт етмәдијини, еләҹә дә һәр саһәдә, һәтта ҝејим мәсәләсиндә Јеһованы разы салмағы үстүн тутдуғуну ҝөрәндә гүрур дујуруг!
Гејри-реал шејләрин архасынҹа ҝетмә
14. Шамуел гејри-реал шејләрин архасынҹа ҝетмәк барәдә һансы хәбәрдарлығы сөјләди?
14 Инди исә тәсәввүр ет ки, бөјүк бир сәһрадан кечирсән. Бирдән хәјалән ҝөзүнә нә исә ҝөрүнүр. Әҝәр о тәрәфә ҝетсән, нә баш верә биләр? Хәјалын вә ја иллүзијанын ардынҹа ҝетмәк сәнин һәјатын баһасына баша ҝәлә биләр. Ејнилә, Јеһова да гејри-реал шејләрә етибар етмәјин нә дәрәҹәдә тәһлүкәли олдуғуну билир. Бир нүмунәјә нәзәр салаг. Исраиллиләр истәјирдиләр ки, әтраф халгларда олдуғу кими, онларын да инсан падшаһы олсун. Әслинә галса, онларын бу арзусу ҹидди ҝүнаһ иди. Чүнки бу, Јеһованы бир падшаһ кими рәдд етмәк демәк иди. Јеһова јол верди ки, онларын инсан падшаһы олсун, лакин ејни заманда Шамуел пејғәмбәрин васитәсилә халга хәбәрдарлыг едәрәк «бош», јәни гејри-реал шејләрин архасынҹа ҝетмәјин тәһлүкәли олдуғуну да билдирди. (1 Шамуел 12:21 ајәсини оху.)
15. Исраиллиләр һансы мәнада бош, јәни гејри-реал шејләрин архасынҹа ҝедирдиләр?
15 Јәгин, исраиллиләр дүшүнүрдүләр ки, инсан падшаһы Јеһовадан даһа реал вә даһа етибарлы олаҹаг. Әҝәр беләдирсә, демәк олар ки, онлар «бош», јәни гејри-реал шејләрин архасынҹа ҝедирдиләр. Онларын бирҹә дәфә гејри-реал шејин архасынҹа ҝетмәләри сонрадан Шејтанын јаратдығы бир чох башга иллүзијаларын архасынҹа ҝетмәләринә ҝәтириб чыхара биләрди. Мәсәлән, инсан падшаһлары Исраил халгыны асанлыгла бүтпәрәстлијә сүрүкләјә биләрдиләр. Бүтпәрәстләр сәһв олараг дүшүнүрләр ки, ағаҹдан вә дашдан дүзәлдилән аллаһлар һәр шеји јарадан ҝөзәҝөрүнмәз Аллаһ олан Јеһовадан даһа етибарлы вә даһа реалдыр, чүнки онлар бу аллаһлары ҝөрә вә онлара тохуна билирләр. Анҹаг Павелин гејд етдији кими, бүтләр «һеч нәдир» (1 Кор. 8:4). Онлар нә ҝөрә, нә ешидә, нә даныша, нә дә ки һәрәкәт едә билирләр. Дүздүр, сән онлары ҝөрүр вә онлара тохунурсан, амма онлара ибадәт етмәк гејри-реал шејләрин, јәни бош иллүзијанын архасынҹа ҝетмәкдән башга бир шеј дејил. Үстәлик, бу ҹүр ибадәтин сону фәлакәтдир (Мәз. 115:4—8).
16. а) Бу ҝүн Шејтан бир чох инсанлары гејри-реал шејләрин архасынҹа ҝетмәјә неҹә тәһрик едир? б) Нәјә ҝөрә демәк олар ки, Јеһова илә мүгајисәдә мадди шејләр бош вә гејри-реалдыр?
16 Шејтан инди дә мәһарәтлә инсанлары гејри-реал шејләрин ардынҹа ҝетмәјә тәһрик едир. Мәсәлән, о, инсанлары инандырыр ки, мадди шејләр, јәни пул, вар-дөвләт вә јүксәкмәваҹибли иш онлары мүдафиә вә хошбәхт едә биләр. Бәс хәстәләнәндә, игтисади бөһран вә ја тәбии фәлакәт баш верәндә мадди шејләр онлары горујаҹаг? Әҝәр инсан дахилиндә бошлуг һисс едирсә, һәјатынын мәнасыз олдуғуну дүшүнүрсә, рәһбәрлијә еһтијаҹ дујурса вә һәјати ваҹиб суалларын ҹавабыны ахтарырса, онда неҹә, мадди шејләр она көмәк едәҹәк? Бәс олүм ајағында олан инсана вар-дөвләтин бир хејри вар? Әҝәр пул вә әшјаларын руһани тәләбатларымызы өдәјәҹәјини дүшүнүрүксә, мәјус олаҹағыг. Мадди шејләр нә еһтијаҹ дујдуғумуз хошбәхтлији верә, нә дә бизи хәстәликләрдән вә өлүмдән мүдафиә едә биләр. Онлар бош, гејри-реал шејләрдир (Сүл. мәс. 23:4, 5). Јеһова Аллаһымыз исә реалдыр. Јалныз Онунла сых мүнасибәтимиз олдуғу тәгдирдә О, бизи мүдафиә едәҹәк. Бу неҹә дә бөјүк хејир-дуадыр! Ҝәлин һеч вахт гејри-реал шејләрин архасынҹа ҝедәрәк Јеһованы тәрк етмәјәк!
17. Бу мәгаләдә арашдырдығымыз тәһлүкәләри нәзәрә алсаг, сән нә етмәк әзминдәсән?
17 Мәҝәр Јеһованын бизим Достумуз олмасы вә әбәди һәјата апаран јолда бизә рәһбәрлик вермәси хејир-дуа дејил? Әҝәр Јеһованын мәһәббәтлә вердији хәбәрдарлыглара гулаг ассаг, әбәди јашајаҹағыг. Бу мәгаләдә биз үч тәһлүкә — чохлуғун ардынҹа ҝетмәк, өз үрәјимизин истәкләринә гапылмаг вә гејри-реал шејләрин архасынҹа ҝетмәк һаггында данышдыг. Әксәр инсанларын ҝетдији сәһв јолла ҝетмәмәјимиз вә бу јола нифрәт етмәјимиз үчүн Јеһова даһа үч тәһлүкә барәдә бизи хәбәрдар едир (Мәз. 119:128). Нөвбәти мәгаләдә сөһбәт һәмин тәһлүкәләрдән ҝедәҹәк.
Неҹә дүшүнүрсән?
Нөвбәти ајәләрдәки принсипләри шәхсән сән неҹә тәтбиг едә биләрсән?
[11 сәһифәдәки шәкил]
Нә вахтса үрәјиндә чохлуғун ардынҹа ҝетмәк истәји јараныб?
[13 сәһифәдәки шәкил]
Нәјә ҝөрә үрәјимизин вә ҝөзләримизин истәкләринә гапылмаг тәһлүкәлидир?
[14 сәһифәдәки шәкил]
Сән гејри-реал шејләрин архасынҹа ҝедирсән?