Јеһова мәним пајымдыр

«Исраил өвладлары арасында сәнин пајын вә ирсин Мәнәм» (САЈ. 18:20).

1, 2. а) Левилиләр ирси торпагларла бағлы һансы вәзијјәтлә үзләшмишдиләр? б) Јеһова левилиләри нәјә әмин етди?

ИСРАИЛЛИЛӘР Вәд едилмиш дијарын бөјүк һиссәсини зәбт етдикдән сонра Јешуа һәмин әразиләри гәбиләләр арасында бөлмәјә башлады. Бу ишдә она баш каһин Елеазар вә гәбилә башчылары көмәклик ҝөстәрди (Сај. 34:13—29). Диҝәр гәбиләләрдән фәргли олараг, Леви гәбиләсинә Вәд едилмиш дијарда торпаг пајы верилмәди (Јешуа 14:1—5). Нәјә ҝөрә? Бәлкә онлар унудулмушдулар?

² Бу суалын ҹавабыны Јеһованын левилиләрә дедији сөзләрдән тапа биләрик. Јеһованын онлары унутмадығыны нөвбәти ајәдән ајдын ҝөрмәк олар: «Исраил өвладлары арасында сәнин пајын вә ирсин Мәнәм» (Сај. 18:20). «Пајын... Мәнәм» демәклә Јеһова левилиләрә неҹә дә мөһтәшәм вәд верди! Јеһова бу сөзләри сәнә десәјди, һансы һиссләри кечирәрдин? Јәгин, сәнин илк реаксијан белә оларды: «Мән Күлли-Ихтијардан бу вәди алмаға лајигәмми?» Сән һәмчинин соруша биләрсән: «Бәс бу ҝүн Јеһова гејри-камил хидмәтчиси үчүн пај ола биләрми?» Бу суалларын һәм сәнә, һәм дә сәнин севдијин инсанлара аидијјәти вар. Ҝәлин ҝөрәк Јеһованын киминсә пајы олмасы һансы мәнаны кәсб едир. Бу, бизә Јеһованын һансы мәнада Өз хидмәтчиләри үчүн пај олдуғуну баша дүшмәјә көмәк едәҹәк. Истәр ҝөјдә, истәрсә дә јерүзү Ҹәннәтдә јашамаг үмидинә малик олмағындан асылы олмајараг, О, сәнин дә пајын ола биләр.

Јеһова левилиләрин гејдинә галыр

3. Јеһова Она хидмәт етмәк үчүн левилиләри неҹә сечди?

³ Јеһова исраиллиләрә Ганун вермәмишдән габаг, аилә башчылары өз аиләләриндә каһин кими хидмәт едирдиләр. Аллаһ халгына Ганун верәндән сонра исә мүнтәзәм шәкилдә хидмәт етмәләри үчүн Леви гәбиләсиндән бәзиләрини каһин вә көмәкчи тәјин етди. Бу, неҹә баш верди? Аллаһ мисирлиләрин илк оғлан ушагларыны өлдүрәндән сонра исраиллиләрин илк оғлан ушагларыны мүгәддәс һесаб етди вә онлары Өзү үчүн ајырды. Анҹаг сонра Аллаһ мүһүм бир дәјишиклик етдијини деди: «Исраил гадынынын доғдуғу илк оғлан ушағынын әвәзинә Исраиллиләр арасындан Левилиләри сечмишәм». Лакин сијаһыја алынма заманы мәлум олду ки, исраиллиләрин илк оғлан ушаглары левилиләрдән сајҹа чохдур. Бу фәрги компенсасија етмәк мәгсәдилә мүәјјән мәбләғ өдәнилди (Сај. 3:11—13, 41, 46, 47). Бундан сонра левилиләр Исраилин Аллаһына хидмәт етмәјә башлаја биләрдиләр.

4, 5. а) Аллаһын левилиләрин пајы олмасы һансы мәнаны кәсб едирди? б) Аллаһ левилиләрин гејдинә неҹә галырды?

⁴ Бу тапшырыг левилиләр үчүн һансы мәнаны кәсб едирди? Јеһова левилиләрә деди ки, онларын пајы Өзү олаҹаг. Јәни онлар торпаг пајы алмагдан даһа ваҹиб бир шеји, Јеһоваја хидмәт етмәји ирс олараг алаҹагдылар. Левилиләрин ирси Рәббин каһинлији иди (Јешуа 18:7). Сајлар 18:20 ајәсиндә ҝөстәрилдији кими, онлар мадди чәтинлик чәкмәјәҹәкдиләр. (Сајлар 18:19, 21, 24 ајәләрини оху.) Мүгәддәс Китабда дејилир: «Левилиләрә... Исраилдә олан бүтүн варидатын онда бирини ирс олараг вердим. Бу, хидмәтләринин... әвәзидир». Исраил халгынын мәһсулларынын вә ев һејванларынын артымынын онда бир һиссәси, јәни он фаизи левилиләрә верилирди. Левилиләр исә алдыгларынын онда бир һиссәсини — онун «ән јахшы һиссәсиндән» каһинләрин еһтијаҹларынын өдәнилмәси үчүн вермәли идиләрa (Сај. 18:25—29). Һәмчинин Исраил оғулларынын Аллаһа ибадәт етдикләри јерә ҝәтирдикләри «мүгәддәс тәгдимләрин» һамысы каһинләрә чатырды. Буна ҝөрә дә каһинләр там әмин ола биләрдиләр ки, Јеһова онларын еһтијаҹларыны өдәјәҹәк.

⁵ Ҝөрүнүр, Мусанын Ганунунда икинҹи онда бир һиссә дә тәјин олунмушду. Бу онда бир һиссә һәр ил кечирилән мүгәддәс бајрамлар заманы аиләнин еһтијаҹларынын өдәнилмәси вә истираһәти үчүн истифадә едилирди (Ганун. т. 14:22—27). Лакин једдииллик шәнбә дөврүнүн һәр үчүнҹү вә алтынҹы илинин сону исраиллиләр бу онда бири касыблар вә левилиләр үчүн ајырмалы идиләр. Нәјә ҝөрә бура левилиләр дә дахил иди? Чүнки онларын Исраилдә «пајы вә ирси торпағы» јох иди (Ганун. т. 14:28, 29).

6. Исраил гәбиләләри илә бәрабәр торпаг пајы алмајан левилиләр һарада јашајырдылар?

⁶ Јәгин, сәндә суал јараныр ки, левилиләрин торпаг пајы јох идисә, онлар һарада јашајырдылар? Аллаһ онлар үчүн тәдбир ҝөрмүшдү. О, левилиләрә отлаглары илә бирликдә 48 шәһәр вермишди. Бу шәһәрләрдән алтысы сығынаҹаг шәһәр иди (Сај. 35:6—8). Беләликлә, Аллаһын евиндә хидмәт етмәдикләри мүддәтдә левилиләрин галмаға јери вар иди. Јеһова Она хидмәт едәнләрә артыгламасы илә әвәзини гајтарырды. Бәс левилиләр Јеһованын онларын пајы олдуғуну неҹә ҝөстәрә биләрдиләр? Јеһованын онларын еһтијаҹларыны өдәмәјә гадир олдуғуна вә онларын гајғысына галмаг истәдијинә инанмагла.

7. Јеһованын онларын ирси олмасы үчүн левилиләрдән нә тәләб олунурду?

⁷ Мусанын Ганунунда онда бири вермәјәнләр үчүн һеч бир ҹәза нәзәрдә тутулмамышды. Анҹаг халг Аллаһын бу ганунуна етинасыз јанашанда каһинләр вә левилиләр әзијјәт чәкирдиләр. Белә бир вәзијјәт Неһемјанын ҝүнләриндә јаранмышды. Буна ҝөрә дә левилиләр хидмәтләрини бурахыб өз тарлаларында ишләмәли олурдулар. (Неһемја 13:10 ајәсини оху.) Ајдындыр ки, Леви гәбиләсинин мадди вәзијјәти халгын руһани вәзијјәтиндән асылы иди. Үстәлик, каһинләрин вә левилиләрин Јеһоваја, еләҹә дә онларын гејдинә галмаг үчүн истифадә етдији үсула иманлары олмалы иди.

Онларын пајы Јеһова иди

8. Левили Асәфин үзләшдији чәтин вәзијјәти тәсвир ет.

⁸ Бир гәбилә кими левилиләрин пајы Јеһова иди. Лакин гејд етмәк лазымдыр ки, ајры-ајры левилиләр дә Јеһоваја садиг олдугларыны вә Она ҝүвәндикләрини ҝөстәрмәк үчүн Јеһованы өз нәсиби, јәни пајы адландырырдылар (Мәрс. 3:24). Белә инсанлардан бири Јеһованын евиндә илаһи охујан вә нәғмә бәстәләјән бир левили иди. Биз ону Асәф адландыраҹағыг, лакин бу, падшаһ Давудун ҝүнләриндә илаһичиләрә рәһбәрлик едән Асәфин нәслиндән олан башга бир левили дә ола биләрди (1 Салн. 6:31—43). 73-ҹү мәзмурдан охујуруг ки, Асәф (вә ја онун нәслиндән олан бири) пис инсанларын јахшы јашадығыны ҝөрәндә чашбаш галырды вә онлара пахыллыг едирди. О һәтта демишди: «Мәҝәр мән бош јерә гәлбими тәмизләмишдим, ҝүнаһсызлыг ичиндә әлләрими јумушдум?» Бу левили она һәвалә олунан хидмәтин ваҹиблијини унутмушду вә Јеһованын онун пајы олмасыны гијмәтләндирмирди. О, «Аллаһын мүгәддәс мәканына ҝирәркән» писләрин агибәтини дәрк етди вә јалныз бундан сонра раһатлыг тапды (Мәз. 73:2, 3, 12, 13, 17).

9, 10. Нәјә ҝөрә Асәф Аллаһы нәсиби, јәни пајы адландырырды?

⁹ Аллаһын евиндә оларкән Асәф һәр шејә Онун нөгтеји-нәзәри илә бахмаға башлады. Јәгин ки, сән дә буна охшар вәзијјәтлә үзләшмисән. Ола билсин, сән Јеһоваја етдијимиз хидмәтин нә гәдәр бөјүк әһәмијјәт кәсб етдијини унудуб арзусунда олдуғун мадди шејләр барәдә дүшүнмүсән. Анҹаг Аллаһын Кәламыны охумагла вә мәсиһчи ҝөрүшләриндә иштирак етмәклә јенидән Јеһова кими дүшүнмәјә башламысан. Асәф писләрин башына сонда нәләр ҝәләҹәјини баша дүшдү. О, Аллаһын хидмәтчиси кими малик олдуғу јахшы шејләр барәдә чох дүшүндү вә дәрк етди ки, Јеһова онун сағ әлиндән тутуб она рәһбәрлик едәҹәк. Буна ҝөрә дә Асәф Јеһоваја әминликлә деди: «Јер үзүндә... Сәндән башга һеч нә истәмирәм» (Мәз. 73:23, 25). Сонра о, Јеһованы өз нәсиби, јәни пајы адландырды. (Мәзмур 73:26 ајәсини оху.) Мәзмурчунун ҹисми вә үрәји тагәтдән дүшсә дә, Аллаһ әбәдијјәт боју онун пајы олаҹагды. Мәзмурчу әмин иди ки, Јеһова ону бир дост кими јадда сахлајаҹаг. Онун сәдагәтлә етдији хидмәт унудулмајаҹаг (Ваиз 7:1). Асәф неҹә дә раһатлыг тапмышды! О охујурду: «Мәним үчүн Аллаһа јахынлашмаг јахшыдыр, Худавәнд Рәббә пәнаһ ҝәтирмишәм!» (Мәз. 73:28).

¹⁰ Јеһованын Асәфин пајы олмасы левили кими әлдә етдији мадди шејләрдән даһа бөјүк мәна кәсб едирди. О, әсас етибарилә, Јеһоваја хидмәтдә малик олдуғу имтијазлары вә Һагг-Таала илә мүнасибәтләрини — Јеһова илә арасындакы достлуғуну нәзәрдә тутурду (Јаг. 2:21—23). Аллаһла јахшы мүнасибәтдә галмаг үчүн мәзмурчу Она ҝүвәнәрәк иманыны горумалы иди. Асәф әмин ола биләрди ки, әҝәр Јеһованын нормаларына ујғун јашаса, онун мүкафаты хошбәхт ҝәләҹәк олаҹаг. Әмин ола биләрсән ки, Күлли-Ихтијар буну сәнин үчүн дә едәҹәк!

11. Јеремјаны һансы суал нараһат едирди вә о, бу суалын ҹавабыны неҹә алды?

¹¹ Јеһованы өзүнә пај һесаб едән диҝәр левили исә пејғәмбәр Јеремја иди. Ҝөрәк о, буну һансы мәнада дејирди. Јеремја Јерусәлимин јахынлығындакы левилиләрин мәскунлашдығы Анатот шәһәриндә јашајырды (Јер. 1:1). Бир дәфә Јеремја Јеһовадан нәјә ҝөрә салеһ инсанларын әзаб чәкдијини, писләрин исә фираван өмүр сүрдүјүнү сорушду. Бу суал она раһатлыг вермирди (Јер. 12:1). О, Јерусәлимдә вә Јәһудада баш верәнләри ҝөрәндә өзүнү сахлаја билмәјиб Јеһоваја шикајәт етмәјә башлады. Јеремја Јеһованын әдаләтли Аллаһ олдуғуну билирди. Јеһова она Јерусәлимин дағылаҹағы һагда пејғәмбәрлији тәблиғ етмәји тапшырмагла вә сонра һәмин пејғәмбәрлији јеринә јетирмәклә онун суалына ҹаваб верди. Јеһованын ҝөстәришинә әмәл едәнләр хилас олдулар, кеф-дамаг ичиндә јашајан вә Онун хәбәрдарлығына мәһәл гојмајан пис адамлар исә мәһв олдулар (Јер. 21:9).

12, 13. а) Јеремјаны: «Рәбб мәним нәсибимдир», — демәјә нә тәшвиг етмишди вә бу, нәји ҝөстәрирди? б) Нәјә ҝөрә Исраилин бүтүн гәбиләләри Јеһованы сәбирлә ҝөзләмәли идиләр?

¹² Јеремја доғма дијарынын виран галдығыны ҝөрәндә өзүнү зүлмәтә гәрг олунмуш кими һисс етди. О деди: «Чохдан өлүб-ҝедәнләр кими [Јеһова] мәни зүлмәтдә јашатды» (Мәрс. 1:1, 16; 3:6). Јеремја бу инадҹыл халгдан өз сәмави Аталарына дөнмәји хаһиш едирди, анҹаг онлар пис әмәлләриндән әл чәкмәдикләринә ҝөрә Аллаһ Јерусәлими вә Јәһуданы мәһв етмәли олду. Јеремјанын һеч бир ҝүнаһы олмаса да, о, чох кәдәрләнирди. Белә бир аҹынаҹаглы вәзијјәтдә о, Аллаһын мәрһәмәтини хатырлады. О деди: «[Биз] мәһв олмадыг». Һәгигәтән дә, Аллаһын мәрһәмәти «һәр сәһәр... тәзәләнир»! Мәһз бундан сонра Јеремја: «[Јеһова] мәним нәсибимдир», — дејә бәјан етди. О, Јеһованын пејғәмбәри кими хидмәтини давам етдирмәк шәрәфинә лајиг ҝөрүлдү. (Мәрсијәләр 3:22—24 ајәләрини оху.)

¹³ Исраиллиләр 70 ил әрзиндә вәтәнләриндән дидәрҝин дүшәҹәкдиләр вә өлкәләри хараба галаҹагды (Јер. 25:11). Анҹаг Јеремјанын: «Рәбб мәним нәсибимдир», — демәси ҝөстәрирди ки, о, Јеһованын мәрһәмәтинә ҝүвәнирди вә Ону сәбирлә ҝөзләјирди. Исраилин бүтүн гәбиләләри мирасларыны итирмишдиләр, буна ҝөрә дә онлар Јеремја кими давранмағы өјрәнмәли идиләр. Онларын јеҝанә үмид јери Јеһова иди. 70 илдән сонра Аллаһын халгы өз вәтәнинә гајытды вә әввәлки кими бурада Она хидмәт етмәк шәрәфинә лајиг ҝөрүлдү (2 Салн. 36:20—23).

Јеһованы өзләринә пај һесаб едән диҝәр инсанлар

14, 15. Левилиләрдән башга даһа ким Јеһованы өзүнә нәсиб вә ја пај билирди вә нәјә ҝөрә?

¹⁴ Асәфлә Јеремја Леви гәбиләсиндән идиләр. Бәс демәк олармы ки, јалныз бу гәбиләдән олан инсанлар Јеһоваја хидмәт едә биләрдиләр? Хејр. Исраилин падшаһы олаҹаг ҝәнҹ Давуд Аллаһы: «Дириләр арасында... нәсибимсән», — дејә чағырырды. (Мәзмур 142:1, 5 ајәләрини оху.) Давуд бу мәзмуру бәстәләјәндә нә сарајда, нә дә ки өз евиндә иди. О, мағарада дүшмәнләриндән ҝизләнмишди. Давуд ән азы ики дәфә — бири Адулламын јахынлығында, диҝәри исә Ен-Ҝеди сәһрасындакы мағарада сығынаҹаг тапмышды. Еһтимал ки, о, 142-ҹи мәзмуру бу мағараларын бириндә бәстәләмишди.

¹⁵ Давуд ҹаныны Шаулун әлиндән гуртармаг үчүн бу мағараларда ҝизләнмишди (1 Шам. 22:1, 4). Ола билсин, бу уҹгар јердә Давудун јанында она дәстәк олаҹаг һеч бир досту јох иди (Мәз. 142:4). Елә һәмин вахт Давуд Аллаһы чағырды.

16, 17. а) Һансы сәбәбләрә ҝөрә Давуд өзүнү чарәсиз һисс едирди? б) Давуд көмәк үчүн кимә мүраҹиәт едә биләрди?

¹⁶ Давуд 142-ҹи мәзмуру бәстәләмәмишдән әввәл, јәгин ки, баш каһин Ахимелекин башына ҝәләнләри ешитмишди. Давуд Шаулдан гачанда Ахимелек она көмәк етмишди. Гәзәбли Шаул Ахимелекин вә онун аиләсинин өлдүрүлмәсинә сәбәб олду (1 Шам. 22:11, 18, 19). Давуд она көмәк едән каһини вә аиләсини, санки, өз әли илә өлдүрдүјүнү дүшүнәрәк онларын өлүмүндә өзүнү ҝүнаһкар һесаб едирди. Сән Давудун јериндә олсајдын, өзүнү белә һисс едәрдин? Шаулун Давуду усанмадан тәгиб етмәси јорғун һалда олан Давуду даһа да әлдән салырды.

¹⁷ Бу азмыш кими, Давуду падшаһ кими мәсһ едән Шамуел пејғәмбәрин өлүм хәбәри ҝәлди (1 Шам. 25:1). Ола билсин, бу, Давуду елә сарсытды ки, о, өзүнү даһа да чарәсиз һисс етди. Буна бахмајараг, Давуд көмәк үчүн кимә үз тутмалы олдуғуну билирди. Әлбәттә ки, бу, Јеһова иди. Давуд левилиләр кими хүсуси хидмәти иҹра етмәсә дә, о, мәсһ олунмуш падшаһ кими Аллаһын халгыны идарә едәҹәкди (1 Шам. 16:1, 13). О, үрәјини Јеһоваја ачды вә сәбирлә Онун ҝөстәришләрини ҝөзләди. Сән дә хидмәтдә әлиндән ҝәләни едәрәк Јеһоваја ҝүвәнмәклә Ону өзүн үчүн пај вә сығынаҹаг едә биләрсән.

18. Бу мәгаләдә һаггында данышдығымыз инсанлар Јеһованын онларын пајы олдуғуну неҹә ҝөстәрдиләр?

¹⁸ Бу мәгаләдә һаггында данышдығымыз инсанларын Јеһованы өзләринә пај һесаб етмәси һансы мәнаны кәсб едирди? Бу о демәк иди ки, онларын һамысы Аллаһа хидмәтдә мүәјјән тапшырыглар алмышдылар. Онлар зәррә гәдәр дә шүбһә етмирдиләр ки, Рәбб онларын гајғысына галаҹаг. Һәм левилиләр, һәм дә Исраилин башга гәбиләләриндән олан Давуд кими инсанлар Јеһованы өзләри үчүн пај етмишдиләр. Бәс Јеһова бизим пајымыз неҹә ола биләр? Буну биз нөвбәти мәгаләдә арашдыраҹағыг.

[Һашијә]

Неҹә ҹаваб верәрдиниз?

• Һансы мәнада Јеһова левилиләрин пајы иди?

• Асәф, Јеремја вә Давуд Јеһованын онларын пајы олдуғуну неҹә ҝөстәрдиләр?

• Аллаһын сәнин пајын олдуғуну неҹә ҝөстәрә биләрсән?

[8-ҹи сәһифәдәки јазы]

Левилиләрә Вәд едилмиш дијарда торпаг пајы верилмәмишди. Онларын пајы Јеһова иди, чүнки онлар Она хидмәт етмәк шәрәфинә лајиг ҝөрүлмүшдүләр

[7-ҹи сәһифәдәки шәкил]

Јеһова каһинләр вә левилиләр үчүн һансы мәнада пај олду?

[9-ҹу сәһифәдәки шәкил]

Асәфә Јеһованы јенидән өзүнә пај һесаб етмәсинә нә көмәк етди?