Башгаларына мәсулијјәтләрә ҹан атмағы өјрәдин
«Мүкәммәл тәлим алмыш адам өз мүәллими кими олаҹаг» (ЛУКА 6:40).
1. Јер үзүндә хидмәт едәркән Иса мөһтәшәм бир јығынҹағын тәмәлини неҹә гојмушду?
ҺӘВАРИ ЈӘҺЈА јаздығы мүждәни белә јекунлашдырды: «Сөзсүз, Иса чох иш ҝөрүб, лакин онларын һамысы бир-бир јазылсајды, елә дүшүнүрәм ки, јазылан тумарлар дүнјаја белә сығмазды» (Јәһ. 21:25). Јер үзүндә јашадығы гыса мүддәт әрзиндә Иса сәјлә хидмәт едәрәк онун ҝедишиндән сонра тәблиғ ишинә рәһбәрлик едәҹәк кишиләри тапыб онлара тәлим вермәли иди. Ерамызын 33-ҹү илиндә ҝөјә гајыданда о, тезликлә сајы минләрлә инсанлардан ибарәт олаҹаг мөһтәшәм бир јығынҹағын тәмәлини гојмушду (Һәв. иш. 2:41, 42; 4:4; 6:7).
2, 3. а) Нәјә ҝөрә вәфтиз олмуш гардашларын јығынҹагда мәсулијјәтләрә ҹан атмаларына олдугҹа бөјүк еһтијаҹ вар? б) Бу мәгаләдә биз нәји арашдыраҹағыг?
2 Бу ҝүн бүтүн дүнјада фәалијјәт ҝөстәрән 100 000-дән чох јығынҹагда сајы једди милјону өтмүш фәал тәблиғчи хидмәт едир. Буну нәзәрә алараг, руһани мәсәләләрдә рәһбәрлији үзәринә ҝөтүрә биләҹәк гардашлара, мәсәлән, мәсиһчи ағсаггаллара бөјүк тәләбат вар. Бу мәсулијјәтә ҹан атанлар тәрифә лајигдирләр, чүнки онлар «јахшы» шеј арзу едирләр (1 Тим. 3:1).
3 Бунунла белә, кишиләрә јығынҹагда автоматик олараг мәсулијјәтләр верилмир. Онлары бу иш үчүн јарарлы едән алдыглары тәһсил, һәјат тәҹрүбәләри, баҹарыг вә наилијјәтләри дејил. Бу мәсулијјәтләри дүзҝүн иҹра етмәк үчүн онлар Мүгәддәс Китабдакы тәләбләрә ҹаваб вермәли вә руһани хүсусијјәтләрә малик олмалыдырлар. Белә исә, јығынҹагдакы кишиләрә һәмин тәләбләрә ҹаваб вермәјә неҹә көмәк етмәк олар? «Мүкәммәл тәлим алмыш адам өз мүәллими кими олаҹаг», — дејә Иса гејд етмишди (Лука 6:40). Бу мәгаләдә биз мәһарәтли Мүәллим олан Исанын шаҝирдләринә неҹә тәлим вердијини вә онун нүмунәсиндән нә өјрәнә биләҹәјимизи арашдыраҹағыг.
«Мән сизә дост дејирәм»
4. Исанын шаҝирдләринә јахшы дост олдуғу нәдән бәллидир?
4 Иса шаҝирдләринә јухарыдан ашағы бахмырды — о, онларла достлары кими давранырды. Иса шаҝирдләри илә вахт кечирирди. О, онлара етибар едир, мүәјјән мәлуматлары ачыглајыр вә Атасындан ешитдији «һәр шеји» онлара билдирирди. (Јәһја 15:15 ајәсини оху.) Һәвариләрин: «Сәнин иштиракынын вә дөврүн јекунунун әламәти нә олаҹаг?» — суалына Иса ҹаваб верәндә онларын кечирдији һиссләри тәсәввүр един (Мат. 24:3, 4). О, давамчылары илә шәхси фикирләрини вә һиссләрини бөлүшүрдү. Мәсәлән, әлә верилдији ҝеҹә Иса Петери, Јагубу вә Јәһјаны өзү илә Ҝетсемани бағына апармышды. Бурада Иса өз нараһатчылыглары илә бағлы гызғын дуа едирди. Ола билсин, онлар Исанын дуада нә сөјләдијини ешитмирдиләр, бунунла белә, вәзијјәтин нә гәдәр ҹидди олдуғуну баша дүшүрдүләр (Марк 14:33—38). Бу һадисәдән бир гәдәр әввәл Исанын бу үч һәваринин ҝөзү өнүндә ҝөркәмини дәјишмәсинин онлара неҹә тәсир етдијини дә тәсәввүр етмәјә чалышын (Марк 9:2—8; 2 Пет. 1:16—18). Иса илә шаҝирдләри арасында достлуг мүнасибәти онун ҝедишиндән сонра ваҹиб тапшырығы јеринә јетирән шаҝирдләр үчүн, санки, бир лөвбәр иди.
5. Ағсаггаллар башгаларына неҹә көмәк едирләр?
5 Мәсиһчи ағсаггаллар Исадан нүмунә ҝөтүрәрәк башгаларына көмәк едир вә онларла достлашмаға чалышырлар. Ағсаггаллар һәмиманлыларына вахт ајырараг, онлара сәмими мараг ҝөстәрәрәк онларла јахын, меһрибан мүнасибәт гурурлар. Ағсаггаллар мүәјјән мәлуматлары башгаларына дејә билмәсәләр дә, һәр шеји сиррә чевирмирләр. Ағсаггаллар баҹы-гардашлара етибар едир вә Мүгәддәс Јазылардан өјрәндикләри һәгигәтләри онлардан ҝизләтмирләр. Онлар чох вахт өзләриндән ҹаван олан хидмәти көмәкчиләрлә ашағы сәвијјәли бир инсан кими давранмырлар, әксинә, онлара јығынҹагда дәјәрли иши јеринә јетирән вә бөјүк потенсиала малик олан руһани гардашлар кими бахырлар.
«Мән сизин үчүн нүмунә гојдум»
6, 7. Иса шаҝирдләри үчүн һансы нүмунәни гојмушду вә бу, онлара неҹә тәсир ҝөстәрмишди?
6 Исанын шаҝирдләри руһани дәјәрләри гијмәтләндирсәләр дә, бәзән онларын дүшүнҹә тәрзинә алдыглары тәрбијә вә јашадыглары мәдәнијјәт тәсир едирди (Мат. 19:9, 10; Лука 9:46—48; Јәһ. 4:27). Лакин Иса һеч вахт шаҝирдләрини тәнгид етмирди вә онлара аҹыгланмырды. О, онлардан ҝүҹләри чатмадығы иши ҝөрмәји тәләб етмирди вә өзүнүн ҝөрмәк истәмәдији иши онларын бојнуна гојмурду. Иса шаҝирдләрини өз нүмунәси илә өјрәдирди. (Јәһја 13:15 ајәсини оху.)
7 Иса шаҝирдләринә һансы нүмунәни гојмушду? (1 Пет. 2:21). Башгаларына сәрбәст шәкилдә хидмәт етмәк үчүн о, садә һәјат тәрзи сүрүрдү (Лука 9:58). Иса тәвазөкар адам иди вә һәмишә тәлимләрини Мүгәддәс Јазылара әсасландырырды (Јәһ. 5:19; 17:14, 17). О, әлчатан вә хејирхаһ иди. Онун етдији һәр шејин архасында мәһәббәт дурурду (Мат. 19:13—15; Јәһ. 15:12). Исанын нүмунәси һәвариләрә мүсбәт тәсир бағышламышды. Мәсәлән, Јагуб өлүмлә үз-үзә ҝәләндә өзүнү горхаг кими апармады — сон нәфәсинәдәк Аллаһа сәдагәтлә хидмәт етди (Һәв. иш. 12:1, 2). Јәһја исә 60 илдән чох Исанын изләри илә ҝетди (Вәһј 1:1, 2, 9).
8. Ағсаггаллар ҝәнҹ гардашлар вә башгалары үчүн неҹә нүмунә гојурлар?
8 Фәдакар, тәвазөкар вә гајғыкеш олан ағсаггаллар ҝәнҹ гардашлар үчүн чох ҝөзәл нүмунәдирләр. Онларын мәһз бу ҹүр нүмунәјә еһтијаҹы вар (1 Пет. 5:2, 3). Үстәлик, иманда, тәлим вермәкдә, мәсиһчи һәјат тәрзиндә вә хидмәтдә нүмунәви олан ағсаггаллара башгаларынын онлардан нүмунә ҝөтүрдүкләрини билмәк севинҹ ҝәтирир (Ибр. 13:7).
Иса шаҝирдләринә ҝөстәриш вериб онлары тәблиғ етмәјә ҝөндәрир
9. Биз Исанын шаҝирдләринә тәблиғ етмәји өјрәтдијини һарадан билирик?
9 Ики илә јахын сәјлә хидмәт етдикдән сонра Иса 12 һәварисини тәблиғ етмәјә ҝөндәрмәклә фәалијјәтини ҝенишләндирди. Анҹаг әввәлҹә онлара мүәјјән ҝөстәришләр верди (Мат. 10:5—14). Минләрлә инсаны мөҹүзәви шәкилдә гида илә тәмин етмәздән өнҹә, Иса шаҝирдләриндән инсанлары әјләшдирмәји хаһиш етди вә буну неҹә етмәји онлара деди (Лука 9:12—17). Бу нүмунәләрдән ҝөрүрүк ки, Иса шаҝирдләрини ајдын вә конкрет ҝөстәришләр вермәклә өјрәдирди. Мүгәддәс руһун ҝөстәрдији бөјүк көмәклә јанашы, бу тәлим үсулу чох ҝөзәл бәһрәләр верди. Бир мүддәтдән сонра, ерамызын 33-ҹү илиндә һәвариләр та бу ҝүнәдәк давам едән бөјүк тәблиғ кампанијасына башладылар.
10, 11. Јениләри неҹә өјрәтмәк олар?
10 Бәс биз кишиләри нә вахтдан ҝәләҹәк мәсулијјәтләрә һазырламалыјыг? Онлар Мүгәддәс Китабы өјрәнмәјә башладыглары ҝүндән. Ола билсин, Мүгәддәс Китабы өјрәтдијимиз инсан охумаг габилијјәтини јахшылашдырмаг үчүн көмәјә еһтијаҹ дујур. Бунунла бизим көмәјимиз битмир. О, мүнтәзәм олараг јығынҹаг ҝөрүшләриндә иштирак етмәјә башлајанда, Теократик Хидмәт Мәктәбиндә чыхыш едәндә, вәфтиз олунмамыш тәблиғчи оланда вә нөвбәти руһани аддымлар атанда даһа да инкишаф едәҹәк. Вәфтиз олунандан сонра исә гардашлар она тәлим вермәји давам едәҹәкләр. Мәсәлән, гардашлар она Падшаһлыг Залынын гејдинә галмағы өјрәдәҹәкләр. Бир мүддәтдән сонра исә гардашлар она хидмәти көмәкчи олмаг үчүн һансы тәләбләрә ҹаваб вермәк лазым олдуғуну изаһ едә биләрләр.
11 Ағсаггал вәфтиз олунмуш гардаша јығынҹагда бир иш тапшыранда бунунла бағлы тәшкилатын һал-һазыркы гајда-ганунларыны бөјүк мәмнунијјәтлә изаһ едир вә она ајдын ҝөстәришләр верир. Гардаш ондан нә тәләб олундуғуну дәгиг билмәлидир. Әҝәр гардаш үчүн тапшырығы јеринә јетирмәк чәтиндирсә, мәһәббәтли ағсаггал онун үстүндән дәрһал хәтт чәкмәјәҹәк. Әксинә, мүлајимҹәсинә мәгсәди вә нәјин үзәриндә ишләмәли олдуғуну ҝөстәрәҹәк, еләҹә дә буну етмәјин үсулларыны изаһ едәҹәк. Ағсаггаллар бөјүк мәмнунијјәтлә гардашлара өз мәсулијјәтләрини иҹра етмәјә көмәк едирләр, чүнки онлар билирләр ки, јығынҹаг үзвләринә хидмәт етмәк бу гардашлара севинҹ ҝәтирәҹәк (Һәв. иш. 20:35).
«Һикмәтли адам нәсиһәти динләр»
12. Исанын мәсләһәтләрини тәсирли едән нә иди?
12 Иса шаҝирдләрини тәләбатларына ујғун олан мәсләһәтләр вермәклә дә онлары өјрәдирди. Мәсәлән, Јагубла Јәһја онлары гәбул етмәјән самаријалылары ҝөјдән алов ендириб мәһв етмәк истәјәндә Иса онлары мәзәммәт етди (Лука 9:52—55). Јагубла Јәһјанын анасы Исаја јахынлашыб ондан оғуллары үчүн Падшаһлыгда мөтәбәр јерләр вермәји хаһиш едәндә Иса бирбаша гардашлара деди: «Атам бу јерләри кимин үчүн һазырлајыбса, онлар да орада отураҹаглар» (Мат. 20:20—23). Иса һәр заман ајдын, практики вә тамамилә Аллаһын принсипләринә әсасланан мәсләһәтләр верирди. О, шаҝирдләрини бу принсипләрин үзәриндә дүшүнмәји өјрәдирди (Мат. 17:24—27). Иса билирди ки, онун давамчылары гејри-камилдирләр, буна ҝөрә дә онлардан һәр шеји мүкәммәл шәкилдә етмәләрини ҝөзләмирди. О, мәсләһәтләри мәһәббәтдән ирәли ҝәләрәк верирди (Јәһ. 13:1).
13, 14. а) Кимләрин мәсләһәтә еһтијаҹы вар? б) Руһани инкишафдан ҝери галан инсанлара ағсаггаллар һансы нүмунәләр әсасында мәсләһәт верә биләрләр?
13 Мәсиһчи јығынҹағында мәсулијјәтләрә ҹан атан һәр бир кишинин нә вахтса мәсләһәтә еһтијаҹы олаҹаг. Сүлејманын мәсәлләри 12:15 ајәсиндә јазылыб: «Һикмәтли адам нәсиһәти динләр». Бир ҝәнҹ гардаш дејир ки, әввәлләр о, Јеһоваја хидмәт етмәјә лајиг олмадығыны дүшүнүрдү. Лакин бир ағсаггал она баша салды ки, Јеһова Өз хидмәтчиләриндән камиллик ҝөзләмир.
14 Ағсаггаллар һансыса давраныш тәрзинин кишинин руһани инкишафыны ләнҝитдијини ҝөрәндә тәшәббүс ҝөстәрәрәк она мүлајимҹәсинә дүзәлиш вермәјә чалышаҹаглар (Галат. 6:1). Бәзән ағсаггаллар адамын хасијјәтиндә чатышмајан ҹәһәтләри илә әлагәдар мәсләһәт вермәли олурлар. Туталым, ағсаггал ҝөрүр ки, гардаш хидмәтдә имканларындан там шәкилдә истифадә етмир. О, һәмин гардаша давамчыларына шаҝирд һазырламаг тапшырығыны верән Исанын хош хәбәри ҹанла-башла тәблиғ едәрәк гојдуғу нүмунә үзәриндә дүшүнмәјә тәшвиг едә биләр (Мат. 28:19, 20; Лука 8:1). Јахуд да, ола билсин, гардаш шөһрәтпәрәстдир; онда ағсаггал она Исанын шаҝирдләринә ад-сан далынҹа дүшмәјә гаршы сөјләдији хәбәрдарлығы баша дүшмәјә көмәк едә биләр (Лука 22:24—27). Бәс әҝәр гардаш башгаларыны бағышламагда чәтинлик чәкирсә, онда неҹә? Ағсаггал бөјүк мәбләғдә борҹу бағышланан, лакин она кичик мәбләғдә пул борҹлу олан гулу бағышламаг истәмәјән гул мәсәлини чәкә биләр (Мат. 18:21—35). Ағсаггаллар гардашларын мәсләһәтә еһтијаҹы олдуғуну ҝөрәндә мүмкүн гәдәр тез һәрәкәтә кечмәлидирләр. (Сүлејманын мәсәлләри 27:9 ајәсини оху.)
Өзүнүзү өјрәдин
15. Гардашын аилә үзвләри она башгаларына хидмәт етмәкдә неҹә көмәк едә биләрләр?
15 Кишиләрә мәсулијјәтләрә ҹан атмагда, әсас етибарилә, ағсаггаллар көмәк етсәләр дә, башгалары да өз төһфәләрини верә биләрләр. Белә көмәји онун аилә үзвләри ҝөстәрә биләр вә бу, онлардан ҝөзләнилир дә. Әҝәр о артыг ағсаггалдырса, севән һәјат јолдашынын вә итаәткар өвладларынын она дәстәк олмалары гардаша бөјүк фајда ҝәтирәҹәк. Гардашын вахтынын мүәјјән һиссәсини јығынҹаг ишләринә ајырмалы олдуғуна аилә үзвләринин анлајышла јанашмалары мәсулијјәтләринин өһдәсиндән ҝәлмәси үчүн чох ваҹибдир. Онларын фәдакарлығы гардаша севинҹ ҝәтирир вә башгалары тәрәфиндән јүксәк гијмәтләндирилир (Сүл. мәс. 15:20; 31:10, 23).
16. а) Башгалары кишиләрә мәсулијјәтләрә ҹан атмагда көмәк етсәләр дә, әсас мәсулијјәт кимин үзәриндәдир? б) Ағсаггал вә ја хидмәти көмәкчи олмаг истәјән гардаш нә етмәлидир?
16 Башгалары кишиләрә мәсулијјәтләрә ҹан атмагда көмәклик ҝөстәрсәләр дә, әсас мәсулијјәт онларын үзәриндәдир. (Галатијалылара 6:5 ајәсини оху.) Дүздүр, башгаларына көмәк етмәк, јахуд да хидмәтдә фәал иштирак етмәк үчүн хидмәти көмәкчи вә ја ағсаггал олмаг лазым дејил. Анҹаг јығынҹагда мәсулијјәтләрә ҹан атмаг Мүгәддәс Китабын тәләбләринә ҹаваб вермәк демәкдир (1 Тим. 3:1—13; Тит. 1:5—9; 1 Пет. 5:1—3). Әҝәр гардаш хидмәти көмәкчи ја да ағсаггал олмаг арзусундадырса, лакин һәлә дә һансыса тәләбләрә ҹаваб вермирсә, руһән инкишаф етмәк үчүн диггәтини һәмин саһәјә јөнәлтмәлидир. Бунун үчүн о, Мүгәддәс Китабы һәр ҝүн охумалы, чалышганлыгла арашдырмалар апармалы, дәриндән дүшүнмәли, сәмими-гәлбдән дуа етмәли вә тәблиғ хидмәтинә ҹан јандырмалыдыр. Бунунла о, Павелин Тимотејә вердији мәсләһәтә әмәл етмиш олар: «Аллаһ јолунда мәшг ет» (1 Тим. 4:7, «Инҹил», 1996).
17, 18. Гардаш өзүнү јығынҹагдакы мәсулијјәтләр үчүн јарарсыз һесаб едәндә, јахуд да онун үрәјиндә белә арзу олмајанда о, нә едә биләр?
17 Бәс әҝәр гардаш јығынҹагдакы мәсулијјәтләр үчүн өзүнү јарарсыз һисс етдијиндән ағсаггал вә ја хидмәти көмәкчи олмаг истәмирсә, нә етмәк олар? Јахшы оларды ки, белә гардаш Јеһова Аллаһын вә Иса Мәсиһин бизим үчүн етдикләрини нәзәрдән кечирсин. Һәгигәтән дә, Јеһова «һәр ҝүн гајғы јүкүмүзү [чәкир]» (Мәз. 68:19). Буна ҝөрә дә гардаш нараһат олмамалыдыр — сәмави Атамыз јығынҹагдакы мәсулијјәтләрини дашымагда она көмәк едәҹәк. Һәмчинин јахшы оларды ки, хидмәти көмәкчи, јахуд да ағсаггал олмајан гардаш Јеһованын тәшкилатында бу мәсулијјәтләри иҹра едәҹәк јеткин гардашлара бөјүк еһтијаҹ олдуғу үзәриндә дә дүшүнсүн. Бу, ону мәнфи һиссләринин өһдәсиндән ҝәлмәк үчүн сәј ҝөстәрмәјә тәшвиг едәҹәк. Гардаш дуада мүгәддәс руһ истәјә биләр. Үстәлик, о јадда сахламалыдыр ки, бу руһун бәһрәсинин тәркиб һиссәси олан сүлһ вә тәмкинлик она нараһатчылыгдан вә јарарсызлыг һиссиндән азад олмаға көмәк етмәјә гадирдир (Лука 11:13; Галат. 5:22, 23). О, там әмин ола биләр ки, дүзҝүн нијјәтдән ирәли ҝәләрәк јығынҹагда мәсулијјәтләрә ҹан атанларын һамысыны Јеһова бол-бол хејир-дуаландырыр.
18 Ҝәлин башга вәзијјәти тәсәввүр едәк. Ола билсин, вәфтиз олунмуш гардашын јығынҹагда мәсулијјәтләрә ҹан атмаг арзусу јохдур. Бәс белә һалда нә етмәк олар? Һәвари Павел јазыр: «Аллаһ Өзү сизин арзу вә һәрәкәтләринизи истәдији сәмтә јөнәлдәрәк сиздә фәалијјәт ҝөстәрир» (Филип. 2:13). Инсана хидмәт етмәк арзусуну верән Јеһовадыр вә Онун руһу инсаны мүгәддәс хидмәти иҹра етмәси үчүн мөһкәмләндирә биләр (Филип. 4:13). Бундан әлавә, мәсиһчи Ондан хаһиш едә биләр ки, үрәјиндә дүзҝүн оланы етмәк арзусу јаратсын (Мәз. 25:4, 5).
19. Микеја 5:5 ајәсиндә јазылан сөзләр бизи нәјә әмин едир?
19 Јеһова башгаларына тәлим верән ағсаггалларын сәјләринә хејир-дуа верир. Онун хејир-дуаларыны јығынҹагда мәсулијјәтләрә ҹан атмаг чағырышына һај верәнләр дә дадырлар. Мүгәддәс Јазыларда охујуруг: «Халгымыздан олан чохлу рәһбәрләримиз чыхар». Бу сөзләр бизи әмин едир ки, јығынҹағын гејдинә галмаг үчүн Аллаһын тәшкилатында һәмишә кифајәт гәдәр гардашлар олаҹаг (Мик. 5:5). Бир чох гардашларын јығынҹагда лазыми тәлим алдығыны вә Јеһоваја шәрәф ҝәтирмәк үчүн тәвазөкарҹасына мәсулијјәтләрә ҹан атдығыны ҝөрәндә үрәкләримиз фәрәһлә долур! Бу неҹә дә бөјүк хејир-дуадыр!
Неҹә ҹаваб верәрдиниз?
• Иса шаҝирдләринә мәсулијјәтләрә јарарлы олмалары үчүн неҹә көмәк едирди?
• Ағсаггаллар јығынҹагда гардашлара көмәк едәркән Исаны неҹә тәглид едә биләрләр?
• Мәсулијјәтләрә ҹан атан гардашын аилә үзвләри она неҹә дәстәк ола биләрләр?
• Јығынҹагда мәсулијјәтләр алмаг үчүн гардаш өзү нә етмәлидир?
[31–ҹи сәһифәдәки шәкил]
Мүгәддәс Китабы өјрәтдијин инсанын инкишаф етмәси үчүн она неҹә көмәк едә биләрсән?
[32–ҹи сәһифәдәки шәкил]
Гардаш јығынҹагда мәсулијјәтләрә ҹан атдығыны неҹә ҝөстәрә биләр?