Гојма хәстәлик севинҹини әлиндән алсын
ТӘСӘВВҮР ЕТ КИ, сәһәр јухудан галхырсан вә ҝүн башламамыш онун битмәсини арзулајырсан. Һәр нөвбәти ҝүн сәнин үчүн физики вә емосионал ағрыларла мүбаризәдән башга бир шеј дејил. Ола билсин, һәтта өзүнү: «Ҹаным боғулуб-өлмәји јашамагдан үстүн тутур», — дејән Әјјуб кими һисс едирсән (Әјј. 7:15). Бәс әҝәр бу вәзијјәт сәндә узун мүддәт, һәтта илләрлә давам едирсә, онда неҹә?
Падшаһ Давудун досту Јонатанын оғлу Мефибошет дә ејни вәзијјәтдә иди. Беш јашы оланда о, дајәсинин әлиндән дүшүб шикәст галмышды (2 Шам. 4:4). Ону падшаһа хәјанәт етмәкдә ҝүнаһландыранда вә вар-дөвләтиндән мәһрум оланда, јәгин ки, бу, онун шикәст олмағынын ҝәтирдији емосионал ағрыларыны даһа да артырды. Бүтүн бунлара бахмајараг, Мефибошетин севинҹини горујараг хәстәликлә, бөһтанла вә руһ дүшкүнлүјү илә дурмадан мүбаризә апармасы бизим үчүн ҝөзәл нүмунәдир (2 Шам. 9:6—10; 16:1—4; 19:24—30).
Диҝәр нүмунә исә һәвари Павелдир. Мәктубларынын бириндә о, бәдәнини «тикан кими дешән» шејлә мүбаризә апардығыны јазмышды (2 Кор. 12:7). Бу тикан узун мүддәт давам едән хәстәлик вә ја онун һәвари олмасына шүбһә илә јанашан инсанлар ола биләрди. Һәр неҹә олса да, проблем һәлл олунмурду вә Павелин бунун ҝәтирдији физики вә емосионал ағрылара дөзмәкдән башга чарәси јох иди (2 Кор. 12:9, 10).
Бу ҝүн дә Аллаһын бәзи хидмәтчиләри үзүҹү хроники хәстәликләрдән вә емосионал проблемләрдән әзијјәт чәкирләр. 18 јашы оланда Магдаленаја дәри вәрәми диагнозу гојулмушду. Бу, елә бир хәстәликдир ки, инсанын иммунитети өз органларына һүҹум едир. О дејир: «Мән горхурдум. Вәзијјәтим ҝетдикҹә писләширди, һәзм позунтуларындан, ағзымда әмәлә ҝәлән хоралардан вә галханабәнзәр вәзинин јаратдығы проблемләрдән әзијјәт чәкирдим». Изабела исә илк бахышдан нәзәрә чарпмајан хәстәликлә мүбаризә апарыр. О дејир: «Ушаглыгдан депрессијадан әзијјәт чәкирәм. Бунун нәтиҹәсиндә мәндә гәфил тәшвишә дүшмә һаллары баш верир, тәнәффүс проблемләри вә мәдә ағрылары јараныр. Чох вахт тамамилә һалсыз олурам».
Реаллыгла үз-үзә
Бәзи хәстәликләр инсанын һәјатыны тамамилә дәјишир. Јахшы оларды ки, белә вәзијјәтдә отуруб шәраитини дүрүст шәкилдә нәзәрдән кечирәсән. Хәстәлијин төрәтдији мәһдудијјәтләрлә барышмаг елә дә асан олмаја биләр. Магдалена дејир: «Хәстәлијим ҝүнү-ҝүндән шиддәтләнир. Чох вахт о дәрәҹәдә әзҝин олурам ки, сәһәр јухудан галхмаға белә һалым олмур. Бу хәстәлик уҹбатындан әввәлҹәдән нәјисә планлашдырмаг чох чәтиндир. Лакин мәнә ән чох әзијјәт верән одур ки, Јеһоваја әввәлки гәдәр хидмәт едә билмирәм».
Збигнев дејир: «Ревматоид артрит ојнагларымы бир-бир сырадан чыхарараг мәни тамамилә әлдән салыр. Хәстәлијим кәскинләшәндә мән ән садә ишләри белә ҝөрә билмирәм. Белә һалларда руһдан дүшүрәм».
Бир нечә ил әввәл Барбараја ҝетдикҹә бөјүјән бејин шиши диагнозу гојулмушду. О дејир: «Вәзијјәтим гәфләтән дәјишди. Мәндә һалсызлыг вә тез-тез башағрылары олурду, һәмчинин фикрими бир јерә ҹәмләјә билмирдим. Бу сәбәбдән һәјат тәрзимә јенидән нәзәр салмалы олдум».
Бу инсанларын һамысы Јеһованын һәср олунмуш хидмәтчиләридир. Јеһованын ирадәсини јеринә јетирмәк онлар үчүн һәр шејдән ваҹибдир. Онлар тамамилә Аллаһа ҝүвәнир вә Онун көмәјиндән јарарланырлар (Сүл. мәс. 3:5, 6).
Јеһова неҹә көмәк едир?
Биз дүшүнмәмәлијик ки, хәстәликләримиз Аллаһын биздән наразы олдуғунун әламәтидир (Мәрс. 3:33). «Әмәлисалеһ» олмасына бахмајараг, бир чох бәлаларла үзләшән Әјјубу јадымыза салаг (Әјј. 1:8). Аллаһ һеч кәси писликлә сынаға чәкмир (Јаг. 1:13). Хроники вә емосионал хәстәликләр дә дахил олмагла, бүтүн хәстәликләр улу валидејнләримиз олан Адәмлә Һәвванын бизә гојдуглары «мираслардан» биридир (Ром. 5:12).
Јеһова илә Иса салеһләри һеч вахт дарда гојмурлар (Мәз. 34:15). Хүсусилә һәјатымызын чәтин анларында биз ҝөрүрүк ки, Аллаһ бизим сығынаҹаг вә галамыздыр (Мәз. 91:2). Белә исә чәтин вәзијјәтин өһдәсиндән севинҹимизи горујараг ҝәлмәк үчүн биз нә етмәлијик?
Дуа. Аллаһын гәдимдә јашамыш садиг хидмәтчиләри кими, сән дә Сәмави Атана дуа едәрәк гајғы јүкүнү Онун үзәринә гоја биләрсән (Мәз. 55:22). Онда сән «инсан фикирләрини» үстәләјән Аллаһын вердији гәлб раһатлығыны дујаҹагсан. Бу гәлб раһатлығы үрәјини вә зеһнини горујаҹаг (Филип. 4:6, 7). Магдалена да дуада өз јүкүнү Јеһованын өһдәсинә бурахмагла үзүҹү хәстәлијинә таб ҝәтирә билир. О дејир: «Үрәјими Јеһоваја бошалданда јүнҝүллүк һисс едирәм вә гәлбим јенидән севинҹлә долур. Инди мән һәр ҝүн Јеһоваја бел бағламағын нә демәк олдуғуну баша дүшүрәм» (2 Кор. 1:3, 4).
Дуаларына ҹаваб олараг Јеһова Өз мүгәддәс руһу, Кәламы вә мәсиһчи гардашлығы васитәсилә сәни мөһкәмләндирә биләр. Әлбәттә ки, биз Аллаһын бизә мөҹүзәви шәкилдә шәфа верәҹәјини ҝөзләмирик. Бунунла белә, әмин ол ки, Јеһова истәнилән вәзијјәтин өһдәсиндән ҝәлә билмәјин үчүн сәнә лазыми мүдриклик вә ҝүҹ верәҹәк (Сүл. мәс. 2:7). О, сәни «инсан ҝүҹүндән үстүн олан» ҝүҹү вермәклә мөһкәмләндирәҹәк (2 Кор. 4:7).
Аилә. Әҝәр евдәкиләр хәстәјә мәһәббәтлә вә шәфгәтлә јанашсалар, бу, она хәстәлијинә таб ҝәтирмәјә көмәк едәҹәк. Лакин унутма ки, әзизләрин дә әзијјәт чәкирләр. Онлар да өзләрини сәнин кими аҹиз һисс едә биләрләр. Буна бахмајараг, онлар һәр заман, һәтта белә бир чәтин анда да сәнин јанындадырлар. Доғмаларынын сәнинлә бирҝә дуа етмәләри гәлб раһатлығыны горумаға көмәк едәҹәк (Сүл. мәс. 14:30).
Барбара гызы вә јығынҹагдакы ҝәнҹ баҹылар барәдә дејир: «Онлар мәнә хидмәт етмәјә көмәк едирләр. Онларын хидмәтдә сәј ҝөстәрмәләри мәни чох руһландырыр». Збигнев һәјат јолдашынын она дајаг олмасыны јүксәк гијмәтләндирир. О дејир: «Ев ишләринин бөјүк гисмини о ҝөрүр. О, мәнә ҝејинмәјә көмәк едир, еләҹә дә јығынҹаг ҝөрүшләринә вә хидмәтә ҝедәндә чантамы дашыјыр».
Һәмиманлыларымыз. Биз баҹы-гардашларымызын әһатәсиндә оланда руһланыр вә тәсәлли тапырыг. Бәс хәстәлијин сәнә јығынҹаг ҝөрүшләриндә иштирак етмәјә имкан вермирсә, онда нә етмәк олар? Магдалена дејир: «Гардашлар ҝөрүшләрин аудиојазыларыны мәнә верирләр. Баҹы-гардашлар тез-тез мәнә зәнҝ едиб даһа неҹә көмәк едә биләҹәкләри илә марагланырлар, руһландырыҹы мәктублар ҝөндәрирләр. Онларын мәни унутмамалары вә сәһһәтимә ҝөрә нараһат олмалары хәстәлијимә таб ҝәтирмәјимә көмәк едир».
Депрессијадан әзијјәт чәкән Изабела дејир: «Јығынҹагда мәнә гулаг асан, мәни баша дүшмәјә чалышан чохлу “ата” вә “аналар”ым вар. Јығынҹаг мәним аиләмдир. Бурада өзүмү раһат вә хошбәхт һисс едирәм».
Мүхтәлиф сынагларла үзләшәнләр өзләринә гапанмаг әвәзинә, јығынҹагла үнсијјәт етмәји јүксәк гијмәтләндирирләр (Сүл. мәс. 18:1). Онда башгалары онлара бахыб руһланыр. Ола билсин, баҹы-гардашлара өз еһтијаҹларыны билдирмәјә чәкинирсән. Лакин һәмиманлыларын сәнин сәмимијјәтини гијмәтләндирирләр. Бу, онлара «ријасыз гардашлыг [мәһәббәти]» ҝөстәрмәјә имкан јарадаҹаг (1 Пет. 1:22). Нәјә ҝөрә баҹы-гардашлара киминсә сәни јығынҹаға вә тәблиғә апармасына, сәнинлә үнсијјәт етмәсинә еһтијаҹ дујдуғуну демәјәсән? Әлбәттә ки, биз онлара гаршы тәләбкар олмамалыјыг, әксинә, онларын ҝөстәрдији һәр көмәји гијмәтләндирмәлијик.
Никбин ол. Хроники хәстәликлә мүбаризә апаран инсанын севинҹини горумасы онун өз әлиндәдир. Пис әһвал-руһијјә вә руһ дүшкүнлүјү бәдбин дүшүнҹә тәрзинин формалашмасына ҝәтириб чыхара биләр. Мүгәддәс Китабда дејилир: «Хәстәнин үрәји бүтүн ағрылары чәкәр. Амма үрәји сыныгдырса, буна неҹә дөзәр?» (Сүл. мәс. 18:14).
Магдалена гејд едир: «Мән әлимдән ҝәләни едирәм ки, фикрим-зикрим проблемләримдә олмасын. Һалым бир аз јахшылашанда һәјатдан зөвг алмаға чалышырам. Хроники хәстәликләрдән әзаб чәкмәләринә бахмајараг, Јеһоваја садиг галан инсанларын һәјат һекајәләрини охумаг мәни руһландырыр». Изабеланы исә Јеһованын ону севмәси вә гијмәтләндирмәси мөһкәмләндирир. О дејир: «Мән лазымлы олдуғуму һисс едирәм вә кимин үчүн јашадығымы билирәм. Үстәлик, мәним ҝәләҹәк үчүн ҝөзәл үмидим вар».
Збигнев дејир: «Хәстәлијим мәнә тәвазөкар, итаәткар вә сағламдүшүнҹәли олмағы, еләҹә дә анлајыш ҝөстәрмәји вә үрәкдән бағышламағы өјрәдир. Үстәлик, өзүмү јазыгламадан Јеһоваја хидмәтдән севинҹ дујмағы да өјрәндим. Бир сөзлә, вәзијјәтим мәни руһән инкишаф етмәјә тәшвиг етди».
Јадда сахла ки, сәнин дөзүмлүлүјүн Јеһованын нәзәриндән гачмыр. О, сәнин дәрдинә шәрикдир вә гајғына галыр. Јеһова ҝөстәрдијин мәһәббәти вә чәкдијин зәһмәти унутмајаҹаг (Ибр. 6:10). Ондан горхан һәр бир инсана Јеһованын вердији бу вәди мөһкәм јадда сахла: «Сәни һеч бир вәҹһлә атмарам вә һеч вахт тәрк етмәрәм» (Ибр. 13:5).
Һәр дәфә руһдан дүшәндә јени дүнјадакы о ҝөзәл һәјаты ҝөзүнүн гаршысында ҹанландыр. Аллаһын Падшаһлығынын ҝәтирәҹәји хејир-дуалары өз ҝөзләринлә ҝөрәҹәјин вахт сүрәтлә јахынлашыр!
[28 вә 29–ҹу сәһифәләрдәки чәрчивә/шәкилләр]
Хроники хәстәликләринә бахмајараг, хидмәтдә фәалдырлар
«Ҝөзләрим ҝөрмәдијиндән артыг тәкбашына һараса чыха билмирәм. Буна ҝөрә дә һәјат јолдашым вә ја баҹы-гардашлар хидмәтдә мәни мүшајиәт едирләр. Мән тәгдимәләри вә ајәләри әзбәрләјирәм» (Јежи).
«Мән телефон, еләҹә дә мәктублар васитәсилә тәблиғ едирәм вә һәгигәтә мараг ҝөстәрән бир нечә инсанла мүнтәзәм олараг јазышырам. Хәстәханада јатаркән һәмишә чарпајымын јанына Мүгәддәс Китабы вә нәшрләримизи гојурам. Бунун сајәсиндә бир чох инсанларла сөһбәт етмәк имканым јараныб» (Магдалена, дәри вәрәми диагнозу гојулуб).
«Мән евдән-евә тәблиғ етмәји хошлајырам, лакин өзүмү пис һисс етдијим ҝүнләрдә телефон васитәсилә шаһидлик едирәм» (Изабела, клиник депрессијадан әзијјәт чәкир).
«Мән тәкрар башчәкмәләр етмәји вә Мүгәддәс Китаб өјрәнмәси кечирән һәмиманлыларымла әмәкдашлыг етмәји хошлајырам. Өзүмү јахшы һисс етдијим ҝүнләрдә евдән-евә тәблиғ етмәк мәним чох хошума ҝәлир» (Барбара, бејниндә шиш вар).
«Хидмәтә чыхаркән чантама чохлу китаб-журнал гојмурам вә ојнагларымдакы ағрылар јол вердији гәдәр тәблиғ едирәм» (Збигнев, ревматоид артрит хәстәлијиндән әзијјәт чәкир).
[30–ҹу сәһифәдәки шәкил]
Һәм ушаглар, һәм дә башгалары хәстәликдән әзијјәт чәкәнләри руһландыра биләрләр