Бүтүн бәшәријјәтә фајда ҝәтирән падшаһ вә каһин тајфасы
«Сиз “сечилмиш сој, падшаһ вә каһин тајфасы, мүгәддәс милләт, Аллаһын мәхсуси халгысыныз”» (1 ПЕТ. 2:9).
1. Нәјә ҝөрә «Ағамызын шам [јемәји]» һәм дә Хатирә ҝеҹәси адланыр вә бу мәрасимин мәгсәди нәдир?
ЕРАМЫЗЫН 33-ҹү илинин 14 нисан ахшамы Иса Мәсиһ вә онун 12 һәвариси јәһуди Пасхасыны сонунҹу дәфә гејд едирдиләр. Иса сатгын Јәһуда Искариоту ҝөндәриб, сонрадан «Ағамызын шам [јемәји]» адланан башга бир мәрасим тәсис етди (1 Кор. 11:20). Иса ики дәфә демишди: «Хатирәми јад етмәк үчүн буну һәмишә един». Бу мәрасим һәм дә Хатирә ҝеҹәси кими таныныр. Һәмин әламәтдар ҝүндә биз Мәсиһин етдикләрини, хүсусилә дә онун бизим уғрумузда һәјатыны гурбан вердијини јад едирик (1 Кор. 11:24, 25). Јеһованын Шаһидләри бүтүн дүнјада илдә бир дәфә Мәсиһин өлүмүнүн Хатирә ҝеҹәсини гејд етмәклә онун ҝөстәришинә ујғун давранырлар. Мүгәддәс Китаб тәгвиминә ҝөрә, 2012-ҹи илдә нисанын 14-ү ҹүмә ахшамы апрелин 5-дә, ҝүнбатандан сонра башлајыр.
2. Иса мәрасим заманы истифадә етдији символлар барәдә нә демишди?
2 Исанын һәмин ахшам етдикләрини вә дедикләрини шаҝирд Лука ики ајә илә изаһ етди: «[Иса] чөрәк ҝөтүрдү, Аллаһа шүкүр едиб чөрәји бөлдү вә шаҝирдләринә вериб деди: “Бу чөрәк сизин уғрунузда фәда едиләҹәк бәдәними тәмсил едир. Хатирәми јад етмәк үчүн буну һәмишә един”. Шам јемәјини јејәндән сонра ејнилә дә ҹамы ҝөтүрүб деди: “Бу ҹам сизин уғрунузда ахыдылаҹаг ганым әсасында бағланан јени әһди тәмсил едир”» (Лука 22:19, 20). Һәвариләр бу сөзләри неҹә баша дүшмүшдүләр?
3. Һәвариләр символларын мәнасыны неҹә баша дүшмүшдүләр?
3 Һәвариләр јәһуди олдуглары үчүн Јерусәлимдәки мәбәддә каһинләрин Аллаһа ҝәтирдикләри һејван гурбанлары илә јахшы таныш идиләр. Јеһованын лүтфүнү газанмаг мәгсәдилә тәгдим олунан белә гурбанларын чоху һәм дә ҝүнаһларын бағышланмасы үчүн ҝәтирилирди (Лев. 1:4; 22:17—29). Буна ҝөрә дә Иса бәдәнини фәда едәҹәјини вә ганынын ахыдылаҹағыны дејәндә һәвариләр онун камил һәјатыны гурбан верәҹәјини баша дүшмүшдүләр. Бу гурбан һејван гурбанларындан даһа үстүн олаҹагды.
4. Иса: «Бу ҹам сизин уғрунузда ахыдылаҹаг ганым әсасында бағланан јени әһди тәмсил едир», — демәклә нәји нәзәрдә тутурду?
4 Бәс Иса: «Бу ҹам сизин уғрунузда ахыдылаҹаг ганым әсасында бағланан јени әһди тәмсил едир», — демәклә нәји нәзәрдә тутурду? Һәвариләр Јеремја 31:31—33 ајәләриндә јазылан јени әһд барәдәки пејғәмбәрликдән аҝаһ идиләр. (Ајәләри оху.) Исанын сөзләри онун јени әһд бағладығыны ҝөстәрирди вә бу әһд Јеһованын Муса васитәсилә бағладығы Ганун әһдини әвәз едәҹәкди. Бу ики әһд арасында һәр һансы бир бағлылыг вар идими?
5. Ганун әһди Исраил халгы үчүн һансы имканлары ачмышды?
5 Бәли, һәр ики әһдин мәгсәди арасында сых бағлылыг вар иди. Јеһова Исраил халгы илә Ганун әһди бағлајанда нөвбәти сөзләри демишди: «Әҝәр сөзүмә диггәтлә гулаг асыб әһдимә риајәт етсәниз, сиз бүтүн халглар арасындан Мәнә мәхсус халг олаҹагсыныз. Бүтүн јер үзү Мәнимдир; сиз исә Мәнә хидмәт едән каһинләр падшаһлығы, мүгәддәс милләт олаҹагсыныз» (Чых. 19:5, 6). Бу сөзләр исраиллиләр үчүн һансы мәнаны кәсб едирди?
ПАДШАҺ ВӘ КАҺИН ТАЈФАСЫ ВӘД ЕДИЛИР
6. Ганун әһди һансы вәдин јеринә јетирилмәсинә хидмәт едирди?
6 Исраиллиләр «әһд» сөзүнүн мәнасыны баша дүшүрдүләр, чүнки Јеһова онларын улу бабалары Нуһ вә Ибраһимлә дә буна бәнзәр мүгәддәс сазишләр бағламышды (Јар. 6:18; 9:8—17; 15:18; 17:1—9). Јеһованын Ибраһимлә кәсдији әһдә: «Дүнјанын бүтүн милләтләри сәнин нәслинин васитәсилә хејир-дуа алаҹаг», — вәди дә дахил иди (Јар. 22:18). Ганун әһди бу вәдин јеринә јетирилмәсинә хидмәт едирди. Бу әһдә әсасән, Исраил халгы «бүтүн халглар арасындан... [Јеһоваја] мәхсус халг» ола биләрди. Нә үчүн? Јеһоваја «хидмәт едән каһинләр падшаһлығы» олмаг үчүн.
7. «Каһинләр падшаһлығы» ифадәсинин мәнасы нәдир?
7 Исраиллиләр падшаһ вә каһинләрин вәзифәләринин нәдән ибарәт олдуғуну билирдиләр. Лакин кечмишдә јашајан јалныз бир адам — Мелкиседек Јеһованын изнилә ејни вахтда һәр ики вәзифәни иҹра едирди (Јар. 14:18). Инди исә Јеһова Ганун әһди васитәсилә Исраил халгына онларын арасындан сечилән «каһинләр падшаһлығы»на саһиб олмаг имканы верди. Мүгәддәс Китабын диҝәр ајәсиндә онлар «падшаһ вә каһин тајфасы», башга сөзлә, каһин вәзифәсини иҹра едәҹәк падшаһлар адланыр (1 Пет. 2:9).
8. Аллаһын тәјин етдији каһинләрин вәзифәси нәдән ибарәт иди?
8 Падшаһ һөкмранлыг едән кәсә дејилир. Бәс каһинин иши нәдән ибарәт иди? Ибраниләрә 5:1 ајәсиндә изаһ едилир: «Инсанлар арасындан сечилән һәр бир баш каһин бәхшиш вә ҝүнаһлара ҝөрә гурбан тәгдим етмәк үчүн инсанларын рифаһындан өтрү Аллаһын гаршысында хидмәтә тәјин едилир». Јеһова тәрәфиндән тәјин едилән каһин Онун гаршысында ҝүнаһлы халгы тәмсил едирди. Каһин Ганунда нәзәрдә тутулан гурбанлары Јеһоваја тәгдим етмәклә Ондан халгын ҝүнаһларыны бағышламағы хаһиш едирди. Каһин һәмчинин халга Јеһованын ганунларыны өјрәтмәклә Ону тәмсил едирди (Лев. 10:8—11; Мал. 2:7). Беләликлә, Аллаһын тәјин етдији каһинләр халга Аллаһла барышмаға көмәк едирдиләр.
9. а) Јалныз һансы шәртлә Исраил халгы «каһинләр падшаһлығы» ола биләрди? б) Нәјә ҝөрә Јеһова Исраил халгы арасында каһин тајфасы тәјин етмишди? в) Нәјә ҝөрә Ганун әһди алтында олан исраиллиләр «каһинләр падшаһлығы» ола билмәдиләр?
9 Беләликлә, Ганун әһди исраиллиләрә «бүтүн халглар»а фајда ҝәтирәҹәк падшаһ вә каһин тајфасы олмаг кими мөһтәшәм имкан вермишди, лакин бир шәртлә: онлар Аллаһын сөзүнә «диггәтлә гулаг асыб» әһдинә риајәт етмәли идиләр. Исраиллиләр Јеһованын сөзүнә «диггәтлә» гулаг аса биләҹәкдиләрми? Мүәјјән дәрәҹәдә. Бәс онлар буну мүкәммәл шәкилдә едә биләрдиләрми? Хејр (Ром. 3:19, 20). Мәһз бу сәбәбдән Јеһова о вахт Исраил халгы арасында падшаһлыг етмәк иши илә бағлылығы олмајан каһин тајфасы тәјин етмишди ки, исраиллиләрин гачылмаз олараг едәҹәкләри ҝүнаһлара ҝөрә һејван гурбанлары ҝәтирсинләр (Лев. 4:1—6:7). Бу ҝүнаһлара һәмчинин каһинләрин етдикләри ҝүнаһлар да дахил иди (Ибр. 5:1—3; 8:3). Јеһова белә гурбанлары гәбул етсә дә, бу гурбанлар онлары ҝәтирән инсанларын ҝүнаһларыны тамамилә арадан галдырмырды. Ганун әһди әсасында тәшкил олунан каһинләр тајфасы һәтта сәмими исраиллиләри белә тамамилә Аллаһла барышдырмаға гадир дејилди. Һәвари Павел буну белә изаһ етмишди: «Өкүзләрин вә кечиләрин ганы ҝүнаһлары һеч ҹүр јуја билмәз» (Ибр. 10:1—4). Гануну поздугларына ҝөрә исраиллиләр ләнәтли һесаб олунурдулар (Галат. 3:10). Белә вәзијјәтдә чәтин ки, онлар дүнјаја падшаһ вә каһин тајфасы кими хидмәт едә биләрдиләр.
10. Ганун әһди һансы мәгсәдә хидмәт едирди?
10 Бәс бу, о демәк идими ки, исраиллиләр һеч вахт «каһинләр падшаһлығы»нын бир һиссәси ола билмәјәҹәкдиләр вә Јеһованын вәди боша чыхаҹагды? Әсла! Әҝәр онлар сәмими-гәлбдән Јеһоваја итаәт етмәјә чалышсајдылар, онларда бу имкан олаҹагды, лакин Ганун алтында олдуглары мүддәтдә јох. Нәјә ҝөрә? (Галатијалылара 3:19—25 ајәләрини оху.) Буну баша дүшмәк үчүн биз Ганун әһдинин мәгсәдини билмәлијик. Ганун итаәткар исраиллиләри һасар кими јалан ибадәтдән горујурду, онларын ҝүнаһкар олдугларыны вә баш каһинләрин ҝәтирдикләри гурбанлардан даһа үстүн гурбана еһтијаҹ дујдугларыны ҝөстәрирди. Ганун һәмчинин онлары «Мәсһ олунмуш» мәнасыны дашыјан Мәсиһә апаран тәрбијәчи ролуну ојнајырды. Лакин Мәсиһ ҝәләндә о, Јеремјанын пејғәмбәрлик етдији јени әһди тәсис едәҹәкди. Мәсиһи гәбул едәнләр јени әһдин шәрикләри олмаг дәвәтини алыб «каһинләр падшаһлығы» олаҹагдылар. Ҝәлин ҝөрәк неҹә.
ЈЕНИ ӘҺДИН ШӘРИКЛӘРИ ПАДШАҺ ВӘ КАҺИН ТАЈФАСЫНЫН ҮЗВЛӘРИ ОЛУРЛАР
11. Иса падшаһ вә каһин тајфасынын бүнөврәси неҹә олду?
11 Назаретли Иса ерамызын 29-ҹу илиндә Мәсиһ олду. Тәхминән 30 јашы оланда о, Јеһованын сырф онун үчүн нәзәрдә тутдуғу хүсуси нијјәтини һәјата кечирмәк үчүн өзүнү тәгдим едиб буну суда вәфтиз олунмагла символизә етди. Јеһова Исанын Онун «севимли» Оғлу олдуғуну етираф едәрәк ону јағла јох, мүгәддәс руһла мәсһ етди (Мат. 3:13—17; Һәв. иш. 10:38). Бундан сонра о, бүтүн дүнјада она иман едән һәр бир инсан үзәриндә Баш Каһин вә ҝәләҹәк Падшаһ тәјин олунду (Ибр. 1:8, 9; 5:5, 6). Иса әсил падшаһ вә каһин тајфасынын бүнөврәси олаҹагды.
12. Исанын гурбанлығы сајәсиндә нә мүмкүн олду?
12 Баш Каһин кими, Иса неҹә гурбан тәгдим едә биләрди ки, она иман едән һәр бир инсан мирас алдығы ҝүнаһдан тамамилә азад олсун? Өлүмүнүн Хатирә ҝеҹәсини тәсис едән заман өзүнүн дедији кими, һәмин гурбан онун камил инсан һәјаты иди. (Ибраниләрә 9:11, 12 ајәләрини оху.) Иса 29-ҹу илдә вәфтиз олундуғу ҝүндән бәри сон нәфәсинәдәк Баш Каһин кими сынаныр вә тәлим кечирди (Ибр. 4:15; 5:7—10). Дирилдикдән сонра о, ҝөјә галхды вә фидјә гурбанлығынын дәјәрини Јеһоваја тәгдим етди (Ибр. 9:24). Бундан сонра Иса, бир һавадар кими, онун бу гурбанлығына иман едәнләр үчүн Аллаһа јалвара вә ҝәләҹәкдә әбәди һәјаты ала билмәләри үчүн Она хидмәт етмәјә көмәк едә биләрди (Ибр. 7:25). Үстәлик, онун гурбанлығы јени әһди һүгуги ҹәһәтдән тәсдиг етди (Ибр. 8:6; 9:15).
13. Јени әһдин шәрикләри олмаг дәвәтини аланлара бу, һансы фајданы ҝәтирди?
13 Јени әһдин шәрикләри олмаг дәвәтини аланлар да мүгәддәс руһла мәсһ олунмалы идиләр (2 Кор. 1:21). Бу һәм иман едән јәһудиләрә, һәм дә башга милләтләрдән оланлара аид иди (Ефес. 3:5, 6). Јени әһдин шәрикләринә бу, һансы фајданы ҝәтирди? Онларын ҝүнаһлары тамамилә бағышланды. Јеһова вәд етмишди: «Тәгсирләрини бағышлајаҹағам, ҝүнаһларыны даһа јада салмајаҹағам» (Јер. 31:34). Ҝүнаһлары гануни шәкилдә ләғв олундуғу үчүн онлар артыг «каһинләр падшаһлығы» ола биләрдиләр. Петер мәсһ олунмуш мәсиһчиләрә мүраҹиәт едәрәк демишди: «Сиз “сечилмиш сој, падшаһ вә каһин тајфасы, мүгәддәс милләт, Аллаһын мәхсуси халгысыныз”, сизи гаранлыгдан Өз һејрәтамиз нуруна чағыранын “әзәмәтли кејфијјәтләрини бәјан етмәк” үчүн сечилмисиниз» (1 Пет. 2:9). Бурада Петер Јеһованын Исраил халгына Ганун вердији заман дедији сөзләри ситат ҝәтирир вә онлары јени әһдин шәрикләри олан мәсиһчиләрә тәтбиг едир (Чых. 19:5, 6).
ПАДШАҺ ВӘ КАҺИН ТАЈФАСЫ БҮТҮН БӘШӘРИЈЈӘТӘ ФАЈДА ҜӘТИРИР
14. Падшаһ вә каһин тајфасы һарада хидмәт едир?
14 Јени әһдин шәрикләри һарада хидмәт едирләр? Јер үзүндә. Бир груп кими, онлар каһин тајфасыны тәшкил едир вә Јеһованы инсанлар гаршысында тәмсил етмәклә «әзәмәтли кејфијјәтләрини» бәјан едир вә онлары руһани гида илә тәмин едирләр (Мат. 24:45; 1 Пет. 2:4, 5). Онлар өлүб дирилдикдән сонра исә ҝөјдә Мәсиһлә бирликдә падшаһ вә каһин кими фәалијјәт ҝөстәрир вә бу вәзифәләрин һәр икисини дә там шәкилдә иҹра едирләр (Лука 22:29; 1 Пет. 1:3—5; Вәһј 1:6). Буна бир сүбут олараг һәвари Јәһја алдығы ҝөрүнтүдә ҝөјдә Јеһованын тахты гаршысында чохлу руһани варлыг ҝөрмүшдү. Онлар Гузуја үнванланан «јени маһны» охујурдулар: «Сән... һәр тајфадан, һәр дилдән, халгдан вә милләтдән олан инсанлары өз ганынла Аллаһ үчүн сатын алдын, онлары Аллаһымызын хидмәтиндә дурмаг үчүн падшаһ вә каһин тәјин етдин. Онлар јер үзәриндә һөкмранлыг едәҹәкләр» (Вәһј 5:8—10). Сонракы ҝөрүнтүләрин бириндә Јәһја бу һөкмдарлар барәдә демишди: «Онлар Аллаһын вә Мәсиһин гаршысында каһин кими хидмәт едәҹәк вә мин ил әрзиндә Мәсиһлә бирликдә һакимијјәт сүрәҹәкләр» (Вәһј 20:6). Мәсиһлә бирҝә онлар бүтүн бәшәријјәтә фајда ҝәтирән падшаһ вә каһин тајфасыны тәшкил едирләр.
15, 16. Падшаһ вә каһин тајфасы бәшәријјәтә һансы хејир-дуалары ҝәтирәҹәк?
15 Јер үзүндә јашајанлара 144 000 нәфәр һансы хејир-дуалары ҝәтирәҹәк? «Вәһј» китабынын 21-ҹи фәслиндә онлар «Гузунун [арвады]» адландырылараг сәмави шәһәр, Јени Јерусәлим кими тәсвир олунур (Вәһј 21:9). 2-дән 4-дәк ајәләрдә дејилир: «Мән һәмчинин мүгәддәс шәһәри — Јени Јерусәлими ҝөрдүм. О, ҝөјдән, Аллаһын јанындан енирди вә санки нишанлысы үчүн бәзәниб-дүзәнмишди. Бу вахт тахтдан ҝәлән ҝур бир сәс ешитдим. Сәс дејирди: “Аллаһын чадыры инсанларладыр вә О, инсанларла јашајаҹаг, онлар да Аллаһын халгы олаҹаглар. Аллаһ Өзү онларла олаҹаг. Аллаһ инсанларын ҝөзләриндән бүтүн јашлары силәҹәк. Артыг нә өлүм, нә дәрд, нә фәрјад, нә дә ағры олаҹаг, чүнки әввәлки шејләр кечиб ҝетди”». Бу неҹә дә ҝөзәл, мөһтәшәм хејир-дуалардыр! Өлүмүн арадан галдырылмасы илә ҝөз јашларынын, ағры-аҹынын, гәм-гүссәнин әсас сәбәби јох олаҹаг. Садиг инсанлар камиллијә говушаҹаг вә Аллаһла тамамилә барышаҹаглар.
16 Падшаһ вә каһин тајфасынын ҝәтирәҹәји нөвбәти хејир-дуалар Вәһј 22:1, 2 ајәләриндә тәсвир олунур: «О, мәнә һәјат сују ахан, бүллур кими шәффаф бир чај ҝөстәрди. Чај Аллаһын вә Гузунун тахтындан чыхыб шәһәрин [Јени Јерусәлим шәһәринин] баш күчәси илә ахырды. Чајын һәр ики саһилиндә һәјат ағаҹлары битирди. Бу ағаҹлар илдә он ики дәфә бар ҝәтирир, һәр ај мејвә верирдиләр. Милләтләр онларын јарпагларындан шәфа тапырдылар». Бу тәдбирләр сајәсиндә «милләтләр», јәни бәшәр аиләси Адәмдән мирас алдығы гејри-камилликдән тамамилә сағалаҹаг. Бир сөзлә, «әввәлки шејләр» кечиб ҝедәҹәк.
ПАДШАҺ ВӘ КАҺИН ТАЈФАСЫ ИШИНИ БАША ВУРУР
17. Миниллијин сонунда падшаһ вә каһин тајфасы һансы иши баша вураҹаг?
17 Миниллијин сонунда падшаһ вә каһин тајфасынын хидмәти сона чатанда бәшәријјәт камиллијә јетишәҹәк. Бундан сонра Баш Каһин вә Падшаһ олан Мәсиһ камил бәшәр аиләсини Јеһоваја тәгдим едәҹәк. (1 Коринфлиләрә 15:22—26 ајәләрини оху.) Бунунла да падшаһ вә каһин тајфасы она һәвалә олунан иши битирмиш олаҹаг.
18. Падшаһ вә каһин тајфасы өз ишини битирәндән сонра Јеһова Мәсиһин шәрикләриндән неҹә истифадә едәҹәк?
18 Бәс бундан сонра Јеһова Мәсиһин јүксәк вәзифәли һакимијјәт шәрикләриндән неҹә истифадә едәҹәк? Вәһј 22:5 ајәсиндә дејилир: «Онлар әбәдијјәт боју һакимијјәт сүрәҹәкләр». Кимләрин үзәриндә? Мүгәддәс Китаб бу һагда һеч нә демир. Јеһова ҝәләҹәк нијјәтләри үчүн онлары һөкмдарлар кими әбәдијјән истифадә едәҹәк, чүнки онлар өлмәзлијә, чүрүмәзлијә вә гејри-камил бәшәријјәтә көмәк етмәкдә зәнҝин тәҹрүбәјә малик олаҹаглар.
19. Мәсиһин Хатирә ҝеҹәси иштиракчылара нәји хатырладаҹаг?
19 2012-ҹи илин апрелин 5-дә, ҹүмә ахшамы Мәсиһин Хатирә ҝеҹәсини гејд едән заман Мүгәддәс Китабдан өјрәндијимиз бу биликләр бизим јаддашымызда олаҹаг. Һәлә јер үзүндә јашајан вә сајы аз олан мәсһ олунмуш мәсиһчиләр мајасыз чөрәк вә гырмызы шәрабдан гәбул едәрәк јени әһдин шәрикләри олдугларыны ҝөстәрәҹәкләр. Мәсиһин гурбанлығынын рәмзи олан бу символлар онлара мөһтәшәм үстүнлүкләрини вә Аллаһын әбәди нијјәтиндәки мәсулијјәтләрини хатырладаҹаг. Гој бу мәрасимдә иштирак едән бүтүн инсанларын үрәји Јеһованын бәшәријјәтә хејир-дуалар ҝәтирәҹәк падшаһ вә каһин тајфасына ҝөрә миннәтдарлыг һисси илә долуб-дашсын.
[29–ҹу сәһифәдәки шәкил]
Падшаһ вә каһин тајфасы бәшәријјәтә әбәди хејир-дуалар ҝәтирәҹәк