Һар-Маҝедон нә вахт ҝәләҹәк?

Һеч кәсин сајмаға гадир олмадығы бөјүк бир издиһам ҝөрдүм. Бу издиһамын ичиндә һәр милләтдән, һәр гәбиләдән, һәр халгдан вә һәр дилдән адамлар вар иди. Бунлар бөјүк мүсибәтдән чыханлардыр (ВӘҺЈ 7:9, 14).

ҺАР-МАҜЕДОН мүһарибәсинә аз галыб. Артыг дөјүш мејданы һазырдыр.

Бу ҝүн бүтүн дүнјада Јеһова Аллаһа хидмәт едән вә Онун Кәламында јазылан јүксәк әхлаг нормаларына әмәл едән халг мөвҹуддур. Аллаһ «һәр халгдан вә һәр дилдән» милјонларла инсаны гардашлыг телләри илә бирләшдириб. Белә гардаш мәһәббәти Јеһованын Шаһидләри арасында һөкм сүрүр (Јәһја 13:35).

Тезликлә Шејтан ордусуну сәфәрбәр едиб вар гүввә илә сүлһпәрвәр вә илк бахышдан мүдафиәсиз ҝөрүнән бу халга һүҹум чәкәҹәк (Језекел 38:8—12; Вәһј 16:13, 14, 16). Буну һарадан билирик? Инҹилдә Һар-Маҝедон мүһарибәсинин вахтына ишарә едән конкрет һадисәләр тәсвир олунур. Бу һадисәләрин чоху һал-һазырда баш верир.

Ҝөзүмүз өнүндә баш верән һадисәләр

Бир дәфә Иса пејғәмбәрин шаҝирдләри ондан сорушмушдулар ки, «дөврүн јекунунун» јахын олдуғу нәдән бәлли олаҹаг (Матта 24:3). Пејғәмбәр белә ҹаваб вермишди: «Милләт милләтә гаршы, дөвләт дөвләтә гаршы галхаҹаг. Бир чох јерләрдә гытлыг вә зәлзәләләр олаҹаг». Сонра исә әлавә етмишди: «Бүтүн бунлар бәлаларын башланғыҹыдыр» (Матта 24:7, 8). Иса пејғәмбәрин бир һәвариси бу дөврү «ахыр ҝүнләр» адландырмыш вә демишди ки, һәмин вахт «сон дәрәҹә ағыр бир зәманә» олаҹаг (2 Тимотејә 3:1). Сизҹә, бу ҝүн баш верән һадисәләр һәмин пејғәмбәрликләрин јеринә јетдијини ҝөстәрмир?

Исанын шаҝирди Јәһја бу зәманәнин нәјә ҝөрә ағыр олаҹағыны ачыгламышды. О, Вәһј китабында јазмышды ки, вахт ҝәләҹәк Шејтанла ҹинләр јалныз Јер күрәсинин һүдудларында фәалијјәт ҝөстәрәҹәк вә мөһләти гыса олдуғу үчүн Шејтан бөјүк гәзәб ичиндә олаҹаг (Вәһј 12:7—12). Мәҝәр бу ҝүн бүтүн дүнјаны гәзәб вә нифрәт далғасынын бүрүдүјүнә шаһид дејилик?

Һәмчинин Иса пејғәмбәр демишди ки, бу чәтин зәманәдә мисли-бәрабәри олмајан иш һәјата кечириләҹәк. О сөјләмишди: «[Аллаһын Падшаһлығы] һаггындакы бу хош хәбәр милләтләрин һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Матта 24:14). Бу ҝүн 235-дән артыг өлкә вә әразидә Јеһованын Шаһидләри Аллаһын Падшаһлығы һаггында мүждәни бәјан едирләр. Онларын нәшрләри 500-дән чох дилдә дәрҹ олунур. Мүгәддәс Китаб әсасында нәшр олунан «Ҝөзәтчи гүлләси» вә «Ојанын!» журналы дүнјада ҝениш јајылан журналлардандыр. Һәмчинин Јеһованын Шаһидләри тәрәфиндән Мүгәддәс Китаб јүзә јахын дилә тәрҹүмә едилиб. Онлар бу ишләри тәмәнна ҝүдмәдән иҹра едир вә бу фәалијјәтә мадди ҹәһәтдән дәстәк олурлар. Сизҹә, бу мүждәчилик иши Исанын дедији пејғәмбәрликлә үст-үстә дүшмүр?

Бунлардан әлавә, Мүгәддәс Китабда Јеһова Аллаһла Она гаршы дуранлар арасындакы мүһарибәјә апаран һадисәләр тәсвир олунур. Ҝәлин јахын ҝәләҹәкдә баш верәҹәк үч һадисәјә нәзәр салаг.

Тезликлә баш верәҹәк һадисәләр

1. Аллаһын Кәламында дејилир ки, дүнја лидерләри «сүлһ вә тәһлүкәсизлик» дејә ҹар чәкәҹәкләр. Онлар дүнјанын әсас проблемләрини һәлл етмәјин бир аддымлығында олдугларыны зәнн едәҹәкләр. Лакин бу бәјанатын ардынҹа ҝәлән һадисәләр ҝөстәрәҹәк ки, әслиндә, сүлһдән чох-чох узагдырлар (1 Салоникилиләрә 5:1—3).

2. Сонра бир чох дөвләтләр бүтүн дини тәшкилатлара гаршы һәрәкәтә кечмәјә гәрар верәҹәкләр. Вәһј китабында бу дөвләтләр вәһши һејванла, јалан динләр исә онун белиндә отуран гадынла тәмсил олунур (Вәһј 17:3, 15—18). Бу дөвләтләр Аллаһын јолуну өјрәтдијини иддиа едән јалан динләри мәһв едәҹәкләр. Бунунла онлар өзләри дә билмәдән Аллаһын һөкмүнү иҹра едәҹәкләр.

Јәһја пејғәмбәр бу сәһнәни рәмзи диллә белә тәсвир едир: «Ҝөрдүјүн он бујнуз вә вәһши һејван фаһишәјә [јалан динләри тәмсил едән гадына] нифрәт едәҹәк, ону сојундураҹаг, виран едәҹәк, әтини јејәҹәк вә сонра ону јандырыб күлә чевирәҹәк. Бу фикри онларын үрәјинә Аллаһ гојуб» (Вәһј 17:16, 17).

3. Шејтан бу уғурлу һүҹумдан сонра сијаси вә һәрби гүввәләри Јеһова Аллаһын халгына гаршы сәфәрбәр едәҹәк (Вәһј 7:14; Матта 24:21).

Бизә аидијјаты

Илк бахышдан бу шејләрә инанмаг инсана чәтин ҝәлә биләр. Амма Мүгәддәс Китабы дәриндән арашдыранда бу шејләрин јахын ҝәләҹәкдә хырда тәфәррүатынадәк јеринә јетәҹәјинә әмин олурсан. Аллаһын Өз Кәламында пејғәмбәрләри васитәсилә јаздырдығы чохлу пејғәмбәрликләр артыг јеринә јетиб. Бу, өз-өзлүјүндә бир зәманәтдир ки, ҝәләҹәк пејғәмбәрликләр дә ҝерчәкләшәҹәкa.

Биз чох истәјәрдик ки, сиз Гадир Аллаһын бөјүк мүһарибәсинин јахынлашдығына әмин оласыныз вә бу ҝүндән горхмајасыныз (Вәһј 16:14). Сиз Аллаһын хилас едәҹәји инсанлар арасында олмаг истәјәрдинизми? Бунун үчүн Аллаһын сиздән нә тәләб етдијини Онун Кәламындан өјрәнә биләрсиниз. Бир аз вахт ајырсаныз, Јеһованын Шаһидләри бу ишдә сизә мәмнунијјәтлә көмәк едәрләр. Инанын ки, өјрәндијиниз шејләр ҝәләҹәјә бахышынызы дәјишәҹәк.

[Һашијә]

[8–ҹи сәһифәдәки шәкил]

Јеһованын Шаһидләринин мүждәчилик иши Мүгәддәс Китабда јазылан пејғәмбәрликлә үст-үстә дүшүр