Гәзәбин јува салдығы үрәјә јол тапан хејирхаһлыг
НИДЕРЛАНДДА јашајан Жорж вә Мано адлы ики Јеһованын Шаһиди ҝүнләрин бир ҝүнү Падшаһлыг һагда хош хәбәри бир јашлы гадынла бөлүшдүләр, лакин о, бу хәбәри чох сәрт гаршылады. Онлар өјрәндиләр ки, бу гадынын ики әри вә бир оғлу вәфат едиб, онун өзү исә артритин ағыр формасындан әзијјәт чәкир. Сөһбәт заманы о, аз да олса сакитләшсә дә, үрәјиндәки гәзәб сојумамышды.
Бу ҹүр мүнасибәтә бахмајараг, Жорж Маноја тәклиф етди ки, һәмин гадына бир дәстә ҝүллә тәкрарән баш чәксинләр, чүнки о, чох тәнһа ҝөрүнүрдү вә һирсли иди. Јашлы гадынын ады Рија иди. Гадын гапыны ачыб онларын әлләриндә бир дәстә ҝүл ҝөрәндә бу, онда хош тәәҹҹүб һисси доғурду. Лакин онлар мүнасиб олмајан вахтда ҝәлдикләринә ҝөрә ҝөрүш үчүн башга ҝүн тәјин етдиләр. Жоржла Мано данышдыглары вахтда ҝәләндә гапыны һеч кәс ачмады. Онлар дәфәләрлә вә мүхтәлиф вахтларда ҝәлсәләр дә, гадыны евдә тапа билмирдиләр. Тәблиғчиләр һәтта гадынын онлардан гачдығыны дүшүнмәјә башладылар.
Ҝүнләрин бир ҝүнү Жорж, нәһајәт ки, гадыны евдә тапды. О, ҝөрүшмәли олдуглары ҝүн евдә олмадығы үчүн үзр истәди вә һәмин вахт хәстәханада олдуғуну деди. Сонра әлавә етди: «Сизин ағлыныза белә ҝәлмәз ки, сиз ҝетдикдән сонра мән нә етдим. Мән Мүгәддәс Китабы охумаға башладым!» Меһрибан сөһбәтдән сонра гадын Мүгәддәс Китабы өјрәнмәјә башлады.
Рија Мүгәддәс Китабы өјрәндији мүддәтдә кинли-гәзәбли инсандан хошбәхт, хејирхаһ гадына чеврилди. Хәстәлији уҹбатындан евдән чөлә чыха билмәсә дә, о, она баш чәкән һәр инсана јени иманы һагда данышмаға башлады. Сәһһәти она јығынҹаг ҝөрүшләриндә тез-тез иштирак етмәјә имкан вермирди, бунунла белә, Рија севинҹлә баҹы-гардашлары евиндә гәбул едирди. Онун 82 јашы оланда о, рајон конгресиндә иштирак етди вә вәфтиз олунду.
Бир нечә ајдан сонра о вәфат етди. Ријанын өлүмүндән сонра евиндә онун јаздығы бир шеир тапылды. Һәмин шеирдә о, аһыл јашларында тәнһалығын вердији әзабдан вә хејирхаһ әмәлләрин ваҹиблијиндән јазмышды. Мано дејир: «Бу шеири охујанда гәлбим сызлады. Мән неҹә дә хошбәхтәм ки, Јеһова үрәјимә она хејирхаһлыг ҝөстәрмәји гојмушду».
Бәли, бизи бу ҹүр мәһәббәт вә хејирхаһлығы тәзаһүр етдирмәјә Јеһованын шәхси нүмунәси тәшвиг едир (Ефес. 5:1, 2). Һәгигәтән дә, биз «Аллаһын хидмәтчиләри кими» хејирхаһлыг ҝөстәрәндә хидмәтимиз даһа сәмәрәли олур (2 Кор. 6:4, 6).