Һикмәтли ол «сағлам мәсләһәт» ахтар
Һәјатымыз дәниз сәјаһәтинә бәнзәјир. Лакин инсан мүдриклији бу сәјаһәти уғурла баша вурмагда чох вахт ишә јарамыр. Чохлары фыртыналы дәнизә бәнзәр бу һәјатда «ҝәми гәзасына» уғрајыблар (Мәз. 107:23, 27). Нәјә ҝөрә бу, мүнасиб мүгајисәдир?
Гәдим заманларда дәнизлә сәјаһәт етмәк бөјүк тәҹрүбә тәләб едән чәтин бир иш иди. Бу һәм дә өмүрләри дәниздә кечмиш дәнизчиләрдән, мәсәлән, сүканчылардан өјрәнилән бир баҹарыг иди (Һәв. иш. 27:9—11). Бир чох гәдим рәсм әсәрләриндә сүканчынын ролунун ваҹиблијини вурғуламаг үчүн о, диҝәр дәнизчиләрә нисбәтән даһа ириҝөвдәли тәсвир олунур. Ҹәсарәт едиб ачыг дәнизә чыхмаг үчүн дәнизчиләр улдузлар, күләкләр вә истигамәти мүәјјән етмәкдә јардымчы олан диҝәр шејләр барәдә өјрәнирдиләр. Мүгәддәс Китаб Сур шәһәринин дәнизчиләрини «баҹарыглы» адландырыр; бу сөзү «мүдрик» кими дә тәрҹүмә етмәк олар (Јез. 27:8).
Мүасир һәјатын проблемләри һәлл етмәк гәдим заманларда дәнизлә сәјаһәт етмәк гәдәр чәтин ола биләр. Бәс белә чәтин заманда бизим дадымыза нә чата биләр?
«САҒЛАМ МӘСЛӘҺӘТ»ЛӘРИ НЕҸӘ ТАПА БИЛӘРИК?
Һәјатын дәниз сәјаһәтинә бәнзәдилдијини јадда сахлајараг ҝәлин Мүгәддәс Китабда јер алан бир һәгигәти нәзәрдән кечирәк: «Һикмәтли гулаг асыб мүдриклијини [артырыр], дәрракәли адам сағлам мәсләһәт [алыр]» (Сүл. мәс. 1:5, 6). Бурада «сағлам мәсләһәт» кими тәрҹүмә олунан ибрани ифадәси илә гәдим дөврләрдәки ҝәми капитанларынын фәалијјәтини тәсвир етмәк олар. Бу ифадә алтында усталыгла идарә етмәк вә истигамәт вермәк баҹарығы нәзәрдә тутулур.
«Сағлам мәсләһәт» ахтарыб тапмаг вә һәјат дәнизиндә уғурла «үзмәк» үчүн бөјүк сәј тәләб олунса да, бу мүмкүндүр. «Сүлејманын мәсәлләри» китабында гејд олундуғу кими, һикмәт, дәрракә вә идрак кими хүсусијјәтләри бирҝә ишләтмәлијик (Сүл. мәс. 1:2—6; 2:1—9). Лакин бу, кифајәт дејил, чүнки һәтта шәр инсанлар белә, һијләҝәр дә олса, мәсләһәтләр верирләр. Буна ҝөрә дә биз Аллаһын рәһбәрлијини ахтармаг чағырышына хор бахмамалыјыг (Сүл. мәс. 12:5).
Бу сәбәбдән Аллаһын Кәламыны чалышганлыгла арашдырмаг олдугҹа ваҹибдир. Бунун сајәсиндә биз Јеһова Аллаһ вә Онун хүсусијјәтләрини ән мүкәммәл шәкилдә тәзаһүр етдирән Иса Мәсиһ барәдә гијмәтли биликләр әлдә едә биләрик (Јәһ. 14:9). Јығынҹаг ҝөрүшләриндә дә биз чохлу мүдрик мәсләһәтләр алырыг. Бундан әлавә, валидејнләримиз дә дахил олмагла, тәҹрүбәли инсанлардан да өјрәнә биләрик (Сүл. мәс. 23:22).
УЗАГҜӨРӘНЛИК ВӘ ПЛАНЛАШДЫРМА
Мәҹази диллә десәк, тәһлүкәли суларда «үзәндә» «сағлам мәсләһәт»ә даһа чох еһтијаҹымыз олур. Гәлиз бир вәзијјәтлә үзләшәндә биз нә едәҹәјимизи билмирик. Белә һалларда шүбһәләр бизи өз ағушуна алараг «ифлиҹ» едә биләр, бунун нәтиҹәси исә фәлакәтдир (Јаг. 1:5, 6).
Мараглыдыр ки, «сағлам [дүзҝүн] мәсләһәт» кими тәрҹүмә олунан ибрани ифадәси мүһарибә илә әлагәдар да ишләнир. Биз охујуруг: «Дүзҝүн мәсләһәтлә [«мәһарәтли стратеҝија илә», «Тһе Ревисед Енҝлисһ Библе»] мүһарибә едә биләрсән, доғру нәсиһәт верән чохдурса, гәләбәјә чатарсан» (Сүл. мәс. 20:18; 24:6).
Дөјүшү тәшкил едән стратег кими, биз дә руһанилијимиз үчүн тәһлүкә јарадаҹаг амилләри мүәјјән едиб онлара габагҹадан һазырлашмалыјыг (Сүл. мәс. 22:3). Мәсәлән, ола билсин, сән јени иш вә ја јени вәзифә тәклифини ҝөтүр-гој едирсән. Тәбии ки, сән алаҹағын мәваҹиби, јола нә гәдәр вахтын ҝедәҹәјини вә диҝәр хырдалыглары нәзәрдән кечирәҹәксән. Бунунла белә, башга амилләри дә нәзәрә алмаг лазымдыр: «Бу иш Мүгәддәс Китаб принсипләринә зидд дејил ки? Јени иш графиким мәсиһчи фәалијјәтимә мане олмајаҹаг ки?» (Лука 14:28—30).
Јеһованын Шаһиди олан Лоретта гида мәһсулларынын истеһсалы илә мәшғул олан бир ширкәтдә јахшы вәзифәдә чалышырды. Ширкәт јени әразијә көчмәли оланда Лореттаја орада мәсул вәзифә тәклиф олунду. Менеҹерләр она дедиләр: «Һәјатда бир дә белә шансын олмајаҹаг. Биз һәтта өјрәнмишик ки, орада Падшаһлыг залы да вар». Лакин Лоретта Јарадана даһа чох хидмәт етмәк үчүн һәјатыны садәләшдирмәк истәјирди. О ҝөрдү ки, бу јени вәзифә онун чох вахтыны алаҹаг вә хидмәтинә әнҝәл төрәдәҹәк. Менеҹерләрдән биринин сәмими олараг онун ширкәтдә сахламаг истәдикләри јеҝанә шәхс олдуғуну демәсинә бахмајараг, Лоретта ишдән чыхды. Тәхминән 20 илдир даими пионер кими хидмәт едән Лоретта әминдир ки, әлдә етдији ҝөзәл бәһрәләр бирбаша олараг Аллаһын Кәламындакы «сағлам мәсләһәт»ләри тәтбиг етмәсинин нәтиҹәсидир. О, Јеһова илә мүнасибәтини мөһкәмләндирди вә бир нечә адама Мүгәддәс Китаб һәгигәтләрини гәбул етмәјә көмәк етди.
Аиләдә дә «сағлам мәсләһәт»ә еһтијаҹ вар. Ушаглары тәрбијә етмәк, онлары боја-баша чатдырмаг бөјүк ишдир; руһани, мадди мәсәләләрлә әлагәдар верилән гәрарлар бүтүн аиләнин ҝәләҹәјинә тәсир едир (Сүл. мәс. 22:6). Ушаглары олан мәсиһчиләр өзләриндән соруша биләрләр: «Өвладларымыз бөјүјәндә онлара чәтинликләрин өһдәсиндән мүдрикликлә ҝәлмәкдә көмәк едәҹәк руһани дәјәрләри өз данышыг вә давраныш тәрзимизлә ашылајырыгмы? Бизим сүрдүјүмүз һәјат тәрзи онлара садә јашамагла кифајәтләнмәјин вә диггәтләрини хидмәтә ҹәмләмәјин нә демәк олдуғуну баша дүшмәјә көмәк едирми?» (1 Тим. 6:6—10, 18, 19).
Әсил мүвәффәгијјәт бу дүнјада әксәр инсанларын ҹан атдығы пул вә әјләнҹәләрдән асылы дејил. Сүлејман падшаһ бунун нә демәк олдуғуну баша дүшүрдү. О, Аллаһдан илһам алараг демишди: «Аллаһдан горханларын, Онун һүзурунда еһтирамла дуранларын јахшылыг ҝөрәҹәјини билирәм» (Ваиз 8:12). Һәгигәтән дә, бу сөзләр Аллаһын Кәламына әсасланан вә она ујғун олан «сағлам мәсләһәт» ахтармағын мүдрик һәрәкәт олдуғуна дәлаләт едир (2 Тим. 3:16, 17).
[30–ҹу сәһифәдәки шәкил]
Сүканчынын ролуну вурғуламаг үчүн о, адәтән, башга дәнизчиләрә нисбәтән даһа ириҝөвдәли тәсвир олунурду
[Иҹазә илә]
Су ҹонҹессионе дел Министеро пер и Бени е ле Аттивитà Ҹултурали. Бу шәклин сурәтини истәнилән формада чыхартмаг гадағандыр.