Пилигримләрин изләри илә

«МӘН һеч ҹүр евдән-евә тәблиғ едә билмәрәм!» Бир чохлары Мүгәддәс Китабы тәзә-тәзә өјрәнмәјә башлајанда танымадыглары инсанлара тәблиғ етмәк барәдә бу ҹүр фикирләширләр! Лакин бу сөзләр вахтилә пилигрим адланан тәҹрүбәли натигә вә Мүгәддәс Китабы өјрәдән шәхсә аиддир.

Килсәни тәрк едән «Сион Ҝөзәтчи гүлләси»нин бир чох охуҹулары онлар кими Мүгәддәс Китаб һәгигәтләринә сусајан инсанларла топлашмаға еһтијаҹ дујурдулар. Бу журнал онлары белә дәјәрли имана саһиб олан диҝәр инсанлары тапыб онларла Мүгәддәс Китабы арашдырмаг үчүн мүнтәзәм шәкилдә бир јерә топлашмаға тәшвиг едирди. 1894-ҹү илдән башлајараг Ҝөзәтчи Гүлләси Ҹәмијјәти онлара баш чәкмәји хаһиш едән груплара өз сәјјар нүмајәндәләрини ҝөндәрирди. Бу тәҹрүбәли, зәһмәткеш гардашлара сонрадан пилигримләр дејилди. Онлар һәлим олмаларына, Мүгәддәс Китабы јахшы билмәләринә, ҝөзәл натиглик вә мүәллимлик габилијјәтләринин олмасына, еләҹә дә фидјә тәлиминә садигликләринә ҝөрә сечилирдиләр. Онларын башчәкмәләри бир-ики ҝүн чәкирди. Бир чох Мүгәддәс Китаб Тәдгигатчыларынын тәблиғ хидмәтиндә илк тәҹрүбәләри пилигримләрин ачыг мәрузәләринә дәвәтнамә пајламагдан ибарәт иди. Сонрадан Рәһбәрлик Шурасынын үзвү олан Һүго Ример мәктәбләрин бириндә нитглә чыхыш етдикдән сонра ҝеҹә јарысына гәдәр Мүгәддәс Китаб суалларына ҹаваб верди. О, јорғун олмасына бахмајараг, севинҹли иди вә бу ҝөрүшүн ҝөзәл кечдијини деди.

«Ҝөзәтчи гүлләси»ндә дејилирди ки, пилигрим башчәкмәләринин әсас мәгсәди иманлы инсанларын евләриндә кечирилән ҝөрүшләр васитәсилә онларын иманыны мөһкәмләндирмәкдир. Әтрафда јашајан Мүгәддәс Китаб Тәдгигатчылары нитгә гулаг асмаг вә суал-ҹавабда иштирак етмәк үчүн һәмин евә ҝәлирдиләр. Даһа сонра мәсиһчиләр өз гонагпәрвәрлијини ҝөстәрирдиләр. Мод Абботт адлы бир баҹы ушаглығыны хатырлајараг дејир ки, сәһәр мәрузәсиндән сонра һамы чөлдә ачылан узун маса архасына топлашырды. «Масаја чохлу ләзиз тәамлар — гахаҹ едилмиш донуз әти, гызардылмыш тојуг, нөвбәнөв чөрәкләр, пирог вә торт дүзүлүрдү! Һамы о ки вар јејирди вә саат икидә нөвбәти мәрузә башлајырды. Лакин һамы, — дејә баҹы етираф едир, — јарыјухулу вәзијјәтдә олурду». Узун мүддәт пилигрим кими хидмәт едән Бенжамин Бартон бир дәфә зарафатјана демишди: «Әҝәр мәнә тәклиф олунан бүтүн наз-немәтләри јесәјдим, пилигрим хидмәтини чохдан баша вурмуш олардым». Нәһајәт, Бруклиндәки баш идарәдән ҝәлән мәктубда гонагпәрвәр баҹылара мәсләһәт ҝөрүлүрдү ки, пилигримләрә «ади ҝүндәлик јемәк» вә «сакитҹә јатмаг» имканы верилсин.

Пилигримләр тәлим вермәкдә, еләҹә дә схем, макет вә мөвзуну даһа ҹанлы чатдырмаға көмәк едән әлләринә кечән әјани вәсаитләрдән истифадә етмәкдә чох мәһарәтли идиләр. Ричард Барберин нитгләри һәмишә «руһани әдвијјатлар»ла зәнҝин олурду. Инсанлара ата гајғысы илә јанашан Уолтер Торн Аллаһын «гәдим заманлардакы садиг јашлы хидмәтчиләри кими» данышырды. Шилд Тутҹијан исә бир дәфә машынла ҝедәркән гәфләтән: «Сахла!» — дејә гышгырды, сонра машындан тулланды вә бир дәстә ҝүл дәриб, Јеһованын јаратдыгларынын бир нүмунәси кими әмәкдашларына верди.

Пилигрим хидмәти чох чәтин иш иди, хүсусилә дә ортајашлы вә орта јашдан јухары олан гардашлар үчүн. Бәзиләринин исә ән бөјүк сынағы бу ишин мәгсәдинин дәјишилмәси олду. Инди онлар евдән-евә тәблиғ етмәк ишиндә рәһбәрлији өз үзәрләринә ҝөтүрмәли идиләр. «Ҝөзәтчи гүлләси»нин 1924-ҹү ил 15 март сајында гејд олунурду ки, һәгиги мәсиһчиләрә һәвалә олунан «ән әсас тапшырыглардан бири Падшаһлыг һагда шаһидлик етмәкдир. Пилигримләр мәһз бу мәгсәд үчүн ҝөндәрилир».

Бәзи пилигримләр бу дәјишиклијә һиддәтләнәрәк сәјјар хидмәтләрини дајандырдылар, наразы олан диҝәр пилигримләр исә һәтта өз тәригәтләрини јаратдылар. Роби Адкинс хатырлајыр ки, ҝөзәл натиглик габилијјәти олан бир пилигрим бу дәјишиклик һаггында хиффәтлә деди: «Әлимдән ҝәлән јеҝанә иш сәһнәдән тәблиғ етмәкдир. Мән һеч ҹүр евдән-евә тәблиғ едә билмәрәм!» Роби гардаш хатырлајыр: «Нөвбәти дәфә ону 1924-ҹү илдә Оһајо штатынын Колумбус шәһәриндә конгресдә ҝөрдүм. О, тәк-тәнһа балаҹа ағаҹын көлҝәсиндә дајанмышды. Севинҹ ичиндә олан минләрлә гардашларын арасында о ән јазыг инсан кими ҝөрүнүрдү. Бундан сонра мән ону бир даһа ҝөрмәдим. Бир мүддәт сонра һәмин гардаш тәшкилаты тәрк етди». Евдән-евә тәблиғ етмәјә һазыр олан бир чох гардашлар исә орадан кечәрәк севинҹлә машынларына китаблар апарырдылар (Һәв. иш. 20:20, 21).

Бир чох пилигримләр вахтилә өзләри тәблиғә ҝөндәрдикләри баҹы-гардашлар кими һәјәҹанлы олсалар да, јенә дә бу ишә ҹан јандырырдылар. Евдән-евә тәблиғ етмәк барәдә алмандилли пилигрим Максвел Френд јазмышды: «Пилигрим ишинин бу һиссәси хејир-дуалардан биридир». Пилигрим Ҹон Бонет билдирмишди ки, үмумиликдә гардашлар әсас диггәтин Падшаһлығын тәблиғ ишинә јөнәлдилмәсини ҹанла-башла гаршыладылар. Онун сөзләринә әсасән, әксәријјәт «дөјүшдә өн сыраларда ҹанфәшанлыгла вурушурду».

Илләр әрзиндә садиг сәјјар гардашлар һәмиманлылары үчүн јахшы нүмунә идиләр. Јеһоваја узун мүддәт хидмәт едән Норман Ларсон демишди: «Һәтта ушаг оланда мәним үчүн ајдын иди ки, пилигримләрин дәјәри вә фајдасы данылмаздыр. Онлар мәним дүзҝүн формалашмағымда бөјүк рол ојнамышдылар». Та бу ҝүнә кими фәдакар вә садиг сәјјар нәзарәтчиләр һәмиманлыларына: «Биз евдән-евә тәблиғ едә биләрик!» — демәјә көмәк едирләр.

[32–ҹи сәһифәдәки јазы]

Пилигримин башчәкмәси севиндириҹи һадисә иди!

[31–ҹи сәһифәдәки шәкил]

1905-ҹи илдә Бенжамин Бартон 170-ә јахын башчәкмә етмишди

[32–ҹи сәһифәдәки шәкил]

Мәсиһәбәнзәр хүсусијјәтләри вә ата гајғысы илә танынан пилигрим Уолтер Торну мәһәббәтлә «ата» адландырырдылар

[32–ҹи сәһифәдәки шәкил]

Ҹ. Браун тәхминән 1902-ҹи илдә Јамајкадакы 14 балаҹа групу мөһкәмләндириб руһландырмаг үчүн ораја пилигрим кими ҝөндәрилмишди

[32–ҹи сәһифәдәки шәкил]

Пилигримләр мәсиһчиләрин иманыны, араларындакы бирлији мөһкәмләндирир вә гардашлара тәшкилата даһа јахын олмаға көмәк едирдиләр