Тәбии фәлакәтләрә һазырлыг
Ҝетдикҹә артан вә даһа дағыдыҹы олан фәлакәтләрдән сағ чыхмаг үчүн нә етмәк олар? Ҝәлин бәзи мәсләһәтләри нәзәрдән кечирәк.
Фәлакәтләр олан јерләрдән узаг дурун. Мүгәддәс Китабда дејилир: «Узагҝөрән габагҹадан шәри ҝөрүб ондан гачар, ҹаһил исә ирәли чыхар, зијан тапар» (Сүлејманын мәсәлләри 22:3). Бу мүдрик мәсләһәти фәлакәтләр заманы да тәтбиг етмәк олар. Әҝәр вулкан пүскүрмәси, дашгын вә ја гасырға барәдә хәбәрдарлыг олунубса, даһа тәһлүкәсиз јерә ҝетмәк мүдриклик оларды. Һәјат евдән вә ја башга шејләрдән даһа гијмәтлидир.
Бәзиләри имкан дахилиндә даһа тәһлүкәсиз јерләрә көчүрләр. Бир мөтәбәр мәнбәдә дејилир: «Тәбии фәлакәтләр адәтән ејни јерләрдә баш верир. Ән тәһлүкәли вә иримигјаслы фәлакәтләрин Јер күрәсинин мәһз белә кичик әразиләриндә баш верәҹәји еһтимал олунур». Буну, мәсәлән, дәниз сәвијјәсиндән ашағыда јерләшән вә ја сејсмик ҹәһәтдән актив әразиләрә аид етмәк олар. Белә тәһлүкәли јерләрдә мәскән салмамагла, јахуд орада јашајырсынызса, тәһлүкәсиз јерә көчмәклә фәлакәтләрин аҹынаҹаглы нәтиҹәләриндән гача биләрсиниз.
Нә едәҹәјинизи планлашдырын. Еһтијат тәдбирләринә бахмајараг, ҝөзләнилмәјән фәлакәтин гурбаны ола биләрсиниз. Нә едәҹәјинизи әввәлҹәдән планлашдырсаныз, баш верән фәлакәтә даһа асан таб ҝәтирә биләрсиниз. Бу, јухарыда ҝәтирилән Сүлејманын мәсәлләри 22:3 ајәсинә дә ујғун ҝәлир. Һәр еһтимала гаршы ичиндә лазыми әшјалар олан һазыр чантаныз вармы? Бир нәшрдә чантаја нөвбәти әшјалары јығмаг мәсләһәт ҝөрүлүр: илк тибби јардым ләвазиматлары, ичмәли су, ҝеҹ хараб олан әрзаг вә ваҹиб сәнәдләр («1-2-3 of Disaster Education»). Һәмчинин сизин әразиниздә еһтимал едилән фәлакәтләри вә белә вәзијјәтләрдә неҹә давранмаг лазым ҝәлдијини аиләликҹә мүзакирә етмәјиниз мүдриклик оларды.
Аллаһла јахын мүнасибәтләринизи горујун. Һәр вәзијјәтдә бунун көмәји дәјә биләр. Мүгәддәс Китабда Аллаһ һаггында дејилир ки, О, «мәрһәмәтли Ата вә һәр ҹүр тәсәлли Аллаһы олуб һәр дәрдимиздә бизә тәсәлли верир». Башга ајә исә Ону «мәзлумлара тәскинлик верән Аллаһ» кими тәсвир едир (2 Коринфлиләрә 1:3, 4; 7:6).
Бәли, Аллаһ Она иман едәнләрин вәзијјәтиндән јахшы аҝаһдыр. О, мәһәббәт Аллаһыдыр вә мүхтәлиф үсулларла тәсәлли верир (1 Јәһја 4:8). Биз мөҹүзәләр үчүн јох, Аллаһын гүдрәтли мүгәддәс руһу үчүн дуа едириксә, бу, истәнилән вәзијјәтдә бизә көмәк едәҹәк. Мүгәддәс руһ бәдбәхтликләрлә үзләшәнләрә тәсәлли вә тәскинлик вермәк үчүн Мүгәддәс Китабдан лазыми фикирләри бизим јадымыза сала биләр. Һәгигәтән дә, Аллаһын садиг хидмәтчиләри гәдим Исраилин падшаһы Давуд пејғәмбәр кими ејни һиссләри кечирә биләрләр. О дејирди: «Өлүм көлҝәсинин дәрәсиндә ҝәзсәм белә, шәрдән горхмарам, чүнки Сән мәнимләсән, Сәнин әсан, Сәнин дәјәнәјин мәнә тәсәлли верир» (Мәзмур 23:4).
Һәмиманлылар бир-бирләринә көмәк едир. Ерамызын биринҹи әсриндә Агаб адлы бир пејғәмбәр «бүтүн јер үзүндә бәрк гытлыг олаҹағыны... хәбәр верди. Доғрудан да, Клавдинин дөврүндә гытлыг олду». Бу аҹлыг Иса Мәсиһин Јәһудејада јашајан шаҝирдләриндән дә јан кечмәди. Башга әразидә јашајан мәсиһчиләр һәмиманлыларынын аҹынаҹаглы вәзијјәтиндән хәбәр тутанда нә етдиләр? Мүгәддәс Китабда дејилир: «Шаҝирдләр гәрарлашдырдылар ки, һәр кәс Јәһудејада јашајан гардашлара ҝүҹү чатан гәдәр јардым ҝөстәрсин» (Һәвариләрин ишләри 11:28, 29). Онлар дар ҝүндә һәмиманлыларына мәһәббәтлә көмәк әли узатдылар.
Бу ҝүн дә Аллаһын хидмәтчиләри ејни ҹүр давранырлар. Јеһованын Шаһидләри һәмиманлыларына көмәк етмәкдә јахшы танынырлар. Мәсәлән, 2010-ҹу илин февралын 27-дә Чилидә ҝүҹлү зәлзәлә баш верәндә Јеһованын Шаһидләри зәрәр чәкәнләрә тәҹили јардым ҝөстәрдиләр. Евини сунами апаран Карла адлы бир мәсиһчи дејир: «Нөвбәти ҝүн бизә көмәк етмәк үчүн башга јерләрдән ҝәләнләри [һәмиманлылары] ҝөрмәк чох руһландырыҹы иди. Әминик ки, Јеһова бизә көнүллүләрин васитәсилә тәсәлли верирди. Аллаһын мәни севдијини вә горудуғуну һисс едирдим». Онун Јеһованын Шаһиди олмајан бабасы бүтүн бунлары мүшаһидә едирди. О дејир: «Бунлар мәним илләр әрзиндә ҝетдијим килсәдән тамамилә фәргләнир». Ҝөрдүкләри ону Јеһованын Шаһидләри илә Мүгәддәс Китабы өјрәнмәјә тәшвиг етди.
Аллаһы севән инсанларын арасында олмаг фәлакәтләр заманы бөјүк көмәк ола биләр. Бәс елә бир вахт ҝәләҹәкми ки, јер үзү фәлакәтләрдән азад олсун? Ҝәлин ҝөрәк Мүгәддәс Китаб бу барәдә нә дејир.
[6–ҹы сәһифәдәки шәкил]
Ичиндә лазыми әшјалар олан һазыр чантаныз вармы?
[7–ҹи сәһифәдәки шәкил]
Мөҹүзәләр үчүн јох, Аллаһын гүдрәтли мүгәддәс руһу үчүн дуа едириксә, бу, һәр вәзијјәтдә бизә көмәк едәҹәк
[7–ҹи сәһифәдәки шәкил]
Һәмиманлылар тәбии фәлакәтләр заманы бир-биринә көмәк едирләр
[7–ҹи сәһифәдәки шәкил]
«Аллаһын мәни севдијини вә горудуғуну һисс едирдим»