Аллаһ бизи ҹәзаландырырмы?
«Дүшүнүрәм ки, бу, тембатсудур [Аллаһын ҹәзасы], амма фәлакәтин гурбанларына јазығым ҝәлир». Бу сөзләри 2011-ҹи илин март ајында баш верән 9 бал ҝүҹүндә зәлзәлә вә сунамидән сонра Јапонијанын ҝөркәмли сијасәтчиләриндән бири демишди.
2010-ҹу илин јанвар ајында Һаитидә баш верән зәлзәлә нәтиҹәсиндә 220 000-дән чох инсан тәләф оланда телевизија васитәсилә дини тәблиғат апаран танынмыш бир адам иддиа едирди ки, бу инсанлар «иблислә сазиш бағладыглары» үчүн белә фәлакәтә дүчар олдулар вә онлар «аллаһа дөнмәлидирләр».
Манилада (Филиппин) басабас нәтиҹәсиндә 79 нәфәр өләндә бир католик кешиш демишди: «Аллаһ бизим јатмыш вә күтләшмиш виҹданымызын ојанмасыны истәјир». Һәмин өлкәнин бир гәзетиндә јазыланлара әсасән, «әһалинин ијирми бир фаизи инаныр ки, Аллаһ Өз гәзәбини [өлкәдә тез-тез баш верән] торпаг сүрүшмәләри, гасырғалар вә башга тәбии фәлакәтләр васитәсилә јағдырыр».
АЛЛАҺЫН пис инсанлары тәбии фәлакәтләрлә ҹәзаландырмасы фикри јени дејил. 1755-ҹи илдә Лиссабонда (Португалија) тәхминән 60 000 нәфәр баш верән зәлзәлә, јанғын вә сунаминин гурбаны олду. Бунунла бағлы танынмыш философ Волтер белә бир суал галдырды: «Мәҝәр бәлаја дүчар олмуш Лиссабонун писликләри әхлагсызлыға батан Парисин пислијиндән чох иди?» Милјонларла инсанлары бир суал нараһат едир: доғруданмы Аллаһ инсанлары тәбии фәлакәтләрлә ҹәзаландырыр? Бир чох өлкәләрдә белә фәлакәтләрин Аллаһын иши олдуғуну дејирләр.
Бүтүн бунлары нәзәрә алсаг, нөвбәти суаллар јараныр: һәгигәтәнми Аллаһ инсанлары тәбии фәлакәтләрлә ҹәзаландырыр? Демәк олармы ки, бу ҝүнләрдә бир-биринин ардынҹа баш верән тәбии фәлакәтләр Аллаһ тәрәфиндән ҝөндәрилән ҹәзадыр?
Бәзиләри өз сөзләринә гүввәт олараг Аллаһын тәбиәт гүввәләри васитәсилә инсанлары ҹәзаландырдығына даир Мүгәддәс Китабдакы һадисәләрә истинад едирләр (Јарадылыш 7:17—22; 18:20; 19:24, 25; Сајлар 16:31—35). Лакин Мүгәддәс Јазылардакы һәмин һадисәләри диггәтлә арашдырсаг, һәр бириндә үч фәргләндириҹи амили ҝөрә биләрик. Биринҹиси, һәмин һадисәләр барәдә әввәлҹәдән хәбәрдарлыг едилмишди. Икинҹиси, һәм јахшы, һәм дә писләрин һәјатына сон гојан тәбии фәлакәтләрдән фәргли олараг, Аллаһ јалныз пис вә хәбәрдарлыглара мәһәл гојмајан инсанлары мәһв етмишди. Үчүнҹүсү, Аллаһ әмәлисалеһ инсанлара хилас олмаг имканы јаратмышды (Јарадылыш 7:1, 23; 19:15—17; Сајлар 16:23—27).
Бу ҝүн милјонларла инсанын һәјатыны алт-үст едән сајсыз-һесабсыз фәлакәтләрин Аллаһын иши олдуғуну демәјә һеч бир әсас јохдур. Бәс онда ҝүнү-ҝүндән артан фәлакәтләрин сәбәби нәдәдир? Фәлакәтләрин аҹы нәтиҹәләриндән јаха гуртармаг үчүн һансы тәдбирләри ҝөрмәк олар? Фәлакәтләрин олмајаҹағы бир вахт ҝәләҹәкми? Бу суалларын ҹавабыны нөвбәти мәгаләләрдә өјрәнәҹәксиниз.