Пис ҝүнләр ҝәлмәздән габаг Јеһоваја хидмәт един
«Сәни Јараданы хатырла» (ВАИЗ 12:1).
1, 2. а) Аллаһдан илһам алараг Сүлејман ҝәнҹләрә һансы мәсләһәти вермишди? б) Нә үчүн Сүлејманын мәсләһәти јашы 50-ни кечмиш мәсиһчиләрә дә мараглыдыр?
СҮЛЕЈМАН ПАДШАҺ Аллаһдан илһам алараг ҝәнҹләрә демишди: «Пис ҝүнләр ҝәлмәздән габаг... ҹаванлыг ҝүнләриндә сәни Јараданы хатырла». Сөһбәт һансы «пис ҝүнләр»дән ҝедир? Бурада Сүлејман гоҹалыг дөврүнүн чәтинликләрини мараг доғуран поетик диллә тәсвир едир: титрәјән әлләр, әјилән ајаглар, төкүлән дишләр, нуруну итирән ҝөзләр, зәиф ешидән гулаглар, ағаран сачлар вә бүкүлмүш бел. Ҝәрәк инсан Јеһоваја хидмәтә белә вәзијјәтә дүшмәмишдән габаг башласын. (Ваиз 12:1—5 ајәләрини оху.)
2 Елә мәсиһчиләр вар ки, јашлары 50-ни кечмәсинә бахмајараг, һәлә дә ҝүмраһдырлар. Сачларына дән дүшсә дә, онларын сағламлығы Сүлејманын тәсвир етдији кими дејил. Бәс кифајәт гәдәр јашы олан бу мәсиһчиләр Аллаһын ҝәнҹләрә үнванладығы: «Сәни Јараданы хатырла», — мәсләһәтиндән фајдалана биләрләрми? Бу мәсләһәт һансы мәнаны кәсб едир?
3. Јараданы хатырламаг өзүнә нәји дахил едир?
3 Јеһоваја узун илләр әрзиндә хидмәт етмәјимизә бахмајараг, јахшы олар ки, һәрдән дајаныб бизи Јарадан барәдә миннәтдарлыгла дүшүнәк. Һәјат чох әсрарәнҝиздир. Онун мүрәккәблијини инсан ағлы дәрк едә билмәз. Халигин хәлг етдикләри о гәдәр рәнҝарәнҝдир ки, һәјат бизә һәртәрәфли зөвг верир. Јеһованын јаратдыглары үзәриндә дүшүнәндә Онун мәһәббәтинә, мүдриклијинә вә гүввәсинә олан миннәтдарлығымыз ҹанланыр (Мәз. 143:5). Лакин Јараданымызы хатырламаг өзүнә Онун гаршысындакы мәсулијјәтләримизи ҝөтүр-гој етмәк үчүн вахт ајырмағы да дахил едир. Бу заман биз өмрүмүз боју вар ҝүҹүмүзлә Јараданымыза хидмәт етмәклә миннәтдарлығымызы билдирмәјә тәшвиг олунуруг (Ваиз 12:13).
ЈАШЛЫЛЫҒЫН ҜӘТИРДИЈИ НАДИР ИМКАНЛАР
4. Һәјат тәҹрүбәси олан мәсиһчиләр өзләринә һансы суалы верә биләрләр вә нә үчүн?
4 Чохлу һәјат тәҹрүбәси олан јеткин бир инсан кими өзүнүзә белә бир суал верә биләрсиниз: «Нә гәдәр ки, ҝүҹүм вар, һәјатымы нәјә һәср едим?» Дүнја ҝөрмүш бир мәсиһчи кими сизин гаршынызда башгаларынын малик олмадығы имканлар вар. Һәјат тәҹрүбәнизи ҝәнҹләрлә бөлүшә биләрсиниз. Хидмәтдә растлашдығыныз руһландырыҹы һадисәләр барәдә данышмагла онлары мөһкәмләндирә биләрсиниз. Давуд падшаһ белә бир имканынын олмасы үчүн Аллаһа дуа едирди. О дејирди: «Еј Аллаһ, ҝәнҹлијимдән бәри мәнә тәлим вермисән... Јаша долуб сачыма дән дүшәнә гәдәр ҝәләҹәк нәслә гүввәтини, ҝәләҹәк нәслин һәр биринә гүдрәтини елан едәҹәјәм. Еј Аллаһ, мәни тәрк етмә» (Мәз. 71:17, 18).
5. Јаша долмуш мәсиһчиләр өјрәндикләрини башгалары илә неҹә бөлүшә биләрләр?
5 Узун илләр әрзиндә газандығыныз мүдриклији башгалары илә неҹә бөлүшә биләрсиниз? Руһландырыҹы үнсијјәт үчүн ҝәнҹ тәблиғчиләри евинизә дәвәт едә биләрсинизми? Тәблиғдә онларла әмәкдашлыг едәрәк Јеһоваја хидмәтин сизә неҹә севинҹ ҝәтирдијини ҝөстәрә биләрсинизми? Гәдимдә јашамыш Елиһу демишди: «Гој данышсын чох узун өмүр сүрәнләр, гој һикмәт өјрәтсин чох илләрин шаһидләри» (Әјјуб 32:7). Һәвари Павел тәҹрүбәли мәсиһчи гадынлары һәм сөздә, һәм дә әмәлдә башгаларыны руһландырмаға тәшвиг едәрәк демишди: «Ағбирчәкләр... јахшы шејләр өјрәтмәлидирләр» (Тит. 2:3).
ПОТЕНСИАЛЫНЫЗДАН БАШГАЛАРЫНА КӨМӘК ЕТМӘК ҮЧҮН ИСТИФАДӘ ЕДИН
6. Нә үчүн чохлу һәјат тәҹрүбәси олан мәсиһчиләр өз потенсиалларына әһәмијјәтсиз јанашмамалыдырлар?
6 Әҝәр сиз тәҹрүбәли мәсиһчисинизсә, демәли, бөјүк потенсиала маликсиниз. Мәсәлән, сиз һал-һазырда дәрк етдијиниз шејләри 30 вә ја 40 ил бундан габаг билмирдиниз. Инди сиз мәһарәтлә Мүгәддәс Китаб принсипләрини өз һәјатыныза тәтбиг едә билирсиниз. Шүбһәсиз, Мүгәддәс Китаб васитәсилә башгаларынын үрәјинә јол тапмағы јахшы баҹарырсыныз. Әҝәр сиз ағсаггалсынызса, сәһв аддым атан гардашлара неҹә көмәк етмәји билирсиниз (Галат. 6:1). Ола билсин, сиз јығынҹағын ишләринә, конгреслә бағлы тәдбирләрә вә ја Падшаһлыг залынын тикинтисинә нәзарәт етмәк үчүн тәлим алмысыныз. Јахуд да һәкимләри кејфијјәтли гансыз мүалиҹә үсуллары тәтбиг етмәјә тәшвиг едә билирсиниз. Һәтта һәгигәти тәзәликҹә өјрәнсәниз дә, сизин дәјәрли һәјат тәҹрүбәниз вар. Мәсәлән, әҝәр сиз өвлад бөјүтмүсүнүзсә, демәли, чохлу практики мүдриклијә саһибсиниз. Јашлы мәсиһчиләр баҹы-гардашлара тәлим вермәк, рәһбәрлик етмәк вә мөһкәмләндирмәклә Јеһованын халгы үчүн әсил руһланма мәнбәјидирләр. (Әјјуб 12:12 ајәсини оху.)
7. Јашлы мәсиһчиләр ҝәнҹләрә неҹә көмәк едә биләрләр?
7 Сиз өз потенсиалыныздан даһа неҹә истифадә едә биләрсиниз? Сиз ҝәнҹләрә Мүгәддәс Китаб өјрәнмәсинә башламағын вә ону кечирмәјин үсулуну ҝөстәрә биләрсиниз. Јахуд бир баҹы кими, ҝәнҹ аналара ушагларыны тәрбијәләндирәркән руһани тапшырыглары јеринә јетирмәкдә көмәк едә биләрсиниз. Ја да бир гардаш кими, ҝәнҹ гардашлара шөвглә чыхыш етмәји вә хош хәбәрин тәблиғиндә даһа еффектив олмағы өјрәдә биләрсиниз. Аһыл јашда олан баҹы-гардашлары руһландырмаг үчүн неҹә баш чәкдијинизи ҝәнҹ гардашлара ҝөстәрә биләрсиниз. Бүтүн бунлары етмәјә ҝүҹүнүз чатмаса да, ҝәнҹләрә тәлим вермәк үчүн ҝөзәл имканларыныз вар. Аллаһын Кәламында дејилир: «Ҝәнҹләри гүввәти шәрәфләндирәр, ағ сачлар гоҹалара зинәт верәр» (Сүл. мәс. 20:29).
ДАҺА ЧОХ ТӘЛӘБАТ ОЛАН ЈЕРДӘ ХИДМӘТ ЕДИН
8. Һәвари Павел јашлы вахтында нәләр етмишди?
8 Һәвари Павел јашлы вахтында Аллаһа хидмәт етмәк үчүн өзүнүн бүтүн потенсиалындан истифадә етмишди. Ерамызын тәхминән 61-ҹи илиндә Ромада азадлыға бурахылана кими Павел артыг узун илләр асан олмајан сәјјар хидмәтдә тәҹрүбә топламышды вә о, Ромада мәскунлашыб тәблиғини давам етдирә биләрди (2 Кор. 11:23—27). Бу бөјүк шәһәрдә јашајан гардашлар, шүбһәсиз, онун даими дәстәјини гијмәтләндирәҹәкдиләр. Лакин Павел ҝөрдү ки, диҝәр әразиләрдә даһа чох тәләбат вар. Тимотеј вә Титусла бирликдә сәјјар фәалијјәтинә давам етди, Ефесә, орадан Критә, сонра исә, ола билсин, Македонијаја сәјаһәт етди (1 Тим. 1:3; Тит. 1:5). Биз билмирик, о, Испанијаја ҝетди ја јох, анҹаг о, буну планлашдырырды (Ром. 15:24, 28).
9. Петер хидмәт етмәк үчүн тәләбат олан әразијә нә вахт көчмүшдү? (Мәгаләнин әввәлиндәки шәклә бах.)
9 Һәвари Петер тәләбат олан әразијә көчәндә, ола билсин, јашы 50-дән чох иди. Буну нәјә әсасән дејә биләрик? Әҝәр о, Исанын һәмјашыды, јахуд јашда ондан бир аз бөјүк идисә, демәли, ерамызын 49-ҹу илиндә Јерусәлимдә диҝәр һәвариләрлә ҝөрүшәндә о, тәхминән 50 јашларында оларды (Һәв. иш. 15:7). Бу ҝөрүшдән бир гәдәр сонра Петер, чох еһтимал ки, Бабилдә јашајан чохсајлы јәһудиләрә тәблиғ етмәк үчүн ора көчдү (Галат. 2:9). О, ерамызын тәхминән 62-ҹи илиндә илк илһамланмыш мәктубуну јазаркән орада јашајырды (1 Пет. 5:13). Јад өлкәдә јашамаг чәтин олса да, Петер јол вермәди ки, јашынын чох олмасы Јеһоваја там шәкилдә хидмәтин ҝәтирдији севинҹи әлиндән алсын.
10, 11. Роберт вә арвады јашлы вахтларында һансы аддымлары атдылар?
10 Бу ҝүн 50 вә ондан јухары јашда олан бир чох мәсиһчиләр шәраитләринин дәјишдијини ҝөрүб Јеһоваја јени үсулларла хидмәт едирләр. Бәзиләри тәләбат олан әразиләрә көчмүшләр. Робертлә һәјат јолдашы да гаршыларында чохлу јени имканлар ачылдығыны анлајанда тәхминән 55 јашында идиләр. Роберт јазыр: «Бизим ҹәми бир оғлумуз вар, о да ајры јашајыр вә артыг өһдәмиздә гајғысына галмалы олдуғумуз валидејнләримиз јохдур, үстәлик, бизә балаҹа бир мирас галыб. Мән һесабладым ки, евимизи сатсаг, онун пулу илә борҹумузу өдәјә вә әмәк тәгаүдүнә чыхана кими долана биләрик. Биз ешитдик ки, Боливијада Мүгәддәс Китабы өјрәнмәк истәјән инсанлар чох, орада јашамағын хәрҹи исә аздыр. Буна ҝөрә дә ора көчмәк гәрарына ҝәлдик. Јени евимизә алышмаг елә дә асан олмады. Һәр шеј Шимали Америкадакы шәраитимиздән олдугҹа фәргләнирди. Амма вердијимиз гурбанларын әвәзини артыгламасы илә алдыг».
11 Роберт әлавә едир: «Инди биз бүтүн вахтымызы анҹаг јығынҹағын ишләринә сәрф едирик. Мүгәддәс Китабы өјрәтдијимиз инсанлардан бәзиләри артыг вәфтиз олунублар. Биз һәмчинин бир нечә километр аралыда јерләшән кәнддә касыб бир аилә илә Мүгәддәс Китаб өјрәнмәси кечирирдик. Амма бу аиләнин һәр бир үзвү һәр һәфтә јығынҹагда иштирак етмәк үчүн чәтин јол гәт едир. Бу аиләнин руһани инкишафыны вә һәтта бөјүк оғулун пионер хидмәтинә башладығыны ҝөрмәк олдугҹа севиндириҹидир».
ӘҸНӘБИДИЛЛИ ӘРАЗИЛӘРДӘ ТӘЛӘБАТ
12, 13. Тәгаүдә чыхдыгдан сонра јени хидмәт нөвүндә иштирак едән мәсиһчинин нүмунәсини данышын.
12 Әҹнәбидилли јығынҹаглар вә груплар јашлы баҹы-гардашларын нүмунәсиндән чохлу фајда әлдә едә биләрләр. Һәмчинин белә әразидә хидмәт етмәк бөјүк севинҹ ҝәтирә биләр. Мәсәлән, Бөјүк Британијадан олан Брајн јазыр: «65 јашымда тәгаүдә чыханда арвадымла мән раһат нәфәс ала билдик. Ушагларымыз артыг бизимлә јашамырды вә Мүгәддәс Китабы өјрәнмәк истәјән инсанлары тәк-түк һалларда тапырдыг. Бир мүддәтдән сонра мән јерли университетдә тәдгигат апаран ҝәнҹ бир чинли илә растлашдым. О, јығынҹаға ҝәлмәк дәвәтини гәбул етди вә мән онунла Мүгәддәс Китабы арашдырмаға башладым. Бир нечә һәфтәдән сонра о, бир чинли әмәкдашыны өзү илә ҝәтирмәјә башлады. Ики һәфтәдән сонра икинҹи, даһа сонра исә үчүнҹү әмәкдашыны ҝәтирди.
13 Елә һәмин вахтлар бешинҹи чинли тәдгигатчы Мүгәддәс Китабы өјрәнмәк истәдијини билдирди. Мән өз-өзүмә фикирләшдим: “65 јашымын олмасы һеч дә о демәк дејил ки, Јеһоваја хидмәтдән дә тәгаүдә чыхмалыјам”. Бу сәбәбдән, мәндән ики јаш кичик олан һәјат јолдашымдан чин дилини өјрәнмәк истәјиб-истәмәдијини сорушдум. Биз курса јазылдыг. Бунун үстүндән он ил кечиб. Әҹнәбидилли әразидә хидмәт етмәклә өзүмүзү јенидән ҝәнҹ һисс етмәјә башладыг. Бу гәдәр вахт әрзиндә биз 112 чинли илә Мүгәддәс Китабы арашдырмышыг. Онларын әксәријјәти јығынҹаг ҝөрүшләриндә иштирак едир. Онлардан бири һал-һазырда бизимлә бирҝә пионер кими хидмәт едир».
Ола билсин, сиз о гәдәр дә гоҹа дејилсиниз ки, хидмәтинизи ҝенишләндирә билмәјәсиниз (12, 13-ҹү абзаслара бах)
ҜҮҸҮНҮЗ ЧАТАНЫ ЕДИН
14. Јашлы мәсиһчиләр нәји унутмамалыдырлар вә Павелин нүмунәси онлары неҹә руһландыра биләр?
14 Јашы 50-ни кечмиш бүтүн мәсиһчиләрин Јеһоваја хидмәтдә јени ишләр ҝөрмәк имканы олмур. Онлардан бәзиләринин сағламлығы әл вермир, диҝәрләринин һимајәсиндә јашлы валидејнләри вә ја ушаглары вар. Амма унутмајын ки, Јеһова Она хидмәтдә ҝөстәрдијиниз һәр бир сәји гијмәтләндирир. Буна ҝөрә дә ҝүҹүнүз чатмајан шејләрә ҝөрә өзүнүзү јејиб-битирмәјин, әксинә, ҝүҹүнүз чатаны един. Һәвари Павелин нүмунәси үзәриндә дүшүнүн. О, илләр әрзиндә ев дустағы олуб вә тәблиғ сәјаһәтләрини давам етдирә билмәјиб. Бунунла белә, о, јанына ҝәлән һәр бир адамла Мүгәддәс Јазылар барәдә сөһбәт едир вә иманларыны мөһкәмләндирирди (Һәв. иш. 28:16, 30, 31).
15. Нә үчүн аһыл јашда олан мәсиһчиләр олдугҹа дәјәрлидир?
15 Јеһова аһыл јашда олан мәсиһчиләрин дә Она хидмәтдә етдикләрини гијмәтләндирир. Сүлејман јашлылығын өзү илә ҝәтирдији пис ҝүнләрин һеч дә һәјатын ән јахшы анлары олмадығыны десә дә, аһыл јашда олан мәсиһчиләрин Она һәмд етмәк үчүн ҝөрдүкләри һәр бир иш Јеһова үчүн дәјәрлидир (Лука 21:2—4). Јығынҹагдакы баҹы-гардашлар узун илләр Јеһоваја сәдагәтлә хидмәт едәнләри гијмәтләндирир.
16. Јашлы Аннаја һансы имканлары дадмаг нәсиб олмамышды, амма о, Аллаһа ибадәтдә нә едә билмишди?
16 Мүгәддәс Китабда Анна адлы јашлы бир гадынын Јеһоваја сәдагәтлә һәмд етдијиндән бәһс едилир. Иса доғуланда бу дул гадынын 84 јашы варды. Ҝөрүнүр, онун өмрү Исанын давамчысы олмаға, мүгәддәс руһла мәсһ едилмәјә вә ја Падшаһлыг һаггында хош хәбәрин тәблиғчиси олмаға чатмады. Бунунла белә, Анна ҝүҹү нәјә чатырдыса, ону едирди. «О, һеч вахт мәбәддән ајрылмыр... ҝеҹә-ҝүндүз ибадәт едирди» (Лука 2:36, 37). Каһин һәр сәһәр вә ахшам мәбәддә бухур тәгдим едәндә Анна халгла бирҝә мәбәдин ич һәјәтиндә дуруб, еһтимал ки, јарым саат үрәјиндә дуа едирди. О, көрпә Исаны ҝөрәндә «Јерусәлимин гуртулушуну ҝөзләјәнләрә ушаг һаггында данышмаға башлады» (Лука 2:38).
17. Јашлы вә тагәтдән дүшмүш мәсиһчиләрә һәгиги ибадәти дәстәкләмәјә неҹә көмәк едә биләрик?
17 Бу ҝүн биз јашлы вә тагәтдән дүшмүш мәсиһчиләрә көмәк етмәјә һазыр олмалыјыг. Бәзиләри јығынҹаг ҝөрүшләриндә вә конгресләрдә иштирак етмәји үрәкдән истәсәләр дә, онлар буну һәмишә едә билмирләр. Бәзи јерләрдә бу ҹүр јашлы баҹы-гардашларын јығынҹаг ҝөрүшләринә телефон васитәсилә гулаг асмасы үчүн тәдбирләр ҝөрүлүр. Диҝәр јерләрдә исә бу, мүмкүн олмаја биләр. Һәр бир һалда јығынҹаг ҝөрүшләринә ҝәлә билмәјәнләр һәгиги ибадәти дәстәкләјә биләрләр. Мәсәлән, онларын дуалары јығынҹағын чичәкләнмәсинә көмәк едә биләр. (Мәзмур 92:13, 14 ајәләрини оху.)
18, 19. а) Нә үчүн јашлы мәсиһчиләр башгаларыны нә гәдәр руһландырдыгларыны ағылларына белә ҝәтирә билмәзләр? б) «Сәни јараданы хатырла», — мәсләһәтинә кимләр әмәл едә биләр?
18 Јашлы мәсиһчиләр башгаларыны нә гәдәр руһландырдыгларыны ағылларына белә ҝәтирә билмәзләр. Мәсәлән, Анна узун илләр әрзиндә мәбәддә сәдагәтлә хидмәт етсә дә, һеч ағлына белә ҝәтирә билмәзди ки, әсрләр сонра онун нүмунәси башгаларыны руһландыраҹаг. Аннанын Јеһоваја олан мәһәббәти Мүгәддәс Јазыларда гәләмә алыныб. Шүбһәсиз, сизин дә Аллаһа мәһәббәтиниз һәмиманлыларынызын үрәкләринә һәкк едилир. Аллаһын Кәламында: «Ағаран сачлар шәрәф таҹыдыр, салеһлик јолунун газанҹыдыр», — сөзләринин јазылмасы һеч дә тәәҹҹүблү дејил (Сүл. мәс. 16:31).
19 Јеһоваја хидмәтдә һәр биримизин өз мәһдудијјәтләри вар. Бунунла белә, гој ҹанында ҝүҹү олан һәр бир кәс бу илһамланмыш сөзләри үрәјинә һәкк етсин: «Пис ҝүнләр ҝәлмәздән габаг... сәни Јараданы хатырла» (Ваиз 12:1).