Һәгигәт ахтарышында

Мин илләр әрзиндә һеч кәс бу суалын ҹавабыны билмәјиб. Бу сәбәбдән хәстәликләр милјонларла инсанын һәјатына сон гојуб. Нәһајәтдә, алимләр һәгигәти ашкара чыхармаға мүвәффәг олублар. Онлар ашкар едибләр ки, хәстәликләрә, әксәрән, микроблар, јәни бактерија вә вирус кими микроорганизмләр сәбәб олур. Тәкҹә бу һәгигәти билмәк бир чох хәстәликләрин гаршысыны алмаға вә онлары мүалиҹә етмәјә көмәк едир. Бунун да сајәсиндә, милјардларла инсан даһа узун вә даһа сағлам өмүр сүрүр.

Бәс башга ваҹиб суаллар барәдә нә демәк олар? Сизҹә, нөвбәти суалларын дүзҝүн ҹавабыны билмәк һәјатыныза неҹә тәсир едә биләр?

• Аллаһы јахындан таныјырыг?

• Иса Мәсиһ һаггында нә билирик?

• Аллаһын Падшаһлығы нәдир?

• Бизи ҝәләҹәкдә нә ҝөзләјир?

Милјонларла инсан бу суалларын ҹавабыны тапыб вә инди даһа хошбәхт һәјат сүрүрләр. Бу суалларын ҹавабыны билмәк сизин дә һәјатынызы мәналы едә биләр.

ҺӘГИГӘТИ ТАПМАГ МҮМКҮНДҮР?

Бәлкә дә, инанмырсыныз ки, бу зәманәдә нәјинсә һаггында һәгигәти билмәк мүмкүндүр. Ахы чох шеј барәдә һәгигәти өјрәнмәк ҝет-ҝедә чәтинләшир. Нијә?

Чохлары һөкумәтин, бизнес аләминин, күтләви информасија васитәләринин һәгигәти сөјләдијинә инанмыр. Инсанлар ајырд едә билмирләр, онлара тәгдим олунан мәлумат һәгигәтдир, јохса киминсә субјектив фикридир, јары ҝерчәк, јары һәгигәтдир, јохса тамамилә ағ јаландыр. Етибарсызлыг вә јаланын һөкм сүрдүјү белә бир мүһитдә инсанлар нәинки фактларын шәрһиндә, һәтта үмумијјәтлә нәјин факт олдуғунда јекдил фикрә ҝәлә билмирләр.

Бүтүн бунлара бахмајараг, һәјатын ән ваҹиб суалларына дүзҝүн ҹаваб тапмаг мүмкүндүр. Неҹә? Башга суалларымыза ҹаваб тапмаг үчүн тәтбиг етдијимиз үсуллардан истифадә етмәклә.

СИЗИН АХТАРЫШЛАРЫНЫЗ

Мүәјјән мәнада сиз һәр ҝүн һәгигәт ахтарышындасыныз. Мәсәлән, Ҹесика адлы бир гадын дејир: «Мәним гызымын јерфындығына аллерҝијасы о гәдәр шиддәтлидир ки, һәтта јерфындығынын тәркибиндәки зүлалын ҹүзи мигдары белә, онун үчүн өлүмҹүл ола биләр». Ҹесика гызына ҝөрә алдығы әрзаглары һәмишә јохлајыр. О дејир: «Мән әввәлҹә мәһсулун тәркибини диггәтлә охујурам. Сонра бир аз да әлавә мәлумат топлајырам, һәтта фабрикдә мәһсула тәсадүфән јерфындығы зүлалынын гатылыб-гатылмадығыны өјрәнмәк үчүн истеһсалчы ширкәтлә әлагә сахлајырам. Һәмчинин истеһсалчы ширкәтин мәһсулун һазырланмасында тәһлүкәсизлик гајдаларына нә дәрәҹәдә риајәт етдијини диҝәр мөтәбәр мәнбәләрдән дә өјрәнирәм».

Бәлкә дә, сизи һәр ҝүн нараһат едән мәсәләләр Ҹесиканы нараһат едән мәсәлә кими, өлүм-дирим мәсәләси дејил. Амма сиз дә Ҹесика кими, суалларыныза ҹаваб тапмаг үчүн нөвбәти аддымлары ата биләрсиниз.

• Фактларла таныш олун.

• Әлавә мәлумат топлајын.

• Мәнбәнин мөтәбәрлијини јохлајын.

Бу аддымлар сизә һәјатын ваҹиб суалларына дүзҝүн ҹаваб тапмаға көмәк едәҹәк. Ҝөрәк неҹә.

ҺӘГИГӘТ КӘЛАМЫ

Ҹесика гызы үчүн әрзаг аларкән неҹә ахтарыш апарырса, Мүгәддәс Китабдакы һәгигәти ахтараркән дә ејни ҹүр давранды. О дејир: «Охумаг, дәрин арашдырма апармаг мәнә Мүгәддәс Китабдакы һәгигәти тапмаға көмәк етди». Ҹесика кими, милјонларла инсан Мүгәддәс Китабын нөвбәти суаллара неҹә ҹаваб вердијини өјрәниб:

• Һәјатын мәнасы нәдәдир?

• Өлүмдән сонра һәјат вармы?

• Әзаб-әзијјәтин сәбәби нәдир?

• Аллаһ әзаблара сон гојмаг үчүн нә едәҹәк?

• Аиләмизин хошбәхтлији үчүн нә едә биләрик?

Мүгәддәс Китабы охујараг вә www.jw.org сајтында ахтарыш апарараг бу вә диҝәр суалларын дүзҝүн ҹавабыны тапа биләрсиниз.