Јеһова вә Оғлу илә достлуғумуза севинирик
Илин ән мүһүм һадисәси мартын 28–дә гејд едиләҹәк
1 Рәббин Хатирә Ҝеҹәсини 2002–ҹи ил март ајынын 28–дә ҝүнәшин батмасындан сонра гејд етмәклә, Јеһова Аллаһ вә Иса Мәсиһлә олан достлуғумуза севиндијимизи ҝөстәрәҹәјик. Бу хүсуси бајрам заманы, мәсһ едилмиш мәсиһчиләрин галығы һәм Падшаһлығын диҝәр варисләри илә, һәм дә Ата вә Оғулла “мүштәрәк” олдугларыны һисс едә биләрләр (1 Јәһ. 1:3, И–93; Ефес. 1:11, 12). Милјонларла “башга гојунлар” исә Јеһова вә Онун Оғлу илә олан гијмәтли мүнасибәтләри, һәмчинин онларла бирликдә Аллаһын ирадәсини иҹра етмәк кими ҝөзәл имканлары үзәриндә дүшүнә биләрләр (Јәһ. 10:16).
2 Јахын әмәкдашлар. Јеһова вә Иса јахын мүнасибәтләринә һәмишә севинмишләр. Онлар, инсанын јарадылмасындан минилликләр өнҹә јахын үнсијјәтдән һәзз алырдылар (Мика 5:2). Беләликлә дә онлар арасындакы зәриф бағлылыг телләри мөһкәмләнирди. Мүдриклијин тәҹәссүмү олан илкин Оғул инсан кими мөвҹудлуғундан әввәл дејә билмишди: “Ме’мар олараг онун јанында идим; вә һәр ҝүн онун севинҹи идим. Һәр вахт онун өнүндә севинирдим” (Сүл. мәс. 8:30). Сајсыз–һесабсыз әсрләр әрзиндә мәһәббәт Мәнбәји илә сых үнсијјәт Аллаһын Оғлуна дәрин тә’сир ҝөстәрмишдир! (1 Јәһ. 4:8).
3 Инсанларын ҝүнаһларынын бағышланмасына еһтијаҹ дујдугларыны хатырлајараг, Јеһова бәшәр өвладларына хүсуси мәһәббәт дујан јеҝанә Оғлуну сечди вә бизим үчүн јеҝанә үмид олан фидијә гурбаны кими тәгдим етди (Сүл. мәс. 8:31). Јеһова вә Оғлу бир нијјәтин иҹрасында әмәкдашлыг етдикләри кими, мәһәббәтин мөһкәм бағлары илә бирләшән бизләр дә Аллаһын ирадәсини севинҹлә јеринә јетирәркән һәм онларла, һәм дә бир–биримизлә әмәкдашлыг едирик.
4 Дәрин миннәтдарлығымызы билдирәк. Хатирә Ҝеҹәсинә ҝәлмәклә, һәмчинин сөјләнилән мә’рузәни диггәтлә вә еһтирамла динләмәклә, Јеһованын мәһәббәтинә, о ҹүмләдән Оғлунун гурбанлығына ҝөрә дәрин миннәтдарлығымызы ҝөстәрәҹәјик. Биз, Исанын мәһәббәт нүмунәси һаггында, онун садиглији, өлүмү вә фидијә кими тәгдим олунмасы, Аллаһын гурулмуш Падшаһлығында падшаһ тимсалында тутдуғу мөвге, еләҹә дә бу Падшаһлығын бәшәријјәтә ҝәтирәҹәји хејир–дуалар һаггында ешидәҹәјик. Бизә һәмчинин “һәгигәт уғрунда һәмкар”лар кими Јеһованын ирадәсини јеринә јетирәркән даима иманымызы јохламағын ваҹиблији һагда да хатырладаҹаглар (3 Јәһ. 8; Јаг. 2:17).
5 Бизә гошулмагда башгаларына көмәк едәк. Ағсаггаллар шурасы әсас диггәти она јөнәлтмәлидирләр ки, јығынҹағын әразисиндә јашајан бүтүн гејри–фәал Шаһидләри, Мәсиһин өлүмүнүн Хатирә Ҝеҹәсинә ҝәлмәјә тәшвиг етсинләр (Мат. 18:12, 13). Һеч кими унутмамаг вә һәр бир кәси шәхсән дә’вәт етмәк үчүн, чағырыласы адамларын сијаһысыны тутун.
6 Хатирә Ҝеҹәсинә ҝәлә биләҹәк башга кимләри таныјырсыныз? Тәшәббүс ҝөстәрин вә бу бајрамын ваҹиблијини анламагда онлара көмәк един. Онлары сәмимиликлә дә’вәт един вә өзләрини арзу едилән гонаг кими һисс етмәләри үчүн әлиниздән ҝәләни един. Ҝәлин, илин бу ән ваҹиб һадисәсинә Мүгәддәс Китабы өјрәнәнләрин һамысыны, бүтүн мараглананлары, һәмчинин онларын аилә үзвләрини вә танышларыны дә’вәт етмәк үчүн вар гүввәмизлә чалышаг. “Мәсиһ Исаны танымағын үстүн дәјәри”ни әлдә едәнләрин һамысы фидијә гурбанлығындан фајдаланаҹаглар (Филип. 3:8). Мәсиһин гурбанлығына иман ҝәтирәнләр әбәди һәјата мөһкәм үмид әлдә едәҹәкләр (Јәһ. 3:16).
7 Хатирә Ҝеҹәсинин ачыг үрәкли инсанлара ҝөстәрәҹәји тә’сири гијмәтләндирмәмәк олмаз. Ики ил өнҹә, Папуа–Јени Гвинеја адаларында һәгигәтлә марагланан 11 адам, Хатирә Ҝеҹәсиндә иштирак етмәк үчүн балаҹа гајыгла ҹошғун дәниздә 17 саат үзмүшләр. Нәјә ҝөрә? Онлар изаһ едирләр: “Биз, Мәсиһин өлүмүнүн Хатирә Ҝеҹәсини, Јеһоваја иман ҝәтирән башга һәмиманлыларла бирҝә гејд етмәк истәјирдик вә бизим сәјаһәтимиз өзүнү бүтүнлүклә доғрултду”. Марагланан бу инсанларын ҝөстәрдикләри сә’ј, һәмчинин Јеһова, Онун Оғлу вә мәсиһчи гардашлығы илә јахын мүнасибәтләриндән дујдуглары севинҹ үзәриндә дүшүнүн!
8 Мараг ҝөстәрән һәр бир кәсә Мүгәддәс Китаб өјрәнмәси тәклиф един. Онлары, мүнтәзәм олараг јығынҹаглара ҝәлмәјә вә өјрәндикләри һәгигәти башгалары илә бөлүшмәјә тәшвиг един. Онлара “нурда” ҝәзмәјә вә “һәгигәти тәтбиг” етмәјә көмәк един (1 Јәһ. 1:6, 7). Јеһова илә јахын мүнасибәт инкишаф етдирмәкдә вә халгы илә бирликдә Онун ирадәсини јеринә јетирмәк имканыны гијмәтләндирмәкдә онлара көмәклик ҝөстәрин.
9 “Руһда сабит” дуруб, “Мүждәјә иман үчүн јекдилликлә сә’ј” ҝөстәрмәк неҹә дә тәәҹҹүб доғуран шәрәфдир! (Филип. 1:27, 28). Ҝәлин, мартын 28–дә кечириләҹәк Хатирә Ҝеҹәсиндәки хош достлуг үнсијјәтини сәбирсизликлә ҝөзләјәк, Јеһоваја вә Онун Оғлуна даима миннәтдар олаг! (Лука 22:19).