Тәвазөкарлығы ҝејинин
1 Ҝәнҹ чобан тамамилә Јеһоваја ҝүвәнәрәк ҝүҹлү бир ҹәнҝавәри мәғлуб едир (1 Сам. 17:45-47). Зәнҝин бир адам башына ҝәлән бәдбәхтликләрә сәбирлә таб ҝәтирир (Ејуб 1:20-22; 2:9, 10). Аллаһын Оғлу вердији тә’лим үчүн бүтүн иззәти Атасына верир (Јәһ. 7:15-18; 8:28). Бу нүмунәләрин һәр бириндә тәвазөкарлыг ваҹиб рол ојнамышдыр. Бу кејфијјәт бу ҝүн бизим үчүн дә һәјати ваҹибдир (Колос. 3:12).
2 Тәблиғдә. Мәсиһин шаҝирдләри олан бизләр инсанларын ирги мәнсубијјәтинә, мәдәнијјәтинә вә мәншәјинә ҝөрә онлара јүксәкдән бахмырыг, тәвазөкарлыгла хош хәбәри онлара данышырыг (1 Кор. 9:22, 23). Әҝәр кимсә Падшаһлыг һаггындакы хәбәри динләмәк истәмәјәрәк кобудлуг вә тәкәббүрлүк ҝөстәрирсә, биз онлара ејнилә ҹаваб вермирик, әксинә, сәбирлә ләјагәтли оланлары ахтармаға давам едирик (Мат. 10:11, 14). Биз билијимиз вә ја тәһсилимизлә инсанларда тәәссүрат јаратмаға чалышмырыг. Биз садәҹә олараг онлара Мүгәддәс Китабын нә дедијини ҝөстәририк, бу исә бизим дедикләримиздән даһа инандырыҹыдыр (1 Кор. 2:1-5; Ибр. 4:12). Иса кими биз дә бүтүн иззәти Јеһоваја веририк (Марк 10:17, 18).
3 Јығынҹагда. Һәмчинин мәсиһчиләр ‘бир-биринә табе олараг тәвазөкарлыг палтарыны ҝејинмәлидирләр’ (1 Пет. 5:5). Әҝәр башгаларыны өзүмүздән үстүн тутуругса, онда гардашларымызын бизә хидмәт етмәләрини ҝөзләмәдән өзүмүз онлара хидмәт етмәјә чалышаҹағыг (Јәһ. 13:12-17; Филип. 2:3, 4). Мисал үчүн, биз елә дүшүнмәјәҹәјик ки, Падшаһлыг Залыны тәмизләмәк иши бизим үчүн дејил.
4 Тәвазөкарлыг ‘бир-биримизә мәһәббәтлә тәһәммүл етмәкдә’ вә бунунла да јығынҹагда сүлһү вә бирлији горумагда бизә көмәк едир (Ефес. 4:1-3). Тәвазөкарлыг бизә үзәринә рәһбәрлик ҝөтүрмәк үчүн тә’јин олунмуш кәсләрә табе олмагда көмәк едир (Ибр. 13:17). Бу кејфијјәт тәшвиг едир ки, мәсләһәт вә өјүдләри гәбул едәк (Мәз. 141:5). Тәвазөкарлыг һәмчинин јығынҹагда һәр һансы бир тапшырығы јеринә јетирдијимиз заман бизи Јеһоваја ҝүвәнмәјә тәшвиг едир (1 Пет. 4:11). Давуд кими биз дә дәрк едирик ки, наилијјәтләр инсан габилијјәтиндән јох, Аллаһын хејир-дуасындан асылыдыр (1 Сам. 17:37).
5 Аллаһ гаршысында. Һәр шејдән өнҹә биз “Аллаһын ҝүҹлү әлинин һимајәси алтында тәвазөкар” олмалыјыг (1 Пет. 5:6). Чәтин вәзијјәтләрдә оларкән, јәгин ки, Аллаһын Падшаһлығынын бизи тезликлә проблемләрдән азад етмәсини арзулајырыг. Лакин биз тә’јин олунмуш вахтда Јеһованын Өз вә’дләрини јеринә јетирәҹәјини ҝөзләјәрәк, тәвазөкарлыгла тәһәммүл етмәјә давам едирик (Јаг. 5:7-11). Јеһоваја садиг галан Ејуб кими биз дә һәр шејдән чох истәјирик ки, “Рәббин [“Јеһованын”, ЈД] исми мүбарәк олсун” (Ејуб 1:21).
6 Даниел пејғәмбәр ‘Аллаһынын өнүндә өзүнү алчалтдығы’ үчүн Јеһова ону јүксәк гијмәтләндирир вә бол-бол хејир-дуаландырырды (Дан. 10:11, 12). Ҝәлин, биз дә “тәвазөкар олмағын вә Рәбб горхусунун сону сәрвәт, иззәт вә һәјат” олдуғуну биләрәк тәвазөкарлығы ҝејинәк! (Сүл. мәс. 22:4).