Јени хидмәт или үчүн дәјәрли мәгсәд

1. Јени хидмәт илиндә гаршымыза һансы мәгсәди гоја биләрик?

¹ Руһән инкишаф етмәк истәјириксә, гаршымыза мәгсәдләр гојмалыјыг. Јени хидмәт или үчүн шәхсән сәнин һансы мәгсәдләрин вар? Ән ҝөзәл мәгсәд, бир вә ја бир нечә ај көмәкчи пионер кими хидмәт етмәкдир. Бу севинҹ ҝәтирән фәалијјәт олдуғундан бә’зи шејләри адәтән габагҹадан планлашдырмаг тәләб олунур, буну дүшүнмәк үчүн инди јахшы вахтдыр. Нәјә ҝөрә көмәкчи пионер хидмәтинә мәгсәд кими јанашмалыјыг?

2. Көмәкчи пионер олмағы гаршымыза мәгсәд гојмаг үчүн һансы сәбәбләримиз вар?

² Көмәкчи пионер олмаг үчүн сәбәбләр. Көмәкчи пионер олмаг бизә көмәк едир ки, хидмәтә даһа чох вахт сәрф едәрәк сәмави Атамызы «даһа чох» севиндирәк (1 Салон. 4:1). Јеһованын бизим үчүн етдикләрини нәзәрдән кечирдикдә, үрәјимиз бизи Онун һаггында башгаларына данышмаға тәшвиг едир (Мәз. 34:1, 2). Хидмәтдә даһа чох иштирак етмәк наминә вердијимиз шәхси гурбанлары Јеһова нәзәрә алыр вә дәјәрләндирир (Ибр. 6:10). Сә’јлә чалышмағымызын Јеһованы мәмнун етдијини билмәк бизә бөјүк севинҹ бәхш едир (1 Салн. 29:9).

3, 4. Көмәкчи пионер хидмәтиндән неҹә фајдалана биләрик?

³ Адәтән бир ишлә чох мәшғул оланда һәмин иш асанлашыр вә даһа чох севинҹ ҝәтирир. Хидмәтә чох вахт сәрф етмәклә, евдән-евә тәблиғ заманы өзүнү даһа раһат һисс едәҹәксән. Сән башгалары илә сөһбәт етмәкдә вә Мүгәддәс Китабдан истифадә етмәкдә даһа сәриштәли олаҹагсан. Аллаһа иманын барәдә нә гәдәр чох данышарсанса, иманын да бир о гәдәр мөһкәм олаҹаг. Мүгәддәс Китаб өјрәнмәси олмајан бир чох мәсиһчиләр, көмәкчи пионер кими хидмәт етдикләри вахт әрзиндә өјрәнмәјә башламышлар.

⁴ Көмәкчи пионер хидмәти, һәмчинин руһани сүстлүјүн өһдәсиндән ҝәлмәјә дә көмәк едир. Вахтилә даими пионер олан бир гардаш дүнјәви ишә чох вахт сәрф етдијини һисс етмиш вә бир ај көмәкчи пионер кими хидмәт етмәји гәрара алмышдыр. О дејир: «Инана билмирдим ки, һәмин бир ај мәни руһән бу гәдәр гүввәтләндирсин! Мән фасиләсиз олараг көмәкчи пионер кими хидмәт етмәк гәрарына ҝәлдим, бу исә нәһајәтдә јенидән даими пионер олмағыма сәбәб олду».

5. Баҹарыгсыз олдуғумузу дүшүнүрүксә, бунун өһдәсиндән неҹә ҝәлә биләрик?

⁵ Манеәләри дәф ет. Бә’зиләри тәблиғчи тәҹрүбәләри олмадығыны дүшүнәрәк, көмәкчи пионер олмаға тәрәддүд едә биләрләр. Әҝәр сән дә белә һисс едирсәнсә, Јеремја илә олдуғу кими, Јеһова сәнә дә көмәк едә биләр (Јер. 1:6-10). Муса ‘дили ағыр, сәлис данышмајан’ олса да, Јеһова Өз ирадәсини јеринә јетирмәк үчүн ондан истифадә етмишди (Чых. 4:10-12). Өзүнүн баҹарыгсыз олдуғуну дүшүнүрсәнсә, Јеһовадан ҹәсарәт дилә.

6. Сәһһәтлә бағлы проблем вә ја сых иш графики олдуғуна бахмајараг, көмәкчи пионер хидмәти неҹә мүмкүн ола биләр?

⁶ Сәһһәтлә бағлы проблемин вә ја сых иш графикин олдуғу үчүн көмәкчи пионер олмаға тәрәддүд едирсәнми? Әҝәр сәһһәтини нәзәрә алараг өз ритминә мүвафиг график тутсан, көмәкчи пионер кими хидмәт етмәјин мүмкүн олар. Иш графикин ағырдырса, аз әһәмијјәтли ишләри башга ај әрзиндә дә едә биләҹәјинә әмин ола биләрсән. Там иш ҝүнү олан бә’зи мәсиһчиләр бир-ики ҝүн мә’зунијјәтә чыхараг, көмәкчи пионер олмаг үчүн вахты сатын алмышлар (Колос. 4:5).

7. Көмәкчи пионер олмаг үчүн тә’кидлә дуа етмәк нә үчүн фајдалыдыр?

⁷ Көмәкчи пионер олмаг үчүн нә етмәк олар? Арзун барәдә Јеһоваја дуа ет. Јеһовадан хидмәтини ҝенишләндирмәк ҹәһдинә хејир-дуа вермәсини хаһиш ет (Ром. 12:11, 12). О, сәнә көмәк едәҹәк ки, графикиндә неҹә дәјишиклик етмәк мәсәләсиндә мүдрик гәрар гәбул едәсән (Јаг. 1:5). Истәјин зәифдирсә, тәблиғ хидмәтиндән севинҹ дујмаг үчүн Јеһовадан көмәк дилә (Лука 10:1, 17).

8. Көмәкчи пионер олмаг үчүн Сүлејманын мәсәлләри 15:22 ајәсини неҹә тәтбиг етмәк олар?

⁸ Көмәкчи пионер олмаг истәјини аиләнлә бирҝә мүзакирә ет (Сүл. мәс. 15:22). Ола билсин ки, аилә үзвләриндән бири аиләнин дәстәји илә көмәкчи пионер олаҹаг. Пионер олмаг истәјини јығынҹагда башгалары, хүсусилә дә сәнинлә ејни вәзијјәтдә олан мәсиһчиләрлә бөлүш. Бу, көмәкчи пионер олмаг истәјини ҝүҹләндирә биләр.

9. Көмәкчи пионер олмаг үчүн һансы ајлары сечәрдин?

⁹ Јени хидмәт или үчүн тутдуғун хидмәт графикини нәзәрдән кечирәркән, сәнҹә, нә вахт көмәкчи пионер кими хидмәт едә биләрсән? Әҝәр там иш ҝүнү ишләјир вә ја мәктәбдә охујурсанса, тә’тил ҝүнләрини, ја да беш шәнбә вә базар ҝүнү олан ајлары нәзәрә алмаг олар. Мәсәлән, сентјабр, декабр, март вә август ајларында беш шәнбә вә базар ҝүнү вар. Мај ајында беш шәнбә, ијунда исә беш базар ҝүнү олаҹаг. Сәһһәтлә бағлы проблемин варса, јахшы һавасы олан ајларда хидмәт етмәји планлашдырмаг олар. Рајон нәзарәтчисинин сизин јығынҹаға баш чәкдији ај әрзиндә көмәкчи пионер кими хидмәт етмәји дүшүнә биләрсән. Хатирә Ҝеҹәси ҝәлән ил мартын 22-дә олдуғундан, март, апрел вә мај ајлары көмәкчи пионер олмаг үчүн ҝөзәл сечимдир. Бир вә ја бир нечә ај көмәкчи пионер олмағы гәрара аланда, тәләб олунан саатлары јеринә јетирмәјә көмәк едәҹәк график тутмаға башла.

10. Көмәкчи пионер кими хидмәт етмәјин мүмкүн дејилсә, нә едә биләрсән?

¹⁰ Һәтта јени хидмәт илиндә көмәкчи пионер кими хидмәт етмәјин мүмкүн олмаса да, тәблиғдә пионер руһуну горуја биләрсән. Хидмәтдә әлиндән ҝәләни едәрәк әмин ола биләрсән ки, Јеһова сәнин Она хидмәтдә ҝөстәрдијин сә’јдән мәмнундур (Галат. 6:4). Көмәкчи пионер кими хидмәт едәнләри дәстәклә вә руһландыр. Јәгин ки, өз графикиндә дәјишиклик едиб, һәфтәнин бир ҝүнүнү пионерләрлә әмәкдашлыг етмәк олар.

11. Нә үчүн биздә тә’хирәсалынмазлыг һисси олмалыдыр?

¹¹ Јеһованын халгы анлајыр ки, вахт ҝөзләмир. Хош хәбәрин тәблиғ иши јеринә јетирилмәлидир. Инсанлар тәһлүкә алтында јашајырлар, вахт исә азалыб (1 Кор. 7:29-31). Аллаһа вә јахынлара олан мәһәббәт, бизи хидмәтдә әлимиздән ҝәләни етмәјә тәшвиг едәҹәк. Јахшы сә’ј вә план сајәсиндә јени хидмәт или әрзиндә ән азы бир ај көмәкчи пионер кими хидмәт едә биләрик. Бу исә, доғрудан да дәјәрли мәгсәддир!