Хидмәтини ҝенишләндирмәји индидән планлашдыр
1. Хатирә ҝеҹәси әрәфәсиндә һансы имканымыз јараныр вә биз индидән һансы һазырлыглары ҝөрә биләрик?
1 Һәр ил Хатирә ҝеҹәси әрәфәсиндә «Рәббә бол-бол шүкүр» сөјләмәк үчүн јени имканларымыз јараныр (Мәз. 109:30). Фидјәни тәгдим едән Аллаһа миннәтдарлыг әламәти олараг март ајында хидмәтини ҝенишләндирәҹәксәнми? Буну артыг индидән планлашдырмаг лазымдыр (Сүл. мәс. 21:5).
2. Өтән илин апрелиндә көмәкчи пионерләр үчүн саат нормасынын азалдылдығыны биләндә јығынҹаглар буна неҹә һај вердиләр?
2 Көмәкчи пионер хидмәти. Өтән ил апрел ајында көмәкчи пионерләр үчүн саат нормасынын азалдылдығыны биләндә, јығынҹагларда хош бир ҹанланма јаранды. Бир гардаш јазыр: «Мән мәктәбдә охујурам, буна ҝөрә дә даими пионер кими хидмәт едә билмирәм. Амма апрел ајында 30 саатлыг пионер хидмәти ҝөтүрдүм вә гаршыма мәгсәд гојдум ки, 50 саат тәблиғ едим». Бүтүн ҝүн ишләјән бир баҹы дејир: «Отуз саат — чох асандыр!» Бу барәдә елан олунанда әввәлләр пионер олмуш 80 јашлы бир баҹы демишди: «Мән бу аны сәбирсизликлә ҝөзләјирдим! Јеһова билир ки, пионер кими хидмәт етдијим дөвр һәјатымын ән ҝөзәл дөврү олуб!» Көмәкчи пионер кими хидмәт едә билмәјәнләр исә гаршыларына хидмәтдә даһа чох иштирак етмәк мәгсәди гојурлар.
3. Март, апрел вә мај ајларында көмәкчи пионер хидмәти ҝөтүрмәк үчүн һансы сәбәбләримиз вар?
3 Март ајы көмәкчи пионер хидмәти ҝөтүрмәк үчүн ән мүнасиб вахт олаҹаг, чүнки јенә дә 30 вә 50 саатлыг пионер нормасы вермәк имканымыз олаҹаг. Үстәлик, мартын 17-си шәнбә ҝүнүндән етибарән хүсуси кампанијада иштирак едәрәк инсанлары апрелин 5-дә Хатирә ҝеҹәсинә дәвәт едәҹәјик. Хидмәтләрини ҝенишләндирмәк бир чохларына елә бөјүк севинҹ бәхш едәҹәк ки, апрел вә мај ајларында да 50 саат хидмәт етмәк истәјәҹәкләр.
4. Хидмәтимизи неҹә ҝенишләндирә биләрик вә бу, бизә һансы фајданы ҝәтирәҹәк?
4 Нөвбәти аиләви ибадәт ахшамында һәр бир аилә үзвүнүн Хатирә ҝеҹәси әрәфәсиндә хидмәтини неҹә ҝенишләндирә биләҹәјини нијә дә мүзакирә етмәјәсиниз? (Сүл. мәс. 15:22). Јеһоваја дуа един ки, сәјләринизә хејир-дуа версин (1 Јәһ. 3:22). Хидмәтинизи ҝенишләндирсәниз, Јеһованы иззәтләндирмәклә јанашы, өз севинҹинизи дә артыраҹагсыныз (2 Кор. 9:6).