Мүгәддәс Китаб дәрсләрини мәһарәтлә кечирин
1. Тәблиғчинин үзәринә һансы мәсулијјәт дүшүр?
1 Јеһова «ҹәлб етмәсә», һеч ким Она хидмәт едә билмәз (Јәһ. 6:44). Бунунла белә, Мүгәддәс Китаб дәрсләри кечән тәблиғчиләр әлләриндән ҝәләни етмәлидирләр ки, өјрәтдикләри адамлар Аллаһла шәхси мүнасибәт гура билсинләр (Јаг. 4:8). Бунун үчүн дәрсләрә һазырлашмаг лазымдыр. Өјрәнән адамын охудугларыны гаврамасы вә инкишаф етмәси үчүн садәҹә олараг абзасы охујуб чап олунмуш суалы вермәк кифајәт етмир.
2. Мүгәддәс Китаб дәрсләрини јахшы кечирмәк үчүн тәблиғчи нә етмәлидир?
2 Мүгәддәс Китабы јахшы өјрәдән тәблиғчи өјрәтдији адама 1) Мүгәддәс Китаб тәлимләрини баша дүшмәјә, 2) Мүгәддәс Китаб тәлимләрини гәбул етмәјә вә 3) Мүгәддәс Китаб тәлимләрини һәјатында тәтбиг етмәјә көмәк етмәлидир (Јәһ. 3:16; 17:3; Јаг. 2:26). Бунун үчүн ајлар лазым ҝәлә биләр. Амма инсанын Јеһова илә мүнасибәт јаратмасы вә өзүнү Она һәср етмәси үчүн бу амилләрин һәр үчү ваҹибдир.
3. Јахшы мүәллим нәјә ҝөрә суаллар вермәлидир?
3 Инсанын фикирләрини өјрәнмәјә чалыш. Инсанын өјрәндији шејләри баша дүшдүјүнү вә гәбул етдијини билмәк үчүн тәблиғчи чалышмалыдыр ки, өзү чох данышмасын, ону данышмаға тәшвиг етсин (Јаг. 1:19). О, мүзакирә олунан мөвзу илә бағлы Мүгәддәс Китабда дејиләнләри баша дүшүрмү? Мөвзуну өз сөзләри илә изаһ едә билирми? Өјрәндикләри һагда өзү нә фикирләшир? Мүгәддәс Китаб тәлимләринин мәнтигли олдуғу гәнаәтинә ҝәлирми? (1 Салон. 2:13). Өз һәјатында өјрәндикләринә ујғун олараг дәјишикликләр етмәли олдуғуну баша дүшүрмү? (Кол. 3:10). Бу суаллара ҹаваб тапмаг үчүн биз нәзакәтлә суаллар вермәли, сонра исә гулаг асмалыјыг (Мат. 16:13—16).
4. Әҝәр инсан Мүгәддәс Китабдан өјрәндикләрини баша дүшмүрсә, јахуд һәјатында тәтбиг едә билмирсә, нә етмәк лазымдыр?
4 Чох вахт вәрдишләр вә мүәјјән дүшүнҹә тәрзи инсанда дәрин көк салыр вә бунлары тәрҝитмәк үчүн вахт лазым олур (2 Кор. 10:5). Әҝәр инсан өјрәндијини гәбул етмирсә, јахуд да һәјатында тәтбиг етмирсә, онда нә етмәк лазымдыр? Белә һалда сәбирли олмаг ҝәрәкдир. Аллаһын Кәламынын вә мүгәддәс руһун инсанын үрәјинә тәсир етмәси үчүн мүәјјән гәдәр вахт лазымдыр (1 Кор. 3:6, 7; Ибр. 4:12). Инсаны сыхма-боғмаја салмаг лазым дејил. Әҝәр о, Мүгәддәс Китаб тәлимини баша дүшмүрсә, јахуд һәјатына тәтбиг едә билмирсә, јахшы олар ки, башга мөвзуја кечәсиниз. Инсана сәбирлә вә анлајышла Мүгәддәс Китабы өјрәтсәк, вахт кечдикҹә о, һәјатында дәјишикликләр етмәјә башлаја биләр.