‘Өјрәтмәк баҹарығына’ диггәт јетир

«Аллаһын кәламыны тәблиғ ет... инсанлары там сәбирлә вә тәлимлә [«өјрәтмәк баҹарығы илә», ЈД] игна, мәзәммәт, тәшвиг ет». 2 ТИМ. 4:2

1. Иса шаҝирдләринә һансы тапшырығы вермишди вә өзү неҹә нүмунә гојмушду?

ИСА МӘСИҺ јер үзүндәки хидмәти заманы инсанлара шәфа верәрәк бир чох валеһедиҹи ишләр етсә дә, тәбиб вә ја мөҹүзә ҝөстәрән кими јох, әсас етибары илә мүәллим кими танынырды (Марк 12:19; 13:1). Иса үчүн ән ваҹиб иш Аллаһын Падшаһлығы һаггында хош хәбәри бәјан етмәк иди. Бу иш онун мүасир давамчылары үчүн дә ваҹибдир. Мәсиһчиләр Исанын әмр етдији һәр шејә риајәт етмәји инсанлара өјрәдәрәк шаҝирд һазырламаг ишини давам етдирмәк тапшырығыны алыблар (Мат. 28:19, 20).

2. Тәблиғ етмәк тапшырығыны јеринә јетирмәк үчүн биздән нә тәләб олунур?

² Шаҝирд һазырламаг тапшырығыны јеринә јетирмәк үчүн биз өјрәтмәк баҹарығымызы даима инкишаф етдирмәјә чалышмалыјыг. Һәвари Павел бу баҹарығын ваҹиблијини әмәкдашы Тимотејә јазаркән вурғуламышды: «Өзүнә вә вердијин тәлимата диггәт јетир вә бу ишләри давам етдир. Чүнки буну етмәклә сән һәм өзүнү, һәм дә сәнә гулаг асанлары хилас едәрсән» (1 Тим. 4:16). Павел тәлимат сөзү алтында садәҹә билик вермәји нәзәрдә тутмурду. Мәһарәтли тәблиғчи инсанларын үрәјинә јол тапыр вә онлары һәјатларында дәјишикликләр етмәјә тәшвиг едир. Бах, бу әсл баҹарыгдыр. Бәс башгаларына Аллаһын Падшаһлығы һаггында хош хәбәри чатдырмаг үчүн ‘өјрәтмәк баҹарығыны’ неҹә инкишаф етдирә биләрик? (2 Тим. 4:2).

‘Өјрәтмәк баҹарығыны’ инкишаф етдир

3, 4. а) ‘Өјрәтмәк баҹарығыны’ неҹә инкишаф етдирә биләрик? б) Теократик Хидмәт Мәктәби мәһарәтли мүәллим олмағымыза неҹә көмәк едир?

³ Бир лүғәтә әсасән, «баҹарыг — арашдырма, тәтбиг вә мүшаһидә етмәк нәтиҹәсиндә әлдә едилән габилијјәтдир». Аллаһын Кәламыны мәһарәтлә өјрәтмәк үчүн биз бу үч амилә диггәт јетирмәлијик. Мөвзуну дүзҝүн баша дүшмәјин јеҝанә јолу, ону дуа едәрәк арашдырмагдыр. (Мәзмур 119:27, 34 ајәләрини оху.) Мәһарәтли тәблиғчиләрин неҹә өјрәтдијини мүшаһидә етсәк, онларын тәтбиг етдији үсуллары мәнимсәјәр вә тәглид едә биләрик. Өјрәндикләримизи даима тәтбиг етмәјә чалышмагла баҹарығымызы инкишаф етдирә биләрик (Лука 6:40; 1 Тим. 4:13-15).

⁴ Јеһова бизим ‘Даһи Нәсиһәтчимиздир’ (ЈД). О, хидмәтчиләринин тәблиғ тапшырығыны јеринә јетирә билмәләри үчүн тәшкилатынын јердәки һиссәси васитәсилә онлара рәһбәрлик верир (Јешаја 30:20, 21). Белә ки, јығынҹагларда һәр һәфтә Теократик Хидмәт Мәктәби кечирилир вә бу Мәктәбин мәгсәди, она јазыланлара Аллаһын Падшаһлығыны мәһарәтлә тәблиғ етмәји өјрәтмәкдир. Мәктәбин әсас дәрслији Мүгәддәс Китабдыр. Бизим нә өјрәтмәли олдуғумузу Јеһованын илһамланмыш Кәламындан өјрәнирик. Үстәлик, орада һансы тәлим үсулларынын еффектив вә мүнасиб олдуғу да ҝөстәрилир. Теократик Хидмәт Мәктәби даима бизә хатырладыр ки, даһа баҹарыглы мүәллим олмаг үчүн тәлимләримизи Аллаһын Кәламына әсасландырмалы, суаллардан мәһарәтлә истифадә етмәли, садә тәрздә өјрәтмәли вә инсанлара сәмими мараг ҝөстәрмәлијик. Ҝәлин бүтүн бу бәндләри бир-бир арашдыраг. Сонра исә мүзакирә едәҹәјик ки, Мүгәддәс Китабы өјрәнән адамын үрәјинә неҹә јол тапа биләрик.

Вердијин тәлими Аллаһын Кәламына әсасландыр

5. Өјрәтдикләримиз нәјә әсасланмалыдыр вә нә үчүн?

⁵ Јер үзүндә ән Бөјүк Мүәллим олмуш Иса тәлимләрини Мүгәддәс Јазылара әсасландырырды (Мат. 21:13; Јәһ. 6:45; 8:17). О өз адындан јох, ону ҝөндәрәнин адындан данышырды (Јәһ. 7:16-18). Биз дә белә давранмалыјыг. Истәр евдән-евә тәблиғ едәк, истәрсә дә Мүгәддәс Китаб өјрәнмәси кечирәк, һәмишә инсанларын диггәтини Аллаһын Кәламына јөнәлтмәлијик (2 Тим. 3:16, 17). Сөјләдијимиз фикирләр нә гәдәр мәнтигли олса да, Аллаһын илһамланмыш Кәламынын тәсири вә ҝүҹү илә мүгајисәјә ҝәлә билмәз. Мүгәддәс Китабын тәсири ҝүҹлүдүр. Мүгәддәс Китабы өјрәнән адама һәр нәји баша салсаг да, ән јахшы үсул бу һагда Мүгәддәс Јазыларын нә дедијини онун өзүнә охутдурмагдыр. (Ибраниләрә 4:12 ајәсини оху.)

6. Мүгәддәс Китабы өјрәнән адамын арашдырылан материалы баша дүшдүјүнә неҹә әмин ола биләрик?

⁶ Әлбәттә, бу о демәк дејил ки, биз Мүгәддәс Китаб өјрәнмәсинә һазырлашмалы дејилик. Әксинә, өјрәнмә заманы һансы ајәләри ачыб охумаг лазым олдуғу үзәриндә әввәлҹәдән јахшы-јахшы дүшүнмәлијик. Иманымызын тәмәлини тәшкил едән әсас ајәләри охумаг јахшы оларды. Һәмчинин өјрәнәнә охудуғу һәр бир ајәнин мәнасыны баша дүшмәјә көмәк етмәк дә ваҹибдир (1 Кор. 14:8, 9).

Суаллардан мәһарәтлә истифадә ет

7. Суаллардан истифадә етмәк нә үчүн еффектив тәлим үсулудур?

⁷ Суаллардан мәһарәтлә истифадә етмәк инсаны дүшүнмәјә тәшвиг едир вә тәблиғчијә көмәк едир ки, өјрәтдији адамын үрәјинә јол тапсын. Өјрәнән адама Мүгәддәс Китаб ајәләрини изаһ етмәк әвәзинә, хаһиш ет ки, буну онун өзү етсин. Бәзән өјрәнәнин дүзҝүн нәтиҹәјә ҝәлмәси үчүн әлавә суал, јахуд бир нечә суал вермәк лазым ҝәлә биләр. Өјрәнмә заманы сән бу үсулдан истифадә етмәклә өјрәтдијин адама јалныз һансыса нәтиҹәнин сәбәбини баша дүшмәјә јох, һәмчинин белә нәтиҹәнин дүзҝүнлүјүнә онун өзүнүн әмин олмасына көмәк едирсән (Мат. 17:24-26; Лука 10:36, 37).

8. Өјрәнәнин үрәјиндәкиләри неҹә ашкара чыхара биләрик?

⁸ Суал-ҹаваб васитәсилә мүзакирә, нәшрләримиздә истифадә олунан тәлим үсулудур. Шүбһәсиз, Мүгәддәс Китабы өјрәнәнләрин әксәријјәти мүзакирә олунан абзасдакы мәлуматдан истифадә едәрәк чап едилмиш суаллара асанлыгла ҹаваб верә биләр. Амма өјрәнән адамын үрәјинә јол тапмаг истәјән тәблиғчи садәҹә дүзҝүн ҹавабы ешитмәклә кифајәтләнмәјәҹәк. Мәсәлән, өјрәнән Мүгәддәс Китабын әхлагсызлыға даир нә дедијини дүзҝүн изаһ едә биләр (1 Кор. 6:18). Лакин өјрәнәнин нөгтеји-нәзәринә даир јериндә верилән суал­лар онун өјрәндикләри һаггында әслиндә нә дүшүндүјүнү ашкара чыхараҹаг. Ондан сорушмаг олар: «Нә үчүн Мүгәддәс Китаб никаһданкәнар ҹинси әлагәни мүһакимә едир? Аллаһын бу гадағасы һаггында нә дүшүнүрсән? Сәнҹә, Аллаһын әхлаг нормаларына ујғун јашамағын бир хејри вармы?» Бу суаллара вердији ҹаваблар онун үрәјиндә оланлары ајдын ҝөрмәјә сәнә көмәк едәҹәк. (Матта 16:13-17 ајәләрини оху.)

Садә тәрздә өјрәт

9. Мүгәддәс Јазылардан мүәјјән мәлуматы баша саланда нәји јадда сахламалыјыг?

⁹ Аллаһын Кәламындакы һәгигәтләрин әксәријјәти өз-өзлүјүндә садәдир. Амма ола билсин, јалан дини тәлимләр һәлә дә Мүгәддәс Китабы өјрәнән адамы чашдырыр. Белә һалда, бир мүәллим кими, бизим вәзифәмиз Мүгәддәс Китабы она асан тәрздә баша салмагдыр. Мәһарәтли мүәллим мәлуматы садә, ајдын тәрздә чатдырыр вә ону тәһриф етмир. Биз дә белә етсәк, һәгигәти мүрәккәбләшдирмәјәҹәјик. Лазымсыз тәфсилатлардан гач. Охудуғумуз ајәни һәртәрәфли изаһ етмәјә еһтијаҹ јохдур. Садәҹә олараг, өјрәнин диггәтини ајәнин мүзакирә едилән мөвзу илә бағлы олан һиссәсинә јөнәлт. Онун анлајышы артдыгҹа, дәрин Мүгәддәс Китаб һәгигәтләрини өзү баша дүшәҹәк (Ибр. 5:13, 14).

10. Бир дәфәјә кечәҹәјимиз материалын һәҹмини неҹә мүәјјән етмәк олар?

¹⁰ Өјрәнмә заманы нә гәдәр материал кечилмәлидир? Буну мүәјјән етмәк үчүн бәзи шејләри нәзәрә алмаг лазымдыр. Һәм шаҝирдин, һәм дә мүәллимин габилијјәт вә шәраити фәргли ола биләр, анҹаг һәмишә јадда сахламалыјыг ки, бир мүәллим кими мәгсәдимиз шаҝирдин мөһкәм имана саһиб олмасына көмәк етмәкдир. Буна ҝөрә дә, Аллаһын Кәламындакы һәгигәтләри охумасы, баша дүшмәси вә гәбул етмәси үчүн она кифајәт гәдәр вахт вермәлијик. Онун гавраја биләҹәјиндән артыг материал кечмәмәлијик. Бунунла белә, бир материалын үзәриндә чох дајанмаг лазым дејил. Өјрәтдијимиз адам бир материалы гаврадыгдан сонра о бирисинә кечмәк олар (Колос. 2:6, 7).

11. Тәлим вермәк мәсәләсиндә һәвари Павелдән нә өјрәнә биләрик?

¹¹ Һәвари Павел хош хәбәри садә тәрздә тәблиғ едирди. Савадлы олмасына бахмајараг, о, садә халгын баша дүшмәјәҹәји сөзләри ишләтмирди. (1 Коринфлиләрә 2:1, 2 ајәләрини оху.) Мүгәддәс Јазылардакы һәгигәтләрин садәлији сәмими инсанлары өзүнә ҹәлб едир вә онлара мәмнунлуг ҝәтирир. Бу һәгигәтләри баша дүшмәк үчүн али савад шәрт дејил (Мат. 11:25; Һәв. иш. 4:13; 1 Кор. 1:26, 27).

Өјрәнәнә Мүгәддәс Китаб һәгигәтләрини гијмәтләндирмәјә көмәк ет

12, 13. Өјрәнән адамы өјрәндикләринә әсасән давранмаға нә тәшвиг етмәлидир? Изаһ един.

¹² Вердијимиз тәлим сәмәрә ҝәтирсин дејә, өјрәнәнин үрәјинә јол тапмалыјыг. Шаҝирдин мәлуматын шәхсән она һансы аидијјәти олдуғуну, фајдасыны вә Мүгәддәс Јазыларын рәһбәрлијинә риајәт едәрсә, һәјатынын неҹә јахшылашаҹағыны дәрк етмәсинә көмәк етмәлијик (Јешаја 48:17, 18).

¹³ Тутаг ки, биз онунла Ибраниләрә 10:24, 25 ајәләрини арашдырырыг. Бу ајәләрдә мәсиһчиләр һәмиманлыларыны Аллаһын Кәламы илә руһландырмаг вә сәмими үнсијјәт үчүн бир јерә јығышмаға тәшвиг олунур. Әҝәр өјрәнән адам һәлә јығынҹаг ҝөрүшләринә ҝәлмирсә, биз ҝөрүшләрин неҹә кечдији вә нөвбәти ҝөрүшдә нә мүзакирә олунаҹағы һагда гыса мәлумат верә биләрик. Јығынҹаг ҝөрүшләринин ибадәтимизин бир һиссәси олдуғуну вә һәр биримизә фајда ҝәтирдијини вурғулаја биләрик. Сонра ону ҝөрүшләрә дәвәт етмәк олар. Ону Мүгәддәс Китаб принсипләринә риајәт етмәјә тәшвиг едән өјрәдән адамы разы салмаг јох, Јеһоваја табе олмаг истәји олмалыдыр (Галат. 6:4, 5).

14, 15. а) Мүгәддәс Китабы өјрәнән адам Јеһова һаггында нәји өјрәнә биләр? б) Аллаһы танымаг өјрәнәнә һансы фајданы ҝәтирә биләр?

¹⁴ Инсанын Мүгәддәс Китабы өјрәнмәкдән вә онун принсипләрини тәтбиг етмәкдән әлдә едәҹәји ән әсас фајда Јеһованы танымасы вә севмәсидир (Јешаја 42:8). Јеһова јалныз севән Ата, каинатын Јараданы вә Саһиби јох, һәмчинин Ону севән вә Она хидмәт едәнләрә Өз шәхсијјәтини вә хүсусијјәтләрини ачан Аллаһдыр. (Чыхыш 34:6, 7 ајәләрини оху.) Муса Исраил халгыны Мисир көләлијиндән чыхаран әрәфәдә Јеһова Өзүнү бу сөзләрлә танытмышды: «Мән олмаг ­истәдијим Кәс олаҹағам» (Чых. 3:13-15, ЈД). Бу сөзләр ҝөстәрир ки, Јеһова Өз сечилмиш халгы илә әлагәдар нијјәтләрини јеринә јетирмәк үчүн лазым ҝәлән шәхс ола биләр. Беләликлә, Исраил халгы Јеһованы бир Хиласкар, Ҹәнҝавәр, онлары тәмин едән вә Өз вәдләрини јеринә јетирән бир Шәхс кими таныды (Чых. 15:2, 3; 16:2-5; Јешуа 23:14).

¹⁵ Дүздүр, өјрәтдијимиз адам, Муса кими, өз һәјатында Јеһованын она мөҹүзәли сурәтдә көмәк етдијини ҝөрмәјиб. Анҹаг онун иманы вә өјрәндикләринә ҝөрә миннәтдарлығы артдыгҹа вә онлары тәтбиг етмәјә башладыгҹа, шүбһәсиз ки, ҹәсарәт, мүдриклик вә рәһбәрлик үчүн Јеһоваја еһтијаҹы олдуғуну анлајаҹаг. Бунун сајәсиндә, о да Јеһованы мүдрик вә етибарлы Мәсләһәтчи, Мүдафиәчи вә бүтүн еһтијаҹларымызы сәхавәтлә өдәјән бир Шәхс кими таныјаҹаг (Мәз. 55:22; 63:7; Сүл. мәс. 3:5, 6).

Сәмими мараг ҝөстәр

16. Аллаһын Кәламыны мәһарәтлә өјрәтмәк үчүн нәјә ҝөрә габилијјәт вә баҹарыг ән ваҹиб шәрт дејил?

¹⁶ Әҝәр сән өјрәтмәк ишиндә истәдијин кими мәһарәтли олмадығыны һисс едирсәнсә, мәјус олма. Јеһова вә Иса бу ҝүн бүтүн дүнјада кечирилән тәлим програмына нәзарәт едирләр (Һәв. иш. 1:7, 8; Вәһј 14:6). Онлар, сөзләримиз сәмими инсанлара тәсир етсин дејә, сәјимизи хејир-дуаландыра биләрләр (Јәһ. 6:44). Тәблиғчинин Мүгәддәс Китабы өјрәнән адама сәмими мәһәббәти, истәнилән габилијјәт вә баҹарығын јерини долдура биләр. Һәвари Павелин нүмунәсиндән ҝөрмәк олар ки, о, өјрәнән адама мәһәббәт ҝөстәрмәјин ваҹиб олдуғуну анлајырды. (1 Салоникилиләрә 2:7, 8 ајәләрини оху.)

17. Мүгәддәс Китабы өјрәнән һәр бир адама сәмими марағы неҹә ҝөстәрә биләрик?

¹⁷ Биз Мүгәддәс Китабы өјрәнән һәр бир адама сәмими мараг ҝөстәрмәк үчүн вахт ајырыб онунла јахындан таныш олмалыјыг. Онунла Мүгәддәс Китаб принсипләрини мүзакирә етдикҹә, еһтимал ки, шәраити илә јахындан таныш олаҹағыг. Бәлкә, биз онун артыг Мүгәддәс Китабдан өјрәндији бәзи принсипләрә әсасән јашадығыны мүшаһидә едирик. Ола билсин, башга саһәләрдә онун һәлә дә дәјишикликләр етмәси лазымдыр. Мүзакирә едилән мөвзунун шәхсән өјрәнәнә неҹә аид олдуғуну ҝөстәрмәклә, Мәсиһин әсл шаҝирди олмасына мәһәббәтлә көмәк едирик.

18. Өјрәнәнлә бирҝә вә онун үчүн дуа етмәк нә үчүн ваҹибдир?

¹⁸ Ән ваҹиби исә, өјрәнәнлә бирҝә дуа етмәк вә бу дуаларда онун үчүн көмәк диләмәкдир. О ајдын баша дүшмәлидир ки, бизим мәгсәдимиз она Јараданла јахындан таныш олмасына, Она јахынлашмасына вә рәһбәрлијиндән фајдаланмасына көмәк етмәкдир. (Мәзмур 25:4, 5 ајәләрини оху.) Биз өјрәнәнин өјрәндикләрини тәтбиг етмәк сәјинә Јеһовадан хејир-дуа диләјәндә, о, «кәламын иҹрачысы» олмағын ваҹиблијини анлајаҹаг (Јаг. 1:22). Өјрәнән бизим сәмими дуаларымызы динләмәклә дуа етмәји өјрәнәҹәк. Мүгәддәс Китабы өјрәнәнә Јеһова илә шәхси мүнасибәтләрини инкишаф етдирмәсинә көмәк етмәк неҹә дә севиндириҹидир!

19. Нөвбәти мәгаләдә нәји мүзакирә едәҹәјик?

¹⁹ Бүтүн дүнјада алты милјон јарымдан артыг Шаһид ‘өјрәтмәк баҹарыгларыны’ инкишаф етдирмәјә чалышыр ки, сәмими адамларын Исанын әмр етдији һәр шејә риајәт етмәләринә көмәк етсин. Бу бизи чох руһландырыр. Бәс тәблиғ ишиндә һансы наилијјәтләри әлдә етмишик? Бу суалын ҹавабыны нөвбәти мәгаләдә мүзакирә едәҹәјик.

Хатырлајырсынызмы?

• Мәсиһчиләр нә үчүн ‘өјрәтмәк баҹарығыны’ инкишаф етдирмәлидирләр?

• Һансы үсулларла даһа еффектив өјрәдә биләрик?

• Өјрәтмәк габилијјәтимиз зәифдирсә, онун јерини нә илә долдура биләрик?

[9-ҹу сәһифәдәки шәкил]

Сән Теократик Хидмәт Мәктәбинә јазылмысанмы?

[10-ҹу сәһифәдәки шәкил]

Өјрәнәни Мүгәддәс Китабдан охумаға тәшвиг етмәк нә үчүн ваҹибдир?

[12-ҹи сәһифәдәки шәкил]

Өјрәнәнлә бирҝә вә онун үчүн дуа ет