Ҝәләҹәк һәјат јолдашыны неҹә тапа биләрсиниз?

1, 2. а) Субај мәсиһи ҝөрүшмәјә башламаздан әввәл һансы амилләри ҝөтүр-гој етмәлидир? б) Ҝөрүшмәк дејәндә нәји нәзәрдә тутуруг? («Бәзи ифадәләрин изаһы»на бахын.)

АИЛӘ һәјаты гурмаг истәјирсиниз? Дүздүр, хошбәхт олмаг үчүн евли олмаг мүтләг дејил. Амма јашындан асылы олмајараг, чох субај мәсиһи аилә гурмаг нијјәтиндәдир. Әлбәттә ки, ҝөрүшмәјә башламаздан әввәл сиз мадди, руһани вә емосионал ҹәһәтдән евлилијә һазыр олмалысынызa (1 Кор. 7:36). Онда бөјүк еһтимал ки, гураҹағыныз аилә хошбәхт олаҹаг.

² Амма мүнасиб һәјат јолдашы тапмаг һәмишә асан олмур (Мәс. 31:10). Һәтта јахындан танымаг истәдијиниз бири илә растлашсаныз белә, онунла ҝөрүшмәјә башламаг да чәтин ола биләрb. Бу мәгаләдә өјрәнәҹәјик ки, субај мәсиһи мүнасиб һәјат јолдашы тапыб ҝөрүшмәјә башламаг үчүн нә едә биләр. Һәмчинин ҝөрәҹәјик ки, јығынҹагдакы баҹы-гардашлар евләнмәк истәјәнләрә неҹә дәстәк ола биләр.

МҮНАСИБ ҺӘЈАТ ЈОЛДАШЫ

3. Өзүнә һәјат јолдашы ахтаран мәсиһи һансы амилләри ҝөтүр-гој етмәлидир?

³ Әҝәр евләнмәји дүшүнүрсүнүзсә, јахшы олар ки, ҝөрүшмәјә башламаздан әввәл неҹә бир инсанла аилә һәјаты гурмаг истәдијинизи өзүнүз үчүн мүәјјән едәсиниз. Әкс һалда, сизә јахшы һәјат јолдашы олаҹаг инсаны нәзәриниздән гачыра биләрсиниз, ја да сизә ујғун олмајан бири илә ҝөрүшмәјә башлајарсыныз. Тәбии ки, евләнәҹәјиниз кәс мүтләг вәфтиз олунмуш мәсиһи олмалыдыр (1 Кор. 7:39). Амма һәр вәфтиз олунмуш кәс дә сизин үчүн јахшы һәјат јолдашы олмаја биләр. Одур ки, дүшүнүн: «Һәјатда һансы мәгсәдләрим вар? Ҝәләҹәк һәјат јолдашымда һансы хүсусијјәтләрин олмасыны ваҹиб сајырам? Ҝөзләнтиләрим реалдыр?»

4. Бәзиләри дуада Јеһовадан нә хаһиш едир?

⁴ Әҝәр аилә гурмаг истәјиниз варса, сөзсүз ки, бу барәдә дуа етмисиниз (Филип. 4:6). Тәбии ки, Јеһова һеч кәсә һәјат јолдашы тапаҹағына сөз вермәјиб. Бунунла белә, Јеһова һиссләринизә, еһтијаҹларыныза гаршы лагејд дејил вә сиз һәјат јолдашы ахтараркән көмәк едә биләр. Она ҝөрә дә нә истәдијинизи, һансы һиссләр кечирдијинизи Онунла бөлүшмәјә давам един (Зәб. 62:8). Дуада сәбир вә һикмәт диләјин (Јаг. 1:5). Бирләшмиш Штатларда јашајан Ҹонc адлы субај бир гардаш нә һагда дуа етдији барәдә белә дејир: «Јеһоваја һәјат јолдашымда ҝөрмәк истәдијим хүсусијјәтләри дејирәм. Ондан аилә гура биләҹәјим инсанла гаршылашмағыма имканлар јаратмасыны хаһиш едирәм. Һәм дә дуа едирәм ки, Јеһова мәнә ҝәләҹәкдә јахшы әр ола билмәјим үчүн лазым олан хүсусијјәтләр јетишдирмәјә көмәк етсин». Шри-Ланкада јашајан Танја адлы баҹы дејир: «Јеһоваја дуа едирәм ки, өзүмә мүнасиб һәјат јолдашы ахтардығым мүддәтдә Она садиг галмаға, позитив вә хошбәхт олмаға көмәк етсин». Әҝәр һәлә дә јарынызы тапмамысынызса, Јеһова сөз верир ки, бундан сонра да физики еһтијаҹларынызын гејдинә галаҹаг вә сизи еһтијаҹ дујдуғунуз севҝи илә, гајғы илә әһатә едәҹәк (Зәб. 55:22).

5. Субај мәсиһиләр Јеһованы севән диҝәр субај инсанларла нә вахт гаршылаша биләр? (1 Коринфлиләрә 15:58). (Һәмчинин шәклә бахын.)

⁵ Мүгәддәс Китабда јазылыб: «Рәббин ишиндә чох чалышын». (1 Коринфлиләрә 15:58 ајәсини охујун.) Јеһоваја хидмәтдә фәал олдугҹа вә мүхтәлиф баҹы-гардашларла вахт кечирдикҹә һәм руһландырыҹы сөһбәтләриниз олаҹаг, һәм дә сизин кими фикри Јеһоваја хидмәт етмәк олан субај инсанларла таныш ола биләҹәксиниз. Јеһованы разы салмаг үчүн әлиниздән ҝәләни едәндә әсл хошбәхтлији дујаҹагсыныз.

6. Субај мәсиһиләр һәјат јолдашы ахтардыглары мүддәтдә нәји унутмамалыдырлар?

⁶ Амма бу кичик хәбәрдарлығы нәзәрә алын: чалышын бүтүн фикринизи-зикринизи һәјат јолдашы ахтарышына ҹәмләмәјәсиниз (Филип. 1:10). Әсл хошбәхтлик аилә вәзијјәтиниздән јох, Јеһова илә мүнасибәтиниздән асылыдыр (Мәт. 5:3). Үстәлик, нә гәдәр ки субајсыныз, хидмәтинизи ҝенишләндирмәк үчүн даһа чох имканыныз вар (1 Кор. 7:32, 33). Бу вахтыныздан сәмәрәли истифадә един. Бирләшмиш Штатлардан олан Ҹесика адлы бир баҹы 40 јашына јахын аилә гуруб. О дејир: «Тәблиғдә чох иштирак едирдим, бу мәнә көмәк етди ки, аилә гурмаг истәјимә бахмајараг, һәјатдан мәмнун галым».

ЈАХШЫ-ЈАХШЫ МҮШАҺИДӘ ЕДИН

7. Нәјә ҝөрә инсан һиссләрини ачмаздан әввәл гаршы тәрәфи мүшаһидә етсә, ағыллы давранмыш олар? (Мәсәлләр 13:16).

⁷ Ола билсин, киминсә сизин үчүн јахшы һәјат јолдашы олаҹағыны дүшүнүрсүнүз. Ондан хошунуз ҝәлдијини дәрһал демәлисиниз? Мүгәддәс Китаба әсасән һикмәтли инсан камалла, ағылла отуруб-дурур. (Мәсәлләр 13:16 ајәсини охујун.) Буна ҝөрә дә инсана һиссләринизи ачмаздан әввәл бир мүддәт она ҝөз гојмағыныз ағыллы һәрәкәт олар. Нидерланддан олан Ашвин адлы гардаш дејир: «Һиссләр тез јарандығы кими тез дә јоха чыха биләр. Буна ҝөрә дә инсаны бир мүддәт мүшаһидә етсәниз, онунла ҝөрүшүб-ҝөрүшмәјәҹәјинизә һиссләрә әсасән гәрар вермәјәҹәксиниз». Бундан әлавә, ола билсин, ҝөрәҹәксиниз ки, һәмин инсан сизә ујғун дејил.

8. Субај мәсиһи аилә гурмаг истәдији кәси неҹә мүшаһидә едә биләр? (Һәмчинин шәклә бахын.)

⁸ Бәс инсаны кәнардан неҹә мүшаһидә едә биләрсиниз? Јығынҹагда, гонаглыгларда онун руһанилијинә, хасијјәтинә, давранышына фикир вермәк олар. О кимләрлә достлуг едир, даһа чох нә һагда данышыр? (Лука 6:45). Мәгсәдләриниз үст-үстә дүшүр? Һәмин мәсиһинин ағсаггалларындан, јахуд ону јахшы таныјан јеткин мәсиһиләрдән онун барәсиндә соруша биләрсиниз (Мәс. 20:18). Онун һансы ад газандығы вә хасијјәтинин неҹә олдуғу илә марагланмаг олар (Рут 2:11). Бу инсаны мүшаһидә етдијиниз мүддәтдә чалышын о өзүнү сыхылмыш, нараһат һисс етмәсин. Буна ҝөрә дә онун һиссләринә һөрмәт един. Һәр аддымыны изләмәјин, онун шәхси һәјатынын олдуғуну унутмајын.

9. Аилә гурмаг истәдијиниз инсана јахынлашмаздан әввәл сиздә һансы әминлик олмалыдыр?

⁹ Бәс инсаны нечә мүддәт мүшаһидә едәндән сонра она һиссләринизи ача биләрсиниз? Әҝәр она тез јахынлашсаныз, елә баша дүшүләҹәк ки, сиз һиссләрлә гәрар верән инсансыныз (Мәс. 29:20). Диҝәр тәрәфдән, хошунуза ҝәлән инсан ҝөрсә ки, сизин она гаршы һиссләриниз вар, амма хејли вахтдыр буну демирсиниз, онда кәнардан гәрарсыз инсан кими ҝөрүнә биләрсиниз (Ваиз 11:4). Унутмајын, инсана јахынлашмаг үчүн онунла аилә гураҹағыныза там әмин олмаг мүтләг дејил. Бунунла белә, әмин олмалысыныз ки, аилә һәјаты гурмаға һазырсыныз вә ҝөз гојдуғунуз инсан сизин үчүн јахшы һәјат јолдашы ола биләр.

10. Киминсә сиздән хошу ҝәлирсә, амма һиссләриниз гаршылыглы дејилсә, нә етмәлисиниз?

¹⁰ Әҝәр киминсә сизи јахындан танымаг истәдијини һисс етсәниз, нә етмәлисиниз? Һиссләриниз гаршылыглы дејилсә, онда давранышынызла буну ајдын ҝөстәрин. Мүнасибәт гурмаг фикриниз олмаја-олмаја, она үмид вермәк рәһмсиз һәрәкәт оларды (1 Кор. 10:24; Ефес. 4:25).

11. Киминсә ҝөрүшмәјини вә ја евләнмәјини тәшкил едән инсан һансы амилләри јадда сахламалыдыр?

¹¹ Бәзи әразиләрдә субајлар үчүн һәјат јолдашыны валидејнләри вә ја башга бөјүкләр сечир. Башга әразиләрдә исә аилә үзвләри, јахуд достлар субај инсан үчүн мүнасиб һәјат јолдашы тапыб онларын ҝөрүшмәјини тәшкил едир. Беләҹә, оғланла гыз бир-бирләрини бәјәниб-бәјәнмәдикләринә гәрар верир. Әҝәр сиздән дә бу кими шејләри тәшкил етмәји хаһиш едибләрсә, һәр ики тәрәфин зөвгүнү, истәјини вә тәләбатыны нәзәрә алын. Достунуз, јахуд гоһумунуз үчүн кимисә ҝөзалты едәндән сонра исә онун хасијјәти, хүсусијјәтләри, әсас да руһанилији барәдә мүмкүн гәдәр чох шеј өјрәнин. Онун Јеһова илә јахын мүнасибәти пулундан, тәһсилиндән вә ја ҹәмијјәтдәки мөвгејиндән даһа ваҹибдир. Бунунла белә, јадда сахлајын ки, евләниб-евләнмәмәклә бағлы сон гәрары субај инсанын өзү вермәлидир (Гал. 6:5).

ҜӨРҮШМӘЈӘ БАШЛАМАГ

12. Хошунуз ҝәлән инсана онунла ҝөрүшмәк истәдијинизи неҹә дејә биләрсиниз?

¹² Әҝәр киминләсә ҝөрүшмәјә башламаг истәјирсинизсә, һәмин инсана һиссләринизи неҹә ача биләрсиниз?d Иҹтимаи әразидә, јахуд телефонла сөһбәт етмәк үчүн онунла ҝөрүш тәшкил едә биләрсиниз. Она гаршы һиссләринизин олдуғуну вә ону даһа јахындан танымаг истәдијинизи ајдын шәкилдә билдирин (1 Кор. 14:9). Еһтијаҹ јаранарса, һәмин инсана ҹаваб вермәздән әввәл дүшүнмәси үчүн вахт верин (Мәс. 15:28). Әҝәр онун киминләсә ҝөрүшмәк фикри јохдурса, буна һөрмәтлә јанашын.

13. Әҝәр кимсә сизә һиссләрини ачса, нә едә биләрсиниз? (Колослулара 4:6).

¹³ Бәс әҝәр кимсә сизә јахынлашыб һиссләрини ачса, нә едә биләрсиниз? Јәгин, һәмин инсан сизә јахынлашмаг үчүн бүтүн ҹәсарәтини топлајыб. (Колослулара 4:6 ајәсини охујун.) Одур ки, нәзакәтли вә һөрмәтҹил олун. Әҝәр дүшүнмәк үчүн вахта еһтијаҹыныз варса, буну она билдирин. Амма чалышын мүмкүн гәдәр тез ҹаваб верәсиниз (Мәс. 13:12). Әҝәр һәмин шәхслә ҝөрүшмәк фикриниз јохдурса, буну она нәзакәтлә, ејни заманда ајдын шәкилдә дејин. Ҝөрүн Австријадан олан Һанс гардаш она јахынлашан баҹыја неҹә ҹаваб вермишди: «Мән нәзакәтлә, амма ајдын шәкилдә она гәрарымы билдирдим. Буну дәрһал етдим, чүнки она бош јерә үмид вермәк истәмирдим. Бундан сонра онунла давранышыма, данышығыма диггәт јетирмәјә башладым ки, фикрими дәјишдијими санмасын». Јох әҝәр һәмин инсаны даһа јахындан танымаг истәјирсинизсә, буну она дејин. Сонра исә танышлыг дөврү илә бағлы бәзи тәфәррүатлары мүзакирә един. Чүнки бу дөврлә бағлы дүшүнҹәләриниз мәдәнијјәтиниздән вә диҝәр амилләрдән долајы гаршы тәрәфинкиндән фәргләнә биләр.

СУБАЈ МӘСИҺИЛӘРӘ ДӘСТӘК ОЛУН

14. Субај мәсиһиләрә сөзләримизлә неҹә дәстәк ола биләрик?

¹⁴ Евләнмәк истәјән субај мәсиһиләрә һәр биримиз неҹә дәстәк ола биләрик? Бунун бир јолу сөзләримизә фикир вермәкдир (Ефес. 4:29). Нөвбәти суаллар үзәриндә дүшүнә биләрик: «Евләнмәк истәјән кәсләри зарафатла да олса, әлә салырам? Субај баҹы илә гардашын бир-бири илә данышдығыны ҝөрәндә араларында романтик мүнасибәтин олдуғуну дүшүнүрәм?» (1 Тим. 5:13). Бундан әлавә, субајларын евли олмадыгларына ҝөрә өзләрини натамам һисс етмәләринә сәбәб олмамалыјыг. Бајаг ады чәкилән Һанс бөлүшүр: «Бәзи гардашлар мәндән сорушур: “Јашын артыг кечир, нә вахт тәрпәнирсән?” Бу ҹүр сөзләр субајларын өзләрини дәјәрсиз һисс етмәләринә сәбәб ола биләр. Һәмчинин евләнмәклә бағлы үзәрләриндә олан тәзјиги артыра биләр». Она ҝөрә дә јахшы оларды ки, субај мәсиһиләри тәрифләмәк үчүн имканлар ахтараг (1 Салон. 5:11).

15. а) Ромалылара 15:2 ајәсиндәки принсипә әсасән кимәсә һәјат јолдашы тапмаға көмәк етмәздән әввәл нәји нәзәрә алмалысыныз? (Һәмчинин шәклә бахын.) б) Видеодан һансы ваҹиб фикирләри өјрәндиниз?

¹⁵ Бәс әҝәр һансыса гардашы һансыса баҹыја јарашдырырыгса, онда неҹә? Мүгәддәс Китаб бизи башгаларынын һиссләрини нәзәрә алмағы өјрәдир. (Ромалылара 15:2 ајәсини охујун.) Субајларын чоху киминсә онлары һәр һансы бир мәсиһи илә евләнмәк мәгсәди илә таныш етмәсини истәмир. Биз онларын фикринә һөрмәт етмәлијик (2 Салон. 3:11). Башгалары, ола билсин, кимләринсә онлара көмәк етмәсини истәјәрди, амма әҝәр сиздән буну хаһиш етмәјибләрсә, гарышмамалысынызe (Мәс. 3:27). Бәзи субајлар исә бу ҹүр рәсми үсулла таныш олмаг истәмирләр. Алманијадан олан Лидија адлы субај баҹы дејир: «Һәмин баҹы илә гардашы һансыса мәҹлисә дәвәт едә биләрсиниз. Бунунла садәҹә олараг онларын ҝөрүшмәси үчүн шәраит јарадырсыныз, галаныны исә өз өһдәләринә бурахырсыныз».

16. Субај мәсиһиләр нәји јадда сахламалыдыр?

¹⁶ Субај вә ја евли олмағымыздан асылы олмајараг, һәр биримиз һәјатдан хошбәхтлик, мәмнунлуг дуја биләрик (Зәб. 128:1). Она ҝөрә дә әҝәр евләнмәк истәјирсинизсә, амма һәлә дә мүнасиб һәјат јолдашы тапмамысынызса, диггәтинизи Јеһоваја хидмәтә ҹәмләмәјә давам един. Макаодан олан Син Ји баҹы дејир: «Ҹәннәтдә һәјат јолдашынызла кечирәҹәјиниз вахтла мүгајисәдә субај кими галдығыныз мүддәт чох гысадыр. Она ҝөрә дә нә гәдәр ки субајсыныз, бунун гәдрини билин». Бәс әҝәр аилә гура биләҹәјиниз инсана раст ҝәлмисинизсә вә артыг ҝөрүшмәјә дә башламысынызса, онда неҹә? Нөвбәти мәгаләдә ҝөрәҹәјик ки, оғланла гыз ҝөрүшән заман неҹә дүзҝүн гәрарлар верә биләр.