Биз садәҹә достуг, јохса... I һиссә

БАШЛЫҒЫ ОХУЈАНДА ҜӨЗҮНҮН ГАБАҒЫНА КИМСӘ ҜӘЛДИ?

ҺӘ ЈОХ

↓ ↓

Сәнҹә, бу фикир дүздүр, јохса сәһв?

Аилә гурмаға һазыр олмајынҹа әкс ҹинслә достлуг етмәк олмаз.

․․․․․ ДҮЗДҮР ․․․․․ СӘҺВДИР

Нәзәрә ал: Бахмајараг ки, Иса Мәсиһин евләнмәк фикри јох иди, онун достлары арасында гадынлар да вар иди (Матта 12:46—50; Лука 8:1—3). Субај Тимотејин дә әкс ҹинсдән достлары вар иди. Бу, һәвари Павелин она вердији мәсләһәтдән ҝөрүнүр: «Ҝәнҹ гадынларла баҹын кими тәмиз нијјәтлә давран» (1 Тимотејә 5:1, 2).

Һәвари Павел јахшы билирди ки, Тимотеј мүхтәлиф јығынҹагларда хидмәт етдији үчүн ҝәнҹ гадынларла тәмасда олаҹаг (Марк 10:29, 30). Бәс Тимотеј нә етмәли иди, онлардан гачмалы иди? Јох. Анҹаг евләнмәк нијјәтиндә олмадығына ҝөрә арада сәрһәд сахламалы иди ки, һеч кимә бағланмасын, һеч кимин һиссләри илә ојнамасын (Лука 6:31).

Бәс сән неҹә? Аилә гурмаға һазырсан?

Әҝәр ҹавабын «БӘЛИ»дирсә ⇨ Әкс ҹинсдән оланларла достлуг етмәк сәнә һәјат јолдашы тапмаға көмәк едә биләр (Сүлејманын мәсәлләри 18:22; 31:10).

Әҝәр ҹавабын «ХЕЈР»дирсә ⇨ Арада сәрһәд гој (Јеремја 17:9). Бәлкә фикирләширсән: «Демәјә нә вар ки!» Һаглысан. 18 јашлы Наиләa дә буну дејир: «Адам билмир һарада сәрһәд гојсун. Садәҹә дост олараг галмаг чәтиндир».

Үмумијјәтлә, арада сәрһәд сахламаг нәјә ҝөрә лазымдыр? Белә етмәсән, ја сән, ја да гаршы тәрәф әзаб чәкәҹәк. Бахаг нәјә ҝөрә.

ТӘҸРҮБӘ ҜӨСТӘРИР: ҹидди мүнасибәтә һазыр олмадығын һалда кимәсә бағлансан, икиниздән бири әзаб чәкәҹәк. 19 јашлы Кәмалә дејир: «Дүз ики дәфә башым бәлаја дүшүб. Бир дәфә мән оғлана вурулдум, нөвбәти дәфә исә оғлан мәнә вурулду. Һәр дәфә кимсә әзаб чәкмәли олду. Һәлә дә гәлбимин јарасы сызлајыр».

Дүшүн:

● Һансы һалларда әкс ҹинслә тәмасда олмаг мүнасибдир? Бәс һансы һаллардан гачмаг дүзҝүн оларды?

● Нәјә ҝөрә һәмишә јалныз бир адама мараг ҝөстәрмәк вә ја онунла вахт кечирмәк ағыллы һәрәкәт дејил? Белә етсән, онда һансы фикирләр јаранаҹаг? Бәс сәндә?

«Бәзән өзүмү алдадыб дејирдим ки, биз садәҹә достуг, о, мәним гардашымдыр. Амма ҝөрәндә ки, о башга гыза диггәт јетирир, пис олурдум, санки, һәмишә мәним јанымда олмалы иди» (Ајтән).

Мүгәддәс Китабда јазылыб: «Узагҝөрән габагҹадан шәри ҝөрүб ондан гачар, ҹаһил исә ирәли чыхар, зијан тапар» (Сүлејманын мәсәлләри 22:3).

ТӘҸРҮБӘ ҜӨСТӘРИР: ҹидди мүнасибәтә һазыр олмадығын һалда кимәсә бағлансан, достуну итирә биләрсән. 16 јашлы Әсмәр дејир: «Мән бир оғланла смсләширдим. Чох кечмәди ки, о, мәнимлә флирт етмәјә башлады. Биз демәк олар, һәр ҝүн јазышырдыг. Бир ҝүн деди ки, мәндән чох хошу ҝәлир вә садәҹә дост олмаг истәмир. Мәнимсә үрәјимдә она гаршы һеч бир һисс јох иди. Она сөзүмү дејәндән сонра ара сојуду вә сонда достлуғумуз битди».

Дүшүн:

● Сәнҹә, бу һалда ким әзаб чәкди: Әсмәр, јохса оғлан? Нәјә ҝөрә? Икисиндән бири бунун гаршысыны алмаг үчүн нә исә едә биләрди? Едә биләрдисә, нә?

● Бәзән кимсә өзү дә билмәдән смсләри илә башгасында елә фикир ојада биләр ки, она башга һиссләр бәсләјир. Бу, неҹә ола биләр?

«Һәрдән өзүмү мәҹбур едирәм ки, оғланларла аз отурум-дурум. Оғланлардан јахшы дост олур, амма истәмирәм ки, башга һиссләр јараныб достлуғумузу позсун» (Нәрмин).

Мүгәддәс Китабда дејилир: «Узагҝөрән һәр аддымына нәзәр салар» (Сүлејманын мәсәлләри 14:15).

Нәтиҹә: Әкс ҹинслә достлуг етмәк гәбаһәт дејил. Амма евләнмәјә һазыр дејилсәнсә, арада сәрһәд сахла.

«ҜӘНҸЛӘРИН СУАЛЛАРЫ» РУБРИКАСЫНЫН НӨВБӘТИ САЈЫНДА...

Ҹидди мүнасибәтә һазыр олмадыгда кимәсә бағланмаг инсанын адына ләкә ҝәтирә биләр. Неҹә? Нөвбәти сајда сөһбәт бундан ҝедәҹәк.

«Ҝәнҹләрин суаллары» рубрикасындан диҝәр мәгаләләри www.jw.org сајтындан рус дилиндә тапа биләрсән.

[Һашијә]

[20–ҹи сәһифәдәки чәрчивә/шәкил]

СӘН НӘ ЕДӘРДИН?

ҜЕРЧӘК ҺАДИСӘ: «Мән бир оғлан достумла јазышырдым. О, биздән 1500 км узаглыгда јашајырды. Биз һәфтәдә һарадаса бир дәфә јазышырдыг. Мәндә она гаршы һеч бир һисс јох иди, ағлыма ҝәтирмирдим ки, онда ола биләр. Амма бир ҝүн мәнә белә јазды: “Салам, ҝөзәл! Дарыхмышам сәнинчүн. Нејнирсән?” Ҝөзләримә инанмадым! Она дедим ки, биз садәҹә достуг, дост олараг да галаг. О исә ардынҹа јазды: “Өзүн биләрсән!” О ҝүндән даһа мәнә бир кәлмә дә јазмады» (Ҹанет).

● Әҝәр сән ҹидди мүнасибәтә һазыр дејилсәнсә вә белә бир фикрин јохдурса, бу ҹүр месаж сәнә дә ҝәлсә, нә едәрдин?

● Әҝәр сән оғлансанса, неҹә фикирләширсән: оғланын Ҹанетә јаздығы сөзләр јериндә иди? Јериндә идисә, нәјә ҝөрә, јериндә дејилдисә, нәјә ҝөрә?

● Һансы һалда гаршы тәрәфә бағланмаг даһа асандыр: үзбәүз данышаркән, јохса јазышаркән? Нә үчүн белә фикирләширсән?

[21–ҹи сәһифәдәки чәрчивә]

ВАЛИДЕЈНЛӘРИНДӘН СОРУШ

[21–ҹи сәһифәдәки чәрчивә]

ҺӘМЈАШЫДЛАРЫНЫН ФИКИРЛӘРИ

Ҹошуа: «Бир адамла чох вахт кечирирсәнсә, истәр-истәмәз она бағланаҹагсан».

Наташа: «Әҝәр киминләсә садәҹә дост галмаг истәјирсәнсә, амма бош вахтларыны јалныз онунла кечирирсәнсә, ја һәр икиниздә, ја да икиниздән бириндә мүтләг һиссләр баш галдыраҹаг».

Келси: «Әҝәр бир адамла чох вахт кечирсән, достлугла башлајан мүнасибәт севҝијә чеврилә биләр. Әслиндә, гаршы ҹинслә садәҹә дост олараг галмаг мүмкүндүр, амма ҝәрәк јеткин оласан вә һәр аддымыны өлчүб-бичәсән».

[21–ҹи сәһифәдәки шәкил]

Ата-анандан ишарәләнмиш суалларла бағлы нә фикирләшдијини соруш. Сәнин фикирләрин онларынкындан фәрглидир? Фәрглидирсә, нәдә? Сәнҹә, ата-анан нәдә һаглыдыр? (Сүлејманын мәсәлләри 11:14).

[20–ҹи сәһифәдәки шәкил]

Ҹидди мүнасибәтә һазыр олмадыгда кимәсә бағланмағын ахыры пис гуртарыр