8. Өрнәк

МӘНАСЫ

Өрнәк гојан валидејнләр өјрәтдикләринә ујғун јашајыр. Мәсәлән, гапыја ҝәлән инсанла данышмаг истәмәјәндә, ушағыныз «де ки, евдә дејиләм»,— дедијинизи ешидибсә, ондан дүрүст олмағы ҝөзләмәјин.

«Белә бир дејим вар: “Етдијим кими јох, дедијим кими ет”. Амма бу дејим ушаглар үчүн кечәрли дејил. Онлар сүнҝәр кими дедијимиз вә етдијимиз һәр шеји өзләринә чәкирләр, өјрәтдикләримизә ујғун давранмасаг, буну мүтләг бизә дејәҹәкләр» (Дејвид).

МҮГӘДДӘС КИТАБ ПРИНСИПИ: «“Оғурлама” дејә тәблиғ едиб нијә өзүн оғурлуг едирсән?» (Ромалылара 2:21).

ЗӘРУРӘТИ

Валидејнләр өз өвладларына башгаларындан, һәтта јашыдларындан даһа чох тәсир едир. Буна ҝөрә дә сиз өјрәтдикләринизә ујғун давранмалысыныз, чүнки ушагларыныза дүзҝүн јол ҝөстәрмәкдә әсас јери сиз тутурсунуз.

«Ушаға бир шеји јүз дәфә дејирик ешитмир. Амма өзүмүз дедијимизи бир дәфә етмәјән кими, о дәгигә үзүмүзә вурур. Ушаглар етдијимиз һәр шејә, һәтта ағлымыза ҝәлмәјән шејләрә дә диггәт јетирирләр» (Никол).

МҮГӘДДӘС КИТАБ ПРИНСИПИ: «Јухарыдан назил олан һикмәт... ријакарлыгдан узагдыр» (Јагуб 3:17).

ТӘТБИГИ

Мејарларынызы ҝөздән кечирин. Сиз һансы нөв әјләнҹәләрә мејиллисиниз? Һәјат јолдашыныз вә ушагларынызла неҹә рәфтар едирсиниз? Кимләрлә достлуг едирсиниз? Башгаларына гаршы диггәтҹилсинизми? Хүласә, ушағынызда ҝөрмәк истәдијиниз кејфијјәтләр сиздә вар?

«Әримлә мән ушагларымыздан өзүмүзүн риајәт етмәдијимиз мејарлара риајәт етмәләрини ҝөзләмирик» (Кристин).

Сәһвләринизә ҝөрә үзр истәјин. Онсуз да ушагларыныз камил олмадығынызы билир. Сәһвиниз оланда һәјат јолдашыныза вә ушагларыныза «үзр истәјирәм» демәклә, тәвазөкарлыг вә дүрүстлүк саһәсиндә нүмунә гојаҹагсыныз.

«Ҝәрәк ушагларымыз сәһвләримизи етираф етдијимизи вә бу сәһвләрә ҝөрә үзр истәдијимизи ешитсинләр. Әкс һалда, онлар сәһвләрини өрт-басдыр етмәји өјрәнәҹәкләр» (Робин).