Мәгсәд лајиһә кимидир, әмәк сәрф етмәклә ону ҝерчәкләшдирә биләрсиниз.
ҜӘНҸЛӘР ҮЧҮН
12. Мәгсәдләр
МӘНАСЫ
Мәгсәд садәҹә ҝерчәкләшмәсини истәдијиниз бир арзу дејил. Әсл мәгсәдләр үчүн план гурмаг, вәзијјәтә ујғунлашмаг вә ҝүҹ сәрф етмәк лазымдыр.
Мәгсәдләр гысамүддәтли (һәјата кечмәси үчүн ҝүнләр вә ја һәфтәләр алан), ортамүддәтли (ајлар) вә узунмүддәтли (илләр) ола биләр. Узунмүддәтли мәгсәдләрә гысамүддәтли вә ортамүддәтли мәгсәдләрин сајәсиндә наил олмаг мүмкүндүр.
ЗӘРУРӘТИ
Мәгсәдләрә наил олмаг сиздә өзүнәинам јарадаҹаг, достлуг мүнасибәтләринизи ҝүҹләндирәҹәк вә хошбәхтлијинизи артыраҹаг.
Өзүнәинам. Гаршыныза кичик мәгсәдләр гојуб, онлара наил олдугҹа даһа бөјүк мәгсәдләр гојмаг үчүн сиздә өзүнәинам һисси јаранаҹаг. Өзүнәинам һисси һәмчинин ҝүнбәҝүн манеәләрлә үзләшәндә, мәсәлән, јашыдларынызын тәзјигинә гаршы дуранда артаҹаг.
Достлуг мүнасибәтләри. Инсанлар әтрафларында мәгсәдјөнлү, јәни нә истәдијини билән вә истәдикләринә наил олмаг үчүн әлиндән ҝәләни едән кәсләри ҝөрмәк истәјирләр. Бундан әлавә, достлуг мүнасибәтини ҝүҹләндирмәјин ән јахшы үсулларындан бири гаршы тәрәфлә бирликдә ејни мәгсәд үчүн чалышмагдыр.
Хошбәхтлик. Гаршыныза мәгсәд гојуб, она наил оланда мәмнунлуг дујаҹагсыныз.
«Мәгсәдләр гојмағы хошлајырам. Бу мәнә көмәк едир ки, бош дурмајым вә онлара наил олмаға чалышым. Мәгсәдимә чатанда ҝеријә бахыб: “Ура, бу мәндә алынды! Истәјимә наил олдум!” — демәк ән мөһтәшәм һиссдир» (Кристофер).
МҮГӘДДӘС КИТАБ ПРИНСИПИ: «Күләјә бахан тохум сәпмәз, булуда бахан бичин бичмәз» (Ваиз 11:4).
ТӘТБИГИ
Мәгсәд гојмаг вә онлара наил олмаг үчүн нөвбәти аддымлары атын.
Мүәјјән един. Реал мәгсәдләрин сијаһысыны тутун. Илк өнҹә һансылара наил олмаг истәдијинизи ардыҹыллыгла сыралајын.
План гурун. Һәр бир мәгсәд үчүн ашағыдакылары един:
Реал вахт тәјин един.
Ишләринизи аддым-аддым планлашдырын.
Манеәләри тәхмин един вә онлары неҹә дәф едәҹәјинизи дүшүнүн.
Һәрәкәтә кечин. Ола билсин, сиз бүтүн деталлары ҝөтүр-гој етмәмисиниз, амма бунун сизә мане олмасына јол вермәјин. Өзүнүздән сорушун: «Мәгсәдимә чатмаг үчүн илк нөвбәдә нә едә биләрәм?» Сонра ону един. Һәр аддымы тамамладыгҹа наилијјәтләринизи изләјин.
МҮГӘДДӘС КИТАБ ПРИНСИПИ: «Чалышганын нијјәти уғур ҝәтирәр» (Мәсәлләр 21:5).