Гаршыныза Аллаһы шәрәфләндирән мәгсәдләр гојун
«ИНСАН һансы саһилә јан алаҹағыны билмирсә, күләк һансы сәмтә әсирсә әссин, она фајдасы олмајаҹаг». Биринҹи әсрдә јашамыш Рома философуна аид едилән бу сөзләр һәјатын бир ҝерчәклијинә ишарә едир: һәјата истигамәт вермәк үчүн инсан ҝәрәк гаршысына мәгсәдләр гојсун.
Мүгәддәс Китабда мәгсәдјөнлү инсанларын чох ҝөзәл нүмунәси вар. Мәсәлән, Нуһ тәхминән 50 ил әмәк сәрф едәндән сонра «аиләсинин хиласы үчүн ҝәми тикди». Муса пејғәмбәр «ҝөзүнү алаҹағы мүкафатдан чәкмирди» (Ибраниләрә 11:7, 26). Мусанын хәләфи Јушәнин исә гаршысына мәгсәди Аллаһ гојду: Кәнан дијарыны истила етмәк (Ганунун тәкрары 3:21, 22, 28; Јушә 12:7—24).
Ерамызын биринҹи әсриндә јашајан һәвари Булусун да мәгсәдләри вар иди. Шүбһә јохдур ки, онун мәгсәдләринә Иса Мәсиһин нөвбәти сөзләри чох тәсир етмишди: «Падшаһлыг һаггындакы бу мүждә... бүтүн јер үзүндә тәблиғ едиләҹәк» (Мәтта 24:14). Иса Мәсиһин она дедији сөзләр, ҝөстәрдији ҝөрүнтүләр, еләҹә дә адыны халглара билдирмәк тапшырығы Булусу һәвәсләндирди. О, Кичик Асија бөлҝәсиндә, та Авропаја гәдәр һәр јанда мәсиһи јығынҹагларынын јаранмасында мүһүм рол ојнады (Һәвариләрин ишләри 9:15; Колослулара 1:23).
Бәли, Јеһованын бүтүн дөврләрдә јашајан хидмәтчиләри гаршыларына нәҹиб мәгсәдләр гојмуш вә онлара наил олмушлар. Бунунла да Јеһованы шәрәфләндирмишләр. Бәс биз нәдән ирәли ҝәләрәк гаршымыза руһани мәгсәдләр гојмалыјыг? Һансы мәгсәдләрә ҹан ата биләрик? Онлара чатмаг үчүн һансы аддымлары атмаг олар?
Дүзҝүн нијјәт ваҹибдир
Мәгсәдләр һәјатын һәр саһәсинә аид ола биләр. Бу дүнјада да мәгсәдјөнлү инсанлар аз дејил. Анҹаг руһани мәгсәдләр дүнјәви мәгсәдләрдән фәргләнир. Бу дүнјада бир чох мәгсәдләрин архасында дуран нијјәт вар-дөвләт севдасы, вәзифәјә, нүфуза саһиб олмаг арзусудур. Анҹаг бу, чох јанлыш мәгсәдләрдир. Јеһова Аллаһы шәрәфләндирән мәгсәдләр билаваситә ибадәтлә вә Падшаһлыг иши илә бағлы мәгсәдләрдир (Мәтта 6:33). Бу ҹүр мәгсәдләрин архасында Аллаһа вә инсанлара мәһәббәт дурур вә бу ҹүр мәгсәдләр инсаны мөминлијә јетишдирир (Мәтта 22:37—39; 1 Тимутијә 4:7).
Ҝәлин гаршымыза руһани мәгсәдләр гојаг, мәсәлән, хидмәтдә јени мәсулијјәтләрә, јахуд руһани ҹәһәтдән тәрәгги етмәјә ҹан атаг. Ејни заманда, унутмајаг ки, бу мәгсәдләри гојаркән, онлара чатмаға чалышаркән нијјәтимиз дә тәмиз олмалыдыр. Анҹаг бир шеј дә вар ки, һәтта нијјәт тәмиз оланда да бәзән мәгсәдләр ҝерчәкләшмир. Белә исә, неҹә едә биләрик ки, мәгсәдләримизи һәјата кечирәк?
Үрәкдән арзуламаг ваҹибдир
Ҝәлин Јеһова Аллаһын дүнјаны јаратмасындан данышаг. «Ахшам олду, сәһәр олду» сөзләри илә Јеһова һәр нөвбәти јарадылыш дөврүнүн сәрһәдләрини мүәјјәнләшдирирди (Јарадылыш 1:5, 8, 13, 19, 23, 31). Һәр јарадылыш дөврүнүн әввәлиндә О ајдын билирди ки, һәмин дөвр үчүн гаршысына һансы мәгсәди гојуб. Сонра исә һәмин мәгсәдинә чатырды, јәни нијјәт етдији шејләри јарадырды (Вәһј 4:11). Әјјуб Јеһова Аллаһ барәдә демишди: «Көнлү нә истәсә, ону да едәр» (Әјјуб 23:13). Јәгин Јеһова јаратдыгларына бахыб, һәр шејин чох јахшы олдуғуну дејәндә бөјүк мәмнунлуг дујмушду! (Јарадылыш 1:31).
Мәгсәдләримизин ҝерчәкләшмәси үчүн биздә дә ҝүҹлү истәк олмалыдыр. Бәс бу истәји үрәјимиздә неҹә ојада биләрик? Јенә дә Јеһова Аллаһын нүмунәсинә бахаг. Һәтта јер күрәси гурулушсуз, бош оланда да Јеһова онун ҝәләҹәкдәки һалыны ҝөрүрдү. Онун фәзада ҝөзәл бир инҹи кими парлајаҹағыны, Она шәрәф ҝәтирәҹәјини дүшүнүрдү. Биз дә мәгсәдләримизә чатмаг арзусуну аловландырмаг үчүн онларын ҝәтирәҹәји бәһрәләр барәдә дүшүнмәлијик. 19 јашлы Тони мәһз белә давранмышды. Бир дәфә о, Јеһованын Шаһидләринин гәрби Авропадакы филиалыны зијарәт етмишди. Ҝөрдүкләри ону чох ҝөзәл тәсир бағышламышды. О вахтдан орада јашамаг, хидмәт етмәк арзусу Тонини раһат бурахмырды. Тону бу арзудан әл чәкмәди вә она чатмаг үчүн әлиндән ҝәләни етди. Бир нечә илдән сонра ону филиалда хидмәт етмәјә дәвәт етдиләр. Тонинин севинҹи јерә-ҝөјә сығмырды!
Һәмчинин мүәјјән мәгсәдләрә чатан инсанларла отуруб-дурсаг, бу да мәгсәдләримизә чатмаг арзусуну аловландыра биләр. 30 јашлы Ҹејсон јенијетмә вахты тәблиғ етмәји севмирди. Анҹаг мәктәби битирдикдән сонра бөјүк һәвәслә өнҹүллүјә башлады вә Падшаһлығын тамвахтлы тәблиғчиси олду. Ҹејсонда өнҹүллүк етмәк һәвәси һарадан пејда олду? О дејир: «Башга өнҹүлләрлә сөһбәт етмәјин, онларла хидмәт етмәјин мәнә чох бөјүк тәсири олду».
Мәгсәдләринизи јазын
Гејри-мүәјјән, думанлы фикри сөзләрлә ифадә етмәјә чалышанда о ајдынлашыр, конкретләшир. Сүлејман падшаһ да гејд етмишди ки, дүзҝүн сөзләр бөјүк ҝүҹә маликдир, чомаг кими һәјата истигамәт верир (Ваиз 12:11). Һәмин сөзләри јазыја аланда исә инсанын үрәјинә, зеһнинә һәкк олур. Јеһова мәһз елә буна ҝөрә Исраил падшаһларына әмр етмишди ки, Ганунун сурәтини көчүрсүнләр (Ганунун тәкрары 17:18). Буна ҝөрә дә мәгсәдләримизи, онлара чатмаг үчүн һансы аддымлары атаҹағымызы, о ҹүмләдән гаршылашаҹағымыз әнҝәлләри вә онлары ашмаг үчүн нә едәҹәјимизи вәрәгә јаза биләрик. Һәмчинин јахшы оларды ки, мүәјјәнләшдирәк ҝөрәк нәләри өјрәнмәлијик, һансы баҹарыглара јијәләнмәлијик вә кимләрин бизә көмәји дәјә биләр.
Ҹефри Асија өлкәләриндән бириндә, уҹгар әразидә узун илләр иди ки, хүсуси өнҹүл кими хидмәт едирди. Гаршысына руһани мәгсәдләр гојмаг һәјатынын чәтин дөврүндә она чох көмәк етди. Белә ки, онун һәјат јолдашы гәфилдән вәфат етмишди. Фаҹиәдән сонра өзүнә ҝәләндә Ҹефри гәрара ҝәлди ки, диггәтини тамамилә өнҹүл хидмәтинә ҹәмләсин. Бунун үчүн о, гаршысына мәгсәдләр гојду. Дуа едәндән сонра ајын сонуна кими үч нәфәрлә Мүгәддәс Китаб дәрсинә башламағы гәрарлашдырды. Планларыны вәрәгә јазыб ишә башлады. Һәр ҝүн ҝүндәлик фәалијјәтини нәзәрдән кечирирди, һәр он ҝүндән бир исә мәгсәдинә доғру нә гәдәр ирәлиләдијинә диггәт јетирирди. О, дүз дөрд нәфәрлә дәрсә башлады. Мәгсәдинә чатмаг она бөјүк севинҹ бәхш етди.
Пиллә-пиллә мәгсәдләринизә доғру ирәлиләјин
Бәзи мәгсәдләр илк бахышдан әлчатмаз ҝөрүнә биләр. Мәсәлән, әввәлдә ады чәкилән Тонијә Јеһованын Шаһидләринин филиалында хидмәт етмәк хәјал кими ҝәлирди. Чүнки өз билдији кими јашајырды, һеч һәјатыны да Аллаһа һәср етмәмишди. Анҹаг о гәрара ҝәлди ки, Јеһованын ганунларына ујғун јашајаҹаг вә вәфтиз олунаҹаг. Бу мәгсәдинә чатандан сонра гаршысына мәгсәд гојду ки, көмәкчи өнҹүл, сонра исә өнҹүл олаҹаг. Һәтта тәгвимдә бу хидмәтә башламағы планлашдырдығы тарихи дә гејд етди. Бир мүддәт өнҹүллүк едәндән сонра артыг филиалда хидмәт етмәк арзусу она әлчатмаз ҝөрүнмүр.
Биз дә бөјүк мәгсәдләрә чатмаг үчүн гаршымыза кичик мәгсәдләр гоја биләрик. Бу мәгсәдләр бизим үчүн пиллә ролуну ојнајаҹаг. Вахташыры нечә пиллә галхдығымыза нәзәр салсаг, диггәтимиз әсас мәгсәдимиздән јајынмајаҹаг. Тез-тез Јеһоваја планларыныз барәдә дуа един. Бу да сизә јолу әзмлә давам етдирмәјә көмәк едәҹәк. Һәвари Булус һәмишә дуа етмәји мәсләһәт ҝөрүрдү (1 Салоникилиләрә 5:17).
Әзмли олун
Һәр шеји әтрафлы дүшүнүб-дашынсаг да, ҝүҹлү истәјимиз олса да, бәзи мәгсәдләрә чатмаг мүмкүн олмур. Бу, Маркын да башына ҝәлмишди. Һәвари Булус икинҹи тәблиғ сәјаһәтинә ҝедәндә Маркы өзү илә апармаг истәмәмишди. Јәгин о чох мәјус олмушду (Һәвариләрин ишләри 15:37—40). Анҹаг Марк бундан өзүнә дәрс ҝөтүрдү вә гаршысына хидмәтлә бағлы башга мәгсәд гојду. Сонралар һәвари Булус Марк һаггында хош сөзләр демишди. О, һәвари Бутрусла Бабилдә хидмәт етмишди (2 Тимутијә 4:11; 1 Бутрус 5:13). Она даһа бөјүк бир шәрәф дә нәсиб олмушду: Аллаһын илһамы илә Иса Мәсиһин һәјаты вә хидмәтиндән бәһс едән Мүждәни јазмышды.
Руһани мәгсәдләрә чатмаға чалышаркән биз дә әнҝәлләрлә үзләшә биләрик. Амма бу заман руһдан дүшмәмәлијик, әксинә, тәрәггимизә бир дә нәзәр салмалыјыг, мәгсәдимизин нә дәрәҹәдә әлчатан олдуғуну ҝөтүр-гој етмәлијик, лазым ҝәләрсә, мәгсәдимизи дәјишмәлијик. Манеәләрлә үзләшәндә әзмлә, исрарла ирәлијә доғру һәрәкәт етмәлијик. Сүлејман падшаһын сөзләри бизә әминлик верир. О јазмышды: «Һәр ишини Јеһоваја тапшыр, онда нијјәтин баш тутар» (Мәсәлләр 16:3).
Лакин бәзи һалларда шәраит елә ҝәтирир ки, мүәјјән мәгсәдләрә чатмаг артыг гејри-реал олур. Мәсәлән, хәстәлик, аилә мәсулијјәтләри мәгсәдә чатмаға имкан вермир. Бу заман унутмамалыјыг ки, ҹан атдығымыз ән әсас мүкафат ја ҝөјдә, ја да јердә әбәди һәјат мүкафатыдыр (Лука 23:43; Филиппилиләрә 3:13, 14). Бәс бу мүкафата неҹә наил ола биләрик? Һәвари Јәһја јазмышды: «Аллаһын истәјини јеринә јетирән... әбәди јашајыр» (1 Јәһја 2:17). Вәзијјәтдән ирәли ҝәләрәк, мүәјјән мәгсәдләрә чатмаг мүмкүн олмаса да, јенә дә Аллаһдан горхуб, Онун әмрләрини јеринә јетирә биләрик (Ваиз 12:13). Руһани мәгсәдләр бизә көмәк едәҹәк ки, диггәтимизи Аллаһын ирадәсини јеринә јетирмәјә ҹәмләјәк. Буна ҝөрә дә ҝәлин һәмишә гаршымыза Јараданымызы шәрәфләндирән мәгсәдләр гојаг.
[Чәрчивә]
Руһани мәгсәдләр
○ Мүгәддәс Китабы һәр ҝүн охумаг
○ «Ҝөзәтчи гүлләси» вә «Ојанын!» журналларынын һәр сајыны охумаг
○ Дуаны јахшылашдырмаг
○ Руһун бәһрәсинә дахил олан хүсусијјәтләрә јијәләнмәк
○ Хидмәти ҝенишләндирмәк
○ Тәблиғ вә тәлим ишиндә сәриштәли олмаг
○ Телефонла, гејри-формал вә ишҝүзар әразиләрдә хидмәт етмәк