Өвладыныза мәтин олмағы өјрәдин

МӘТИН ОЛМАГ НӘ ДЕМӘКДИР?

Мәтин инсан манеә вә ја мәјуслугла үзләшәндән сонра тез өзүнә ҝәлир. Инсан буна тәҹрүбә сајәсиндә јијәләнир. Ушаг јыхыла-јыхыла бөјүдүјү кими, уғурсузлугларла да үзләшә-үзләшә һәјатда габаға ҝетмәји өјрәнир.

МӘТИН ОЛМАГ НӘ ҮЧҮН ВАҸИБДИР?

Бәзи ушаглар уғурсузлугла, чәтинликлә үзләшәндә, јахуд тәнгид ешидәндә руһдан дүшүрләр. Бәзиләри исә тамамилә тәслим олурлар. Лакин онлар нөвбәти мәгамлары баша дүшмәлидирләр:

• Уғурсузлугла үзләшмәмәк мүмкүн дејил (Јагуб 3:2).

• Һәр бир инсан һәјатда чәтинликләрлә үзләшир (Ваиз 9:11).

• Адама сәһвини демәсәләр о, һеч вахт дүзәлмәз (Мәсәлләр 9:9).

Мәтин олмаг өвладыныза һәјатдакы чәтинликләри әминликлә јолуна гојмаға көмәк едәҹәк.

МӘТИН ОЛМАҒЫ НЕҸӘ ӨЈРӘТМӘЛИ?

Өвладыныз сәһв едәндә.

МҮГӘДДӘС КИТАБ ПРИНСИПИ: «Салеһ једди дәфә јыхылар, јенә галхар» (Мәсәлләр 24:16).

Өвладыныза вәзијјәтә дүзҝүн јанашмағы өјрәдин. Мәсәлән, мәктәбдә имтаһандан кечмәсә, нә едәр? О, руһдан дүшүб дејә биләр: «Мән һеч нәји баҹармырам».

Анҹаг өвладыныза мәтин олмағы өјрәтмәк истәјирсинизсә, она баша салын ки, нөвбәти дәфә нәтиҹәнин јахшы алынмасы үчүн нә едә биләр. Белә етмәклә о өзүнү јазыгламајаҹаг, әксинә, проблеми һәлл етмәјә чалышаҹаг.

Ејни заманда, проблеми өвладынызын јеринә һәлл етмәјин. Әксинә, она көмәк един ки, проблеми өзү јолуна гојсун. Она суал верә биләрсиниз: «Дәрси даһа јахшы баша дүшмәк үчүн нә едә биләрсән?»

Бәдбәхтлик баш верәндә.

МҮГӘДДӘС КИТАБ ПРИНСИПИ: «Сиз һеч сабаһ башыныза нәјин ҝәләҹәјини билмирсиниз» (Јагуб 4:14).

Инсан билмир сабаһ башына нә ҝәләҹәк. Бу ҝүн варлы олан адам сабаһ касыблајыр. Сағлам адам хәстә дүшүр. Мүгәддәс Китабда дејилир: «Гачышы һәмишә бәрк гачанлар удмур, дөјүшдә һәмишә иҝидләр галиб ҝәлмир... Чүнки һамысынын габағына вахт вә тәсадүф чыхыр» (Ваиз 9:11).

Сиз бир валидејн кими, өвладынызы горумаға чалышырсыныз. Анҹаг ушағы һәјатын бүтүн бәлаларындан горумаг мүмкүн олмур.

Әлбәттә, бәлкә дә, өвладыныз һәлә кичикдир вә иши итирмәјин, игтисади чәтинлијин нә демәк олдуғуну баша дүшмүр. Амма сиз она башга бәдбәхтликләрә, мәсәлән, дост иткисинә, јахуд аилә үзвүнүн өлүмүнә таб ҝәтирмәјә көмәк едә биләрсинизa.

Өвладыныз һаглы олараг данлананда.

МҮГӘДДӘС КИТАБ ПРИНСИПИ: «Мәсләһәтә гулаг ас,.. ахырда һикмәтли оларсан» (Мәсәлләр 19:20).

Өвладынызы һаглы олараг данлајан адам ону ҝөзүмчыхдыја салмыр, садәҹә, она сәһвини дүзәлтмәјә көмәк етмәк истәјир.

Өвладыныза мәзәммәти гәбул етмәјә көмәк етмәклә һәм ону, һәм дә өзүнүзү чох проблемләрдән горујурсунуз. Ҹон адлы бир ата дејир: «Ушагларын сәһвинә һәмишә ҝөз јумулса, онлар һеч вахт өз һәрәкәтләриндән дәрс ҝөтүрмәјәҹәкләр. Һеч вахт башлары бәладан ачылмајаҹаг. Сиз дә өмүр боју онларын далынҹа дүшүб проблемләрини һәлл етмәјә чалышаҹагсыныз. Бу исә һәм валидејнләрин, һәм дә өвладын һәјатыны аҹынаҹаглы едир».

Бәс өвладыныза ешитдији данлагдан нәтиҹә чыхармаға неҹә көмәк едә биләрсиниз? Ушағыныз ја мәктәбдә, ја да башга јердә данлананда бунун наһаг јерә олдуғуну сөјләмәјин. Әксинә, ондан сорушун:

• «Сәнҹә, нәјә ҝөрә сәни данладылар?»

• «Сәһвини неҹә дүзәлдә биләрсән?»

• «Ҝәлән дәфә белә вәзијјәтдә оланда нә едәҹәксән?»

Унутмајын, јери ҝәләндә, данланмаг өвладынызын хејринәдир. О тәкҹә инди јох, һәм дә бөјүјәндә бунун фајдасыны ҝөрәҹәк.