Фактларла таныш олун

Проблем

Гәрәз чох вахт мәлуматсызлыгдан гајнагланыр. Нөвбәти нүмунәләрә нәзәр салаг:

Бәзи иш адамлары дүшүнүр ки, елми вә техники ишләр гадынларын ҝөрәҹәји иш дејил.
Орта әсрләрдә Авропада јәһудиләри су гујуларыны зәһәрләмәкдә вә хәстәлик јајмагда һагсыз јерә иттиһам едирдиләр. Насистләрин дөврүндә јәһудиләрә јенә дә бөһтан атдылар. Бу дәфә онлары Алманијада игтисади бөһрана сәбәб олмагда тәгсирләндирдиләр. Һәр ики иттиһамын нәтиҹәсиндә јәһудиләр ифрат гәрәзин гурбаны олдулар. Бу ҝүн дә бу гәрәз мүәјјән дәрәҹәдә һисс олунмагдадыр.
Чохлары дүшүнүр ки, әлиллији оланлар һәјатдан күскүн вә ја кинли инсанлардыр.

Бу кими јаланлара инанан адамлар һаглы олдугларыны сүбут етмәк үчүн кимләрисә нүмунә чәкир, вә ја дәлилләр ҝәтирирләр. Онларла разылашмајанлары исә ҹаһил һесаб едирләр.

Мүгәддәс Китабдан мәсләһәт

«Елмсиз олмаг јахшы дејил» (МӘСӘЛЛӘР 19:2)

Мәнасы: Инсан фактлары билмәјәндә јанлыш гәрарлар верир. Әҝәр биз фактлара јох, јалана инанырыгса, инсанлар һаггында јанлыш фикирдә олаҹағыг.

Мүгәддәс Китабда гәрәз барәдә нә дејилир?

Бәзи инсанлар иддиа едирләр ки, Мүгәддәс Китабда гәрәз ашыланыр. Бәс ҝөрәсән әслиндә Мүгәддәс Китабда бу барәдә нә јазылыб?

Бүтүн инсанларын әҹдады ејнидир. Аллаһ «бир инсандан һәр халгы јаратды» (Һәвариләрин ишләри 17:26).
Аллаһ ајры-сечкилик етмир. «Аллаһ ајры-сечкилик етмәјән Аллаһдыр, һәр халгын ичиндә Ондан горхан вә дүзҝүн иш ҝөрән адамдан разыдыр» (Һәвариләрин ишләри 10:34, 35).
Аллаһ инсанын заһиринә јох, үрәјинә бахыр. «Инсан заһири ҝөрүр, Аллаһ исә үрәји» (1 Ишмуил 16:7).

Фактлары билмәјин фајдасы

Әҝәр инсанлар һаггында фактлары билсәк, онлар һагда ҝениш јајылмыш јанлыш фикирләрә инанмајаҹағыг. Мүәјјән бир груп инсан һагда ешитдикләримизин һәгигәт олмадығыны биләндә өзүмүз дә башга груп инсанлар һагда гәрәзли фикирләр ирәли сүрмәјәҹәјик.

Реал һәјатдан нүмунә: Јовича (Балкан)

Әввәлки мәгаләдә ады чәкилән Јовича ушаг вахтындан јерлиләриндән, хәбәрләрдә, телевизија програмларында бир кичик етник груп һаггында һәмишә пис шејләр ешидирди. О дејир: «Мән бу инсанлара гәрәзлә јанашырдым, һәтта онлара нифрәт бәсләјирдим. Һәм дә өзүмү һаглы һесаб едирдим.

Анҹаг ордуда хидмәт едәндә әсҝәр јолдашларымдан бәзиләри һәмин етник групдан иди вә мән онларла јашајыб ишләмәли олмушдум. Вахт кечдикҹә онлары јахындан таныдым. Һәтта дилләрини өјрәнмәјә, халг маһныларына гулаг асмаға башладым. Бирликдә јахшы вахт кечирирдик. Онлара мүнасибәтим дәјишди. Амма гәрәз елә һиссдир ки, јенидән пејда ола биләр. Буна ҝөрә дә хәбәрләрдә һәмин етник груп барәдә мәнфи фикирләр сөјләнәндә гулаг асмырам. Һәмчинин онлары лаға гојан филмләрә, комедијалара бахмырам. Билирәм ки, гәрәз гәзәбә, һәтта нифрәтә чеврилә биләр».

Нә едә биләрсиниз?

Ҹәмијјәтдә һансыса бир груп инсан һагда мәнфи фикир формалашса да, унутмајын ки, әслиндә о адамларын чоху һеч дә белә дејил.
Нәзәрә алын ки, һәмин инсанлар һагда һәр шеји билмирсиниз.
Етибарлы мәнбәдән мәлумат алын.