Мәһәббәт ҝөстәрин

Проблем

Гәрәз һисси инсанын үрәјиндән тез бир заманда јох олмур. Неҹә ки, вирусун организмдән тәмизләнмәси үчүн һәм вахт кечмәлидир, һәм дә тәдбир ҝөрмәк лазымдыр, еләҹә дә гәрәз һисси. Бәс гәрәздән гуртулмаг үчүн һансы тәдбирләри ҝөрмәк лазымдыр?

Мүгәддәс Китабдан мәсләһәт

Шәкилләр: 1) Асијалы бир киши әлиндә кофе стәканлары тутан гарадәрили бир киши үчүн гапыны ачыр. 2) Һәмин гарадәрили киши јухарыда тәсвир олунан һиндистанлы гадын да дахил бүтүн иш јолдашларына кофе верир.

«Мәһәббәтә бүрүнүн, чүнки мәһәббәт инсанлар арасында камил бирлик јарадыр» (КОЛОСЛУЛАРА 3:14).

Мәнасы: Јахшылыг инсанлары бирләшдирир. Инсанлара мәһәббәт ҝөстәрдикҹә, гәрәз һисси үрәјиниздән јох олаҹаг. Үрәкдә мәһәббәт артдыгҹа орада нифрәтә вә гәрәзә јер галмајаҹаг.

Нә едә биләрсиниз?

Шәкилләр: 1) Һиндистанлы бир гадын авропалы јашлы гадынын әрзаг чантасыны дашыјыр вә пилләкәнләри галхмасына јардым едир. 2) Авропалы јашлы гадын јухарыда тәсвир олунан асијалы гоншусуна көкә ҝәтириб.

Дүшүнүн, ҝөрүн мәнфи мүнасибәт бәсләдијиниз ҹәмијјәтдән олан инсанларла неҹә мәһәббәтлә даврана биләрсиниз. Бу о демәк дејил ки, онлар үчүн нәсә бөјүк шејләр етмәлисиниз. Ашағыда садалананлардан һансыныса етмәјә чалышын.

Белә кичик шејләрдә мәһәббәт ҝөстәрдикҹә гәрәз һиссиндән узаглашаҹагсыныз.

Онларла нәзакәтлә давранын, мәсәлән, гапыны тутун, јахуд иҹтимаи нәглијјатда јер верин.
Һәтта сизин дилинизи јахшы билмәсәләр дә, онларла бир-ики кәлмә данышын.
Онларын давранышыны баша дүшмәсәниз дә, сәбирли олун.
Проблемләриндән данышанда дәрдләринә шәрик олун.

Реал һәјатдан нүмунә: Назари (Гвинеја-Бисау)

«Әввәлләр мүһаҹирләрә гәрәзлә јанашырдым. Ешитмишдим ки, мүһаҹирләрин чоху сахтакарлыгла сосиал јардым алыб бунун һесабына јашајыр вә чоху ҹинајәткарлыг едир. Она ҝөрә дә онлардан хошум ҝәлмирди. Амма буну гәрәз һесаб етмирдим, чүнки әксәр инсанлар мүһаҹирләрә бу ҹүр јанашырды.

Анҹаг вахт кечдикҹә баша дүшдүм ки, мүһаҹирләрә олан мәнфи мүнасибәтим әслиндә гәрәздир. Мүгәддәс Китабдакы мәсләһәт мәнә көмәк етди ки, онларла мәһәббәтлә давраным. Инди онлардан ҝен ҝәзмирәм, әксинә, саламлашырам, сөһбәт едирәм. Һәр биринә фәрди јанашырам. Инди онлара мүнасибәтим јахшыдыр».