Технолоҝијанын тәсири. Достлуға
Мүасир дөврдә инсанларын бир-бирилә үнсијјәт гурмасы чох асанлашыб. Ајры-ајры гитәләрдә јашајан инсанлар белә, смс, e-mail, видеоконфранс вә сосиал медиа васитәсилә бир-бирилә асанлыгла әлагә јарадыр. Белә истифадә олундугда технолоҝија инсана хидмәт едир.
Анҹаг бәзи инсанлар достлары илә, әсас етибарилә, сосиал шәбәкәләр васитәсилә үнсијјәт едирләр. Белә инсанлар адәтән...
достларына анлајыш ҝөстәрмир.
өзләрини тәнһа һисс едир.
даһа чох өзләрини дүшүнүр.
НӘЈИ БИЛМӘК ЛАЗЫМДЫР?
АНЛАЈЫШ
Киминсә һиссләрини баша дүшмәк үчүн онун һаггында дүшүнмәк лазымдыр. Анҹаг бүтүн ҝүнү месажлашырыгса, јахуд сосиал шәбәкәләри изләјириксә, бу, чәтин ола биләр.
Әҝәр сизә чохлу месаж ҝәлирсә, вахт кечдикҹә достларынызын јаздығы месажлары ҹавабландырмаг ағыр јүкә чевриләҹәк. Ҝәлән месажлара тәләм-тәләсик ҹаваб јазаҹагсыныз. Һансыса достунузун көмәјә еһтијаҹы олдуғуну сезмәјәҹәксиниз.
ДҮШҮНҮН: Достларыныза месаж јазаркән онларын дәрдинә шәрик олдуғунузу неҹә ҝөстәрә биләрсиниз? (1 БУТРУС 3:8).
ТӘНҺАЛЫГ
Бир арашдырма нәтиҹәсиндә мәлум олмушду ки, адәтән сосиал шәбәкәдә вахт кечирәндән сонра инсанлар өзләрини пис һисс едирләр. Тәдгигатчылар белә гәнаәтә ҝәлмишләр ки, башгаларынын пајлашдығы шәкилләрә бахандан сонра инсан вахтыны һәдәр јерә сәрф етдијини дүшүнүр.
Үстәлик, башгаларынын мараглы шәкилләринә баханда инсан өз һәјатыны онларын һәјаты илә мүгајисә етмәјә башлајыр. Она елә ҝәлир ки, һамы вахтыны хош кечирир, онун исә һәјаты марагсыз кечир.
ДҮШҮНҮН: Сосиал медиадан истифадә едәркән нәјә ҝөрә өзүнүзү башгалары илә мүгајисә етмәмәлисиниз? (ГАЛАТИЈАЛЫЛАРА 6:4).
ӨЗҮНҮ ДҮШҮНМӘК
Бир мүәллим мүшаһидә едиб ки, шаҝирдләрдән бәзиләри егоистдир вә анҹаг достларындан нә исә ҝөзләјир. Бу ҹүр инсанлар достлуг мүнасибәтиндә јалныз өз мәнфәәтини ҝүдүр. Онлар үчүн достлуг садәҹә мобил ҹиһазлардакы тәтбигләр кимидир, лазым ҝәләндә истифадә едирләр, лазым олмајанда исә сөндүрүрләр.
ДҮШҮНҮН: Сосиал шәбәкәләрдә етдијиниз пајлашымлар сизин рәгабәтә мејилли олдуғунузу, јахуд да јалныз өзүнүзү дүшүндүјүнүзү бүрузә вермир? (ГАЛАТИЈАЛЫЛАРА 5:26).
НӘ ЕДӘ БИЛӘРСИНИЗ?
ӨЗҮНҮЗҮ ТӘҺЛИЛ ЕДИН
Сосиал шәбәкәләр сизә ағалыг јох, хидмәт едәндә достларынызла әлагә сахламаға вә мүнасибәтләринизи мөһкәмләндирмәјә көмәк едәҹәк.
МҮГӘДДӘС КИТАБДАН МӘСЛӘҺӘТ: «Мәһәббәт... өз хејрини ҝүдмүр» (1 КОРИНФЛИЛӘРӘ 13:4, 5).
Сизә ујғун ҝәлән мәсләһәтләри сечин, јахуд өз фикирләринизи јазын.
Ҹанлы үнсијјәт гурун, садәҹә месажлашмајын.
Сөһбәт едәркән телефону кәнара гојун, јахуд сәссиз режимә кечирин.
Сосиал шәбәкәләрдә кечирдијиниз вахты азалдын.
Һәмсөһбәтинизә диггәтлә гулаг асын.
Чәтинлији олан достунуза вахт ајырын.