ТӘЛАТҮМЛҮ ДҮНЈАДА

1 | Сағламлығынызы горујун

НӘЈӘ ҜӨРӘ ВАҸИБДИР?

Бөһран, фәлакәт бирбаша вә ја долајы јолла инсанын сағламлығына мәнфи тәсир едир.

Фәлакәтләр инсанларда ҝәрҝинлик, тәлаш јарадыр. Бу кими һиссләр узун мүддәт давам едәндә инсан хәстә дүшүр.
Бәдбәхтликләр сәһијјә системини тәзјиг алтында гојур, тибби персонал вә дәрман гытлығы јарадыр.
Фәлакәтләр инсанын мадди вәзијјәтинә дә мәнфи тәсир едир. Әрзаг, дәрман кими зәрури шејләри алмаг чәтинләшир.

Нәји билмәлисиниз?

Ҹидди хәстәлик вә стрес уҹбатындан инсан өз сағламлығына лагејд јанаша биләр. Нәтиҹәдә, сәһһәти даһа да ағырлашар.
Хәстәлик мүалиҹә олунмадыгда инсанын һәјаты үчүн тәһлүкә јарада биләр.
Нә гәдәр сағлам олсаныз, чәтин вәзијјәтләрдә бир о гәдәр дүзҝүн гәрарлар верәҹәксиниз.
Мадди вәзијјәтиниздән асылы олмајараг, сағламлығынызы горумаг үчүн мүәјјән тәдбирләр ҝөрә биләрсиниз.

Нә едә биләрсиниз?

Ағыллы адам мүмкүн гәдәр тәһлүкәләри габагҹадан сезир вә онлардан горунмаг үчүн мүвафиг тәдбирләр ҝөрүр. Ејни шеј сағламлыға да аиддир. Чох вахт садә ҝиҝијена гајдалары инсаны хәстәликдән горујур вә ја хәстәлијин кәскинләшмәсинин гаршысыны алыр. Унутмајын, еһтијат иҝидин јарашығыдыр.

«Тәмизкар олмағын, евимизи тәмиз сахламағын сајәсиндә, һәкимә, дәрмана аз пулумуз чыхыр» (Андреасa).

a Бу журналда бәзи адлар шәртидир.

ХОШ ҜҮЗӘРАН МҮМКҮНДҮР? Мәсләһәтләр

Тәлатүмлү вахтларда сағламлығынызы горумаг үчүн нөвбәти аддымлары атын

ҜИҜИЈЕНА ГАЈДАЛАРЫНА РИАЈӘТ ЕДИН

Ҝиҝијена гајдаларына риајәт един

Мүгәддәс Китабда дејилир: «Узагҝөрән бәланы дујуб ҝизләнәр» (Мәсәлләр 22:3). Сағламлығыныз үчүн олан тәһлүкәләри габагҹадан сезин вә онлардан узаг дурун.

Әлләринизи тез-тез сабунла јујун, хүсусилә дә јемәк јемәздән әввәл вә ја ајагјолундан истифадә едәндән сонра.
Евинизи мүнтәзәм тәмизләјин вә дезинфексија един. Хүсусилә дә тез-тез тохундуғунуз сәтһләри вә әшјалары.
Имкан дахилиндә, јолухуҹу хәстәлији олан инсанла јахын тәмасдан гачын.

САҒЛАМ ГИДАЛАНЫН

Сағлам гидаланын

Мүгәддәс Китабда дејилир: «Елә бир адам јохдур ки, өз бәдәнинә нифрәт етсин, әксинә, инсан өз бәдәнинин гејдинә галыр, ону әзизләјир» (Ефеслиләрә 5:29). Бәдәнимизин гејдинә галырыгса, једијимизә, ичдијимизә фикир верәҹәјик.

Чохлу су ичин.
Ҹүрбәҹүр мејвә-тәрәвәз јејин.
Јағ, дуз вә шәкәр гәбулуну азалдын.
Түтүндән вә наркотикдән узаг дурун, спиртли ичкидән вә дәрман васитәләриндән суи-истифадә етмәјин.

«Биз сағлам гидаланырыг ки, хәстәләнмәјәк, јохса газандығымыз гәпик-гурушу да дәрмана верәрик. Дүшүнүрүк ки, јахшысы будур, пулумузу сағлам гидалара хәрҹләјиб, ҹанымыза бахаг» (Карлос).

ИДМАН ЕДИН ВӘ КИФАЈӘТ ГӘДӘР ДИНҸӘЛИН

Идман един

Мүгәддәс Китабда дејилир: «Бир овуҹ истираһәт ики овуҹ зәһмәтдән вә күләк далынҹа гачмагдан јахшыдыр» (Ваиз 4:6). Ишләмәк ваҹибдир, амма динҹәлмәк дә лазымдыр.

Актив һәјат сүрүн. Башланғыҹ үчүн мүнтәзәм ҝәзинтијә чыхмаг олар. Физики активлик, һәтта јашлы, әлил, хроники хәстәлији олан инсанларын белә сәһһәтини јахшылашдыра биләр.
Динҹәлин

Кифајәт гәдәр динҹәлин. Јетәринҹә јатмамаг илк олараг стресә, диггәт дағыныглығына сәбәб олур. Вахт кечдикҹә исә инсанын сәһһәтиндә ҹидди проблемләрә ҝәтириб чыхарыр.
Јатмаг үчүн вахт тәјин един вә буна риајәт един. Чалышын һәр ҝүн ејни вахтда јатыб-дурасыныз.
Јатагда оланда телевизора бахмајын вә електрон ҹиһазлардан истифадә етмәјин.
Јатмаздан әввәл ағыр јемәкләр јемәјин, кофеин тәркибли вә спиртли ичкиләр ичмәјин.

«Фикир вермишәм ки, јуху режимим бүтүн сәһһәтимә тәсир едир. Әҝәр кифајәт гәдәр јатмамышамса, һәрдән башым, бүтүн бәдәним ағрыјыр. Амма дојунҹа јатыб јухуму аланда дүнјанын ишини ҝөрә билирәм! Ҝүмраһ олурам вә ҝеҹ-ҝеҹ хәстәләнирәм» (Ҹастин).