Сағламлығынын гејдинә галаркән Аллаһын принсипләрини нәзәрә ал
«Аллаһын олан Рәбби... бүтүн дүшүнҹәнлә вә бүтүн гүввәтинлә сев» (МАРК 12:30).
1. Аллаһын бәшәријјәтә даир илк нијјәти нәдән ибарәт иди?
ЈЕҺОВА АЛЛАҺЫН инсанлара даир илк нијјәтинә хәстәликләр вә өлүм дахил дејилди. Јарадан Адәмлә Һәвваны Еден бағында, јәни һәзз верән Ҹәннәтдә јерләшдирди ки, ораны 70-80 ил јох, әбәдијјән ‘беҹәрсинләр вә сахласынлар’ (Јар. 2:8, 15; Мәз. 90:10). Илк инсан ҹүтү Јеһоваја садиг галсајды вә Онун һөкмранлығына мәһәббәтлә табе олсајды, һеч заман хәстәлији, физики зәифлији вә өлүмү дадмазды.
2, 3. а) «Ваиз» китабында гоҹалыг неҹә тәсвир едилир? б) Адәмдән мирас алдығымыз өлүмүн сәбәбкары кимдир вә өлүмүн тәсири неҹә арадан галдырылаҹаг?
2 «Ваиз» китабынын 12-ҹи фәслиндә гејри-камил инсанларын гоҹалығында мүшаһидә олунан «пис ҝүнләр» ајдын тәсвир едилир. (Ваиз 12:1-7 ајәләрини оху.) Ағаран сачлар ‘бадам ағаҹынын чичәкләнмәсинә’ бәнзәдилир. Ајаглар артыг зәифләјән вә титрәјән «ҝүҹлүләр» илә мүгајисә олунур. Ишыг үчүн ‘пәнҹәрәјә баханлар’, амма гаранлыгдан башга һеч нә ҝөрмәјәнләр нуруну итирән ҝөзләрин мүвафиг символудур. Төкүлән дишләр, ‘аз олдуглары үчүн әл дәјирманы илә дән үјүдә билмәјәнләрлә’ мүгајисә олунур.
3 Титрәјән дизләр, зәифләјән ҝөзләр, дишсиз дамаглар — бүтүн бунлар Аллаһын бәшәријјәтә даир илк нијјәтинә дахил дејилди. Бундан савајы, Адәмдән мирас алдығымыз өлүм ‘иблисин әмәлләриндән’ биридир ки, Аллаһын Оғлу сәмави Падшаһлыг васитәсилә ону јох едәҹәк. Һәвари Јәһја јазмышды: «Аллаһын Оғлу да буна ҝөрә зүһур етди ки, иблисин әмәлләрини пуч етсин» (1 Јәһ. 3:8).
Сағламлыға ҝөрә нараһат олмаг тәбиидир
4. Јеһованын хидмәтчиләри нәјә ҝөрә таразлы шәкилдә сағламлыгларынын гејдинә галырлар вә нәји дәрк едирләр?
4 Јеһованын хидмәтчиләри дә ҝүнаһлы бәшәријјәтин мәруз галдығы хәстәликләрин вә гоҹалығын ҝәтирдији проблемләрлә үзләширләр. Белә вәзијјәтдә таразлы шәкилдә сағламлығымызын гејдинә галмаг тәбии вә һәтта фајдалыдыр. Мәҝәр биз Јеһоваја ‘бүтүн гүввәтимизлә’ хидмәт етмәк истәмирикми? (Марк 12:30). Сағламлығымызы горумаға чалышсаг да, реалист олмалы вә етираф етмәлијик ки, гоҹалма просесини ләнҝитмәк вә ја хәстәликләрин һамысындан гачынмаг үчүн чох аз шеј едә биләрик.
5. Аллаһын садиг хидмәтчиләринин хәстәликләрлә неҹә мүбаризә апардыгларындан нә өјрәнә биләрик?
5 Јеһованын бир чох садиг хидмәтчиләринин сәһһәтиндә проблемләр олмушду. Онлардан бири Епафродит иди (Филип. 2:25-27). Һәвари Павелин садиг әмәкдашы Тимотеј тез-тез мәдә ағрысындан әзаб чәкирди, буна ҝөрә дә Павел она «бир аз шәраб» ичмәји мәсләһәт ҝөрмүшдү (1 Тим. 5:23). Павелин өзү ‘бәдәниндәки бир нештәрлә’, ола билсин, һәмин вахт мүалиҹәси олмајан ҝөз хәстәлији вә ја башга физики насазлыгла мүбаризә апарырды (2 Кор. 12:7; Галат. 4:15; 6:11). О, бу һагда дәфәләрлә Јеһоваја јалвармышды. (2 Коринфлиләрә 12:8-10 ајәләрини оху.) Аллаһ Павели бу ‘нештәрдән’ мөҹүзәли шәкилдә азад етмәди. Әвәзиндә, таб ҝәтирмәк үчүн ону гүввәтләндирди. Бунунла да Јеһованын гүдрәти Павелин зәифлијиндә тәзаһүр олунду. Шүбһәсиз ки, бу һадисәдән чох шеј өјрәнә биләрик.
Сағламлығын үчүн һәддән артыг нараһат олма
6, 7. Нә үчүн сағламлығымыза ҝөрә һәддән артыг нараһат олмагдан гачынмалыјыг?
6 Билдијимиз кими, Јеһованын Шаһидләри тибби хидмәтдән вә мүхтәлиф мүалиҹә үсулларындан имтина етмирләр. «Ојанын!» журналымызда вахташыры сағламлыгла бағлы мәгаләләр чап олунур. Биз һансыса мүалиҹә үсулуну үстүн тутуб-тутмадығымызы ирәли сүрмәсәк дә, пешәкар һәкимләрин јардымына вә әмәкдашлығына ҝөрә миннәтдарыг. Әлбәттә, мүкәммәл сағламлығын һәләлик әлчатмаз олдуғуну билирик. Буна ҝөрә дә, сағламлыға ҝөрә һәддән артыг вә ја даима нараһат олмамаг мүдрикликдир. Мүнасибәтимиз ‘һеч бир үмиди’ олмајан, индики һәјатын һәр шеј олдуғуну дүшүнән вә сағалмаг үчүн һәр бир мүалиҹә үсулуна әл атан инсанларын мүнасибәтиндән фәргләнмәлидир (Ефес. 2:2, 12). Индики һәјатымызы горумаға чалышараг Јеһованын лүтфүнү итирмәмәјә гәти гәрарлыјыг, чүнки әминик ки, Аллаһа садиг галсаг, ‘һәгиги һәјатдан’, јәни Аллаһын вәд етдији јени дүнјадакы әбәди һәјатдан ‘бәрк тутаҹағыг’ (1 Тим. 6:12, 19, һашијә; 2 Пет. 3:13).
7 Сағламлығымыз үчүн һәддән артыг нараһат олмагдан гачынмағымызын башга сәбәби дә вар: биз худбин олмаг истәмирик. Павел филипилиләри ‘јалныз өз мәнфәәтини дејил, башгаларынын да мәнфәәтини ҝүдмәјә’ тәшвиг едәндә бу тәһлүкә барәдә хәбәрдар етмишди (Филип. 2:4). Таразлы шәкилдә өз гејдимизә галмаг дүзҝүндүр, амма һәмиманлыларымыза вә Падшаһлыг һагда хош хәбәри чатдырдығымыз инсанлара сәмими мараг ҝөстәрмәк бизи физики сағламлығымыз барәдә һәддән артыг дүшүнмәкдән горујаҹаг (Мат. 24:14).
8. Сағламлыгла бағлы һәддән артыг нараһатчылыг бизи нәјә тәһрик едә биләр?
8 Белә бир тәһлүкә дә вар ки, мәсиһчи өз сағламлығына ҝөрә нараһатчылыға гапыларса, Падшаһлығын мараглары икинҹи јерә кечә биләр. Белә нараһатчылыг һәмчинин бәзи пәһризләрин, мүалиҹә үсулларынын вә ја гида әлавәләринин фајдасы һагда шәхси фикирләримизи башгаларынын бејнинә јеритмәјимизә дә сәбәб ола биләр. Бунунла бағлы Павелин сөзләриндәки принсипә диггәт јетирәк: ‘Мәсиһин ҝүнүндә пак вә нөгсансыз олмаг үчүн ән үстүн дәјәрләри ајырд един’ (Филип. 1:10).
Ән үстүн дәјәрләр нәдир?
9. Һансы ән үстүн дәјәрә етинасыз јанашмамалыјыг вә нәјә ҝөрә?
9 Ән үстүн дәјәрләри ајырд етсәк, Аллаһла јахшы мүнасибәтләр јаратмагда башгаларына даһа фәал көмәк едәҹәјик. Буна Аллаһын Кәламыны тәблиғ етмәк вә өјрәтмәк дахилдир. Севинҹ бәхш едән бу фәалијјәт һәм бизә, һәм дә өјрәтдијимиз инсанлара фајда ҝәтирир (Сүл. мәс. 17:22; 1 Тим. 4:15, 16). «Ҝөзәтчи Гүлләси» вә «Ојанын!» журналларында ҹидди хәстәликләри олан һәмиманлыларымыз барәдә вахташыры мәгаләләр чап олунур. Бурада онларын өз проблемләри илә неҹә мүбаризә апардыглары һагда бәһс едилир вә ҝөстәрилир ки, онлар Јеһова вә Онун ҝөзәл вәдләри барәдә инсанлара данышанда мүвәггәти олараг өз проблемләрини унудурларa.
10. Нәјә ҝөрә мүалиҹә үсулунун сечими аз әһәмијјәтли мәсәлә дејил?
10 Мүалиҹә үсулларыны сечмәк мәсәләсиндә һәр бир мәсиһчи ‘өз мәсулијјәтинин јүкүнү дашымалыдыр’ (Галат. 6:5). Анҹаг сечимимизин Јеһова үчүн әһәмијјәтсиз олмадығыны јадда сахламалыјыг. Мүгәддәс Китаб принсипләринә һөрмәт етмәјимиз бизи ‘гандан чәкинмәјә’ тәшвиг етдији кими, бизә руһани зәрәр верә биләҹәк вә ја Јеһова илә мүнасибәтимизә тәсир едә биләҹәк мүалиҹә үсулларындан гачынмаға да тәшвиг етмәлидир (Һәв. иш. 15:20). Бәзи диагностика вә мүалиҹә үсуллары спиритизмлә бағлы ишләрә охшајыр. Јеһова спиритизмә әл атан дөнүк исраиллиләри мүһакимә едирди: «Мәнә артыг батил тәгдимләр ҝәтирмәјин, бухур Мәндә икраһ јарадыр. Писликлә [«сеһрли гүввә илә», ЈД] долу тәзә ај мәрасимләринизә, шәнбә ҝүнләринизә, мүгәддәс топлантыларыныза дөзә билмирәм!» (Јешаја 1:13). Хәстәлик вахты дуаларымыза мане олаҹаг вә Аллаһла мүнасибәтләримизә тәһлүкә јарадаҹаг ишләр ҝөрмәк мүдриклик олмазды (Мәрс. 3:44).
Сағлам дүшүнҹәли олмағын ваҹиблији
11, 12. Мүалиҹә үсулу сечиминдә ‘сағлам дүшүнҹә’ һансы ролу ојнајыр?
11 Хәстәләнәндә Јеһованын бизә мөҹүзәли шәкилдә шәфа верәҹәјини ҝөзләмәсәк дә, мүалиҹә үсулу сечиминдә Ондан мүдриклик диләјә биләрик. Сечим едәркән Мүгәддәс Китаб принсипләрини рәһбәр тутмалы вә сағлам дүшүнҹәли олмалыјыг. Вәзијјәт ҹидди оланда имкан дахилиндә бир нечә һәкимлә мәсләһәтләшмәк пис олмазды. Бу, Сүлејманын мәсәлләри 15:22 ајәсиндәки сөзләрә ујғундур: «Мәсләһәтсиз нијјәт боша чыхар, доғру нәсиһәт верән чохдурса, уғур газандырар». Һәвари Павел һәмиманлыларыны ‘бу дүнјада тәмкинли [«сағлам дүшүнҹәли», ЈД], салеһ вә Аллаһ јолуна ујғун бир өмүр сүрмәјә’ тәшвиг едирди (Тит. 2:12).
12 Бу ҝүн бир чохларынын вәзијјәти Исанын ҝүнләриндә јашајан бир хәстә гадынын вәзијјәтинә бәнзәјир. Марк 5:25, 26 ајәләриндә охујуруг: «Он ики илдән бәри ајбашы ганахмасы кәсилмәмиш бир гадын вар иди. Бир чох һәкимләр әлиндән хејли әзијјәт чәкмишди, бүтүн варыны сәрф едиб һеч бир фајда ҝөрмәмиш, әксинә вәзијјәти даһа да писләшмишди». Иса ону сағалтды вә онунла шәфгәтлә давранды (Марк 5:27-34). Үмидсизлијә гапылан бәзи мәсиһчиләрдә тәмиз ибадәтин принсипләринә зидд олан диагностика вә ја мүалиҹә үсулуну сечмәк мејли јаранмышды.
13, 14. а) Нөгсансызлығымызы сындырмаг үчүн Шејтан бизим мүалиҹә сечимимиздән неҹә истифадә едә биләр? б) Спиритизмлә аз да олса бағлы олан һәр шејдән нә үчүн узаг дурмалыјыг?
13 Шејтан бизи һәгиги ибадәтдән узаглашдырмаг үчүн һәр шејә әл атаҹаг. О, бәзиләрини бүдрәтмәк үчүн ҹинси әхлагсызлыгдан вә вар-дөвләтә һәрисликдән истифадә етдији кими, диҝәрләринин дә нөгсансызлығыны сындырмаг үчүн сеһрли гүввәләрлә вә спиритизмлә әлагәси олан шүбһәли мүалиҹә үсулларына әл атыр. Јеһоваја дуа едирик ки, бизи «шејтандан» вә «һәр ҹүр һагсызлыгдан» гуртарсын. Буна ҝөрә дә, өзүмүзү спиритизм вә маҝија илә бағлы олан шејләрин тәсиринә мәруз гојмагла Шејтанын торуна дүшмәмәлијик (Мат. 6:13, һашијә; Тит. 2:14).
14 Јеһова исраиллиләрә ҹадуҝәрлик вә фалчылыгла мәшғул олмағы гадаған етмишди (Ганун. т. 18:10-12). Павел ‘сеһрбазлығы’ «ҹисмани тәбиәтин әмәлләри» илә бир сыраја гојмушду (Галат. 5:19, 20). Үстәлик, Јеһованын вәд етдији јени дүнјада «сеһрбазларын» јери јохдур (Вәһј 21:8). Тамамилә ајдындыр ки, спиритизмә аидијјәти олан һәр бир шеј Јеһовада икраһ доғурур.
«Гој сизин мүлајимлијиниз [бәсирәтиниз]... мәлум олсун»
15, 16. Мүалиҹә үсулу сечиминдә нә үчүн һикмәт тәләб олунур вә биринҹи әсрин рәһбәрлик шурасы һансы мүдрик мәсләһәти вермишди?
15 Әҝәр һансыса диагностика вә ја мүалиҹә үсулу биздә шүбһә ојадырса, јухарыда дејиләнләри нәзәрә алыб, ондан имтина етмәјимиз мүдриклик оларды. Әлбәттә, мүәјјән бир мүалиҹә үсулуну изаһ едә билмириксә, бу онун спиритизмлә бағлы олдуғуна ишарә етмир. Сағламлыға даир Мүгәддәс Китаб нөгтеји-нәзәринә риајәт етмәјимиз үчүн Аллаһын Кәламына әсасланан һикмәт вә сағлам дүшүнҹәлилик тәләб олунур. «Сүлејманын мәсәлләри» китабынын 3-ҹү фәслиндә нөвбәти нәсиһәти охујуруг: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр... Сағлам шүура, дәрракәјә бағлан... Онлар сәнин һәјатын олар» (Сүл. мәс. 3:5, 6, 21, 22).
16 Мүмкүн гәдәр сағлам галмаға чалышанда диггәтли олмалыјыг ки, хәстәликләрлә мүбаризә апараркән вә ја гоҹалма просесини ләнҝитмәјә чалышаркән Аллаһын лүтфүндән мәһрум олмајаг. Башга саһәләрдә олдуғу кими, сағламлыгла бағлы мәсәләләрдә дә Мүгәддәс Китаб принсипләринә риајәт едәрәк ‘мүлајимлијимиз [бәсирәтимиз] бүтүн инсанлара мәлум олмалыдыр’ (Филип. 4:5). Биринҹи әсрдә рәһбәрлик шурасы мәсиһчиләрә үнванладығы ваҹиб бир мәктубда онлара бүтпәрәстликдән, гандан вә ҹинси әхлагсызлыгдан чәкинмәји бујурмушду. Һәмин мәктубда белә бир әминлик дә ифадә олунмушду: «Бунлардан гачынсаныз, јахшы иш ҝөрәрсиниз» (Һәв. иш. 15:28, 29). Һансы мәнада?
Гаршыда мүкәммәл сағламлыг
17. Мүгәддәс Китаб принсипләринә риајәт етмәјимизин һансы фајдалары вар?
17 Һәр биримиз өзүмүздән сорушмалыјыг: «Мүгәддәс Китабын гана вә ҹинси әхлагсызлыға даир принсипләринә ҹидди риајәт етмәјимин мәнә нә гәдәр јахшы тәсир ҝөстәрдијини анлајыраммы?» ‘Өзүмүзү һәр бир бәдән вә руһ мурдарлығындан тәмизләмәјә’ чалышмағымызын ҝәтирдији фајдалары да фикирләш (2 Кор. 7:1). Мүгәддәс Китабын шәхси ҝиҝијенаја даир нормаларына риајәт етдикдә өзүмүзү бир чох физики хәстәликләрдән горујуруг. Бәдәни чиркләндирән вә Аллаһла мүнасибәти позан түтүндән вә наркотикләрдән истифадә етмәдијимиз үчүн чичәкләнирик. Јејиб-ичмәкдә һәддимизи билмәјимизин сәһһәтимизә ҝәтирдији фајдалар үзәриндә дә дүшүн. (Сүлејманын мәсәлләри 23:20; Титуса 2:2, 3 ајәләрини оху.) Истираһәт вә идман етмәјимизин сајәсиндә өзүмүзү јахшы һисс етсәк дә, физики вә руһани ҹәһәтдән чичәкләнмәјимиздә Мүгәддәс Јазыларын рәһбәрлијинә риајәт етдијимизин ролу даһа бөјүкдүр.
18. Әсасән нәјин гејдинә галмалыјыг вә сағламлыға даир һансы пејғәмбәрлијин јеринә јетмәсини сәбирсизликлә ҝөзләјирик?
18 Ән ваҹиби исә, руһани сағламлығымызын гејдинә галмалы вә сәмави Атамызла дәјәрли мүнасибәтләримизи мөһкәмләндирмәлијик. О, «индики вә ҝәләҹәк һәјат»ын, јәни вәд етдији јени дүнјадакы һәјатын Мәнбәјидир (1 Тим. 4:8; Мәз. 36:9). Ҝүнаһларымыз Исанын фидијә гурбанлығы әсасында бағышланаҹағы үчүн, Ҹәннәтдә һәм руһани, һәм дә физики ҹәһәтдән там сағлам олаҹағыг. Аллаһын Гузусу олан Иса Мәсиһ бизи «һәјат суларынын гајнагларына апараҹаг» вә Аллаһ ҝөзләримиздән һәр јашы силәҹәкдир (Вәһј 7:14-17; 22:1, 2). Нәһајәт, бу һејранедиҹи пејғәмбәрлијин јеринә јетдијини ҝөрәҹәјик: ‘Һеч бир сакин “хәстәјәм” демәјәҹәк’ (Јешаја 33:24).
19. Аллаһын ајдын принсипләринә әсасән сағламлығымызын гејдинә галырыгса, нәјә әмин ола биләрик?
19 Биз хиласымызын јахын олдуғуна әминик вә Јеһованын бәшәријјәти хәстәликләрдән вә өлүмдән гуртараҹағы вахты сәбирсизликлә ҝөзләјирик. Мүгәддәс Китаб бизи әмин едир ки, севән Атамыз ағры-аҹылара таб ҝәтирмәјимизә көмәк едәҹәк, чүнки О ‘гајғымыза галыр’ (1 Пет. 5:7). Беләликлә, ҝәлин сағламлығымызын гејдинә галаг, амма буну һәмишә Аллаһын Кәламынын ајдын рәһбәрлијинә ујғун едәк!
[Һашијә]
a Белә мәгаләләрдән бәзиләри «Ҝөзәтчи Гүлләси»нин 2003-ҹү ил 1 нојабр сајынын 29-ҹу сәһифәсиндәки чәрчивәдә садаланыр.
Тәкрар үчүн суаллар
• Инсанларын хәстәләнмәсинин сәбәбкары кимдир вә бизи ҝүнаһын пәнҹәсиндән ким азад едәҹәк?
• Сағламлығымыз һагда дүшүнмәјимиз тәбии олса да, нәјә јол вермәмәлијик?
• Нәјә ҝөрә мүалиҹә үсулу сечимимиз Јеһова үчүн әһәмијјәтсиз дејил?
• Сағламлыға даир Мүгәддәс Китаб принсипләринә риајәт етмәјимиз бизә һансы фајданы ҝәтирир?
[23-ҹү сәһифәдәки шәкил]
Инсан хәстәләнмәк вә гоҹалмаг үчүн јарадылмамышды
[25-ҹи сәһифәдәки шәкил]
Хәстәликләрә бахмајараг, Јеһованын халгы хидмәтдән севинҹ дујур