ТӘЛАТҮМЛҮ ДҮНЈАДА

4 | Үмидинизи итирмәјин

НӘ ҮЧҮН ВАҸИБДИР?

Дүнјада баш верәнләрә ҝөрә нараһатлыг инсанларын сағламлығына, емосионал вәзијјәтинә ҹидди зәрбә вура биләр. Бу һадисәләрдән зәрәр чәкән инсанларын чоху ҝәләҹәјә олан үмидини итирир. Бу нәјә ҝәтириб чыхарыр?

Бәзиләри ҝәләҹәк барәдә дүшүнмәк белә истәмир.
Бир башгалары нараһатлыгдан јаха гуртармаг үчүн спиртли ичкиләрә, наркотикә гуршаныр.
Кимләрсә фикирләшир ки, белә јашамагданса, өлмәк јахшыдыр. Буна ҝөрә дә интиһар барәдә дүшүнүрләр.

Нәји билмәлисиниз?

Бәлкә дә, үзләшдијиниз бәзи проблемләр мүвәггәтидир вә ҝөзләнилмәдән јолуна дүшәҹәк.
Һәтта вәзијјәт дәјишмирсә дә, буна таб ҝәтирмәк үчүн мүәјјән аддымлар ата биләрсиниз.
Мүгәддәс Китаб инсана үмид верир. Орада јазылыб ки, Аллаһ бәшәријјәтин проблемләрини бирдәфәлик һәлл едәҹәк.

Нә едә биләрсиниз?

Мүгәддәс Китабда дејилир: «Һеч вахт сабаһкы ҝүн үчүн нараһат олмајын, чүнки сабаһкы ҝүн өзү илә јени гајғылар ҝәтирәҹәк. Һәр ҝүнүн дәрди өзүнә бәсдир» (Мәтта 6:34).

Бу ҝүнлә јашајын. Гојмајын ки, сабаһкы ҝүнүн дәрди сизи бу ҝүнүн ишини ҝөрмәкдән сахласын.

Сабаһын дәрдини чох чәксәниз, ҝәрҝинлијиниз артаҹаг, ҝәләҹәјә никбин баха билмәјәҹәксиниз.

ХОШ ҜҮЗӘРАН МҮМКҮНДҮР? Мәсләһәтләр

НИКБИН ОЛУН

Мүгәддәс Китабда дејилир: «Мәзлумун һәр ҝүнү гарадыр, амма көнлү шад олан үчүн һәмишә бајрамдыр» (Мәсәлләр 15:15). Бәдбинлик инсана ҝөз өнүндә олан чыхыш јолуну ҝөрмәјә мане олур. Никбинлик исә проблеми һәлл етмәк үчүн чыхыш јолу ахтарыб тапмаға көмәк едир.

Хәбәрләрә аз бахын, чалышын хәбәрләрлә чох марагланмајасыныз.
Һәр ахшам үрәкачан ики-үч шеји јада салыб шүкүр един.
Ишләринизин сијаһысыны тутун, сијаһыја јалныз бу ҝүнүн ишләрини дахил един. Бөјүк ишләри һиссә-һиссә един ки, ҝүнүн ахырында әмәјинизин бәһрәсини ҝөрәсиниз.

КӨМӘК ИСТӘЈИН

Мүгәддәс Китабда дејилир: «Тәнһалыға гапылан... һәр ҹүр һикмәти рәдд едир» (Мәсәлләр 18:1). Учурумдан өз ҝүҹүнүзә чыха билмәзсиниз, амма сизә узадылан көмәк әлиндән јапышсаныз, бу мүмкүндүр.

Доғмаларыныздан, достларыныздан көмәк истәјин.
Һәмчинин өзүнүз дә чалышын ки, онлара көмәк едәсиниз. Инсан башгаларына јахшылыг едәндә өз проблемләринә алудә олмур.
Әҝәр үмидиниз үзүлүбсә, үрәјиниздә һәјат ешги сөнүбсә, һәкимә мүраҹиәт етмәк барәдә дүшүнүн. Бәзән бу ҹүр вәзијјәт сәһһәтдәки проблемин, мәсәлән, депрессијанын әламәти олур. Чохларына мүалиҹә бу вәзијјәтдән чыхмаға көмәк едибa.

a «Ојанын!» журналы конкрет бир мүалиҹә үсулу төвсијә етмир.

Мүгәддәс Китаб инсана үмид верир

Гәдимдә бир мөмин инсан Аллаһа дуа едәркән демишди: «Сөзүн аддымларыма чыраг, јолларыма ишыгдыр» (Зәбур 119:105). Ҝәлин ҝөрәк Аллаһын Кәламы һансы мәнада чыраг вә ишыгдыр.

Гаранлыг ҝеҹәдә чыраг бизә көмәк едир ки, аддымларымызы һара атдығымызы ҝөрәк. Ејнилә,Мүгәддәс Китабдакы һикмәтли мәсләһәтләр дә чәтин мәсәләләрдә дүзҝүн гәрар вермәјә бизә көмәк едир.

Ишыг бизим јолумузу ајдынлашдырыр. Беләҹә, гаршыда нә олдуғуну ҝөрүрүк. Буна бәнзәр тәрздә Мүгәддәс Китаб бизим ҝәләҹәјә олан бахышымызы ајдынлашдыра биләр.

Мүгәддәс Китабда тәкҹә бәшәр тарихинин башланғыҹындан јох, ҝәләҹәјә олан үмиддән дә бәһс едилир. Орада нөвбәти мәгамлара ајдынлыг ҝәтирилир.

1

Әзабларын башланғыҹы һарадандыр? Мүгәддәс Китабда дејилир ки, «ҝүнаһ бир адам васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди, чүнки һамы ҝүнаһ ишләјиб» (Ромалылара 5:12).

2

Нәјә ҝөрә инсанлар проблемләр гаршысында аҹиздир? Мүгәддәс Китабда дејилир ки, «аддымларыны јөнәлтмәк инсанын ихтијарында дејил» (Әрәмја 10:23). Дүнјада баш верәнләр буну бир даһа сүбут едир.

3

Аллаһ вәзијјәти јолуна гојмаг үчүн нә едәҹәк? Мүгәддәс Китабда дејилир ки, «О, онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди» (Вәһј 21:4).